.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الجمعة، 11 أبريل 2008

بنت مصريه

احب اعرفكم بيا انا بنت مصريه..........ايه بتضحكوا على ايه..........انا عارفه اللى بيدور ف دماغكوا اكيد بتقولوا(كل ده عشان مصريه امال لو كانت صوماليه كانت عملت ايه)فعلا عندكو حق وعلى رأى اللى قال(لو لم اكن مصريا لودت ان اكون صوماليا .. ....هههههههه).......اعرفكم بيا بقى انا بنت بسيطه جدا نشأت وترعرعت (ايه نشأت وترعرعت دى)معلش يا جماعه اصل الثقافه نأحه عليا اليومين دول......المهم كبرت واتربيت ف اسره متوسطه .وبعد سنين طويله ف التعليم والدروس الخصوصيه اللى ما بتخلصش .كان حلم حياتى ادخل جامعه عين شمس..........ايه فى ايه بتبصوا لبعض كده ليه.........لا متفهمونيش غلط.....انا كان نفسى اتعلم اه بس ده ميمنعش ان يكون ليا زمايل ولاد لربما يكون فيهم عريس الغفله........ودقت ساعه الخطر .........لسه بكتب عين شمس ف استماره الرغبات.........لقيت بابا بيقوللى(انا عايزك تدخلى سجن النسا)..هههههههه أأاأأأصدى كليه البنات يعنى.......(ليه يابا.) .......(خالتك وعمتك متخرجين منها يابنت).....طب وانا مالى لازم اكمل المسيره يعنى....ضاعت فرصه العريس........المهم دخلت كليه البنات ومقولكوش عالروايح اللى ف المدرجات ......اصل معظم البنات هناك م الارياف....دى مش تناكه منى والله ..بس تخيل نفسك قاعد ف محاضره والمفروض تفهم وفى واحده جمبك مغيره ريئها بفحل بصل عالصبح .........وكله كوم والكشرى ابو دقه كوم تانى _سبحان الله _كانوا بيرموا الكشرى ويسفوا الدقه ........بس والله كانوا طيبين ........المهم اتخرجت بعد اربع سنين وكنت م المتفوقين .ولازالت فرصه حصولى على عريس الغفله ضعيفه........اعمل ايه اعمل ايه....ايوه هى دى جاتلى فكره جهنميه.......رحت لبابا وقولتله (بابا انا عايزه اعمل دراسات عليا ف جامعه عين شمس) رد عليا وقاللى (برافو) قولت (قشطه) قاللى (من بكره هقدملك ف كليه البنات دراسات)
رررررررررررررررررررحححححححححححممممممممممااااااااااااااااااااااااااااااااكككككككككككك
لا كده حرام .مش عارفه ليه كان عندى احساس ان ابويا فاهمنى...دخلت سجن النسا للمره التانيه.....وسرحت بعينى ف كشف الاسامى _اسامى زميلاتى_اسم بنت ورا اسم بنت ......بصيت ف اخر الكشف
ايه ده مش معقول مش ممكن مش مصدقه عنيا (دهب .ياقوت.مرجان.اسم ولد احمدك يا رب) كان هبل بعيد عنكوا.......
تخيلو هو ده العريس خطيبى سابقا وزوجى حاليا...............
انا قصدى من كل الرغى ده (ان مهما الواحد يعمل مش هياخد الا نصيبه واللى مكتوبله)

هناك 14 تعليقًا:

غير معرف يقول...

ههههههههههههههههه قصتك حلوه قوى واسلوبك كمان ربنا يوفقك

غير معرف يقول...

بس معقوله اول راجل ف حياتك اتجوزك انتى حاجه من الاتنين يااما جميله جدا يا زكيه جدا او يمكن لاتنين بس دى صعبه شويه

غير معرف يقول...

انا صاحب التعليق اللى فات نسيت اقولك انك محترمه جدا عشان كده اتجوزك

غير معرف يقول...

انا بنت زيك عندى 26 سنه متجوزتش لحد دلوقتى ومعنديش امل بصراحه فعلا كل واحد مش بياخد الا نصيبه

غير معرف يقول...

كلامك حلو قوى بس دى مجرد بدايه ايه اللى بعد كده ايه اللى جاى بس انا متاكد ان اكيد واحده محترمه زيك بخفه دمها دى هتخلى اللى جى احلى .مشرف من مصراوى

غير معرف يقول...

ربنا يوفقك وتعملى حاجات احلى

غير معرف يقول...

واضح انك متفاهمه قوى كل اللى بيقولهولك الوالد بتنفزيه حتى لو مش عايزاه

غير معرف يقول...

انت مؤدبه قوى والبركه ف الوالد

Soooo يقول...

قريت الموضوع ده وانا على وشي ابتسامه
وعلى اخر الموضوع لقيت ابتسامتي كبرت قوي وقلت ربنا يوفقك يارب ويباركلك في جوزك ويباركلو فيكي ويباركلكم في بعض ويمنحكم الذريه الصالحه يارب

وفعلا .. ماحدش يعرف نصيبه فين


ملحوظه
في مدونة اسمها نفس الاسم بتاعك لشخصيه من اقدم واكثر الشخصيات التدوينيه احتراما .. وهي اختفت دلوقتي واتجهت للصحافه .. والحمدلله ان ربنا عوض المدونين بمدونة زيك انا شايف انها هتكون ليها مستقبل تدويني باهر
ربنا يوفقك




سلامووووووووووووز

غير معرف يقول...

عاصم الانصاري:
انتي اللي انسانة جميلة في كل حاجة عشان كده مقدرش يستغنى عنك واتمسك بيكي وربنا بيسبب الاسباب قعدتي طول عمرك عايزة تطلعي برة كلية البنات لكن القدر كان بيرجعك ليها تاني عشان تقابلي الشخص ده ويبقى زوجك وطبعا في الاول وفي الاخر كله نصيب .

بالتوفيق......

بنت مصريه يقول...

ربنا يكرمك يا رب يا سوووووووووو انا بصراحه مش عارفه اقولك ايه على زوقك واخلاقك الرفيعه دى

بنت مصريه يقول...

متشكره قوى يا عاصم على زوقك ربنا يكرمك ويوفقك انت كمان يا رب

سمراء يقول...

بجد بجد بجد انتى اسلوبك فى الكتابة يجنن
وبسيطة

انا سعيدة انى جيت هنا

بنت مصريه يقول...

وانا اسعد يا حبيبتى يا سمراء انك شرفتينى بدخولك مدونتى واتمنى تشوفى بقيت الموضوعات عشان تضحكى بس

hi5