.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الثلاثاء، 27 مايو 2008

بنت مصريه.............واتنصب عليه

انا بنت مصريه
عندى افكار جهنميه
عن الناس والشارع
وحتى الديمقراطيه


وفكرت لقيت
افكارى لسه جوايا
وانا قاعده جوا البيت
بخرط ف الملوخيه


مفيش غير حل واحد
هو الامل الصاعد
اجيب نت ف البيت
وانشر دماغى العبقريه



سمعت عن واحد بيوزع وصلات
كان اسمه......اه اسمه الحج عصابات


قاللى ادفعى يا مصريه
قولت وماله
انت فعلا غالى شويه
بس انا بنت ذكيه
ادفع اكتر تدينى الخدمه اللى هيه


ضحك ضحكه سخريه
وقاللى سلام يا مصريه


وانا هيصت
دخل النت
ارؤص يا واد وانتى يا بت


لقيت فرصه اعرض افكارى
مش فارقه غصب ولا اختيارى


بس المهم تبقى مسموعه
وللناس تبقى موضوعه


ناس كتير اعجبوا بيا
محترمين..مثقفين..غلباويه
قولت دى الصداقه اللى هيه


شهرين وفصل النت
ألطم يا واد وانتى يا بت


ناديت وقولت يا حج عصاباات
قالولى اتجننتى بتكلمى اموات
عصابات ده نصاب وبتاع حركات


قولت يا لهوى
وانا اللى عامله فيها ذكيه
ومفيش اذكى منى ف الشرابيه
يا فضحتى قدام البلوجريه
اكيد هيقولوا البعيده غبيه


وانا اعمل ايه يعنى
منا بنت مصريه
واجلا او عاجلا
لازم يتنصب عليا


هلاقيها منين يارب
بقى ف كل حته نصب
نصب ف نصب
م النت للديمقراطيه


يللا بقى منا بنت مصريه ولازم يتنصب عليا

هناك 41 تعليقًا:

rtrcbh يقول...

السلام عليكم ورحمه الله وبركاته
جميله جميله جميله
جميل جدا الكلام لما بيخرج من القلب بعد عملية النصب التى تمت
تشعرى أنها صاعده من الاعماق تحمل كل مشاعر النقمة على هذا النصاب
ربنا يكرمك يارب
أسلوبك جميل جدا فى الكتابه
وأسال الله ان لا تغيبى عنا كثيرا
ولا نراكى لدينا الا حينما يكون لك موضوع جديد ؟!!!!!
أقراتى الموضوع يابنت مصرية ؟؟؟؟؟؟؟
ههههههههه
ربنا يكرمك يارب
السلام عليكم ورحمه الله وبركاته

HERO يقول...

ياسلااااام على الاشعار حتى وانتي منصوب عليكي وفعلا انتي اتنصب عليكي علشان انتي في مصر مش علشان انتي بنت مصرية
وبعدين سؤال عمرك سمعتي عن وصلة نت ب 200 جنيه والله ليهم حق النصابين يكتروا في البلد دي هههههههه

تحياتي

Mafrousa يقول...

هههههههههههههه
ههههههههههه
هههههههههههه
جميله جدا...هوه النصب بيفجر المواهب
و على فكره انتى كلامك صح بيتنصب عليكى لانك مصريه لان المصريين كلهم طيبين و قلبهم ابيض و مابيخونوش حد...همه دول المصرين يا مصريه

ٍSOU يقول...

قصيدة من واقع الحياة..حلوة اوى

Unknown يقول...

ههههههههههههه
دمك زى الشربات
وبعدين انتى لسه منسنيش انك اتنصب عليكى يا ستى عديها مش تهرى ف نفسك كده.

احلى التحيات.......كريم

Lobna Ahmed Nour يقول...

وانا اعمل ايه يعنى
منا بنت مصريه
واجلا او عاجلا
لازم يتنصب عليا

ههههههههههه .. عبقرية بجد

مانتي بنت مصرية

تحياتي

بنت مصريه يقول...

ابا يحيى وادم
ربنا يكرمك يا رب
مهو ميحسش بالنار الا اللى انكوى بيها
شكرا لتشريفك

هيرو
منا ما خونتش بقى
هههههههههه
شكرا عالتعليق

واحده مفروسه
ازيك يا قمر
اه والله عندك حق
منا مصريه

سو
اول مره تعلقلى وان شاء الله متكنش الاخيره

كريم
اعمل ايه يا كريم دمى محرووق
ههههههههههه
شكرا على تعليقك يا كريم

بنت مصريه يقول...

يونك
على فكره دا حصلى فعلا وفى البوست اللى فات
شرح لعمليه النصب
شكرا لتعليقك يا قمر

.:.-=- ELGaZaLy-=-.:. يقول...

السلام عليكم ورحمة الله وبركاته

استشارت نفسية بس اقفش

زميل اهلا اهلا ...

اسلوبك جميل اوى ودمك خفيف اوى بجد...


والقصيدة هايلة والنصاب ربنا يباركلة بقى

بنوته مصرية يقول...

معلشي يا قمر

تعيشي وتاخدي غيرها

مش تضيقي نفسك انسي ياما بتحصل كتير

تحياتي

mostafa rayan يقول...

انا جيتلك اهوعلشان ماتتقمصيش
وان شاء الله تتعوض في المرات الجاية
اماالرالجل النصاب فأكيد ربنا هيوقعوا في نصاب اشر منه وحقك هتاخديه في الدنيا قبل الآخرة
تحياتي ليكي

امل يقول...

السلام عليكي يا بنوتة مصرية
انتي كل الاحداث لازم تحوليها لكلمات
ظريفة ودمها خفيف كده بس الحمد لله ان الحكاية عدت على خير ورجعتي لنا بالسلامة
على فكرة انا جيبالك معايا طبق رز بلبن اسيبه فين هههههههههه
خالص تحياتي وودي

Tamer Nabil Moussa يقول...

بعد كدة تخدى بالك يا بنت مصرية

لاحد يضحك عليكى اوينصب فى عملية تانية


اية الكلمات الجميلة دى طتاع من جوة احساس بالحزن من اللى حصل وقلق من اللى جى

تحياتى

مدحت محمد يقول...

انا نفسى اعرف ايه حكاية الملوخية معاكى ههههههههههه

شكلك بتحبيها اوى

ماعلينا مش انتى مصرية

يبقى النصب حاجة عادية وطبيعية وملوخية برضه هههههههههه
تحياتى ليكى

كريم مصطفي سيد يقول...

يالله تعيشي ومتخديش غيرها يابنوته

tamer.sala7 يقول...

افضل رد عليكي كلام عمي الفاجومي

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى

MATRIX يقول...

يا جماعة موش حينفع الكلام فقط
لازم نعمل حاجة
لازم نعمل حاجة
موش معقول حنفضل نكتب ونتكلم بس

MATRIX يقول...

وشكرا لحضرتك على زيارتك لمدونتى وانا اصبحت زائر دائم لمدونة حضرتك وافكارك الجديدة

استراحة محمد يقول...

ده انتى مش ممكن ، مش قادرة تنسى انك تنصب عليكى ، الموضوع قاهرك خالص ، لدرجة انك ممكن تسجلى احداث الواقعة على الحيطان زى الفراعنة عشان الأجيال اللى جاية تستفيد

رئـــــيسـة حزب الأحلام يقول...

كلامك جميل يابت يامصريه
والمهم صلحت وصلت النت و
ولا لسة ياعنية
اوعى تكونى قاعدة فى نت كافية
يامصرية ربنا يعينك ويهدينا ياعنيا
تحياتى لكى ياقمر

إبن مصر يقول...

انا اسف يا مصريه مش بحب يكون رسايلى فيها غلطات املائيه
علشان كده حزفت اللى قبلها
المهم كانت بتقول
ما عاش ولا كان اللى ينصب عليكى يا مصريه
ولو تحبى يكون ليكى خط نت لوحدك كلمينى وانا اعرفك الطريقه
للعلم انا مهندس فى احد الشركات دى
وطبعا تعرفى تجيبينى منين
محدش ينصب عليكى وانا تخت امرك
امال إيه
منا مصرى وانتى كمان مصريه

Soooo يقول...

ياختي عالنصاحه وياختي عالنباهه
فكرتيني بماجده فـ فيلم النداهه

عملتي زيها وسيدي بلوج ندالك
اتاريكي مش عارفه باللي جرالك

يتنصب عليكي وعيني عينك
وبتسألي عالحاج وتقولي فينك

بس اطمني فلوسك حلال حلال
والنت رجع وعال العال

وشغلي نافوخك بعد كده
وماتقوليش انا حظي كده

ولما تشوفي نصاب تاني
هاتيهولي اكله بسناني

مش انتي لوحدك المنصوب عليكي
كلنا في الهوا .. والنصب ده صديكي




سلامووووووووووز

khobayb يقول...

تدوينتين ورا بعض عن نفس الموضوع
:)

والأولانية نثر والتانية شعر !

واضح إن الموضوع سبب جرح عميييييييييييييق

معلش ..

محدش بيتعلم ببلاش .. المقولة المأثورة لوالدي العزيز كل ما أرجعله خارب حاجة !

ربنا يستر علينا

بنت مصريه يقول...

الجزالى
ربنا يخليك يا رب
ومتدعيش للنصاب لو سمحت
ههههههههههههه
اتمنى تنورنى دايما

بنوته مصريه
مش قادره يا بنوته والله
بس هعمل ايه منه لله
اتمنى تنورينى دايما يا قمر

مصطفى الريان
مرسى عالتعليق يا مصطفى
ويارب تشرفنى دايما

امل
اه يا امل
المواقف اللى بتحز ف نفسى بس هى اللى بعمل عليها باميه اصدى شعر
ايه ده رز بلبن
احمدك يا رب
لا يا ماما ماتسيبيهوش على بقى على طول
ومتقوليش قدام الناس كده عشان الحسد
ههههههههههههههههههه
نورتينى يا قمر

تامر نبيل
ربنا يخليك يا رب ومرسى على تعليقك

مدحت محمد
فعلا
انا بحب الملوخيه جدا
ههههههههههههههههه
مرسى عالتعليق يا مدحت واتمنى تنورنى دايما

كريم مصطفى
ربنا يخليك يا رب
وشكرا على تعليقك
ونورنى دايما

تامر صلاح
الله
ايه الجمال ده والله احنا خسارتنا ف البلد دى ههههههههههههه
اتمنى تنورنى على طول

ماتريكس
والله هو دا يا متريكس اللى نقدر عليه هنعمل ايه يعنى
وانا يشرفنى تكون زائر دائم لمدونتى

استراحه محمد
ههههههههههههههههههه
لا والله خفه يا محمد
بص يا محمد انا اى واقعه بتحز ف نفسى قوى بقلبها شعر على طول
شكرا لتعليقك

رئيسه حزب الاحلام
ربنا يخليكى يا قمر
لا متقلقيش انا قاعده ف بيتى كافيه
اتمنى تنورينى على طول

سون اوف ايجيبت
ربنا يخليك يا رب شيلاك
لعوزه
طبعا محنا اخوات
يا رب اشوف تعليقك عندى على طوول

سووووووووووو
ههههههههههههههههههههههههه
ايه العبقريه دى يا بنى
لا لا لا دا احنا نقر عليك كده بقى
اتمنى تنورنى دايما يا سووووووووو
سلاموووووز

خبيب
اه والله يا خبيب عندك حق
بس انا طبعى انى اعمل على اى موقف
ابيات شعريه ساخره
شكرا لتعليقك

مشربية يقول...

ياااااااااااااااااااااا انجييييييييييييييييييييييييييي
اخبارك اية ؟
يارب تكوني كويسة و خصوصا بعد ما النت فصل من الراجل النصاب
بجد يا انجي مش عارف اقولك اية تحفة يا بنتي و الله و ربنا يكرمك
و علي جملة للنت ديموقراطية فية رواية جديدة في الاسواق دلوقتي اسمها " حورية دوت كوم" لاشرف نصر بجد جميلة قوي قوي
و متشكر علي دخولك للمدونة عندي مع اني كل مرة بخذلك لانك مش بتلاقي حاجة جديدة تكتبي تعليق عليها :D

شريف طلال يقول...

ماشى يا مصريه
هيا دى الدماغ الجهنميه
شكر على الموضوع المهلبيه
ألى خلانى ابطل تخريط الملوخيه
هههههههههه
تحياتى

غير معرف يقول...

هههههههه
حلوه

غير معرف يقول...

يا عيني يا عيني
أول مرة اجيلك وعجبتيني يا مصرية يا جااااااامدة

بنت مصريه يقول...

مشربيه
ها هلالك
شهر مبارك علينا
وعالبنى ادمين
يا بنى انت لازم يسموك رمضان
بتيجى ف السنه مره
وانا اقول الواد ده راح فين
حسستنى ان فيه كارثه عندك لا قدر الله
يا عم انت فين وفين كتاباتك
طب لو معندكش وقت تكتب
زورنى ولو كل سنه مره يا اخى
يا للا الف حمدالله عالسلامه
وعود احمد
معأنك محمد بس مش مهم
اتمنى تنورنى دايما



شريف طلال
ياااااااه
انت كمان كنت بتخرط ملوخيه
وانا اقول شحت ف السوق ليه
هههههههههههههههه
اول مره تنورنى ويارب
متكنش الاخيره
اتمنى تنورنى دايما

غير معرف
انت احلى
بس مكتبتش اسمك ليه

مها ميهو
شرفتينى يا قمر
ويا رب تكرريها
ومرسى عالتعليق الجاامد ده
اتمنى
تنورينى دايما

المـــفـــــــقــــــــوعـــــة مــرارتـهــا يقول...

ماتزعليش نفسك .. كلنا لها وأتحداكي انك تلاقي حد عايش في الدنيا وماأتنصبش عليه مرة في حياته
بس ليكي وحشة ياقمر

حمادة زيدان يقول...

بنت مصرية

شكله وصلة النت مدايقكي اوى ... ربنا يساعدك على الراجل النصاب

الحمد لله معندناش حد نصاب في وصلة النت


هههههههههههههههههههههههههههههه

soulmate يقول...

جميل اوى اسلوبك بجد عجبتنى طريقتك انا مش اول مره ادخل بس اول مره اعلق ويا رب مش يتنصب عليكى تانى

سفينة يقول...

جامد قوي الشعر بتاعك دا علي فكره

المفروض تاخدي لقب اميرة الشعراء قريب ويبقي اسمك انجي شوقي

ههههههههههههه
بس كالعاده كلامك زي العسل
بيخليني دايما سعيد ومبسوط

خالص تحياتي واتمني تنوريني دايما

Tamer Nabil Moussa يقول...

اختى العززية بنت مصرية اليك هذا الخبر حتى لااتهم باخفاء اسرار عشكرية عنكى ههههه


فى ومدنة اخت لينا اسمها ياسمين فى موضوع عن جريدة اسمها الاسرة العربية هتفتح صفحات للمدونين يكتبوا فيها

الموضوع اللى فى المدونة موجود علية الاميل اللى ترسلى علية احدى مواضيعك مع اسمك وصورة

تفاصيل هشى على المدونة

http://amyasser.blogspot.com/

اى خدمى يافندم

تحياتى

mregypt7 يقول...

انا بمسى التماسى اجدع تماسى احسن تقولى ان انا ناسى
والله ما اقدرش اتاخر عن الرد لبوستاتك
اللى هى زى ما بيقولوا كده مخلصه وجايبه من الاخر حتى لو كان ورايا امتحانات
ماهو برضه الرد عليكى يعتبر مزاكره
فى الشعر الحى الجميل اللى دائما ما تبدعينا ومن ثم تتحفينا واحنا نقولك شكرا هندستينا
النهارده شايف البوست بتاعك فيه نوع من التريقه على نفسك
عشان انضحك عليكى من الحاج حاج حاج مين ما تسميهولنا اسم كده غير حاج وعصابات
بس باين عليكى بتحبى الملوخيه
عماله تخرطى فيها وتدعى على الحاج عصابات
بس كنت عايز تفسير لكام كلمه كده
انتى بتقولى وانشر دماغى العبقريه
اوعى تكون فى جرنال ولا اقولك شكلك كده هاتنشريها على الحبل بس عشان خاطرى ابقى استخدمى تايد واوعى تنسى تزهريها وابقى علقيها فى الشمس بكام مشبك كده
بس حاسبى تطير اهه منها تعقبيها عشان الراجل اللى ضحك عليكى ده
الا بصحيح لما قولتى ارقص يا واد وانتى يابت طيب هاتشغليلنا اغنيه ايه
بصى انا بحب الاجنبى بس تكون روشه كده
بوستك جميل يا جميل
والحلو ما يعملش الا الحلو
احب اشكرك على اهتمامك
مع خالص تحياتى الباش مهندس بو حميد اللى ادعوله ربنا ينتعه بالسلامه من امتحاناته

حمامة يقول...

ههههههههههههههههه

يخرب عقلك
ضحكتينى بجد

:)

الميكروباص يقول...

انا الراجل اللي انا اوخد منه النت ربنا يهديه من ساعة ما السرعه زادت و النت عندي باظ مش عارف ازاي؟؟؟
يعني رفع ايجار والوصله ورفع السرعه و مفيش نت في البيت -- ازاي الله أعلم
لكن اكتشفت انه حاطط على البتاع اللي بيطلع منه الوصلات كمية من الناس فوق طاقة الجهاز
ونتيجة لكده النت ضعف وأصبح مجيئه نادر
ومش بيبقى كويس الا بعد 1 باليل
باين علينا مش هانخلص من نصاحة الناس ابدا

HANY YASSIN يقول...

مش عارف اقول ايه والله
كلام جميل وزى العسل
واسلوب مش ممكن
تسلم ايدك تحياتى
هانى يس

حبيبة الروح يقول...

ههههههههههههههه
دمك خفيف جدا
انتي زي السكر

محمود حسن العدل يقول...

انتى اسلوبك مالوش حل وبصراحة انا محتاج اجازة كبيرة على شان اقرى كل اللى كاتبة بس بشرط اكون قافل باب الشقة عليا لواحدى لان لوحد شفنى هايقول اكيد الواد دة اتجنن
وبيضحك لواحدة
بجد انتى كوميدية من الدرجة الاولى ويبخت جوزك واولادك بيكى
انا سعيد جدا بمدونتك جدا جدا جدا

Maha Shahen يقول...

جميله جدا ودايما مبدعه
واكيد طبعا بتعجبنا افكارك ولو النت فصل عندك هترجعى تلاقينا مستنيين بلهفه كل اخبارك
واتمنى تحاولى تكتبى شعر زي الخواطر الغلباويه بنفس الروح الجميله
اكيد هتكتبى شيء مش هيقل عن الأبداع دا
تحياتى

hi5