.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الاثنين، 15 ديسمبر 2008

مكافئه نهايه الخدمه .......لبوش ..........الضرب بالجزمه

وطى وطى ...ما احنا ياما وطينا
ازيكوا يا جماعه.......... اتمنى تكونوا بخير ...... (اكيد طبعا بخير )هههههههه
اكيد عرفتوا موضوع البوست من العنوان والصوره .....وهو حديث الساعه من امبارح باليل
.وهو الحدث اللى اسعدنى انا شخصيا ......... (بقيت هلمس السقف من كتر السعاده والله)
ودا لما شفت ف التلفزيون وتحت عنوان (خبر عاجل) صحفى عراقى يدعى (منتظر الزيدى) .......والذى سميته انا بعد الواقعه (البطل منتظر)
هذا الصحفى الذى استحضر كل غل العرب من هذا المدعو بوش ..........وقام بأخذ الثأر لنا جميعا_ نحن العرب _
من هذا البوش
فقام الصحفى فى غفله من بوش والمالكى.............ورمى بوش بحذائه
ههههههههههه....بصراحه يا جماعه انا حسيت براحه نفسيه غامره بعد ماشفت بوش بيتحدف بالجزم ...........واظن انتو كمان حسيتوا بنفس الراحه النفسيه
وبرغم ان بوش مامتش او حصلت ليه اى اصابه ..........بس فرحت انه.. اتهان ..وان فيه ولو واحد من العرب عرف بوش مقامه وحسيت ان ده اللى كان لازم يحصل من ساعه ما تولى بوش رئاسه امريكا ..........وبدء تحكمه ف البلاد العربيه وحكامها وشعبها ك (قطع الشطرنج)
ولكن قلت فرحتى لما لقيت هجوم عنيف جدا من رجال الامن العراقيين على الصحفى (البطل منتظر )....واللى المفروض يكونوا ف صفه
سبحان الله
ويبقى السؤال
ما مصير الصحفى (منتظر الزيدى )؟
هل سيكون سجن ابو غريب مكانه ؟
ام ان من سيحاكمه سيكون لديه شىء من الاحساس ...........ويحكم له بالبطوله وليس التعذيب والاعدام ؟
انى اطالب......... انا وغيرى_ كثيرين_ من الشعب المصرى والعربى ......بالافراج عن هذا الشاب الصحفى البطل (منتظر الزيدى )
واريد ان اوجه (رساله) لمن سيحاكمه .....وهى رساله تخيليه .........لعلها تفيد هذا الصحفى فى موقفه البطولى
تخيلوا معى هذه القصه............
جاءك فجأه غريب من بلاد غريبه ............وجاء بكثير من الرجال الاقوياء والقنابل والزخيره (اى جاء للحرب )
واقتحم عليك دارك وقال لك (انا عارف ان انت عايز تقتلنى .........ومخبى سلاح ف بيتك عشان تقتلنى بيه وانا عشان كده
-هاخد ارضك
-هغتصب مراتك وامك واختك
-هموت عيالك
-هشرد اهلك
-هولع ف بيتك
-هنهب اموالك
-واخيرا هعدمك فى يوم عيدكم (الاضحى).........كما تدبحون البهائم
وبعد كل هذا ......وبعد مرور السنين من الذل والهوان جاء هذا الغريب يقول لاحفادك......(جدكم ماكنش عنده سلاح ولاحاجه .....
انا بس جاتلى معلومات غلط i am sorry )
والله دا واحد الجزمه شويه قوى عليه .....
مبروك يا بوش على جايزه نهايه الخدمه...................
اه نسيت ...........ومبروك ع الجزمه

هناك 31 تعليقًا:

HERO يقول...

اعارفة المفرح في الموضوع ان الجزمة دي اتحدفت على امريكا مش على بوش بس وعرفت الامريكان قد ايه احنا مش موافقين على سياستهم ناحيتنا

وعلى صعيد آخر ربنا يتولاه بقى الزيدي ويصبره على اللي هيحصله مع اني مش شايف انه المفروض يتحاكم اصلا لأن دي مش جريمة ويا ما حصلت وبتحصل وبنشوفها في مجالس كتير جدا بس لأن ده بوش ولأن ده عراقي فلازم هيبقى في عنصرية

تحياتي

بنت مصريه يقول...

عندك حق والله يا هيرو ربنا يتولاه برحمته
ومرسى على تشريفك ليه

إبن مصر يقول...

السلام عليكم
والله انا كمان فرحان جدا جدا
ومش زعلان من اللى عملوا الأمن العراقى لأن الولد ده لو كان فضل واقف على رجليه تأكدى ان الحيوانات اللى جايبهم معاه بوش كانوا ضربوه بالنار ولكن سقوطه جه مصلحه له ولكل العرب اللى رفع راسهم عاليا بإهانته لأكبر شخصيه مسيطره على كل العرب

وعلى فكره انا منزل بوست على الموضوع ده وده لأنى فعلا مبسوط من قلبى
تحياتى ولك الشكرعلى المرافعه اللى قدمتيها بالتخيل الجميل ده

تحياتى

البت المشمشية حلوة بس شقية يقول...

انا حاسة دلوقتى انا جزء من كرامتى رجعتلى

بنت مصريه يقول...

سون اوف ايجيبت
معتقدش انهم كانوا ممكن يضربوه بالنار
حتى لو كان واقف ف وسط الكم دا من الناس وف بلده كمان والا كانت هتبقى بجاحه م الامريكان عالاخر
وانا كمان فرحانه والله
بس ف نفس الوقت قلقانه جدا عالصحفى ده ربنا يستر
مرسى لتشريفك مدونتى

القطه المشمشيه
كلنا حاسين نفس احساسك يا قطه

مرسى لتشريفك ليا

سمكه واحده يقول...

اولا
اذيك يا بنتي فينك والله ليكي وحشه
ثانيا
ده رااااااااجل بجد واكد ان لسه في العرب رجاله ربنا يحميه يارب
انا عايزه اقلك كنت بتنطط من كتر الفرح ولينا جاره عراقيه معرفش اوصفلك مدي فرحها وشوفت شكلها استغربت جدا بجد كانت بتعيط ودموعها بتنزل من الفرح حاسه بانتصار

فعلا رغم انه عارف ايه اللي هيحصل بس مهموش والله جدع والله جدع
بس ياتري هيحصله ايه انا متأكده شخص بالجرئه دي اكيد لو كان معاه سلاح كان فرغه كله في جسم اللي ميتسماش
فعلا ميستهلش غيرها
مبسوطه جدا وفرحانه بس خايفه عليه ومش عارفه هيحصله ايه اكيد ربنا هينجيه ان شاء الله والعرب يبقي عندهم نخوه ويعملوا حاجه بدل ما الحرس والامن العرقي واللي كانوا بيشدوه من شعره جتهم قطع اديهم

Beram ElMasry يقول...

ابنتى . بنت مصريه
اغمى على بوش الكبير فى اخر حكمة وهو فى زيارة لليابان واعتبر الامريكان انها اهانة ولكن اهانة ( البطل منتظر ) لبوش الصغير لا يعلو عليها شئ
( واخيرا هعدمك فى يوم عيدكم (الاضحى)..) ولا تنسى ان انتقام الزيدى من بوش فى اجواء ايام العيد احسنت
تحياتى

Ahmed يقول...

لأول مره أحس أن بوش مش خسارة فيه الجزمة

الميكروباص يقول...

يا ستي الراجل انضرب بالجزمه بس بعد ايه
بعد ما خربها ومشي
و الاسبوع اللي فات قال ان المخابرات الامريكيه خدعته وان العراق لم يكن يملك اسلحة دمار شامل !!!
خلاص اللي حصل حصل
هو احتل العراق وعدم صدام وساب الحكم واللي جاي بعده هايكمل
واحنا يا عيني علينا زي ما احنا

حـــــ الــجــنــة ـــــور يقول...

السلام عليكم
إزيك يا قمر عارفة إني مقصرة إمسحيها في الجزمة المرة دي هههههه
بجد سعادة لا توصف ربنا مع الصحفي العراقي ده بجد أنا زعلانة على جزمة شخص عربي أصيل زي ده تيجي في وش كلب زي بوش ربنا على الظالم
دمتي بكل تواصل ياقلبي

تقبلي مروري وخالص تحياتي على البوست الجميل

hasona يقول...

أصبحنا في زمن غريب قوي
اصبحت الجزمة سلاح
وأصبح الحذاء بداية للمقاومة

الموقف ممكن يكون كسر أمريكا وعظمتها
يمكن نلاقي مواقف أكثر جرأة في الفترة القادمة
بس أشك انه الموقف يغير شئ من سياسة أمريكا في شئ
لكنه مجرد تعبير عن واقع بانه لا وجود ولا أمان لأمريكا ضمن بلاد العرب

وربنا يتولانا برحمته

تقبل تحياتي

3omda يقول...

والله راجل

حمادة زيدان يقول...

أنجي

والله من امبارح وانا في قمة سعادتي ... حسيت أنه الجذمة اللي أخدها بوش جذمة من كل العرب على أغبى رئيس أمريكي ... حسيت بفرحة كبيرة وأتمنى أننا كلنا نساند الصحفي البطل اللي صورته متعلقه في قلوبنا كلنا الان ... ربنا معاه يارب ويفك أسره

تسلمي ع الموضوع

Maha Shahen يقول...

والله انا مبسوطه وبقول زيك يا ترا مصير الصحفى ايه لما اللي احنا شفناه من رد الفعل كان كدا واتضرب لما اتهلك في اولها امال اخر مصيره هيكون ايه
ربنا يطلف بيه
وبرغم فرحتى الكبيره ان الشعب الامريكى اتهزق في صورة الرئيس السابق بوش الا انى بفكر بكره هيكون في ايه
هيكون الوضع اسوء مما هو عليه ردا منهم علي اللي عمله احد الصحفيين العرب
ولا هنمشى بمقولة ضربوا الاعور علي عينه قال خسرانه خسرانه وخلاص

WhItE HeArT يقول...

هه اديني جيت افتحي الباب بأه انا مش لابس جزمة انا لابس شبشب

ازيك عاملة ايه

بصراحه انا كنت نايم وبعدين بابا من فرحته جه يصحيني بيقول لي قوم قوم وتخيلي منظري بأه واحد منامش بقاله حوالي 72 ساعه علشان مشروع ولسه نايم وحد بيصحيه انا مش هحكي طبعا على اللي حصل وهو الا لازم يصحيني وانا ابدا مش هصحى

المهم قمت وهو مبسوط قوي بقله ايه الاهلي فاز قال لا بوش اتضرب بالجزمة قلتله عقبال مايضرب بالنار ونمت منا مفكره بيهزر صحيت تالت يوم بأه على الخبر الجميل ده اللي لقيت الناس كلهم بيتكلمو عليه مهو انا كنت ف وادي تاني

في الحقيقة انا شايف ان الانسان ده سيطر عليه غضبه وتصرف تصرف غير عقلاني هو صحيح بسط الملايين لكن هو عارف عواقب اللي هو عمله كويس وعارف ان ده مش اي شخص عادي وانه بكده ضيع حياته ولو عنده اطفال فمكنش المفروض يعمل كده بصراحه

انا مبسوط جدا على فكره لكن حزين على عدم التفكير العقلاني للعرب بشكل عام

دي يمكن وجهة نظري في الموضوع

لكن على رأيك مبروك على بوش الجزمة الجديده

تحياتي

مدحت محمد يقول...

ده حق صدام يابنتى

زى ما صدام اتعدم فى شهر ذى الحجة

هو اتضرب بالجزمة


بس انا بعتب على التلفزيونات

انهم ازاى لحد دلوقتى معرفوش نوع الجزمة
بتاعت الرجل ده

غير معرف يقول...

يا فرحة ما تمت كان هيجرا ايه لو فردة واحدة كملت فرحتنا وجت فيه
على العموم الجايات اكتر @طول ما احنا عايشين

مفكر يقول...

السلام عليكم::

فعلا والله،،،الجزمة كانت شيلة غل العرب وهي في طريقها لبوش،،،

الظاهر إن الجزمة مجتش في بوش لأن غل العرب خيبان،،،

حاجة تفرس،،،أنا آسف وصلتني معلومات خاطئة،،،يعني آسف دية هتبرد قلب كل واحد اتهان وأهله اتبهدلوا،،،

يا رب،،،،

"أم أدهم المصرية" يقول...

السلام عليكم ورحمه الله وبركاته
-------------------------------
كل سنه وانتى طيبه يااجمل بنوته
طبعا مزقططه انتى واكيد الكل زيك
وبرده قلقانين على مصير البطل العراقى
اتمنى ربنا يكون معاه ويخلصه من ايدهم
اللهم امين
---------------------------------

مهرة سالم يقول...

السلام عليكم...
كلنا فرحنا ولاكن حملنا هم منتظر..
الله يهون على منتظر...
وكلنا في إنتظار الحكم الذي سيصدر بحقه..
....
لا تنسوه من الدعاء..

شفـقــة و إحســــان يقول...

تحفة تحفة تحفة.....دايما تصيغى الموضوع بطريقة هايلة
برافو عليكى والله
البوست عجبنى جدا
اما عمنا بوش فيستاهل اكتر من كده
تحياتى ليكى وللبطل المنتظر

المتبهدلون في الأرض يقول...

السلام عليكم أيتها المعالجة النفساوية


إني أحترم أصحاب تلك المهنة كثيرا ..وأود ان اكون مثلهم في يوم من الأيام ...و سأكون إن شاء الله




::::::::::::::::::::::

بما إننا في عصر الجزم ... والرجم للجزم ..بالجزم


فكل جز.....أقصد كل عام وانتى الى الله أقرب ....


وعقبال ........... لما يأخدلوا جزمة السنة الجاية ويرحل هو وابنه...ولكنها جزمة أميجو ...بتولع

*^*AL.7aAzZeEnN*^* يقول...

ايوه كدا كرامتنا رجعت

يستاهل اكتر من كده

الصراحه دي اول زياره بس لقيت ان هيا مدنونه جميله اووووي

و اتمني زيارتك الي مدونتي المتواضه

غني يابهيه يقول...

عموما هوه يستاهل ميت مليوووون جزمه

بس الاهم
كل سنه وانتى طيبه

الازهرى يقول...

العزيزة بنت مصرية

اعتذر عن التأخير فى الزيارة ولكن الظروف ليست كما ينبغى


لم اتابع موضوع الصحفى بصورة كاملة للانشغال ولكننى ارتحت بما فعله كعادة الكثيرين فهو تعبير عن الغضب العام الموجود من هذا الرجل ومن سياسته الدموية
ولكننى ارى ان الموضوع اخذ اكثر من حقه كما نفعل دائما مع الامور
الامور سيئة للغاية بالفعل وتسوء مع الوقت ولا بد من تدارك الكثير م قضايانا الاكثر اهمية

تحياتى دوما

MATRIX يقول...

حذاء الذيدى دخل التاريخ لدرجة ان شركة احذية اعلنت ان الحذاء من صنع مصانعها :-)

الصحفى دا خطير خطير خطير ..بجد اسعد ملايين العرب حو العالم ..

.............................
حادثة انقطاع الانترنت للمرة الثانية واخر الاخبار ..مدونة اخبار التكنولوجيا ..
www.tecno-news2.blogspotcom

ياسر يقول...

السلام عليكم

انا عرفت الموضوع دة من فترة من مدونتك
دخلت من الشغل 4الفجر قولت اشوف الجديد
في التدوين عندي اصدقائي المدونين بس
بجد مصدقتش فتحت التليفزيون يالله فرحت فرحة
كنت زي السمكة الافي الزيت بتنطط من الفرحة
وبضم صوتي لصوتكم للافراج عن الشجاع منتظر الزيدي
دة حدفة بالجزمة وهيتحاكم والا اتسبب في قتل كل الاطفال
والنساء والشيوخ دول مش هيتحاكم خارج عن القانون
ياجماعة بجد كرامتنا وشرفنا كا عرب مسلمين وغير مسلمين
ضاعم اغتصاب اطفال وحرق وخراب وتشريد بي ادعاء اسلحة
الدمار الشامل دي لقيوا حاجة من الادعئآت دي
واستخفوا واستهاذوا بينا وفي عيدنا حكموا علي العالم
الاسلامي والعربي ان منفرحشي ولاا نعيدا وعدموة في العيد
ياااااااااااااااااااااة اد كدا احنا دمنا رخيص وكرامتنا انداست اد كدا
يستهينوا بالمصحف الشريف ويرموا علية الخمور ويحرقوة
احنا فين مالنا اتكسحناعجزنا كل دة والجزمة الا زعلتهم
حاسبي الله ونعم الوكيل
اسف علي التاخير
تحياتي

ياسر يقول...

اة اسف نسيت من فرحتي
بموضوع الجزمة دة
كل عام وانتي بالف خير
معلشي اسف علي التاخير
تحياتي

أ / أحمد عبد المنعم يقول...

بسم الله الرحمن الرحيم
السلام عليكم
كيف أخباركم؟
لاشك أن كرامة الإنسان أكبر من التفكير فى عواقب الأفعال .
فكل من يملك كرامة من العرب يستثيره منظر بوش وكوندا ليزا ومنشهد أى جندى أميريكى يجوس فى ديار العراق
ومقياس بوش وأعوانه لم يكن مقياسا منطقيا ولا مهنيا بل كان مقياسا احتلاليا لذا كان تصرف منتظر ملائما كل الملائمة لما يجب أن يواجه به المحتل .

الشريف / جمال طة يقول...

عزيزتى

الحمد لله انك بخير

تعبيرك بعبارة مكافأة نهاية الخدمه أكثر من رائع معذرة فى أـاخير فى زيارتك فى مكتبك على الانترنت
أصدق أمنياتى لك بالتوفيق والسعادة والصحة والهناء

بسبوسة يقول...

بس ضيع نفسة على الفاضى
يسعدنى تشريفك

hi5