.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الثلاثاء، 3 يونيو 2008

رحله الى النيل.................حقا ما انيلها

ازيكو يا جماعه
من يومين كنت زهقانه قوى_ يعنى _ حاسه بالروتين قوى خصوصا انى مش بشتغل...وزوجى العزيز طبعا بيشتغل
ف مش طهقان ذيى...... كل يوم بيخرج .. يشوف ناس..يغير جو
وانا بقعد ف البيت امارس هوايتى ف (غسيل الموعين وتنضيف البيت والطبيخ)..........بصراحه هوايه مزعجه
وسبحان الله كل الهوايات الواحد بيبقى فرحان وهو بيعملها معادا الهوايه النحس دى ببقى حاسه قوى بالمقوله الشهيره
(مجبر اخاك لا بطل ).........وانا بقوم بممارسه الهوايه دى _هنمشيها هوايه عشان منتضربش_بسمع اغنيه واحده
لحبيبه قلبى(شاديه)....واللى مطلعها بيقول (والله يا زمن لا بأدينا زرعنا الشوك ولا روينا يا زمن)
........ايه فى ايه.........مهى دى الاغنيه الوحيده اللى تنفع عالوضع ده

المهم جه زوجى من الشغل حضرت الغداء مع ابتسامه مصطنعه وكأننى كنت بسمع اغنيه (الليله عييد)
مهو الراجل لسه داخل من الباب مينفعش اركب الوش الخشب دلوقتى ......لازم اكون حسيسه شويه

اتغدينا شربنا الشاى .........وانا لازلت مصره على الابتسامه الصفره
لاحظ زوجى ان هذه الابتسامه تخفى احتجاج عاوضع الراهن........وادرك شهريار الصبا........ايه ده
سورى يا جماعه انا دخلت على الف ليله وليله معلش
فبدأ زوجى باكلام ........ودار بيننا الحوار التالى


زوجى (وهو مندهشا) :شكلك مش مريحنى فيه ايه
انا (من غيير تردد رديت وانتهزت الفرصه اصلى استغلاليه والحياه فرص):تيجى نخرج
زوجى (ظهرت علامات الضيق على وجهه.....وعلامه اكس على جبينه..مصحوبه برفع احد الحاجبين:
مفيش خروج انا لسه جى من بره

وبعد مشاده كلاميه ...........ملقتش قدامى غير حل واحد متعارف عليه عند كل البنات.....وهو تمثيل دور الغلبانه
وبدى التأثر على وجهى ........وعملت فيها عيله وبصوت رقيق وناعم وكأننى مغلوبه على امرى قولت:
نفسى اخرج لو سمحت نخرج لو سمحت (ايوه بتمسكن لحد ما اتمكن عادى )
رد عليا زوجى وهو بيضحك:عايزه تروحى فين
انا قولت لنفسى يا بت اختارى حته هو بيحبها اهو منها تشمى هوا ومنها ميقولكيش الجمله المتعارف عليها ف كل خروجه الا وهى (يللا نروح بقى )
قولتله :نروح نتمشى عالنيل
قاللى : فكره حلوه انا كمان بحب التمشيه عالنيل
نزلنا وانا السعاده هتفط من عنيا مش عشان النيل ...لأ..عشان بقالى اسبوعين مخرجتش ..دا انا قربت اخلل يا جدعان
ومقولكوش عاللى شوفته عالنيل ..واو مصر كلها بقت حبيبه يا جدعان .......مفيش واحد واقف لوحده (عييب)
لازم كل واحد يبقى معاه واحده (مزه يعنى).......يا اما ماسكين ايدين بعض ...يا اما مسبلين لبعض ..يا اما بيأكلها الحمص ف بقها .........(اصلها مشلوله)..هههههههههه
فكرونى بأغنيه نانسى عجرم (كل الاحبه اتنين اتنين متجمعين عالنيل صايعين )
لا وانا وزوجى شكلنا صغير فمحدش عاقل يقول اننا متجوزين نهائى ..فـأكيد اى حد هيشوفنا هيفتكرنا تبع نانسى عجرم
المهم فضلنا ماشيين سمعنا صوت ف قفانا....دا المركبى بيدلل على حد يركب المركب وبيقولنا بصوت عالى
(تعالى يا باشا اركبوا المركب اللفه ف النيل ب2 جنيه يا بلاش )........انا بصيت لزوجى بنظره استغلاب للمره التانيه وانا بقول (لو سمحت نركب لو سمحت )..........رد عليا وقاللى (لا مش هنركب فاكره المره اللى فاتت)

اه مقولتلكوش اصل احنا ركبنا مركب مره قبل كده وكان الراجل مشغل اغنيه ل (عبده لاقرع)...محدش يسألنى مين ده
اهو حاجه كده زى ( بعرور) كده............وانا زوجى بيحب (عبد الحليم) فتخيلوا واحد بيحب (حليم ) قاعد ف حته مشغلين فيها (لاقرع)..............لا ويومها كمان كان فيه شويه بنات محجبين قاموا قلعوا الحجاب واتحزموا بيه وقعدوا يرقصوا _فشر دينا والله_ ومجموعه شباب مش تبعهم خالص قاموا يشجعو البنات ويرقصوا معاهم
(ربنا يكفينا شر الصيف وبلاويه واللى بيجرا فيه)

المهم بعد الموقف ده زوجى قرر ميركبش مراكب تانى

بس المراكبى برضه مش راضى يحل عن قفانا.........قام زوجى رد عليه وقاله(اصل المراكب دى يا حج بيبقى فيها شباب وبنات بيقعدوا يرقصوا ......وبيضيعوا استمتاعنا بمنظر النيل)......._اصل زوجى رومانسى حبتين_
رد عليه المراكبى (لاوالله يا باشا دول كلهم عائلات حتى شوف)..........بص زوجى عالمركب لقاه كله ناس متجوزين يعنى مفيهوش شباب ولا بنات صغيرين (مفيهوش مزز يعنى)
وانا بقى ظيت ف الظيته وقعدت ازن (لو سمحت نركب مهو مفيهوش شباب ولا بنات اهووكله عائلات بليييييييييييييييز)
رد زوجى وقاللى (حاضر اما نشوف اخرتها)
ركبنا المركب............ واول ما المركب قامت المركبى شغل اغنيه بيغنيها واحد تقريبا عامل عمليه شايل فيها
(زوره) قبل ما يعمل الشريط
وكانت الاغنيه عباره عن كلمه واحده بيكررها المطرب _ابو زور مش موجود ده _
الكلمه دى هى (خش عليه خش عليه)
بصلى زوجى بصه وكأنه يقول (انتى السبب ف اللى احنا فيه ده)...........وانا عامله نفسى عبيطه ومش واخده بالى
شويه ولقينا واحد المفروض انه (راجل) _ شكله الفيزيقى بيقول كده_ قام وقعد يرقص وسط الناس اللى قاعده ف المركب ....ومقولكوش بقى دا مش اى رقص .............دا على سنفونيه ( خش عليه)
وقعد هذا المدعو (راجل) يتحايل على الست اللى معاه تقوم ( تهز).ههههههههههههه يللا مهى زيطه
وهى مش راضيه ......وهو مصر انها تقوم ترقص.........وهى ابدا ........ويشد ف اديها .....وهى لا ممكن
الظاهر الاغنيه مكنتش عاجباها.............. او كانت عايزه ترقص على (بتهوفن)


زوجى قام باصصلى ووهو بيكز على سنانه وبيقوللى (عائلات هه)
واول ما خرجنا م المركب .......انا اللى قولت الكلمه المأثوره (ياللا نرووح)
رد عليا :(منا بقول كده برضه)


والحمد لله لقينا ميكروباص بيروح بيتنا ........حدفنا نفسنا فيه.........وفجأه........سمعنا صووت فرقعه
بببببببووووووووووممممممممممم
الناس اللى ف الاتوبيس اتخضت......فيه ايه فيه ايه...........نزل السواق يشوف فيه ايه
شويه وطلع يقوللنا :بصو يا جماعه الكاوتش اللى ورا فرقع ...فانا همشى بالراحه عشان المكروباص ميتقلبش
واللى مش عاجبه ينزل اه


جاتلينا كريزه ضحك انا وزوجى
وبصللى وقاللى :مش عايزه تخرجى استحملى بقى
انا اللى غايظنى ان محدش نزل م الميكروباص..........يا عينى زى مايكونوا مصدقوا يلاقوا ميكروباص يوصلهم حتى لو كان هيتقلب بيهم .........او يمكن مستخصرين الجنيه ونص(حق التذكره)
واحنا لقينا الناس منزلتش ..........استشهدنا وقعدنا يللا العمر واحد والرب واحد


(وادى اخره اللى ميسمعش كلمه جوزه يقولها)

هناك 98 تعليقًا:

خواطر رئيس شاب يقول...

ايه الرحلة الممتعة دى

اريح لك ابقى مارسى هوايتك فى البيت ومن غير شادية

HERO يقول...

ههههههه
هو ولمؤاخذة في السؤال انتي كل ما تعوزي حاجة من جوزك بتقوليله " لو سمحت لو سمحت " فعلا ونعم الزوجة ويا بخته بيكي
بس المرة الجاية خي الخروجة اكثر رومانسية يعني روحوا حديقة او اقفوا في البلكونة ههههههه

تحياتي

هوة فى أيه؟؟soso يقول...

ههههههههه
أكيد أكيد مش حتطلبى الطلب ده تانى
على العموم يا بنتى أنا لما بينتابنى الشعور ده
بقوم ضاربه الطقم اللى هوة وأحط الشنطه بتاعتى على كتفى وأمسك الموبايل فى أيدى وأقوم خارجه
قاعده فى البلكونه
وأحاول أقنع نفسى أنى قاعدهخ فى كازينو الشجرة الخضرا
وأنده لاختى أقولها عايزة أشرب شاى
هيه صحيح بتبصلى بأحتقار وبتبصلى نظرة بحس فيها أنى مجنونه رسمى
وطبعا مبتعمليش شاى ولا حاجه
بقوم متصله بالبقال اللى تحتينا أقوله ممكن واحد عصير جهينه
وأنزل السبت وبعدين أطلع علبه العصير وأحطها من غير ما أخد بالى على الترابيزة وارجع فى شياكه أكنى كنت بصلح ميكب فى الحمام
وأقعد على الكرسى أشرب العصير ولا أكنى فى أجدع كازينو 5 ستار فيكى يا أيجبت
مش كده أحسن
من خرج من داره أتقل مقداره

بنت مصريه يقول...

خواطر رئيس شاب
انا شايفه كده برضه
مرسى لزيارتك ويارب تنورنى دايما

هيرو
اه يا هيرو بقولوا لو سمحت
ده كهن يابنى
مانتو مبتجوش غير بكده
لا خلاص منا مش هخرج تانى

سوسو هو فيه ايه
والله فكره عبقريه
هههههههههههههههه
بس انا معنديشسبت مش مهم هتصرف
اتمنى متكنش اخر زياره يا قمر

حــــــراء يقول...

ياجمال الخروجات
بس عشان تعرفى ان الرجاله لما بيكونوا ملهمش مزاج لحاجة مبتكملش على خير والحمد لله ان الباص وصلكم بالسلامة واظن ان زوجك قالك اوعى تطلبى نخرج تانى
بالتوفيق فى هوايه الطبخ

ليكوريكا يقول...

لا لا لا

اشكرررررررررررررررررك بشده يا استشاريتنا النفسيه

انا كنت داخل النت وعلامات الاكتئاب (بتبظ) من عيني

قلت اما عدي عالناس اللي ردوا عندي

دخلت عندك وقريت الرحله الجميله اللي انتي حكيتيهالنا دي

لوسمحت لوسمحت يا طنط ... عاوزين واحده كل يوم :)))

ربنا يكرمك يارب وشكرا علي الابتسابمه الجميله اللي ابتسمتها بسببك

ليكوريكا

Gannah يقول...

ههههههههه
يا بنتى ما فيش احسن من قعدة البيت و اسألى الغلابة اللى بيشتغلوا زيى
نفسى اقعد فى البيت اسبوع واحد
بس ايه ده؟ هى مصر كلها بقت على واحدة و نص ولا ايه اصل انا ياأختى عايشة بره مصر و الاخبار دى مش بتوصلنى
على فكرة اسلوبك لذيذ وحسيت انى رحت الرحلة معاك فعلا ما أنيلها
تحياتى

سفينة يقول...

هههههههههههههههههه

بصي كل اللي اقدر اقولهولك ان انتي مش ممكن ،بجد مش معقوله خفة الدم دي

انا لو قلت لك ضحكت ازاي علي اسلوب كلامك وطريقتك في حكي القصه مش هتصدقي

عارفه ياانجي انا وصلت لمرحله اني لما بكون متضايق بفتح مدونتك واقرأ حاجات حتي من اللي قرأتها قبل كده والغريبه اني لما بقرأها تاني بضحك تاني،
بجد ميرسي ليكي علي اضفائك بسمة علينا،
بنكون سعداء جدا واحنا بنزورك،
ومبروك علينااحنامدونتك الجميله دي.

...........
خالص تحياتي واتمني تنوريني دايما
...........

الـسـيـدة نـون يقول...

هههههههههههههههههههههههه
معلش
تعيشى وتاخدى غيرها
ههههههههههههههههههههه
المهم انك نفذت اللى فى دماغك وخليتى جوزك يخرجك
الدور والباقى على اللى مش عارفين يخلوا جوزهم يقوم من قدام التلفزيون

تحياتى
اختك خيخة

بنت مصريه يقول...

حراء
اه والله عندك حق لما بتحطوا مناخيركو ف حجه مبتكملش
اتمنى تنورنى دايما

ليكوريكا
محمد دايما منورنى
والله انا مبسوطه قوى انى بقدر اضحك صحابى
ولو سمحت لو سمحت تنورنى دايما

جنه نورتينى يا قمر
لا لا لا دا مصر اتطورت عالاخر
كله بقى بيهز
اقرى بقيت بوستاتى وانتى هتعرفى التطورات اللى ف مصر مرسى عالتعليق
يا قمر

سفينه
وانا والله يا دكتور محمد بفرح قوى لما بشوف تعليقك
وانا فرحانه جدا انك بتشكر ف البوست والله وفرحانه انك بتشرفنى ب تعليقك على طوول

خيخه واى كلام
اول مره تنورينى يا قمر
بصى اسهل طريقه لاقناع الزوج بأى حاجه
هى المسكنه والاستغلاب
ههههههههههههههههههه
اتمنى اشوفك دايما يا قمر

.:.-=- ELGaZaLy-=-.:. يقول...

هههههههههههههههههههههه

انا متاكد برضة انك مش هاتطلبية تانى الطلب دة

بس بجد ربنا يكون فى عونك والراجل قالك من الاول..

Unknown يقول...

العزيزة الغالية

بنت مصرية

لبيت الدعوة بكل سعادة وزادت سعادتى

اكثر وانا اتابع تفاصيل يوم فى حياة

زوجة ( ايه رايك فى العنوان الجديد دة )

ومش عاوز اقول كانى امام مراية بشوف

نفسى ..كل الاسر المصرية كدة

بس يمكن احنا احسن بنركب توك توك ب

2 جنيه ونتفسح شوية ولا زحمة

الميكروباس شكرا لك سؤالك

حمادة زيدان يقول...

ههههههههههههههههههههههههههههههههه


والله جوزك عنده حق يقعدك في البيت , الحمد لله أنها رسيت على خير

دمك سكر والله

ههههههههههههههههههههههههههههههههه

mostafa rayan يقول...

ادي جزاة اللي يسمع كلمة مراته تقولها
اشكرك جدا علي هذا البوست فقد علمني اني لما اتجوز في المستقبل مااسمعش كلام مراتي تهائي
سلام

Alkomi يقول...

شوفي
ماحدش بيتعلم ببلاش

عموما برضه الممنوع مرغوب يعني انتي مثلا عشان مش بتخرجي فالخروج بالنسبة لك مهم
بينما القعدة في البيت في الحقيقة اكرم

و عموما لما تطلبي اطلبي طلب جامد

انصحك بتمشية في اسكندرية عالكورنيش في عز الشتا

رومانسية حالمة راقية و تستاهل

بوست حلو واول زيارة

بس زعلت عالبوست اللي فات اللي بتتريقي فيه على اغنية يا حبيبتي يا مصر

تحياتي

بنت مصريه يقول...

غزالى
لا خلاص حرمت
شكرا لمرورك

استاذ حسن
اهلا بيك
بجد عنوان جميل
والله التوك توك اريح هههههههههههه
اتمنى تنورنى دايما

بنت مصريه يقول...

حماده زيدان
ربنا يخليك يا رب
اه والله عنده حق يقعدنى انا امنت بكده
اتمنى تنورنى دايما

مصطفى الريان
ليه يا مصطفى بس
على فكره بقى الستات اذكى م الرجاله
بس سا عات يعنى مش كتير الذكاء دا بيقلب بهطل

محمد الكومى
اول مره تشرفنى يا استاذ محمد
ويا رب متكنش اخر مره
يعنى انا ف مصر عايزنى اقول لجوزى نخرج نروح اسكندريه عشان نتمشى عالبحر انت عايزو يقتلنى

يا استاذ محمد انا مش بتريق على الاغنيه بالعكس انا بحب شاديه جدا وكل اغانيها
بس لو لاحظت عنوان البوست هتلاقيه
اغنيه يا حبيبتى يا مصر المعدله لسنه 2008
الاغنيه دى وقت ما اتغنت قلبت الدنيا وكنت عنيك بتدمع وانت بتسمعها
لكن لو اتقالت دلوقتى عنيك هتدمع؟
طب ما الاولى تدمع على الناس الفقرانه
اللى مش لاقيه تاكل من زياده الاسعار
الشباب اللى مش لاقى شغل
واللى مش عارف يتجوز
انت مفهمتش المعنى اللى انا اقصده انا عدلت الاغنيه عشان تبقى لايقه عالوضع اللى احنا فيه
والا هتبقى نفاق وضحك على الدقون لو اتغنت دلوقتى زى ما هى
انا متريقتش عليها انا فقط عدلتها
شكرا لمرورك واتمنى تنورنى دايما

حبيبة الروح يقول...

ههههههههههههههههههههههههههههههههههههههههههههههههههههههههههههههه
بجد انتي تحفه
انا وماما عقدنا نضحك ضحك
ما شاء الله دمك خفيف بشكل
بس حلو اوي موضوع المدعو راجل دي
هو انتي متعرفيش مش في رجال كتير ماتو في 67 الباقي ناردا ما يكون بخير اللهم ما اكفيان الشر
انا مش بقول علي كل الرجاله
هو في رجاله رجاله
بس نادرين
بجد انا سعدت بمروري علي مدونتك واني قريت كتباتك الي دمها خفيف دي
بس نصيحه المرة الي جايه بلاش النيل
لحسن زوجك اخر ميتخنق من المركاب والي فيها يروح موقعك
هههههههههههههههه
انا بهرج ربنا يخليكو لبعض
سلام يا قمر
وهستني زيارتك

مي

أسير الجراح يقول...

وانا اهو جيت


مدونتك جميلة جدا والله وانا سعيد بتعليقك بجد اجمل حاجة فى الحياة الحب


بس الاهم من الحب

الاخلاص بين الحبيبن


ليكى منى اجمل تحياتى



اسير الجراح


دة ميلى لو حبيتى تكلمينى

weka_weka49 ياهو مش هوت ميل

مدحت محمد يقول...

هههههههههههههههه

رحلة فى النيل مانيلها

خليكى فى الطبيخ يابنتى احسن
من خرج من مطبخه الى النيل
سمع الاغانى البايظة

بس بجد عاجبنى زوج حضرتك جدا

حاسس انه شخصية مثالية

ربنا يخلهولك يارب

زوج رومانسى وزوجة خفيفة الدم
ماشاء الله
هنزل البوست كمان يومين ان شاء الله
اسمه ياستى بالتكويس
بالتكويس يابلدنا ياحلوة بالتكويس
سلاموز بقى

Unknown يقول...

الحمد لله انك خرجتى واستمتعتى
وحاولى يكون لكم يوم كل اسبوع تخرجى فية خروجة عادية
ويوم فى الشهر تكون الخروجها فيها
شئ جديد وغير عادى لتجديد النشاط

مدونة حلوة وبالتوفيق يارب

موناليزا يقول...

المهم انك خرجتى ورجعتى بذكرى حلوة تحكيهالنا

Mafrousa يقول...

هههههههههههههههههه
هههههههههههههههه
اغنية (خش عليه) هههههههههههههه
بس تصدقى انتى جادعه برضه انك عرفتى تأثرى عليه و تخليه يخرج
ههههههههههههههههه

Butterfly يقول...

أولا :أنا برده بكره الهوايه دى ههههه
ثانيا : انتى اللى جبتيه لنفسك انزلى اشتغلى وكبرى دماغك ههههههههه
لا لا بهزر اكيد انت اللى اختارتى
بالنسبه بقى لموضوع الأحبه اللى على النيل دول ف أنا مش عارفه هى الناس بتضحك على بعض ليه أنا متأكده انهم بيتسلوا وبيضيعوا وقت , أنا عن نفسى بتضايق أوى لما بشوف المناظر دى وكمان فى الجامعه كتيير .
تحياتى

صبري سراج يقول...

انا معترض على مقارنتك للبنات اللي بترقص كويس بدينا لأن دينا اساسا ميتعرفش ترفص.. انا بحس ان عندها الدسك.. ربنا يشفيها

اسلوبك كالعادة بيقلبني من الضحك.. بجد زي العسل

rtrcbh يقول...

السلام عليكم ورحمه الله وبركاته
هو اليوم ظاهر من بدايته

هو اخبرك من الاول بلاش مركب

لكن هنعمل ايه متعملتيش من المره السابقة
اعتقد انك عمرك ماهتفكرى مرة اخرى فى ركوب مراكب تانى من هذه النوعية اليس كذلك ؟
وجه الميكروبص كملها
ههههههههههههه
هى وشوش على مايبدو

الميكروباص يقول...

لفت نظري انك بتقولي لزوجك العزيز لو سمحت"
اييييييييييييييييييييييييييه ده
ده الزوجات بيقولوا كلمه واحده
يا تعمل اللي انا عوزاه - وبالامر- يا اما هاتضرب بوز في وشه لمدة يومين أو ثلاثه أيام ويبقى نهارنا أبيض
...
وطالما لقيتي كل المراكب فيها رقص، يبقى بلاش تركبي مراكب تاني وخدي اي حخاجه تانيه او اخرجي في اي مكان تاني، اما بالنسبة للشباب وا لشابات اللي بيرقصوا لأنها فرصه، الشباب قاعدين والدنيا هيصه وكله مباح،

احسن حاجه في الموضوع انك رجعتي البيت
حد ينزل من بيته اليومين دول
ده الشوارع مبهدله
كفايه ان بيمشي جنبك مجانين

Desert cat يقول...

اتبسطى يا ستى اديكى غيرتى جو وشوفتى موزز ماسين فى ايد بعض وبياكلوا بعض حمص وكمان واحد بيرقص على نغمة خش عليه الا هو كان فى خناقه ولا ايه خش عليه دى كمان هههههه

نور الدين (محمد الجيزاوى) يقول...

والله انا حاسس بزوجك جدا
واكتر حاجة مخوفانى من الجواز هو خنقة الزوجة وكل شوية عايزة اخرج ما انت عاييش حياتك وانا قاعدالك هنا دى حتى الشغالة بتخرج
ييعنى انا محصلتش شغالة ولا غسالة
الا اخر الاسطوانات الزوجية المزعجة
سلامى لزوجك
.......
وقولى له هناك من يتعاطف معه بشدة
اما حكاية الموزز فانا كرهت النيل من البنات اللى غيره المثل بدل من جوة هلالا ومن جوة يعلم الله
بقى من فوق هلالا ومن تحت يعلم الله
حجاب الراقصات
.........
ابقى زورينا وشرفينا باطلالة
واعتذر للاطالة
........
نور الدين

غير معرف يقول...

هههههههههههه

اللهم لا شماته

فكرتوني بفيلم عوكل لما كانت بتقول " نحس من يومه و لا هايلاقوه"

ههههههههههه

واحد بيدور علي قلبه يقول...

طب كويس انها جت علي كدا احنا مبنجيش بالطريقه دي اخنا عايزين الحنيه علي شوية سياسه علي حبة حاجات كدا يعني بس لو كل الخروجات كدا محدش هيقول تاني عايز اخرج.ونورتي مدونتي المتواضعه.

سفينة يقول...

بدعوكي لرحله نيليه في سفينتي عشان بس تعرفي الفرق.
............
دعوه خاصه من

القبطان شخصياً
...................
خالص تحياتي واتمني تنوريني

HANY YASSIN يقول...

السلام عليكم
خفة دم جميلة جداً
بجد قصة ممتعة واسلوب رائع يميز كل ما اقرئه لك
خالص التحية
هانى يس

استراحة محمد يقول...

اول واحد من حقه يقرا البوست ده ويضحك ويتريق عليكى اربع تيام متواصلة هو جوز سعادتك
ده حق الموعين اللى سبتيها فى المطبخ من غير ما تحميها
ههههههههه

دكتور لغة العيون يقول...

ههههههههههه

جامد البوست

تسلمى علية


تحياتى

goodman يقول...

يا خبر ابيض
اية كل دة
دى ولا رحلة السندباد البحرى
بس مين عبدة لاقرع؟؟؟

فى حب الله يقول...

ده يعلمك انك متفكريش تقولي اخرج تاني او تختارى انتي مكان الخروج وتسيبيه هو يفكر ويقرر علشان لو الفسحه بردك طلعت حلوه ذى ديه يبقي هو إلى غلطان وفى الأخر تبقوا تجيبوا حد يفكر لكوا فى الخروج والمكان المناسب إلى ممكن تخرجوا ليه
بس بجد اسلوبك فى الكتابه هايل جداً انا عن نفس فضلت اضحك وكل ما افتكر الأغنيه العظيمه خش عليه اضحك اكتر ربنا يرحمنا برحمته من إلى بنشوفه الأيام دى

mregypt7 يقول...

لا مؤاخزه يا مصريه هاعطلك شويه
انتى عارفه زنقه الامتحانات
والله انا مااقدرش اتاخر عنك فى الرد بس بجد
مشغول اوى على فكره انا هخلص يوم الاتنين
وهقرفك هاخليكى تزهقى من تعليقاتى
لحد ما تطردينى
وابقى اسمعى كلام جوزك
وما تركبيش المركب بليل عشان ما يشغلش اغنيه شعبيه وتطلع المزه ترقص
غيرى عليه شويه
بس احمدى ربنا انهم ماشغلوش العبد والشيطان
مع خالص تحياتى
الباش مهندس بو حميد

كوارث يقول...

البوست هايل
ضحكت حتى استلقيت على قفاي من تعبيراتك الساخرة وخفة دمك
عبده الاقرع بالمناسبة واحد من علماء السلف بيطلع على قناة الناس أحيانًا .. مش مطرب خالص .. تلاقيه كان مشغل عبد الباسط حموده بتاع انا مش عارفني .. انا خفت مني .. انا مش انااااا.. ويا بت جملك هبشني
ولا المبدع الكبير ممدوح الليثي
لو تشرب يا منيل
هتحس انك عيل
اجوجوجوجوجوجوجوجوجو!
رائع
استمري
ايه الشناط ده؟

Mero.. يقول...

ههههههههههههه
لا اله الا الله
هي كل فسح المتجوزين بتبقى كدا؟؟
هتعقديني على فكرة..

ربنا يفرج زهقك
تحياتي:)

Tamer Nabil Moussa يقول...

هههههههههه


انا لو من جوزك ابحثك فى البيت ومفيش خروج ههههههه

ماالرجل قال بلاش لازم نحبكها يعنى هههههه


شوفى بعد كدة عايزة تغيرى جو تطلعى فوق السطوح وشمى الهوى وخدى دور شمسههههه

تحياتى

بنت مصريه يقول...

مدينه الملائكه
مى حبيبه قلبى مرسى على نورك يا قمر
وكلامك الجميل ف التعليق
وانا فرحانه جدا انى قدرت اضحكك انتى وماما
لان دا هدفى من المدونه انى اضحك الناس
والحمد لله انى قدرت ارسم ابتسامه على شفايفكوا
اتمنى تنورينى دايما

امير الجراح
شكرا على تعليقك واتمنى تنورنى دايما

مدحت محمد
زوج رومانسى وزوجه دمها خفيف دويتو هايل مش كده
شكرا عالتعليق يا مدحت واتمنى تنورنى دايما

نهر الحب
لا خلاص انا حرمت
مرسى لتعليقك

موناليزا
عندك حق يا موناليزا
مرسى يا قمر واتمنى تنورينى دايما

واحده مفروسه
عرفت ااثر عليه اه بس جه فوق دماغى ف الاخر
مرسى عالتعليقواتمنى تنورينى دايما يا قمر

بوتر فلاى
ازيك يا قمر
لا لا لا شغل ايه ف الحر ده
الهوايات ارحم ههههههههههههه
اه بالنسبه للاحبه فأكيد بيتسلوا
والا مكنوش قعدوا القعده دى

بنت مصريه يقول...

صبرى سراج
مهما كمان كان عندهم ديسك يا صبرى
ربنا يخلييك يا رب ومرسى عالتعليق

ابو يحيى وادم
وعليكم السلام
زالله احنا حرمنا خلاص
ومش هنخرج تانى ههههههههههههه
بس مفيش ف الاسلام حكايه النحس والوشوش دى
لان كل حاجه قضاء وقدر ولا ايه
مرسى لمرورك واتمنى تنورنى دايما


لورنس العرب
هههههههههههههههههه
عندك حق والله يا لورنس
بس كلمه لو سمحت دى مسكنه عشان ينفذلى اللى انا عايزاه اصلكوا مبتجوش غير بكده
ههههههههههههههههههه
مرسى لمرورك

ديزرت كات
اهى كل الاغانى الشعبيه دلوقتى بقت خناقات
ههههههههههههههههههه
دا انا اتبسط اخر انبساط والله
هههههههههههههههههههههه
اتمنى تنورينى دايما يا قمر


نور الدين
الله يسلمك بس مش للدرجه دى يعنى احنا كمان مخنوقين
اما ف حكايه المزز فعندك حق والله
اتمنى تنورنى دايما

غير معرف يقول...

انا بعلق بس اعجاب بيكى وبكلامك الحلو اللى بتقوليه عن حبيب قلبى اخويا الدكتور محمد بحبه جدااااااا واسف انى مقرأتش الموضوع لانى فى امتحانات ومش بقعد كتير بس مبسوط بتعليقاتك عند الدكتور..... اخويا يعنى واوعدك انى هتابع عندك بعد كده بس الاسبوع ده يعدى وانا هزهقك من تعليقاتى وهتابعك على طول اخوكى فى الله محمود(دودو يعنى) واخر كلامى احلى سلاماتى

Unknown يقول...

دى رحله تمام اوى اولها خش عليا خش و اخرها مكروباص انفجر لالا كده كتير دنتو لو كنتو روحتو جنينه الحيوانات كان احسن...هههههههه



تحياتى

فى حب الله يقول...

لا اعلم اذا كان هذا تجاهل منك ام عدم تقدير لقد دخلت إلى مدونتك الجميله وقمت بالتعليق فيها أكثر من مره وفى كل مره تتجاهلي تعاليقاتي ولا اعلم لماذا على العموم هذا لن يغير من رأي بالمدونه أنها جميله جداً وانك اسلوبك فى الكتابه اكثر من رائع شكراً لك

غير معرف يقول...

انتي ممشكلة
انا قاعدة في الشغل عمالة اقراها وماسكة نفسي عايزة اضحك بصوت عالي مش عارفة
شكلي اما اروح البيت هقراها بمزااااااج
بس بجد ضحكتيني
ياللا ياللا اكتبي على طول وهاجي تاني،، هاجي على طول
عندكو شاي بلبن؟

فى حب الله يقول...

انا حبيت احط ردى على تعليقك فى مدونه حب الله فى نفس المكان إلى انا علقت فيه على عدم الرد وباشكر ليكي سرعه الرد والاهتمام
اما بالنسبه للجواز فانتي لسه فى المراحل الأولي لسه بقي لما يكرمك ببنوته ذى بسنت بنتي 6 سنين ومورياني الويل ربنا يكرمك ويهبك الذريه الصالحه بأذن الله

بنت مصريه يقول...

الضاحك الباكى
ههههههههههههه
مرسى على تعليقك واتمنى اشوفك دايما

واحد بيدور على قلبه
عندك حق والله
خلااااص حرمنا
نورتنى
شكرا على التعليق

هانى يس
ربنا يخليك يا رب دا بس من زوقك
شرفتنى ونورتنى ويا رب متبقاش اخر زياره

استراحه محمد
هو يعنى مستنيك يا محمد مهو اتريق من يومها
ماشى ماشى كلكو عليا
شكرا عالتعليق


انا ميين
تسلم انت عالتعليق نورتنى


جوود مان
شوفت بقى جبتلك السندباد لحد عندك اهه
وبعدين انا مش قولت محدش يسألنى مين عبده لقرع ده
اهى بلاوى بتتحدف علينا
وقال مطربين قال دول مصدعين مش مطربين
اشكرك عالتعليق

فى حب الله
مرسى يا قمر عالتعليق وربنا يخليلك بنتك يارب
ويارب تكونى مش زعلانه منى
وعالعموم انا اسفه انى مقصره ف حقك
وحق اى حد اتأخرت عليه
خطأغير مقصود يا حبيبتى
سلااام يا قمر


مستر ايجيبت
بوحمييد
ربينا يوفقك يا رب
انا عارفه انى كل شويه بقومك من عالمذاكره
شكلك دحاح ياه
ههههه
خلاص يا عم توبه مش هقوله يخرجنى تانى
شكرا عالتعليق
يللا ارجع دح بقى
بالتوفيق


كوارث
ربنا يخليك يا رب واكون سبب فى اضحاك البشريه
وبعدين مين اللى انت بتتكلم عليهم دول
بشر زيينا كده
ههههههههههههههههههههههههه
مرسى عالتعليق

ميرو
العيب مش ف المتجوزين والله يا ميرو العيب ف اللى بره
ف الشارع
متتعقدش لا اتجوز متخفش على ضمانتى
شكرا عالتعليق


تامر نبيل مهو دا اللى هعمله يا تامر ان شاء الله
شكرا عالتعليق

دودو
اخوك دكتور محمد بوستاته جميله وكلها حكم بجد
وانا مبسوطه جدا انك بتعلقلى ويا رب اشوفك دايما انت والدكتور
وربنا يخليكوا لبعش
عايزه اشوفك تانى بس بعد الامتحانات بقى

كرييم
والله عندك حق يا كريم اهو حتى كنا لعبنا مه الزرافه هههههههههههه
شكرا عالتعليق

مها ميهو
نورينى يا قمر
فى كل حاجه شاى بلبن
ورز بلبن وكل حاجه
ولو عايزه حاجه مش عندنا ننده الصبى يجيبلك من بره ههههههههههههههههه
شكرا عالتعليق يا قمر

شمس يقول...

ههههههههههه

مراتى عملت كدة حدفتها فى النيل ومشيت هههههه

انا مدون جديد

وعايز تشجيع

تحياتى

فارس بلا جواد يقول...

بجد أسلوبك فظيع .. وعندك خفة دم ما شاء الله .. وجوزك المفروض يحمد ربنا انه متجوزك .. تلاقيه مش بيبطل ضحك
بالتوفيق دايما

بنت مصريه يقول...

شمس
ليه بس كده الاذيه دى
ربنا يوفقك

فارس بلا جواد
ربنا يخلييك يا فارس والله هو اللى بيضحكنى ههههههههههههه
شكرا عالتعليق
واتمنى تنورنى دايما

Mona Shereif يقول...

احمدى ربنا انك خرجتى
هههههههههههههههههههههههههههه
تعرفى بقى انا عمرى ما خرجت مع محمد خاااااااااالص
ومخطوبين بقالنا 9 شهور
عاتشى خالص
اصل انا بصراحه عنيا بتبقى تطلع على اى اتنين مع بعض فقلت لا هو انا الناس هتتفرج علينا كده
ابدننننننننن
هههههههههههههههههه
وهو بصراحه ما صدق
كله خيييييييييييير الحمد لله

عايش... ولكن !!!! يقول...

حلوه الرحله دى
ولا رحلات بطوطه فى زمانه
هوايات ايه بس مهو القعده فى البيت هوايه بردوا
تحياتى
علاء

الميكروباص يقول...

أنا أقولك ايه اللي ممكن يخلي الراجل ينفذ الطلب
ومن غير " لو سمحت"
هي الزوجه تطلب الطلب
ولو لقت أو شعرت ان الراجل مش هاينفذ
هي بس تضرب بوز
يبقى كده نهارنا مش معدي
فيضطر الرجل إلى تنفيذ الطلب على الفور
اصحابي بيعملوا كده
وبيشكوا من ضربة البوز دي أشد الشكوى
ومال انا قاعد عازب ليه

Unknown يقول...

يا اجمل بنوته انتي مش محتاجه تطلبي زيارتي
وانا ايش اكون
انا اساسا بحس اني لازم اجيلك واقرا كتاباتك
غصب عني بتشد لمدونتك
بس والله مشغوووول لحد شعر راسي
وهزهقك مني في الصيف

تسلمي دايما يا قمر
ايه الصور العسل دي

Unknown يقول...

حلوووووووووووووة بس انت مؤدبة اوى يعنى وبتقولى لو سمحت وكدة دة المفروض يخرجك كل يوم على الادب دة... المهم باة ايه رايك فى الرحلة؟؟ طبعا قدامك بتاع حسبة12545896 سنة عشان تتجراى تطلبى خروجة تانى بس ولا يهمك ان شاء الله المرة اللى جاية هتكون احسن والست هتوافق تقوم ترقص على طول من غير ما تغلبكم!!!!
زيارتك شرفتنى واتمنى تكرريها على طول وانا كمان هاكررها على طوووووووول

safa7_karmooz يقول...

ههههههههههههههههههههههههههههه

ده كده مشفش الا 1% من النيل بتاع الغلابة...

اقولك اتمشوا عند الزمالك ...النيل من هناك انضف ...

او اقلبوا البيت نيل واهو اوفر واسهل :D

ادم المصرى يقول...

هههههههههههه

جميل اوى يقمر بس ادب جميل منك واحترام جامد طحن لجوزك

على فكره انا نزلت جزأ تانى من اميره بكل النساء ياريت تشوفيه

tamer.sala7 يقول...

الحمد لله معندناش نيل ومعندناش شرايط فيها ناس من غير زور

بس موضوع الحبيبة اللي علي البحر عندنا ده اكتر بكتير اوي من النيل

ممكن بعد كدة تبقي تاخديه وتروحي مكان قريب شوية مش لازم النيل وبلاويه واللي بيجرا فيه

•√أريـ السمر ـج√• يقول...

رحلة ممتعة جدا .. و كل كلمة منك بتدل على السعادة اللى كنتي بيها :)

دمتى بكل خير و اسعدنى مرورى

wael يقول...

مارسي هواياتك براحتك في البيت وسيبي الراجل يشتغل عشانه شقيان
بوست رائع وربنا يوفقك
تحياتي

المـــفـــــــقــــــــوعـــــة مــرارتـهــا يقول...

انا عاملة ذيك اي فسحة ترضيني لدرجة اني كنت ساعات اعيط انزل عشان انزل اشرب عصير قصب آخر الشارع وأرجع
ماهما الرجالة مش حاسين بزهق ستاتهم خالص

امل يقول...

السلام عليكم
ازيك يا بنوته هوه انا معلقتش قبل
كده والا ايه انا جايه اشوف ردك على
تعليقي ملقيتهوش ههههههههههه شكلي
فقدت الذاكرة ان شاء الله الرحلة
تتعوض المرة الجاية وتبقى احلى من دي
خالص تحياتي

صحفية روشة يقول...

يا لذيذ يا رايق
---------------------------
نزلت بوست بمناسبه عيد ميلادى تعالولى هنونى

alshared يقول...

حد ينزل النيل وفي مركبه من أم 2 جنيه

بعيدا عن كل حاجه
أكيد الزوق العام رايح في داهيه

وأكيد كمان أن الناس بقي عندها لامبالاه بأي حاجه حتي بأرواحهم

علي قد ما ضحكت علي قد ما حزنت

تحياتي

حمادة زيدان يقول...

فينك

من فترة كبيرة من بنشوفك في التدوين

لعل المانع خير

غير معرف يقول...

متهيألي حتي الفسحة ف مصر بقت حاجة م رابع المستحيلااااااات
عمار يا بلدنا عمار
سلامي

zOzO يقول...

ونعم الرحلات والله
مفيش احسن من كده


هههههههههههه
ههههههههههههههههههههه


انا الحمد لله كويسه وخلاص ان شاء الله هخلص يوم الاربع
سلامي ودعواتي ليكي كتيررررررر

بنت مصريه يقول...

سومتايمز
هههههههههههههههههههههههههههه
اه والله الناس دى بيبقى عليهم العين
دايما هههههه
اه طبعا ما صدق وفرتى يا بنتى
هههههههههههه
نورتينى يا قمر


عايش ولكن
والله يا علاء انا خلاص حرمت هوايه بقى مش هوايه مش مهم
نورتنى

لورنس العرب
لا يا لورنس فيه رجاله مش بيهمهم ضرب البوز
صدقنى المسكنه مفعولها اقوى

برقش
الله الله الله
ايه دا كله
ربنا يخليك دا من زوقك
وانت كمان الايدل شو بتاعك حلو قوى
ربنا يوفقك يا رب وتفضى بقى


انجى
لا يا اوجى حطى عليهم عشرميت سنه كمان
ههههههههههههههههه
اتمنى تنورينى دايما يا قمر

صفح كرموز
هههههههههههههههههههههههههههههه
اه والله اسهل اهو بالمره نغرق ونخلص
كل ده وواحد ف الميه
هو فيه ايه اكتر من كده

نورتنى

ادم المصرى
دا مش ادب يا ادم دى مسكنه بعيد عنك
هههههههههههههههههههههه
يشرفنى ازورك




تامر صلاح
على ضمانتك يعنى يا تامر
هههههههههههههههههههه
نورتنى



اريج السمر
بصراحه رغم كل ده كنت فرحانه جدا
وانا كمان اسعدنى مرورك

امل
لا يا اموله معلقتيش والا كنت رديت عليكى معقوله برضه مردش على امل تيجى دى بالزمه

تشى
ان شاء الله

وائل
حاضر هسيبه يا وائل
انت تبعه وللا ايه
ههههههههههههههههه
ربنا يخليك يا رب ومرسى على نورك


مفقوعه مرارتها من حماتها
اه والله يا اختى
اخبار فيفى ايه ياختى
هجيلك قريب


صحفيه روشه
سيفن اب
هههههههههههههه
كل سنه وانتى طيبه يا قمر هجيلك

الشارد
هههههههههههههههههههههههههههههههههههه
ما احنا كننا شاردين بقى يا شارد
عايزين نتفسح وخلاص اى فسحه
هههههههههههههه
نورتنى

حماده زيدان
مرسى لسؤالك يا حماده مفيش حاجه
انا كويسه
وهنزل حاجه قريب


حسام المتيم
اه والله عمار
هههههههههههههههههههه
نورتنى

زوزو
حمد الله عالسلامه يا قمر
منتظرينك يا عسل
ربنا يوفقك

شريف طلال يقول...

من خرج من داره اتقل مقداره
و ادى جزات الى ميسمعش كلمه جوزه يقولها
ههههههههههه
فطستينى من الضحك
تحياتى

(احمد سكر ) يقول...

السلام عليكم

ازيك ياانجى

اولا بعتذر عن التاخير علشان مكنتش فى مصر

مممممممممم

انتى من عائلة البوهى

يعنى قرايب

لاء تعالى بئه نشوف مين ليه فين

ههههههههههههه

دا ايميلى

sukar_184@yahoo.com

sukar_1974@hotmail.com

تعالى نشوف انتى منين

داهيه لنطلع اخواات فى الاخر

هههههههههههههههه

تحياتى اختى الفاضله

احمد

semsema يقول...

اولا بعد الشر عليك من التخليل

بس بصراحة من اللى قريته ده

خللى اهون

يالا عموما اهى خروجة وعدت
عقبال الجايين لو انتى لسة مااعتزلتيش الخروج

تحياتى يا جميل

إيثار يقول...

عشان بعد كده تسمعي كلام جوزك
و عشان هو يتعلم ميتاثرش بلمعان العنين
و الصوت الرقيق


مع تحياتي
عاشقة الحب

صوت من مصر يقول...

رحله النيل اكيد مميزه
لكن خارج القاهره ولا ايه ؟

غير معرف يقول...

ههههههههه

موجة يقول...

مدونتك هايلة بجد
و البوست أكثر من رائع
انتي صادقة قوي على فكرة
بس بجد و نعم الزوجة
ههههههههههه

خالص تحياتي

على الزيبق يقول...

الدعوة لحظر الحزب الوطنى

لماذا لا نقوم بعمل حملة قومية من أجل حظر وحل ما يسمى بالحزب الوطنى
ولماذا لا نقوم برفع دعوى قضائية امام المحاكم المختصة
نتهم فيها الحزب الوطنى بأنه حزب يهدد الدستور ويعطل الدستور
وبأنه حزب يزور ارادة الشعب ويستغل ما لديه من سلطات ونفوذ من أجل البقاء فى الحكم لأجل غير مسمى


قد يقول قائل من الصعب أو من المستحيل أن يحدث هذا الأمر ومن المستحيل أن ننجح فى حظر الحزب الوطنى
وانا غرضى ليس حظر الحزب كأجراء قانونى .. وإن كان هذا ممكن .. ولكن غرضى هو مهاجمة هذا الحزب الفاسد الفاشى الفاشل المزور
مهاجمته قضائياً وشعبياً وإعلامياً
فلنتخيل سوياً هذا الخبر على صدر صفحات الجرائد وفى مقدمة النشرات الأخبارية
قوى حزبية وشعبية واعضاء معارضين بمجلس الشعب المصرى
يطالبون بحظر الحزب الوطنى الحاكم ومحاكمة اعضائه

(احمد سكر ) يقول...

مردتيش عليا ليه ياانجى

؟؟؟

Desert cat يقول...

اعزائى المدونين والمدونات
تم اليوم اذاعة بعض من الكومنتات التى جائت فى مدونة البرنامج الإذاعى انت تسال والكمبيوتر يجيب
http://netonradio.blogspot.com/
للاجابة على السؤال المطروح
ومن هذه الكومنتات
بنت مصرية او انجى البوهى
محمد الكومى
سالى
روفى
عبده الرايق
تابعوا المدونة يمكنكم تحميلها من الارشيف
اهلا ومرحبا بكم دائما اصدقاء للبرنامج
واتمنى التواصل
تحياتى للجميع

مدحت محمد يقول...

مستنيين الجديد

على فكرة والله كل شوية اقراها وكل مرة اضحك بصوت عالى

أسوور يقول...

على فكرة انتى كاتبة ساخرة من الدرجة الأولى
برافو بجد

فى جريدة الأسرة العربية العدد بتاع الأسبوع دة اللى صدر يوم الإثنين نازل ليكى بوست منشور فى الصفحة الثانية
فى باب مدونات
تحت عنوان
موجز الأنباء لسنة 2090
تحياتى لك

Unknown يقول...

طبعا مع ان الخروجة باظت بس اهو على الاقل شمتى شوية هواء
تحياتى

zOzO يقول...

ههههههههههههههههه

احلي خروجه
طبعا
ابقي اقعدي في الييت احسن
ماهل البيت عيبه ايه ؟
مع شويه ترمس وفيشار


انا خلصت النهارده الامتحانات
وجيت عشان اطمنك الحمد لله

الميكروباص يقول...

لا يا مدام صدقيني
ضرب البوز ده له مفعول السحر الرجاله
أصل الراجل يا عيني بيبقى تعبان من كله
ومن المفترض ان الواحد بيرتاح في البيت
ما بالك لو المدام كمان ضاربه له بوز- يعني قرفانه منه-
يبقى يروح ينتحر احسن

محمد حمدي يقول...

الخروج فى مصر بقا محتاج فرد صاعقه مش مواطن عادى الصراحه

تحياتى على البوست الجميل وخفه الدم فى سردك

أية الشقية الشعنونة يقول...

انا اول مرة ادخل عندك بس اكيد هزورك كتير لان بعشقك يوميات الزوجة ال
احم
ههههههههههههههه
حمد لله على السلامة يا كوكو
عشان تعرفى
وتحرمى
تانى مرة تبقى تسمعى الكلام
ههههههههههههههههههه
بس بجد صعبتو عليا
بس احمدى ربنا انكم رجعتوا بالسلامة
تحياتى

ادم المصرى يقول...

ازيك يا بنوته انا بدعوكى لقرائت الجزاء التالت من اميره بكل النساء اتمنا تعليقك

Heart Beat يقول...

و الله فعلا رحلة النيل دي ما انيلها

فكرتيني بأيام زمان

ايام ما كنت بحب اركب المراكب النيلية دي و كانت اخر مرة شبيه باللي حصل معاكي كده فمن ساعتها ماعملتش العملة دي تاني

المهم بقى المرة الجاية بلاش مراكب ممكن تتمشوا على النيل و بس

عًٍمًرٌٍوٍ آلنْوٍبٌَِى يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه والله انا مش قادر امسك نفسى من الضحك
بس هقول اية على رأيك دى اخرت الى مش يسمع كلمة جوزه

سفينة يقول...

23وحشتينا كتير واتمني يكون المانع خير

بجد احنا كدا قلقانين عليكي

ياريت تنزلي بوست في اقرب وقت وتطمنينا
.......
واتمني تنوريني كمان،خالص تحياتي

قبطان

Geo Amr يقول...

بجد قصة جميلة وتعبر عن واقع مش فى حياتك انتى بس ولكن فى حياتنا كلنا بجد والله انا بكون حزين لما اروح على الكورتيش وتلاقى كل ولد مع بنت طيب فين الاهل وكمان موضوع الاغانى بجد خلاص بقى مستوى زفت فى الاغانى وكلمات بجد رغم انى الواحد شاب بس بينحرج لما يسمعهاوربنا يهدى وبالنسنة للراجل الى كان عايز زوجنة ترقص بالعافية هى دى الرجولة الحديثة
وفى الاخر كل خروجة وانتى طيبة

مشربية يقول...

اولا طبعا لازم اقول ربنا يخليكم لبعض حقيقي و يارب ديما تكونوا مبسوطين و شايف كل كلمة بتقوليها في كل موقف حاسس قدام شاشة سينما و بشوف فيها ال shotat دي و جوزك بيبصلك و انتم بتبتسموا لبعض و انت بتتمسكني و هو فاهم بس اجمل حاجة في الدنيا ربنا يارب يكرمكم :D
طبعا بالنسبة لاغنية في حب مصر رصدك لحال الشباب و حال الدنيا و كل دة حصل قدامك في المركب اللي انت كنت فيها مش محتاجة تعليق :D
و زي ما قال منير "ياعيني عليكي يا مصر "
الف شكر يا انجي

مشربية يقول...

نسيت اقولك ان اختياراتك للعناوين تحفة و تشد :D

محمود حسن العدل يقول...

هههههههههههه
تصدقى وتامنى باللة انتى فعلا عسل
واللة انتى عليكى اسلوب فى الكتابة وحكاية القصة جميل جدا جدا
دى اول مرة ادخل على مدونتك
بس اوعدك انها مش هاتكون اخر مرة
لانى فعلا بموت من الضحك لانى بتخيل الموقف بجد لان انتى عندك القدرة الغريبة اوى على الوصف بطريقة جنان
تحياتى

بنت مصريه يقول...

متشكره ليكو كلكوا
يا اخواتى والله انا بعتبركوا اخواتى

Maha Shahen يقول...

مقدرتش امسك نفسى من الضحك ههههههه حتى وانا بكتب التعليق
ما شاء الله عليكى اسلوبك فظيع جميل جدا في الكتابه واكيد في خفة الدم
بس انتى كدا كشفتى بعض من اسلحة المرأه ليه كدا خلى في ناس تعيش وتستفيد هههههههه
ربنا يجعل ايامك كلها سعيده ودايما تكونى سبب فى رسمة البسمه على شفايفنا وأكيد سعادة قلوبنا
تقبلى تحياتى
نور

بنت مصريه يقول...

نور شاهين
انا مش عارفه اعلقلك يا نور الظاهر ان النت فيه حاجه
عموما التاج بتاعك حلو قوى يا قمر

hi5