.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الأحد، 29 يونيو، 2008

الست مصريه............طالعه ع اسكندريه

ازيكو ياااا .............يا رجاله ولا تزعلو
معلش يا بلوجريه انا بعتذرلكوا هغيب عنكو 10 ايام....اصلى مسافره
لا بقولكوا ايه متمسكوش ف ديلى كده .........هو انا كنت خلفتكوا ونسيتكوا

(يا لهوى ايه ده ......ايه وش العشوائيات اللى طلع فجأه ده ..........اعمل ايه دلوقتى .......ارجعى يا بت عن اللغه دى لاتتفضحى )

احم احم........سورى يا جماعه انا اقصد ان انا مش ال(مامى) بتاعتكوا
عشان تتمسكوا بيا قوى كده
لازم يكون عندكو(بيرسوناليتى)...........برافو عليكو شخصيه مستقله يعنى

لا لا يا جماعه انا مش هقدر اكمل البوست كده دانا كده يجيلى المراره........
يا سبحان الله الجو بقى كله ( نشا )

انا هكلمكوا بتشبعتشى بقى ................
اصلى مسافره اسكندريه هصيف .........عقبال عندكوا يا حبايب....عقبالك يا ام احمد
عقبال ماتجوزى احمد (لو لو لو لو لىىىىىى)

انا عارفه ان انتو بتروحوا (شرم _ والغردقه_وابصر ايه دا اللى اسمه الساحل الشمالى )
كل برغوت على قد دمه ياخويا..........بلاش قنعره منك له
وبعدين هى اسكندريه وحشه ...........دى بلد الكابوريه والجمبرى والسمك الطازه
والله وحشتنى ريحه الزفاره هىء هىء هىء

هبقى اجيبلك معايا يا ام احمد .............خلاص يا وليه بلاش زن قولنا هجيبلك

كنا بنقول ايه اه اسكندريه دى بلد (الايوه )....وال....(ايوه) برضو
ايه فيه ايه اه (ايوه).........وفيه كلام تانى منقدروش نقولوه على رأى (سكيننه)

انا قولت اقولوكوا عشان ما تتوغوشوش عليا .........ولو حد سأل عليا قولوله الست مصريه
طلعت على اسكندريه ............وقولوا لام احمد تبطل سرييخ
هجيبلها اللى هى عايزاه_والله لا اجيبلها كابوريا معفنه _عشان ام احمد دى مجننانى ومش عايزه اغلط بقى

ياللا العواف عليكو
تتمسو بالخير

الاثنين، 23 يونيو، 2008

اه يا بلد.........عايزه ولد

ازيكوا يا عيااال.............
ايه متضايقين ليه ..........خلاص خلاص ماتزعلوش ....ازيكو يا رجاله
ولونى حاسه انهم خلصو...............يعنى مش خلصوا قوى ..لا..بس معدش موجود منهم كتيير
يعنى على 2010 كده هيكونوا انقرضوا
فيه ايه ..........زعلانين تانى ليه ...لسه فيه امل لغايه 2010 ..قدامكم سنتين بحالهم واحنا لسه فأول 2008
يعنى سنتين ونص........

طيب خلاص انا هحكيلكوا موقف وانتوا اللى تحكموا اذا كانت البلد عايزه ولد ولا لأ
(شكلنا هنلجأ للاستيراد م الخارج)
بغض النظر عن نسبه العنوسه العاليه وان البنات بقت اكتر م الولاد والكلام اللى لا يودى ولا يجيب ده
المشكله مش ف النسبه ..كام لكام..المشكله ان الولاد اساسا مش لاقيين شغل ...هيتجوزوا ازاى
المهم دا مش موضوعنا

احكيلكم بقى عالموقف اللى حصللى ...واثبتلى ..ان فعلا (البلد عايزه ولد)
امبارح كنت قاعده ف البيت بمارس هوايتى اللى انتو عارفينها _ايوه شاطرين بالضبط هيه دى _
(الطبيخ - غسيل الموعين - تنضيف البيت)
منا خلاص بوست ايدى وش وضهر ...بعد خروجه النيل وحرمت اخرج تانى
وحمدت ربنا عالهوايه الجميله دى ..مالها (شاديه) ماله فيلم (المقهورون ف الارض ).........اهو احسن من خروجه النيل المنيله دى

المهم سمعت جرس التليفون (تررم- تررم)
انا (بكل معانى القرف والزهق) :مين الرزل اللى بيتصل عالصبح دا
عادى يا جماعه مهى لسه الهوايه مأثره برضه .........اصلها متتنسيش بسهوله يعنى
ورفعت السماعه بعصبيه ونرفزه وردييت

انا (بغلاسه) :الو ميين
صاحبتى الانتيخ (بروقان بال) :ازيك يا اوجى
انا (اتعدلت ف الكلام طبعا) :اهلا ازيك يا قمر عامله ايه
صاحبتى (من غيير ما تدينى اى فرصه) :اوجى بليز عايزه اشترى هدوم ممكن تيجى معايا عباس العقاد
انا (ف عقل بالى ) :اللهم اخزيك يا شيطان ....منا خلاص كنت رضيت بالواقع وحرمت اخرج تانى
ايه يا اوجى ......بتشاورى عقلك ولا ايه .......شكلك كده هتتمردى عالهوايه ......يا بت مين خرج من داره اتقل مقداره
ولا انتى نسيتى......لا منسيتش بس انا زهقت وعايزه اخرج.

المهم اتحججت ان دى صاحبتى ومقدرش ارفضلها طلب .......مع العلم انها لو كانت طلبت طلب مش على مزاجى
عمرى ما كنت هنفزه

نزلت معاها وركبنا الميكروباص اللى كان كومبليت بالرجاله وكلهم قاعدين وانا وصاحبتى بس اللى واقفيين
فضلنا واقفين شويه يمكن حد فيهم يبقى عندوا شويه م الاحمر ويحس ويتنازل عن مقعد الرئاسه للبنات
مكسورين الجناح (اللى هم احنا يعنى )
برضه مفيش فايده اضطرييت ابص لكل واحد ف وشه يمكن حد فيهم يتكسف ويقوملنا

بصييت للاولانى :عمل نفسه نايم
بصييت للتانى :قعد يبص لسقف اليكروباص ..(الظاهر الدنيا كانت بتمطر ولا ايه مش عارفه)
بصييت للتالت:بسرعه قام مدور وشه وعمل انه بيكلم اللى جنبه وهو بيقول (الاستى خدت سيدى وراحوا الجونينه)
هههههههههههه اهو اى كلام المهم يعمل نفسه مش شايفنى

قولت لنفسى (مبدهاش بقى يابت يا مصريه )
مالقيتش قدامى غير انى اتكلم مع صاحبتى بصوت عالى يسمع كل اللى قاعدين .....وقولتلها
(تصدقى معدش فيه رجاله ف البلد.....اه والله.....بدليل الواقفه السوده اللى احنا واقفينها دى ......بزمتك يا شيخه
من ساعه ما ركبنا المخروب ده حد من اللى قاعدين دول فكر يقوملنا )
قعدت اتكلم اتكلم ..ان حد يعبرنا ..لكن لا حياه لمن تنادى ........لدرجه انى شكيت فعلا اننا نكون غلطنا ف الميكروباص
وركبنا ميكروباص مخصص للصم والبكم ههههههههههههههه

فيييين وفييين واحد قاملى .......
قولت لنفسى..( خليكى زوق بقى يا مصريه ...هو صحيح الراجل قام بعد ميت سنه ..بس يمكن كان مستنى الترجمه لكلامى ولا حاجه )
الراجل:تعالى اتفضلى اقعدى
انا ( بزوق مصطنع): لا والله خللى حضرتك مستريح
الراجل:لا شكرا اصلى نازل هنا
ساعتها كنت عايزه اخنقوا .......يعنى لولا انك نازل مكنتش قومتلنا

المهم نزلنا لفينا ف المحلات ........وانا ربنا رازقنى بصاحبه متشتريش حاجه بسهوله ..لازم تقيس كل اللى ف المحل
وميعجبهاش حاجه.......تروح محل تانى وتقيس كل اللى فيه وبرضه ميعجبهاش حاجه..(ودوخينى يا لمونه)
وهى بتقيس ف البروفه... انا بقى وقفت امارس هوايتى _(لا مش غسيل الموعين انا دلوقتى ف الشارع ....ركزوا)_
هوايتى انى اتفرج عالهدوم المتعلقه ف المحل
وايدى وقعت على بدى تحفه يا بنات
(لونه بمبه _ومترز بالترتر على شكل قلب_وفيه قلوب صغيره فوشيا)
قررت اشتريه لانه عاجبنى جدا

ف الاخر واحنا ماشيين وخلاص بحاسب عليه ........سمعنى (الكاشير) وانا بقول لصاحبتى
(هو صحيح نص كم ..بس انا ممكن البس تحتيه بدى ابيض بكم)
بمجرد ما قولت الكلمه دى ........لقيت (الكاشير) فطس على روحه م الضحك
ف الاول افتكرته عنده ربع ضارب او تاتش هطل..........بس لما عرفت بيضحك على ايه لقيت (الهطل) عندى انا

بصيتله (بكل فشخره وقنعره ) وقولت : بتضحك على ايه حضرتك
رد عليا (وهو بيحاول يمسك نفسه م الضحك) : مفيش يا فندم....... بس هو حضرتك هتشترى البدى دا ليكى ؟
قولت لنفسى (ايه ده ....ماله ده ....هو انا شكلى شحاته ولا ايه.........مينفعش البس حاجه نضيفه يعنى )
رديت ( بكل ثقه) :اه ليا طبعا ...ايه المشكله ؟
رد عليا (وهو مش قادر يوقف ضحك) : اصل البدى دا رجاالى
انا (مع حول ف العينين) :يا سنه سوخه........(صوتت بالبلدى بنت سلطح باشا)
بصييت لصاحبتى اللى كانت هتقع من الضحك وقولتلها
(الرجاله بقو يلبسوا بمبه وفوشيا بترتر .............مش قولتلك خلصوا )

شفتوا بقى ان البلد عايزه ولد.........
هههههههههههههه

الأربعاء، 18 يونيو، 2008

بنت مصريه اتشهرت يا رجااله...........يا mens


والله صبرتى ونولتى يا بت يا مصريه

باركولى يا عيال(البنت مصريه) طلعت ف (جريده الاسره العربيه)

مين يا ولاد: البت مصريه

بتقولوا ميين يا ولاد :البت مصريه

مين :البت مصريه

بصو بقى يا جماعه اى واحد عايز يعلقلى ميعلقليش بقى كده زى زمان ..لا..خلاص فيه نظام بقى دلوقتى

انا مش اقل م المشاهير دلوقتى ...انا طلعت ف الجرنال يا جماعه... خلاص عديت

لا يا خفيف انت وهو .........مش ف صفحه الحوادث

واحده مدونه هتطلع ف صفحه ايه (لكى يا سيدتى)...........اكيد صفحه (المدونين) طبعا

بصوا بقى ...كل واحد عايز يعلقلى يقوم بالخطوات الاتيه::

1-يقدم طلب

2-يطبع عليه ورقه دمغه ب 4 جنيه

3-يمضى عليه اتنين موظفين

لا لا خلاص انتو حبايبى مقدرش اعذبكوا كده لأ حرام .....خلاص يا جماعه هاتو الدمغه اللى ب2 جنيه

بلاش اللى ب4 جنيه..................ايه فيه ايه منا هونت عليكو اهه

يا جماعه عادى دا انا بخللى الناس اللى ف البيت يكلمونى بميعاد دلوقتى ................انتو احسن من اهلى يعنى

هههههههههههههههههههههه

معلش يا بلوجريه........... مانتو عارفينى ............غلابويه والغلاسه عندى غيه

شكر خاص:

رئيس تحرير الجريده:وحيد غازى

رئيس مجلس الاداره:محمود ياسر رمضان

الصحفيه المعده:اسر ياسر

ولكل زمايلى البلوجريه اللى بحبهم جدا جدا واللى شجعونى على التدوين

الف الف شكر ليكو

السبت، 14 يونيو، 2008

ف يوميين ..........عزيت.........وباركت للعروسين

معلش يا جماعه اتأخرت عليكو شويه.............اصل كان عندى (فصام ف الشخصيه) لمده يومين
مش مصدقينى ولا ايه ...........اكيد بتقولوا لنفسكو (هى جايه تطلع العقد اللى درستها علينا ولا ايه)...........
لا والله يا جماعه انا فعلا كان عندى (فصام ف الشخصيه).....هقولكوا ازاى
من حوالى اسبوع سمعت ان واحد قريبنا_انا بعتبره زى اخويا _سمعت انه عمل حادثه وتوفاه الله (ادعوله يا جماعه)
لسه شاب ف مقتبل العمر (الله يرحمه)
وكنت تانى يوم معزومه على فرح واحده بعتبرها اختى برضه ومقدرش مكنش معاها ف يوم زى دا
ف الحاله دى تقدروا تقولولى ممكن اعمل ايه
ازعل لموت شاب بعتبره اخويا..................... ولا افرح لفرح بنوته بعتبرها اختى
ملقيتش غير حل واحد ...................هو انى احاول اتماسك واحضر لتنين (العزاء) وتانى يوم (الفرح)
مهو مفيش حل تانى


وف يومين ..........لاقيتنى بقول كلمتين
واحد واتنين ............دول كانو يومين
حسيت ان عندى فصام.......او بالاصح شخصيتين
مش كدب ولا نفاق...........لأ دول غلاوتين
ساعتها جالى خبرين
اولهم حزين بيقول الشهادتين................وتانيهم ناس بتزف العروسين
اولهم غالى اهله بموته صابرين...............وتانيهم غاليه اهلها بفرحها مبسوطين
اه ه ه يا دنيا التايهين
تبقى على ناس فل وياسمين ..............وعلى تانيين نعى ومعزيين
ساعتها كان لازم اكون بشخصيتين............والا هخسر لتنين
ولو مخدتش دا حكمه................. هكون من الضاليين
فاضطريت ف يوميين .................اعزى وابارك للعروسين

الثلاثاء، 3 يونيو، 2008

رحله الى النيل.................حقا ما انيلها

ازيكو يا جماعه
من يومين كنت زهقانه قوى_ يعنى _ حاسه بالروتين قوى خصوصا انى مش بشتغل...وزوجى العزيز طبعا بيشتغل
ف مش طهقان ذيى...... كل يوم بيخرج .. يشوف ناس..يغير جو
وانا بقعد ف البيت امارس هوايتى ف (غسيل الموعين وتنضيف البيت والطبيخ)..........بصراحه هوايه مزعجه
وسبحان الله كل الهوايات الواحد بيبقى فرحان وهو بيعملها معادا الهوايه النحس دى ببقى حاسه قوى بالمقوله الشهيره
(مجبر اخاك لا بطل ).........وانا بقوم بممارسه الهوايه دى _هنمشيها هوايه عشان منتضربش_بسمع اغنيه واحده
لحبيبه قلبى(شاديه)....واللى مطلعها بيقول (والله يا زمن لا بأدينا زرعنا الشوك ولا روينا يا زمن)
........ايه فى ايه.........مهى دى الاغنيه الوحيده اللى تنفع عالوضع ده

المهم جه زوجى من الشغل حضرت الغداء مع ابتسامه مصطنعه وكأننى كنت بسمع اغنيه (الليله عييد)
مهو الراجل لسه داخل من الباب مينفعش اركب الوش الخشب دلوقتى ......لازم اكون حسيسه شويه

اتغدينا شربنا الشاى .........وانا لازلت مصره على الابتسامه الصفره
لاحظ زوجى ان هذه الابتسامه تخفى احتجاج عاوضع الراهن........وادرك شهريار الصبا........ايه ده
سورى يا جماعه انا دخلت على الف ليله وليله معلش
فبدأ زوجى باكلام ........ودار بيننا الحوار التالى


زوجى (وهو مندهشا) :شكلك مش مريحنى فيه ايه
انا (من غيير تردد رديت وانتهزت الفرصه اصلى استغلاليه والحياه فرص):تيجى نخرج
زوجى (ظهرت علامات الضيق على وجهه.....وعلامه اكس على جبينه..مصحوبه برفع احد الحاجبين:
مفيش خروج انا لسه جى من بره

وبعد مشاده كلاميه ...........ملقتش قدامى غير حل واحد متعارف عليه عند كل البنات.....وهو تمثيل دور الغلبانه
وبدى التأثر على وجهى ........وعملت فيها عيله وبصوت رقيق وناعم وكأننى مغلوبه على امرى قولت:
نفسى اخرج لو سمحت نخرج لو سمحت (ايوه بتمسكن لحد ما اتمكن عادى )
رد عليا زوجى وهو بيضحك:عايزه تروحى فين
انا قولت لنفسى يا بت اختارى حته هو بيحبها اهو منها تشمى هوا ومنها ميقولكيش الجمله المتعارف عليها ف كل خروجه الا وهى (يللا نروح بقى )
قولتله :نروح نتمشى عالنيل
قاللى : فكره حلوه انا كمان بحب التمشيه عالنيل
نزلنا وانا السعاده هتفط من عنيا مش عشان النيل ...لأ..عشان بقالى اسبوعين مخرجتش ..دا انا قربت اخلل يا جدعان
ومقولكوش عاللى شوفته عالنيل ..واو مصر كلها بقت حبيبه يا جدعان .......مفيش واحد واقف لوحده (عييب)
لازم كل واحد يبقى معاه واحده (مزه يعنى).......يا اما ماسكين ايدين بعض ...يا اما مسبلين لبعض ..يا اما بيأكلها الحمص ف بقها .........(اصلها مشلوله)..هههههههههه
فكرونى بأغنيه نانسى عجرم (كل الاحبه اتنين اتنين متجمعين عالنيل صايعين )
لا وانا وزوجى شكلنا صغير فمحدش عاقل يقول اننا متجوزين نهائى ..فـأكيد اى حد هيشوفنا هيفتكرنا تبع نانسى عجرم
المهم فضلنا ماشيين سمعنا صوت ف قفانا....دا المركبى بيدلل على حد يركب المركب وبيقولنا بصوت عالى
(تعالى يا باشا اركبوا المركب اللفه ف النيل ب2 جنيه يا بلاش )........انا بصيت لزوجى بنظره استغلاب للمره التانيه وانا بقول (لو سمحت نركب لو سمحت )..........رد عليا وقاللى (لا مش هنركب فاكره المره اللى فاتت)

اه مقولتلكوش اصل احنا ركبنا مركب مره قبل كده وكان الراجل مشغل اغنيه ل (عبده لاقرع)...محدش يسألنى مين ده
اهو حاجه كده زى ( بعرور) كده............وانا زوجى بيحب (عبد الحليم) فتخيلوا واحد بيحب (حليم ) قاعد ف حته مشغلين فيها (لاقرع)..............لا ويومها كمان كان فيه شويه بنات محجبين قاموا قلعوا الحجاب واتحزموا بيه وقعدوا يرقصوا _فشر دينا والله_ ومجموعه شباب مش تبعهم خالص قاموا يشجعو البنات ويرقصوا معاهم
(ربنا يكفينا شر الصيف وبلاويه واللى بيجرا فيه)

المهم بعد الموقف ده زوجى قرر ميركبش مراكب تانى

بس المراكبى برضه مش راضى يحل عن قفانا.........قام زوجى رد عليه وقاله(اصل المراكب دى يا حج بيبقى فيها شباب وبنات بيقعدوا يرقصوا ......وبيضيعوا استمتاعنا بمنظر النيل)......._اصل زوجى رومانسى حبتين_
رد عليه المراكبى (لاوالله يا باشا دول كلهم عائلات حتى شوف)..........بص زوجى عالمركب لقاه كله ناس متجوزين يعنى مفيهوش شباب ولا بنات صغيرين (مفيهوش مزز يعنى)
وانا بقى ظيت ف الظيته وقعدت ازن (لو سمحت نركب مهو مفيهوش شباب ولا بنات اهووكله عائلات بليييييييييييييييز)
رد زوجى وقاللى (حاضر اما نشوف اخرتها)
ركبنا المركب............ واول ما المركب قامت المركبى شغل اغنيه بيغنيها واحد تقريبا عامل عمليه شايل فيها
(زوره) قبل ما يعمل الشريط
وكانت الاغنيه عباره عن كلمه واحده بيكررها المطرب _ابو زور مش موجود ده _
الكلمه دى هى (خش عليه خش عليه)
بصلى زوجى بصه وكأنه يقول (انتى السبب ف اللى احنا فيه ده)...........وانا عامله نفسى عبيطه ومش واخده بالى
شويه ولقينا واحد المفروض انه (راجل) _ شكله الفيزيقى بيقول كده_ قام وقعد يرقص وسط الناس اللى قاعده ف المركب ....ومقولكوش بقى دا مش اى رقص .............دا على سنفونيه ( خش عليه)
وقعد هذا المدعو (راجل) يتحايل على الست اللى معاه تقوم ( تهز).ههههههههههههه يللا مهى زيطه
وهى مش راضيه ......وهو مصر انها تقوم ترقص.........وهى ابدا ........ويشد ف اديها .....وهى لا ممكن
الظاهر الاغنيه مكنتش عاجباها.............. او كانت عايزه ترقص على (بتهوفن)


زوجى قام باصصلى ووهو بيكز على سنانه وبيقوللى (عائلات هه)
واول ما خرجنا م المركب .......انا اللى قولت الكلمه المأثوره (ياللا نرووح)
رد عليا :(منا بقول كده برضه)


والحمد لله لقينا ميكروباص بيروح بيتنا ........حدفنا نفسنا فيه.........وفجأه........سمعنا صووت فرقعه
بببببببووووووووووممممممممممم
الناس اللى ف الاتوبيس اتخضت......فيه ايه فيه ايه...........نزل السواق يشوف فيه ايه
شويه وطلع يقوللنا :بصو يا جماعه الكاوتش اللى ورا فرقع ...فانا همشى بالراحه عشان المكروباص ميتقلبش
واللى مش عاجبه ينزل اه


جاتلينا كريزه ضحك انا وزوجى
وبصللى وقاللى :مش عايزه تخرجى استحملى بقى
انا اللى غايظنى ان محدش نزل م الميكروباص..........يا عينى زى مايكونوا مصدقوا يلاقوا ميكروباص يوصلهم حتى لو كان هيتقلب بيهم .........او يمكن مستخصرين الجنيه ونص(حق التذكره)
واحنا لقينا الناس منزلتش ..........استشهدنا وقعدنا يللا العمر واحد والرب واحد


(وادى اخره اللى ميسمعش كلمه جوزه يقولها)