ف يوميين ..........عزيت.........وباركت للعروسين

معلش يا جماعه اتأخرت عليكو شويه.............اصل كان عندى (فصام ف الشخصيه) لمده يومين
مش مصدقينى ولا ايه ...........اكيد بتقولوا لنفسكو (هى جايه تطلع العقد اللى درستها علينا ولا ايه)...........
لا والله يا جماعه انا فعلا كان عندى (فصام ف الشخصيه).....هقولكوا ازاى
من حوالى اسبوع سمعت ان واحد قريبنا_انا بعتبره زى اخويا _سمعت انه عمل حادثه وتوفاه الله (ادعوله يا جماعه)
لسه شاب ف مقتبل العمر (الله يرحمه)
وكنت تانى يوم معزومه على فرح واحده بعتبرها اختى برضه ومقدرش مكنش معاها ف يوم زى دا
ف الحاله دى تقدروا تقولولى ممكن اعمل ايه
ازعل لموت شاب بعتبره اخويا..................... ولا افرح لفرح بنوته بعتبرها اختى
ملقيتش غير حل واحد ...................هو انى احاول اتماسك واحضر لتنين (العزاء) وتانى يوم (الفرح)
مهو مفيش حل تانى


وف يومين ..........لاقيتنى بقول كلمتين
واحد واتنين ............دول كانو يومين
حسيت ان عندى فصام.......او بالاصح شخصيتين
مش كدب ولا نفاق...........لأ دول غلاوتين
ساعتها جالى خبرين
اولهم حزين بيقول الشهادتين................وتانيهم ناس بتزف العروسين
اولهم غالى اهله بموته صابرين...............وتانيهم غاليه اهلها بفرحها مبسوطين
اه ه ه يا دنيا التايهين
تبقى على ناس فل وياسمين ..............وعلى تانيين نعى ومعزيين
ساعتها كان لازم اكون بشخصيتين............والا هخسر لتنين
ولو مخدتش دا حكمه................. هكون من الضاليين
فاضطريت ف يوميين .................اعزى وابارك للعروسين

رحله الى النيل.................حقا ما انيلها

ازيكو يا جماعه
من يومين كنت زهقانه قوى_ يعنى _ حاسه بالروتين قوى خصوصا انى مش بشتغل...وزوجى العزيز طبعا بيشتغل
ف مش طهقان ذيى...... كل يوم بيخرج .. يشوف ناس..يغير جو
وانا بقعد ف البيت امارس هوايتى ف (غسيل الموعين وتنضيف البيت والطبيخ)..........بصراحه هوايه مزعجه
وسبحان الله كل الهوايات الواحد بيبقى فرحان وهو بيعملها معادا الهوايه النحس دى ببقى حاسه قوى بالمقوله الشهيره
(مجبر اخاك لا بطل ).........وانا بقوم بممارسه الهوايه دى _هنمشيها هوايه عشان منتضربش_بسمع اغنيه واحده
لحبيبه قلبى(شاديه)....واللى مطلعها بيقول (والله يا زمن لا بأدينا زرعنا الشوك ولا روينا يا زمن)
........ايه فى ايه.........مهى دى الاغنيه الوحيده اللى تنفع عالوضع ده

المهم جه زوجى من الشغل حضرت الغداء مع ابتسامه مصطنعه وكأننى كنت بسمع اغنيه (الليله عييد)
مهو الراجل لسه داخل من الباب مينفعش اركب الوش الخشب دلوقتى ......لازم اكون حسيسه شويه

اتغدينا شربنا الشاى .........وانا لازلت مصره على الابتسامه الصفره
لاحظ زوجى ان هذه الابتسامه تخفى احتجاج عاوضع الراهن........وادرك شهريار الصبا........ايه ده
سورى يا جماعه انا دخلت على الف ليله وليله معلش
فبدأ زوجى باكلام ........ودار بيننا الحوار التالى


زوجى (وهو مندهشا) :شكلك مش مريحنى فيه ايه
انا (من غيير تردد رديت وانتهزت الفرصه اصلى استغلاليه والحياه فرص):تيجى نخرج
زوجى (ظهرت علامات الضيق على وجهه.....وعلامه اكس على جبينه..مصحوبه برفع احد الحاجبين:
مفيش خروج انا لسه جى من بره

وبعد مشاده كلاميه ...........ملقتش قدامى غير حل واحد متعارف عليه عند كل البنات.....وهو تمثيل دور الغلبانه
وبدى التأثر على وجهى ........وعملت فيها عيله وبصوت رقيق وناعم وكأننى مغلوبه على امرى قولت:
نفسى اخرج لو سمحت نخرج لو سمحت (ايوه بتمسكن لحد ما اتمكن عادى )
رد عليا زوجى وهو بيضحك:عايزه تروحى فين
انا قولت لنفسى يا بت اختارى حته هو بيحبها اهو منها تشمى هوا ومنها ميقولكيش الجمله المتعارف عليها ف كل خروجه الا وهى (يللا نروح بقى )
قولتله :نروح نتمشى عالنيل
قاللى : فكره حلوه انا كمان بحب التمشيه عالنيل
نزلنا وانا السعاده هتفط من عنيا مش عشان النيل ...لأ..عشان بقالى اسبوعين مخرجتش ..دا انا قربت اخلل يا جدعان
ومقولكوش عاللى شوفته عالنيل ..واو مصر كلها بقت حبيبه يا جدعان .......مفيش واحد واقف لوحده (عييب)
لازم كل واحد يبقى معاه واحده (مزه يعنى).......يا اما ماسكين ايدين بعض ...يا اما مسبلين لبعض ..يا اما بيأكلها الحمص ف بقها .........(اصلها مشلوله)..هههههههههه
فكرونى بأغنيه نانسى عجرم (كل الاحبه اتنين اتنين متجمعين عالنيل صايعين )
لا وانا وزوجى شكلنا صغير فمحدش عاقل يقول اننا متجوزين نهائى ..فـأكيد اى حد هيشوفنا هيفتكرنا تبع نانسى عجرم
المهم فضلنا ماشيين سمعنا صوت ف قفانا....دا المركبى بيدلل على حد يركب المركب وبيقولنا بصوت عالى
(تعالى يا باشا اركبوا المركب اللفه ف النيل ب2 جنيه يا بلاش )........انا بصيت لزوجى بنظره استغلاب للمره التانيه وانا بقول (لو سمحت نركب لو سمحت )..........رد عليا وقاللى (لا مش هنركب فاكره المره اللى فاتت)

اه مقولتلكوش اصل احنا ركبنا مركب مره قبل كده وكان الراجل مشغل اغنيه ل (عبده لاقرع)...محدش يسألنى مين ده
اهو حاجه كده زى ( بعرور) كده............وانا زوجى بيحب (عبد الحليم) فتخيلوا واحد بيحب (حليم ) قاعد ف حته مشغلين فيها (لاقرع)..............لا ويومها كمان كان فيه شويه بنات محجبين قاموا قلعوا الحجاب واتحزموا بيه وقعدوا يرقصوا _فشر دينا والله_ ومجموعه شباب مش تبعهم خالص قاموا يشجعو البنات ويرقصوا معاهم
(ربنا يكفينا شر الصيف وبلاويه واللى بيجرا فيه)

المهم بعد الموقف ده زوجى قرر ميركبش مراكب تانى

بس المراكبى برضه مش راضى يحل عن قفانا.........قام زوجى رد عليه وقاله(اصل المراكب دى يا حج بيبقى فيها شباب وبنات بيقعدوا يرقصوا ......وبيضيعوا استمتاعنا بمنظر النيل)......._اصل زوجى رومانسى حبتين_
رد عليه المراكبى (لاوالله يا باشا دول كلهم عائلات حتى شوف)..........بص زوجى عالمركب لقاه كله ناس متجوزين يعنى مفيهوش شباب ولا بنات صغيرين (مفيهوش مزز يعنى)
وانا بقى ظيت ف الظيته وقعدت ازن (لو سمحت نركب مهو مفيهوش شباب ولا بنات اهووكله عائلات بليييييييييييييييز)
رد زوجى وقاللى (حاضر اما نشوف اخرتها)
ركبنا المركب............ واول ما المركب قامت المركبى شغل اغنيه بيغنيها واحد تقريبا عامل عمليه شايل فيها
(زوره) قبل ما يعمل الشريط
وكانت الاغنيه عباره عن كلمه واحده بيكررها المطرب _ابو زور مش موجود ده _
الكلمه دى هى (خش عليه خش عليه)
بصلى زوجى بصه وكأنه يقول (انتى السبب ف اللى احنا فيه ده)...........وانا عامله نفسى عبيطه ومش واخده بالى
شويه ولقينا واحد المفروض انه (راجل) _ شكله الفيزيقى بيقول كده_ قام وقعد يرقص وسط الناس اللى قاعده ف المركب ....ومقولكوش بقى دا مش اى رقص .............دا على سنفونيه ( خش عليه)
وقعد هذا المدعو (راجل) يتحايل على الست اللى معاه تقوم ( تهز).ههههههههههههه يللا مهى زيطه
وهى مش راضيه ......وهو مصر انها تقوم ترقص.........وهى ابدا ........ويشد ف اديها .....وهى لا ممكن
الظاهر الاغنيه مكنتش عاجباها.............. او كانت عايزه ترقص على (بتهوفن)


زوجى قام باصصلى ووهو بيكز على سنانه وبيقوللى (عائلات هه)
واول ما خرجنا م المركب .......انا اللى قولت الكلمه المأثوره (ياللا نرووح)
رد عليا :(منا بقول كده برضه)


والحمد لله لقينا ميكروباص بيروح بيتنا ........حدفنا نفسنا فيه.........وفجأه........سمعنا صووت فرقعه
بببببببووووووووووممممممممممم
الناس اللى ف الاتوبيس اتخضت......فيه ايه فيه ايه...........نزل السواق يشوف فيه ايه
شويه وطلع يقوللنا :بصو يا جماعه الكاوتش اللى ورا فرقع ...فانا همشى بالراحه عشان المكروباص ميتقلبش
واللى مش عاجبه ينزل اه


جاتلينا كريزه ضحك انا وزوجى
وبصللى وقاللى :مش عايزه تخرجى استحملى بقى
انا اللى غايظنى ان محدش نزل م الميكروباص..........يا عينى زى مايكونوا مصدقوا يلاقوا ميكروباص يوصلهم حتى لو كان هيتقلب بيهم .........او يمكن مستخصرين الجنيه ونص(حق التذكره)
واحنا لقينا الناس منزلتش ..........استشهدنا وقعدنا يللا العمر واحد والرب واحد


(وادى اخره اللى ميسمعش كلمه جوزه يقولها)

اغنيه(يا حبيبتى يا مصر)المعدله لسنه............2008

يا بلااادى.......يا أغلى البلاد يا بلادى
فداااكى..........ام العيال يا بلاادى
بلااادى......يا بلادى
بلاااادى.........يا بلااادى


يا وخدانى يا مصر يا مصر
اه عالحامى يا مصر يا مصر
يا حبيبتى يا مصر يا مصر


ما شفش الهبل............ف عيون الشباب
وبنات البلد
ولا شاف السطل..........ف دماغ الولاد
والبانجو اشتغل
ولا شاف النيل...............فيه كل العبر
وكلاب وحميير.............بقوا بدل البقر


اصله معداش على مصر
اصله معداش على مصر


يا ذلانى يا مصر يا مصر
يا قهرانى يا مصر يا مصر
يا حبيبتى يا مصر يا مصر


يا بلااادى................يا ارض الهواان يا بلادى
فداااكى...............كل الشباب يا بلادى
بلاادى....يا بلادى
بلاااادى ............يا بلااادى


يا حبيبتى يا مصر يا مصر
دليل خيبتى يا مصر يا مصر
سيبتك تتهانى يا مصر يا مصر


ما شفش الرجااال.............ما خلصو الرجااال
فى كل المحن
ولا شاف العناد...............ف عيون الشداااد
فى ذل البلد
ولا شااف اسرااء..............ف عيون البشر
بتقول اضرااب................ولازم ننتصر


اصله معداش على مصر
اصله معداش على مصر


يا حبيبتى يا مصر يا مصر
ايوه حبيبتى يا مصر يا مصر
بهدلوكى يا مصر يا مصر

بنت مصريه.............واتنصب عليه

انا بنت مصريه
عندى افكار جهنميه
عن الناس والشارع
وحتى الديمقراطيه


وفكرت لقيت
افكارى لسه جوايا
وانا قاعده جوا البيت
بخرط ف الملوخيه


مفيش غير حل واحد
هو الامل الصاعد
اجيب نت ف البيت
وانشر دماغى العبقريه


سمعت عن واحد بيوزع وصلات
كان اسمه......اه اسمه الحج عصابات


قاللى ادفعى يا مصريه
قولت وماله
انت فعلا غالى شويه
بس انا بنت ذكيه
ادفع اكتر تدينى الخدمه اللى هيه


ضحك ضحكه سخريه
وقاللى سلام يا مصريه


وانا هيصت
دخل النت
ارؤص يا واد وانتى يا بت


لقيت فرصه اعرض افكارى
مش فارقه غصب ولا اختيارى


بس المهم تبقى مسموعه
وللناس تبقى موضوعه


ناس كتير اعجبوا بيا
محترمين..مثقفين..غلباويه
قولت دى الصداقه اللى هيه


شهرين وفصل النت
ألطم يا واد وانتى يا بت


ناديت وقولت يا حج عصاباات
قالولى اتجننتى بتكلمى اموات
عصابات ده نصاب وبتاع حركات


قولت يا لهوى
وانا اللى عامله فيها ذكيه
ومفيش اذكى منى ف الشرابيه
يا فضحتى قدام البلوجريه
اكيد هيقولوا البعيده غبيه


وانا اعمل ايه يعنى
منا بنت مصريه
واجلا او عاجلا
لازم يتنصب عليا


هلاقيها منين يارب
بقى ف كل حته نصب
نصب ف نصب
م النت للديمقراطيه


يللا بقى منا بنت مصريه ولازم يتنصب عليا

زمان(جلا جلا جلا فين البت).........دلوقتى (جلا جلا جلا فين النت)

ازيكوا يا جماعه .........وحشتونى جدا
اكيد انا كمان وحشتكوا صح.........وقعدتوا تسألوا نفسكو
فين البنت المصريه؟
دا احنا من غيرها خيبتنا قويه
غابت عننا فجأه من غير حتى تحيه
مش كنتوا بتقولوا كده ولا ايه.........ايه متنحين ليه.........كنتوا بتقولوا كده وللا لأ
عموما انا هضحك على نفسى واصدق انكو كنتوا بتقولوا كده....يعنى عشان مبطحكوش
واكيد طبعا عايزين تعرفوا انا كنت فيين..........بس قبل ما اقوللكوا هحكيلكو على حاجه

كان زمان فيه واحد ف الموالد اسمه(الحاوى) ........كان الراجل ده يجيب 3 ورقات كوتشينه
فيهم صوره بنت...ويقلبهم على ضهرهم ويحركهم بشكل عشوائى......ويبتدى يسأل الناس اللى حواليه
فين صوره البنت؟
من قواعد اللعبه لو حد من اللى واقفين جاوب صح (الحاوى) يديله فلوس
ولو واحد جاوب واجابته كانت غلط هو اللى يدى (الحاوى) فلوس (وده هوالمطلوب)
عشان (الحاوى) ياخد فلوس من الناس وميخسرش حاجه
بيعمل حيله معينه
يعنى .....يظهر للناس ف الاول صوره البنت
وببعض الحركات اليدويه السريعه يخبى صوره البنت........تحت طقيته........ف جيبه .......ف كمه
ويبدلها بأى رقم تانى
وبكده عمر ما حد هيطلع البنت
و(الحاوى) هيلم على قلبه قد كده من الناس

اكيد دلوقتى بتقولو عليا هبله....واكيد بتقولوا ايه اللى جاب غيابها عن البلوج( للحاوى) والكوتشينه والبنت والهبل ده؟



معلش استحملونى انا زى امكوا برضه
اقولكوا بقى انا كنت فين



من 3 شهورلقيت ناس ف العماره مشتركين ف النت........وفيه واحد اسمه(الحج فلان)
هههههه قال حج قال.......مدى للناس وصلات نت والواصله ب200 جنيه
اتفقنا انا وزوجى على اننا فى حاجه لهذا المدعو(نت) .......وقمنا بالاتصال بالحج
جه الحج وركب الواصله.....ولهف ال200 جنيه....(الهى ما يوعى يصرفهم)
المشكله بقى ان النت فصل من اسبوعين وفضل فاصل واحنا مش عارفين فيه ايه
(والحج علان ) اختفى لا بقى يرد على تليفونات وقافل مكتبه ومستكنيص (نايم يعنى) ف بيتهم


كده اى ذكى يفهم ان احنا اتضحك علينا



يومين ولقينا خبط عالباب فتحنا لقينا شاب محترم بيقول
(انتو كنتوا مشتركين مع فلان ف النت....احب اقولكوا ان فلان ده نصاب..بعلكو وصلات ب200 جنيه وباعكو ليا _على اساس اننا بكوات شاى_ الواحد ب40جنيه.........بس اطمنوا انا خدمتى هتكون متميزه.....
نأسف للازعاج)

ساعتها بس عرفت ان فيه تطور ف كل حاجه
يعنى بعد ما (الحاوى) زمان كان بيقول فين البت؟ .......
الحاوى دلوقتى بيقول فين النت؟......
وعجبى

حدوتة سعيد ......و.......بهيه

روح جارنا الحج سعييد.........على بيته فرحان وسعيد
قال لمراته يا بهيه..........قومى بقى اصحى يا وليه
هيزودوا لنا النقديه...........بزياده 30 %
وهناكل فراخ بالملوخيه.........وعيشتنا راح تبقى هنيه



ردت عليه الست بهيه.......... وهى لسه نايمه شويه
قالتله متأكد يا سعيد.......... مهى الحكومه بتقول وتعيد
ولا عملت اى جديد............ ومبتنفذش الا التهديد



قام قالها ده تصريح م الريس........والله وحالنا راح يبقى كويس



وفرح قوام الحج سعيد .........ومشى يزغرد كأنه ف عيد
بس الزعل كان جايله شديد..........لان تانى يوم وبالتحديد



لقى زياده ف الاسعار............ سواء ف الرز أو الخضار
وتصريح يزود سعر التموين......... والسولار والبنزين
وناس بتلعن السلسفين.................. عايزه حقوقها المنسيه



فكر شويه الحج سعييد..........لقى حلمه بيروح لبعيد
ولقى ال30%..............راحه عالخدمات اليوميه
اللى زادت....................ف النقديه
من تمويل العربيه...........للتموين والفئويه



ورجع سعيد لبهيه...........بيقولها خبيتنا قويه
راحو ال30%...........كانوا وهم وسراب يا بهيه



ردت بهيه اه يانا............ماتسيبنى شويه نعسانه
قام قالها ايه يا وليه...........ماتحسى شويه يا بهيه



قالتله ما قولتلك يا سعيد.........الحكومه بتقول وتعيد
ارضى بقى بعيشتك يا سعيد...........ومتنطقش الا بالتأييد
والا هتروح ف حديد..........فاشوف احسنلك يا سعيد
تعيش طول عمرك عالحديد...........عشان تعجب كل شديد



رد سعيد.............. اهو كله حديد



قولى وداع يا ديمقراطيه................
يدوك ابصر ايه ف الميه................ ويلبوك اللبه اللى هيه



معلش قلقتك يا بهيه.............روحى بقى نامى يا وليه
واحلمى بأحلام ورديه.............معدومه عالارض المصريه

عاقل..........وسط ناس مجانين

كان يوم الاتنين.........وصادف شم النسيم
قولت افرفشلى...........ولو حتى ساعتين
فرصه اعيش حياتى ...........دا انا ف قلق بقالى سنيين
م التفكير ف حالى...............وحال بلد النصابين


معروف شم النسيم.............بالورد ورياح الخماسين
قولت عادى هشم الورد........ومش هتموتنى يعنى رياح الخماسين


قرصنى الجوع ..........قولت اشبرق نفسى واجيبلى سندويتشين
قعدت ف كوفى.........بيقولوا انه من المتميزين


لقيت حوليا ناس قاعدين...........بيشدوا ف الشيشه ومتكيفين
وولاد وبنات متأنتكين .........برضه للشيشه طالبين
وزيهم امهات مترصصين.........طالبين شيشه ومبسوطين
لأوجوازهم ساكتين...........شايفين دا عادى وفرحانين


ايه يا جماعه...........هو انا فين
تهت مش عارف..........الحق على مين ولا مين


هو ده التطور يا مصريين
هو دا دينكو يا مسلمين
خلاص كلنا بقينا متأمركين


فوقوا بقى يا مسطولين
لحد امتى هتفضلوا تايهين
وزى البهايم متساقين
باين عليا انا اللى مسكين

وانا الوحيد اللى عاقل..............وسط ناس مجانين