.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الأربعاء، 30 أبريل 2008

عملتوا ايه ف شم النسيم؟........انا قضيته مع الشمامين

ازيكوا يا جماعه.........كل سنه وانتو طيبين بمناسبه شم النسيم
اتمنى تفهموا البوست ده ومتكنش الرنجه والفسيخ عمل عمايله ف مخكوا ههههههههههه........
واكيد طبعا لونتوا البيض واكلتوه مع الرنجه معأنى مش عارفه ايه علاقه البيض بالرنجه او حتى علاقه الاكل ده بشم النسيم انما عادى اهو كله تهييس
واتمنى كمان ان محدش فيكو يكون زار المستشفيات لأنها كانت على اشدها فى اليوم ده
اقولكوا انا بقى ازاى قضيت شم النسيم .........الله يجازيهم الف خير(امى وابويا وستى واخويا) ... عزموا عليا انا وزوجى العزيز بقضاء شم النسيم عندهم فى (مدينه الرحاب)...............وما ادراكوا ما هى (الرحاب) بجد اول ما تدخلها تحس انك مش فى مصر اساسا.......يعنى تحس انك فى (امريكا)( واشنطن) (نيو يورك) ههههههههه,
بس المشكله ان الناس هناك بيتصرفوا كأنهم امريكان فعلا.........يعنى مثلا تلاقى ناس كتير قوى جايبين كلاب ف بيتهم مش عارفه ليه يعنى يمكن هيدبحوه عالعيد ولا حاجه
(ليه يا عم الحاج جايب كلب) بكل الاطه يرد عليك ويقولك (حراسه)........ طيب ما الامن مالى الرحاب ...خلاص الكلب بتاعك هو اللى هيحمى حما الوطن .........دى مش حراسه وانت الصادق دى (نجاسه)
بس بغض النظر عن الكلاب وبعض الناس فهى مدينه عالميه بصراحه..........
المهم روحنا (الرحاب)..... وبعد اكله الرنجه المعتبره كل واحد فينا خادله لبانة (فلوريتس) يعنى عشان البرفان بتاع الرنجه ..........
وعلى المغرب قررت (انا وزوجى واخويا) اننا نروح السوق وفى (كوفى شوب) هناك انا بحب اروحه قوى اسمه(زلط)...................اول ما وصلنا (كوفى شوب زلط) لقيناهم مغيرين الكراسى ومجددين الديكورات
فالطبيعى انه يغير الاسعار_اى غبى يفهمها يعنى_واحد جدد الكوفى شوب بتاعه هيسيب الاسعار زى ما هى دا يبقى تخلف بصراحه.............
ورغم انهم غلوا الاسعار الا اننا ثبتنا على موقفنا وجازفنا وقعدنا ف (زلط)
انا بقى فيا عاده منيله شويه......... لما بقعد على اى كوفى شوب لازم افر بعنيا الترابيزات اللى حوليا يعنى .......مين قاعد عليها .....ولاد ولا بنات.......ولو بنات لابسين ايه ..كده يعنى خصوصا اللى ف (الرحاب ) اصلهم بيبقوا متشيكين عالاخر
المهم حسينا اننا جاعنين معان الرنجه بتعطش بس احنا جعنا فطلبنا اكل
لقيت الجارسون سايب زوجى واخويا وجاى يقوللى انا انا هه بيقوللى انا
الجارسون:اجيبلك شيشه يا مدام
الراجل شاف تعبير وشى من كلمته اتخض ولقيته قال بسرعه وهو بيضحك.........اسف معلش
استغربت قوى ليه سألنى السؤال ده ومسألش زوجى او اخويا ..........هو انا مش باين انى بنت ولا ايه...........
معقول يكون فاكرنى ولد
ولكن استغرابى ده راح بعد ما ابتديت امارس هوايتى فى فر الترابيزات


اول ترابيزه................
عليها راجل ومراته وابنهم عنده حوالى سبع سنين
الجارسون:تطلب ايه يا فندم
الراجل: انا هاخد ليمون فريش
المدام: وانا هاخد شيشه تفاح
الجارسون نزل الطلبات وقعد الراجل يشرب فى اليمون ومراته تشد فى الشيشه
انا بس صعب عليا الولد الصغير عمال يكلم امه وامه مش معاه خالص ومركزه ف الشيشه لأ والأدهى بتنفخ الدخان ف وشه.........وكمان مدياله (المبسم )يلعب بيه هههههههههههههه


تانى ترابيزه...................
واحد ومراته واربع عيال
ا لجارسون :تطلب ايه يا فندم
الصراحه دول محترمين شويه الراجل هو اللى اتكلم وقال طلبه وطلب مراته والعيال اصل صوت الستات عوره الراجل : انا والمدام هناخد اتنين شيشه تفاح والاولاد سندويتشات.......(ليه متطلبلهم هم كمان شيشه)
والمدام هنا كانت محجبه وعادى انها تشرب شيشه ........مهو جوزها اللى مشربها فيه ايه اكتر من كده بقى


تالت ترابيزه............
تلت ولاد وبنتين وبلا فخر كلهم طلبوا شيشه

انا والله مش فاهمه ازاى (ام) تسمح لنفسها انها تشيش قدام ولادها ..........دول لسه بيعرفوا المعايير للتصرفات ايه الصح وايه الغلط واكيد الكلام التالى بيدور ف دماغهم
(مامى بتشيش وبابى بيشيش ولاتنين بيشيشوا يبقى التشييش حاجه حلوه مش حاجه كخه)

وطبعا هيقلدوهم لما يكبروا ولكن مع التطور الحضارى الولاد مش هيشدوا شيشه هيشدوا حاجه تانيه

عرفتوا ازاى قضيت شم النسيم وسط الشمامين ههههههههههههههههههههه

السبت، 26 أبريل 2008

اغنيه (حلوه يا بلدى )المعدله لسنة..........................2008

لقمه حلوه ولقمتين.................غاليه يا بلدى
مش صف واحد دول صفين ..........عالعيش البلدى

املى دايما كان ..............يا بلدى
أخرج م الطابور ..........يا بلدى
واجيب العيش لولادى............عالطووول

واوا

وزكرايات كل اللى فات...........فاكره يا بلدى
بيتى كان مليان بالخيرات.............فاكره يا بلدى

اول قبض كان ............يا بلدى
مش ممكن انساه..............يا بلدى
فين ايام زمان...................قبل الخداااااع

كنا بنقول ان الفساد دا ................مستحييييل
وكل ثانيه وثانيتين كانت .............بتفوووووت
مليانه بأمل ان احنا نبقى ..............مستوريييين
سنه الفييين.................واضمن منيييين

واوا واوا

بلوزه قديمه وأيشاربين .................أرضى يا بنتى
بنتى عايزه كمان جيبتين................مقدرش يا بنتى

فين ابوكى الأن .............يا بنتى
سافر بعيد عنى .............يا بنتى
وغرق هو كمان .............مع الغرقانييين

قول يا حبيبى انت سايبنى ورايح ............فيييين
قاللى مهاجر يمكن اجييبلى...............قرشييين
كنت عايزاه يقعد ف بلدى ولو ..........يوميين
يا عينى عليه ................كان زنبه ايه

ليلى ليلى ليلى لي

اسمعى يا بلدى دول كلمتين...........كفرنا يا بلدى
هنلاحق بس منين ومنين..............طهئنا يا بلدى

كل ما اقولك...لا...يا بلدى
بحس انك كرهانى ..........يا بلدى
وتفضلى دايماضدى ..........عالطووول

واواواوااا.............قاسيه يا بلدى
عليا يا بلدى............واواواوااااا

الثلاثاء، 22 أبريل 2008

الحق لا عليا ولا عليك.........الحق ........عالبلكونه

ازيكو يا جماعه.....اتمنى تكونوا بخير.......فى البدايه احب اعتزر ليكو على انى هكسر قاعده الضحك المميزه ف مدونتى ......يعنى البوست ده هيبقى نكد شويه....بصراحه انا حاولت مكتبش فيه..بس للاسف معرفتش اتجاهل موضوع زى ده وانتو كمان لما هتقروه محدش فيكو هيقدر يتجاهل التعليق عليه.........
من كام يوم كده..فتحت التليفزيون على قناه (دريم)الفضائيه......لقيت برنامج (الحقيقه) شغال اللى بيقدمه المزيع والاعلامى الرائع (وائل النبراشى)....
ومن حديثه عرفت انه بيتكلم على الاضراب........
قولت لنفسى (ييييييييييييي هو احنا مش هنخلص من السيره دى بقى) ولسه هقلبلقيت الحوار التالى

وائل: احكيلنا بقى يا حج ايه اللى حصل بالتفصيل
والد الضحيه:انا ساكن فى المحله فى بيت ف الدور التالت وف يوم 6 ابريل وبالتحديد ف نفس معاد الاضراب
كنا كلنا ف البيت ابنى محمد ف الاعداديه كان نايم عالسرير واخته كانت ف المطبخ بتعمل شاى
لقينا زعيق ف الشارع جامد قوى كانا اتفزعنا رحنا نبص م البلكونه نشوف ايه الحكايه ....
لقينا المتظاهرين بيجروا والامن بيجرى وراهم وسمعنا صوت بيقول (اضرب).......
مافيش ثانيه ولقيت ابنى اللى واقف جمبى ف البلكونه بيصرخ ويقول اه ه ه ه وقام واقع عالارض ميت

وانتابت الاب حاله من الهستيريا وفضل يكرر ويقول (ابنى ابنى ابنى ابنى ) ......وبعد ان قام وائل النبراشى بتهدئته
استكمل حديثه
والد الضحيه: اخدناه انا وجارى الى مستشفى قريبه وكان لازال حيا ولكن مدير المستشفى قال (لا احنا مش هنقدر ناخده وديه المستشفى الغلانيه ف الحته الفلانيه) ولما وصلنا المستشفى التانيه كان توفى

وائل النبراشى :معانا تليفون الو اللواء السابق للامن(على ما اعتقد) احب اعرف رأى حضرتك ايه فى الواقعه دى اللى
سقط فيها الشهيد محمد
اللواء على الهاتف: اولا مش عايزين نسرف ف كلمه شهيد دى هو مش شهيد ولا حاجه
خال الشهيد(يرد فى غضب): واحد مقفول عليه بيته واتقتل غدر ميبقاش شهيد؟
اللواء على الهاتف:وهو بيدخل البلكونه ليه ..........انا ف عقل بالى (وحياه امك)
والد الشهيد فى ثوره:منعرفش انكو هتضربوا انت ابنك نام ف حضنك لكن انا ابنى مات
اللواء على الهاتف :الامن ده بيحمى مصر ..............(ياريت هنا بقى كان يحدد معنى مصر مهى مصر هى ولادها على ما اعتقد
وائل النبراشى:بنظره انسانيه يا سياده اللواء لو بعد الشر الطفل اللى مات ده كان ابنك كنت هتقول ايه
اللواء على الهاتف بكل المعانى الغليظه وقله الرحمه :ما ف داهيه المهم مصر........هنا بقى كنت عايزه اكسر التلفزيون
(بدا على وجه وائل علامات الضيق من اللفظ وكان واضح انه اصبح نادما على السماح بمداخله هزا اللواء)
اللواء على الهاتف : اصل الامن لما بيضرب بيضرب عشوائى مش بيبص بيضرب على ايه........(يا سنه سوخه عشوائى وانا اقول بتوع الامن المركزى بيختاروهم اغبيه ليه)
الواء فى الاستوديو:عشوائى ده يبقى ف الارض يا سياده اللواء مش ف البلكونات وحتى المفروض انه مايصبش حد من المتظاهرين
اللواء على الهاتف:مصر فوق كل الرؤوس يا سياده اللواء

هزا ما اتزكره من الحلقه واعتقد انه يكفى لكثير من الاسئله
هل اصبحنا مهانين الى هزا الحد؟
هل اصبحت كلمه العزاء خساره فينا؟من السبب فى كل زلك؟
من كلام اللواء على الهاتف استشفيت ان السبب الوحيد هو.....................البلكونه


للفقيد الرحمه وللاسره خالص العزاء

الجمعة، 18 أبريل 2008

اغنيه بلاد طيبه المعدله لسنه...................2008

دانتى بلاد طيبه.........وقويه وغريبه
دا انتى الم وهوان

وقت الغلا ضدى .........بتدوسى على خدى
حضنك شوك وسهام

بيكى انا اتشليييت...............وفضلت على حالى
يا ادفع ايجار البيت...............يا أكل عيالى
بيكى انا اتشليييي ييييييييييت...........وفضلت على حالى
يادفع ايجار البيييييييييت................يا أكل عيالىىىىىىىىىىىىىىى

يا أكل عياااااااااااااااااااالى

لانسيت ولابنسى..................مرتبى خمسه
ومتين .......................يا دوب بالتمام

لاعمره لا هيكتر...............وهفتقر اكتر
واقدر اموت بسلام

بيكى انا اتزلييييت................واتهنت بلا داعى
وازا كنت مره جنييت............فانت السبب والداعى
ليكى انا اتهديييييي يييييييت.............وبقيت كالفاعى
وازا كنت مره جنيييييييت.................فانت السبب والداعىىىىىىىىىى ىىىىى

انت السبب والداااااااااعى

الاثنين، 14 أبريل 2008

موجز الانباء لسنه..........2090

المزيعه:هاى شله .........ازيكو انهارده .....كيويسين ههههههههههه ........ايه رأيكوا بقى ف النيولوك بتاعى جامد قوى مش كده........ولا فستانى اكيد عنيكوا هتطلع عليه
المخرج (بصوت ناعم ورقيق): يلا بقى يا سونيا بقى ابدأى الموجز بقى الللللله
المزيعه:ماشى ماشى يا سوسو .......بقولكوا ايه بعد الموجز هبقى اقولكوا على اسم مصمم الازياء بتاعى ...........يلا يا سوسو نبتدى
موجز الانباء لسنه..........2090
الاخبار السياسيه:
-اكد وزير الاقتصاد السيد (عاطف يوسف بطرس غالى )ان اعدام الفقراء هو الحل الامثل لخروجنا من عنق الزجاجه
-موافقه مجلس الشعب دون تردد على خصخصه ابو الهول .والاحتفاظ بالهرامات لحين ان يأتى من يملك السعر المناسب لها
- الولايات المتحده تخصص 25 مليون دولار لمن يساعد ف القبض على (امين بن محمد بن اسامه بن لادن)المتهم بنسف مبنى التجاره العالمى للمره الثالثه بعد والده (محمد بن اسامه بن لادن) وجده (اسامه بن لادن)
-اسرائيل تأبى الانسحاب من (الكوفه) الا بعد ضمان امن مستوطناتها فى( بغداد )
-حديث الرئيس (بوش دبليو دبليو دبليو بوش)حفيد الرئيس (دبليو بوش) عن اسلحه الدمار الشامل فى( مصر) والمخبئه فى رغيف العيش
الاخبار الفنيه:
-زفاف المطربه( صباح) على حفيد الفنان الراحل( راغب علامه) بالرفاء بس مقدرش اقول والبنين
-(ومادلين )حفيده الفنانه الراحله (هيفاء وهبى ) _التى ماتت محروقه_تصور اول كليب لها فى الحمام
-شوهدت الفنانه( روبى )فى احدى دور المسنين حيث يفوق سنها الان المائة عام .........والتى صرحت فى حديثنا معها انها لازالت تصر على (الامبره) فى الكليبات
-(فتيات الليل ) يجرون حديث صحفى مع الاعلاميه (هاله سرحان) ويؤكدون لها ان حلمها عن فتيات اليل فى مصر اصبح حقيقه وتقدر تموت وهى مستريحه
الاخبار الرياضيه:
-(حسام حسن) يؤكد انه ليس لديه نيه ف الاعتزال .وانه مازال فى قمه لياقته ويستطيع العطاء وقياده مصر للفوز بكأس الامم للناشئين تحت 75 سنه
-شوهد (الحضرى )حارس المرمى العالمى بعد فشله مع نادى سيون من حوالى ستون عاما .شوهد قريبا فى احدى ضواحى استراليا يبيع مجلات رياضيه _واضح انه لم يبتعد كثيرا عن تخصصه
المزيعه ::اااووووووفففففف النشره خلصت اقولكوا بقى على اسم مصمم الازياء .........اه نسيت معاد المساج بتاعى سورى يا جماعه مضطره استأزن موبايلات بقى ها .........يلا يا سوسو

الأحد، 13 أبريل 2008

تهييييييس...........من غير بانجو......ولا حشيش

متستغربوش م العنوان قوى كده انت فعلا ممكن تهيس من غير ما تشرب بانجو او حشيش ......شايفه ف عنيكوا نظره فرح مع ابتسامه ان دلت تدل على الهبل أأأأأأأأأأأأصدى الامل ف التهييس من غير ما تدفعوا ولا مليم عايزين تعرفوا ازاى ..........اسمعوا الموقف ده وانتوا هتعرفوا ازاى تهيسوا............اول امبارح شفت حاجه غريبه قوى مش عارفه اضحك عليها ولا اتحسر بصراحه ف الاول ضحكت شويه ولما فكرت لقيت انها حاجه تحزن ماتضحكش صحيح (شر البلية ما يضحك)..........تخيلوا لقيت راجل ف سن الاربعينات ماشى يكلم نفسه _اه والله بيكلم نفسه_ بصراحه فكرت اكلمه بس اتكسفت قولت (خليكى ف حالك يا بت يمكن يحرجك) فكرت ايه اللى يخلى واحد كبير كده يكلم نفسه ف الشارع قدام اللى رايح واللى جاى .........روحت البيت والموضوع لسه ف بالى...........فتحت النت لقيت اخبار مصراوى .........هقولكوا اللى فاكراه منها
انه بعد ازمه انفلوانزا الطيور الجزارين بقوا يدبحوا حمير وكلاب للناس ويبيعوها على انها لحمه بقرى ...الغلاء يزداد والمرتبات هى هى ..ظهور نصاب ف مدينه نصر...بناء مصنع للكيماويات ف دمياط وسط الناس والاهالى .........الخ
تفتكروا اى واحد يسمع الاخبار دى يعمل ايه
انا عرفت الراجل ده كان بيكلم نفسه ليه
وكان بيهيس بيقول ايه
اكيد كان بيسأل نفسه ثلاث اسئله
مييييييييين ............فييييين .........لييييييه
مين اللى رفع الاسعار؟
فين الفلوس اللى هجيب بيها عيش وخيار؟
ليه انا من زمان مافكرتش ف الانتحار؟
عرفتوا بقى ازاى يحصل التهييس من غير بانجو ولا حشيييش

السبت، 12 أبريل 2008

مشربتش من نيلها............ما كلتش من حميرها


ازيكو انهارده ...اتمنى تكونوا بخير ....انتو ممكن تكونوا مستغربين للعنوان ده ..بس بيتهيألى لأ لان بقى فيه حاجات كتير اليومين دول تدعو للاندهاش واحيانا للصدمات .....لدرجه ان جته الشعب المصرى نحست ..اما بالنسبه للعنوان فانتو اكيد سمعتوا المطربه المصريه(شرين عبد الوهاب) واكيد سمعتوا اغنيتها الشهيره (مشربتش من نيلها)....ومع احترامى ليها ولصوتها القوى الرائع . بس انا عايزه اسأل سؤال هى مش حاسه ان اغنيتها دى مش مناسبه للزمن اللى احنا فيه ده ..........وانها ف الزمن ده تعتبر نفاق واضح وصريح ...نيل ايه اللى بتغنيله يا شرين .ده ما بقاش نيل يا ماما ده بقى بركه ميه معفنه .ده فيه كل ما لز وطاب يا بنتى نفايات مصانع تلاقى .حيوانات ميته تلاقى .لأو ف الأرياف كمان اى حد يتزنق يروح يقضى حاجته ف النيل .وما خفى كان اعظم ....واحنا نشرب بقى ده لو شرين شافت كبايه الميه تحت الميكريسكوب هتقرف تحط بقها فيها........بس انا بكلم مين اكيد شرين بتشرب ميه معدنيه مش ميه م الحنفيه زيينا.....بس برضو احب اطمنها انهم اكتشفوا ان الميه المعدنيه غير صالحه للاستخدام الادمى ..ده حتى اللحمه يا شرين طلعت حمير وكلاب واحنا بنلغ ...يعنى زمان كل واحد ف مصر دلوقتى واكله ييجى حمارين وكلب ......اقولك حاجه يا شرين سيبى البلد وهجى .....بس انتى حتى ليكى طريقه تهجى بيها هتحجزى تزكره طياره وتسافرى اى بلد...بس بقى اى واحد من الشعب المصرى مش هيبقى معاه حق الطياره ...فهيركب العباره.....ويسافر للاخره اعاره ........وابقى سلملى عالاموات ههههههه

ايه يعنى

ايه يعنى ميه فاسده ......... ايه يعنى اكل فاسد
وفيها ايه لما يكون الهوا فاسد........ ولا حتى الدوا فاسد
دا انتو فعلا شعب طماع ......... عايز كل حاجه وبالاجماع
ما انت كده كده هتموت .......... يعنى اخرك تابوت
ليه بقى تعلى الصوت............... وتقول ان الفساد هو اللى هيخليك تموت
زمان كانت الحكومه بتدور عالناس ...........مين افتقر ومين انداس
لكن زمننا فيه الحكومه على راسها ميت قرطاس
مفيش ضمير مفيش احساس

الجمعة، 11 أبريل 2008

البلد باظت

اقولهم البلد باظت يقولولى هات دليل من امين او ظابط
ياخوننا البلد باظت ماقولنا هات دليل من امين او ظابط
قولتلهم بصوا بعينكوا البنات لابسه محزأ
وبيعاكسوا الشباب الملزأ
حتى الشباب مبقاش شباب
بقى حاجه كده بين كده وبين كده
لنا عارفلهم جنس ولا حتى متاكده
وكمان البنات والعرى ف الكليبات
هى دى مصر بلد حليم ونجاة
اقروا معايا الفاتحه عالاموات
ويا حسره عاللى فات

مشيت ف الشارع

مشيت ف الشارع اتفرج عالمحلات
لقيت شويه شباب راكبين عربيات
ومشغلين الكاسيت عالى مسمع الاموات
قولت انا مالى
شويه ولقيت شويه بنات
ببناطيل ساقطه وحزام ملمعات
لأولابسين ايشاربات وبيقولوا محجبات
قال يعنى ده اللى هيجيب العرسان م التجمعات
وشباب مصر اصلا بيشحت ويسرح بغزل بنات
قارنت بين الزمن ده والزمن اللى فات
قولت دا احنا مكناش بنات
كنا رجاله بشنبات
اه والله بشنبات
ده حتى اسامى البنات بقت كنزى و برى وجولا كأنهم مش مصريات
بعد ما كانت ساميه وسلوى ونجاة
ويا حسره عاللى فات

شباب لامؤاخزه

ازيكو انهارده .........اولا احب اشكركم عالتعليقات اللى بعتوهالى جميله جدا ويارب دايما اكون عند حسن ظنكو.........كنت عايزه اقولكوا على موقف حصللى من يومين ......غريب جدا وكوميدى جدا جدا
انتو طبعا عارفين الموضه بتاعه اليومين دول المنتشره بين الشباب والبنات اللى هى (تسقيط البنطلون) موضه غريبه جدا مش كده.على رأى اللى قال(اللى يعيش ياما يشوف)
لاوالبنات بالزات بيتفننوا _سبحان الله_تبقى البنت زى العجله ولابسه بنطلون ضيق جدا لأوالادهى مسقطاه ولابسه حزام عريض بيلمع بتوكه كبيره (منظر مستفز) . وازا ولد عاكسها تضايق قوى وتقول (اوحو بقى يا جماحه..الله انتو مش شايفينى محجبه ولا ايه).........بالزمه حجاب ايه ده .
ده احنا زمان كنا بنقول عالبنت اللى لابسه بنطلون واسع جدا وايشارب انها محتشمه مش محجبه ..اكيد بقى التانيين دول شعرهم خشن او فيه حشرات عشان كده مغطيينه.....ههههههههههه
اقولكوا بقى عالموقف اللى حصللى او بمعنى اصح حصل قدامى
كنت راكبه الاتوبيس والحمد لله لقيت كرسى فاضى اقعد فيه.شويه والاتوبيس اتزحم . لقيت ولد من اياهم (شاب لامؤاخزه يعنى) من اخواننا اللى ماشيين مع الموضه ومسقطين البنطلون .طلع الاتوبيسو وهو بيدفع التزكره هب الفلوس وقعت .هب وطى يجيبها .هب البنطلون وقع هههههههه الواد اتفضح يا عينى قدام الركاب كلهم
الكارثه بقى انو منزلش من الاتوبيس بعد الواقعه دى معأن كل اللى فى الميكروباص شافوه وقعدوا يضحكوا لأ ده كمل مشواره عادى جدا ولا كأن حصل حاجه
(يا عم ازا بليتم فاستتروا ياعم ) انا نفسى اعرف هيجرى ايه يعنى لو لبس هدوم عدله زى بقيت خلق الله هيروح النار يعنى
انتو عارفين احنا مشكلتنا فين مشكلتنا اننا بنقلد الغرب بهبل كأننا معندناش عقل نفكر بيه ماشيين وراهم زى البهايم

يوم ميلادى

جيت للدنيا وقالوا يوم ميلادى
جيييييت بس حاسس انى ما جتش ف معادى
كبرت واتربيت بالعافيه افهم الزوجى م الاحادى
اصل المدرسين مبيشرحوش الا ف البيت
مدرسين خارجين داخلين لما اتجنيت
وفلوس رايحه جايه عالدروس الخصوصيه
وياريتها بتحوأ فيا مش عارف ازاى نجحت وطلعت الاول عالجمهوريه
البركه بقى ف الواسطه والكوسه اللى هيه
دخلت طب وفأول محاضره بكيت
مش فاهم حاجه دماغى بقى طبق فول بالزيت
كأن عمرى لاتعلمت ولا اتربييييييييت
اجتهدت ست سنين لاببص شمال ولا يمين
اتخرجت دكتور ملو هدومى بس الحكومه معمتش على عومى
قالتلى معندناش تعيين يابابا روح بقى ارؤس عالربابا
وللاسف كان يوم ميلادى منا قولت حاسس انى ماجتش ف معادى

بنت مصريه

احب اعرفكم بيا انا بنت مصريه..........ايه بتضحكوا على ايه..........انا عارفه اللى بيدور ف دماغكوا اكيد بتقولوا(كل ده عشان مصريه امال لو كانت صوماليه كانت عملت ايه)فعلا عندكو حق وعلى رأى اللى قال(لو لم اكن مصريا لودت ان اكون صوماليا .. ....هههههههه).......اعرفكم بيا بقى انا بنت بسيطه جدا نشأت وترعرعت (ايه نشأت وترعرعت دى)معلش يا جماعه اصل الثقافه نأحه عليا اليومين دول......المهم كبرت واتربيت ف اسره متوسطه .وبعد سنين طويله ف التعليم والدروس الخصوصيه اللى ما بتخلصش .كان حلم حياتى ادخل جامعه عين شمس..........ايه فى ايه بتبصوا لبعض كده ليه.........لا متفهمونيش غلط.....انا كان نفسى اتعلم اه بس ده ميمنعش ان يكون ليا زمايل ولاد لربما يكون فيهم عريس الغفله........ودقت ساعه الخطر .........لسه بكتب عين شمس ف استماره الرغبات.........لقيت بابا بيقوللى(انا عايزك تدخلى سجن النسا)..هههههههه أأاأأأصدى كليه البنات يعنى.......(ليه يابا.) .......(خالتك وعمتك متخرجين منها يابنت).....طب وانا مالى لازم اكمل المسيره يعنى....ضاعت فرصه العريس........المهم دخلت كليه البنات ومقولكوش عالروايح اللى ف المدرجات ......اصل معظم البنات هناك م الارياف....دى مش تناكه منى والله ..بس تخيل نفسك قاعد ف محاضره والمفروض تفهم وفى واحده جمبك مغيره ريئها بفحل بصل عالصبح .........وكله كوم والكشرى ابو دقه كوم تانى _سبحان الله _كانوا بيرموا الكشرى ويسفوا الدقه ........بس والله كانوا طيبين ........المهم اتخرجت بعد اربع سنين وكنت م المتفوقين .ولازالت فرصه حصولى على عريس الغفله ضعيفه........اعمل ايه اعمل ايه....ايوه هى دى جاتلى فكره جهنميه.......رحت لبابا وقولتله (بابا انا عايزه اعمل دراسات عليا ف جامعه عين شمس) رد عليا وقاللى (برافو) قولت (قشطه) قاللى (من بكره هقدملك ف كليه البنات دراسات)
رررررررررررررررررررحححححححححححممممممممممااااااااااااااااااااااااااااااااكككككككككككك
لا كده حرام .مش عارفه ليه كان عندى احساس ان ابويا فاهمنى...دخلت سجن النسا للمره التانيه.....وسرحت بعينى ف كشف الاسامى _اسامى زميلاتى_اسم بنت ورا اسم بنت ......بصيت ف اخر الكشف
ايه ده مش معقول مش ممكن مش مصدقه عنيا (دهب .ياقوت.مرجان.اسم ولد احمدك يا رب) كان هبل بعيد عنكوا.......
تخيلو هو ده العريس خطيبى سابقا وزوجى حاليا...............
انا قصدى من كل الرغى ده (ان مهما الواحد يعمل مش هياخد الا نصيبه واللى مكتوبله)
hi5