.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الأربعاء، 30 أبريل 2008

عملتوا ايه ف شم النسيم؟........انا قضيته مع الشمامين

ازيكوا يا جماعه.........كل سنه وانتو طيبين بمناسبه شم النسيم
اتمنى تفهموا البوست ده ومتكنش الرنجه والفسيخ عمل عمايله ف مخكوا ههههههههههه........
واكيد طبعا لونتوا البيض واكلتوه مع الرنجه معأنى مش عارفه ايه علاقه البيض بالرنجه او حتى علاقه الاكل ده بشم النسيم انما عادى اهو كله تهييس
واتمنى كمان ان محدش فيكو يكون زار المستشفيات لأنها كانت على اشدها فى اليوم ده
اقولكوا انا بقى ازاى قضيت شم النسيم .........الله يجازيهم الف خير(امى وابويا وستى واخويا) ... عزموا عليا انا وزوجى العزيز بقضاء شم النسيم عندهم فى (مدينه الرحاب)...............وما ادراكوا ما هى (الرحاب) بجد اول ما تدخلها تحس انك مش فى مصر اساسا.......يعنى تحس انك فى (امريكا)( واشنطن) (نيو يورك) ههههههههه,
بس المشكله ان الناس هناك بيتصرفوا كأنهم امريكان فعلا.........يعنى مثلا تلاقى ناس كتير قوى جايبين كلاب ف بيتهم مش عارفه ليه يعنى يمكن هيدبحوه عالعيد ولا حاجه
(ليه يا عم الحاج جايب كلب) بكل الاطه يرد عليك ويقولك (حراسه)........ طيب ما الامن مالى الرحاب ...خلاص الكلب بتاعك هو اللى هيحمى حما الوطن .........دى مش حراسه وانت الصادق دى (نجاسه)
بس بغض النظر عن الكلاب وبعض الناس فهى مدينه عالميه بصراحه..........
المهم روحنا (الرحاب)..... وبعد اكله الرنجه المعتبره كل واحد فينا خادله لبانة (فلوريتس) يعنى عشان البرفان بتاع الرنجه ..........
وعلى المغرب قررت (انا وزوجى واخويا) اننا نروح السوق وفى (كوفى شوب) هناك انا بحب اروحه قوى اسمه(زلط)...................اول ما وصلنا (كوفى شوب زلط) لقيناهم مغيرين الكراسى ومجددين الديكورات
فالطبيعى انه يغير الاسعار_اى غبى يفهمها يعنى_واحد جدد الكوفى شوب بتاعه هيسيب الاسعار زى ما هى دا يبقى تخلف بصراحه.............
ورغم انهم غلوا الاسعار الا اننا ثبتنا على موقفنا وجازفنا وقعدنا ف (زلط)
انا بقى فيا عاده منيله شويه......... لما بقعد على اى كوفى شوب لازم افر بعنيا الترابيزات اللى حوليا يعنى .......مين قاعد عليها .....ولاد ولا بنات.......ولو بنات لابسين ايه ..كده يعنى خصوصا اللى ف (الرحاب ) اصلهم بيبقوا متشيكين عالاخر
المهم حسينا اننا جاعنين معان الرنجه بتعطش بس احنا جعنا فطلبنا اكل
لقيت الجارسون سايب زوجى واخويا وجاى يقوللى انا انا هه بيقوللى انا
الجارسون:اجيبلك شيشه يا مدام
الراجل شاف تعبير وشى من كلمته اتخض ولقيته قال بسرعه وهو بيضحك.........اسف معلش
استغربت قوى ليه سألنى السؤال ده ومسألش زوجى او اخويا ..........هو انا مش باين انى بنت ولا ايه...........
معقول يكون فاكرنى ولد
ولكن استغرابى ده راح بعد ما ابتديت امارس هوايتى فى فر الترابيزات


اول ترابيزه................
عليها راجل ومراته وابنهم عنده حوالى سبع سنين
الجارسون:تطلب ايه يا فندم
الراجل: انا هاخد ليمون فريش
المدام: وانا هاخد شيشه تفاح
الجارسون نزل الطلبات وقعد الراجل يشرب فى اليمون ومراته تشد فى الشيشه
انا بس صعب عليا الولد الصغير عمال يكلم امه وامه مش معاه خالص ومركزه ف الشيشه لأ والأدهى بتنفخ الدخان ف وشه.........وكمان مدياله (المبسم )يلعب بيه هههههههههههههه


تانى ترابيزه...................
واحد ومراته واربع عيال
ا لجارسون :تطلب ايه يا فندم
الصراحه دول محترمين شويه الراجل هو اللى اتكلم وقال طلبه وطلب مراته والعيال اصل صوت الستات عوره الراجل : انا والمدام هناخد اتنين شيشه تفاح والاولاد سندويتشات.......(ليه متطلبلهم هم كمان شيشه)
والمدام هنا كانت محجبه وعادى انها تشرب شيشه ........مهو جوزها اللى مشربها فيه ايه اكتر من كده بقى


تالت ترابيزه............
تلت ولاد وبنتين وبلا فخر كلهم طلبوا شيشه

انا والله مش فاهمه ازاى (ام) تسمح لنفسها انها تشيش قدام ولادها ..........دول لسه بيعرفوا المعايير للتصرفات ايه الصح وايه الغلط واكيد الكلام التالى بيدور ف دماغهم
(مامى بتشيش وبابى بيشيش ولاتنين بيشيشوا يبقى التشييش حاجه حلوه مش حاجه كخه)

وطبعا هيقلدوهم لما يكبروا ولكن مع التطور الحضارى الولاد مش هيشدوا شيشه هيشدوا حاجه تانيه

عرفتوا ازاى قضيت شم النسيم وسط الشمامين ههههههههههههههههههههه

هناك 55 تعليقًا:

Tamer Nabil Moussa يقول...

ههههههههه

كويس ان زوجك مش ضرب الجرسون


مع بعد اكمال كلامك وجدت الجرسون معذور

كل اللى يروح لية المدام تتطلب شيشة تقاح هههههههههههه

انا بقى مش طلعت من بيتى شمتة فى البلكونة ههههههههه

ربنا يوفقك

تحياتى

بنت مصريه يقول...

مرسى على تعليقك يا تامر
وعلى رأيك الجرسون معزور فعلا
م اللى بيشوفه
اتمنى تنورنى دايما

ليكوريكا يقول...

:)))

شيشه ... مش يمكن الفراعنه زمان برضو كانوا بيخلوا مراتاتهم يشربوا شيشه

ولا يمكن كليوباترا السادسه عشر كانت بتشيش في شم النسيم

حاجه خيبه والله :(

كنت بتكلم في الموضوع ده مع زمايلي يوم الحد ، وكانوا بيتكلموا عالشيشه برضو ، (بس علي الاقل دول ولاد) ، وكان الموضوع عن سبب رفضي القاطع لموضوع الشيشه ده ، علي اساس ان كل الي قاعدين دكاتره وبيقولوا ان مره واحده مش مضره وبالتالي مش حرام ، مبدأ غريب وقناعات غريبه بيقتع بيها الشباب نفسه ...
يعني مثلا اشرب كاس خمره وطالما مش هسكر يبقي الخمره مش حرام ...

المهم انا معرفش ايه اللي خلاني احكي الموقف ده خلينا في المدامات المشيشات ، وعلي رايك يا بنت مصريه (الشمامات) علي فكره مهو لو اللي قاعد معاها (راجل) مكنش خلاها تشرب ... لكن ده حته بتاع بتتحكم فيه (بزازه)يبقي ازاي نحكم عليه بانه راجل وازا نحكم علي مراته بانها ست

ربنا يهدي الجميع :(

Unknown يقول...

العزيزة الغالية

بنت مصرية

الحمد لله على نعمه نحن فلاحين معندناش

شيشة ولا كوفى شوب علشان مراتى تروح

تشيش هناك .. والحمد لله احنا مدخنين

طبيعى مما يحدث حولنا بس الحمد لله الريس

ربنا يمد فى عمره هيدينا منحه 30 فى

المئة من شهر مايو

فرجت هنجيب للعيال مصاصه يالله عن

محد حوش ...سعيد بزيارتى لمدونتك

واتمنى دوام التواصل

غير معرف يقول...

عاصم الانصاؤي :

اولا : مش شايفة ان في مبالغة في موضوع الجرسون ده لانه لو كان عمل كده كان المفروض زوجك واخوكي وضبوه ، الا اذا كان ليهم نظرية تانية خالص في الموضوع ده ....الله اعلم

ثانيا : احنا عارفين الحاجة دي من زمان ايه الجديد فيها ، ودي حرية شخصية مسمحلكيش انك تهاجمي الناس فيها كده ، انا معاكي ان هي غلط من الاول وخاصة لما تبقى قدام الاطفال ، بس ايه الاستفادة من مقال زي ده .

ارجو ان تعودي لمستواكي من قبل كما تعودنا عليه

بالتوفيق ....

بنت مصريه يقول...

ليكوريكا
متأكد ان زمايلك دول دكاتره
اصل فبه دكاتره تانيين بيقولوا ان الشيشه ضررها اقل من السجاير
وعلى رايك اللى يخلى مراته تشيش
يبقى ايه هههههه
شكرا انك نورتنى

استاز حسن
الحمد لله يا عم اننا فلاحين ازا كان التمدن هو البجاحه
بس على فكره الشيشه رخيصه عشان تكون ف متناول الجميع
مرسى على تعليقك ويا رب اكون عند حسن ظنك

عاصم الانصارى
بالنسبه لموضوع الجرسون فده اللى حصل وده مش جرسون بيقدم طلبات ده بيقدم الشيشه بس ف كان من الطبيعى انه يسال الترابيزات مين عايز شيشه
دى شغلته كل الناس فى المكان كانت بتشرب شيشه عادى بالنسبه لهم لكن كان مش عادى بالنسبالى
لو انت مستفتش من مقال زى ده ف دى حاجه ترجعلك انت مترجعليش انا
لان الانسان السوى لازم يبص حواليه يشوف ايه الصح وايه الغلط ويناقش فيه الناس وصدقنى كلهم هيجتمعوا على ان الغلط غلط والصح صح
والحريه الشخصيه مش انى اعمل اى حاجه مش مهم صح او غلط لا الحريه الشخصيه انى اقول افكارى اللى متتعارضش مع قيم المجتمع ويكون هدفها تنميه المجتمع

وبالنسبه لمستوايا اعتقد انى لازلت فيه ان لم اكن تفوقت
وشكرا عالتعليق

بنت مصريه يقول...

ليوريكا
لخبطتنى اصدى فيه دكاتره تانيين بيقولوا ان الشيشه ضررها اكبر مش اقل ههههههههههههههه

حائر في دنيا الله يقول...

في يوم وأنا طالب كنت أجلس مع معيد في كوفي شوب أمام الكلية نتناقش في أمر ما وبكل "ألاطة" وجدته بيطلب لنفسه شيشية وعمال "يكركر" بصراحة اندهشت اوي فالمفروض دا بعد كم سنة هيبقى دكتور وقاعد مع طالب عنده ودا مش منظر عاطفي يعني
بصراحة استفزني اوي
اومال البنات بقا
وبصراحة معرفش الدكتورات الاناث شيشوا ولا لسه شوية

لك تحياتي
السلام عليكم

khobayb يقول...

"طيب ما الامن مالى الرحاب ...خلاص الكلب بتاعك هو اللى هيحمى حما الوطن"

هههههههههههه

---

شر البلية ..

ما يُضحك !

للأسف

واحد من البلد دى يقول...

الحمد لله إنها عدت على كده ..والله أنا لو مكان زوج حضرتك كنت ضربت الجرسون بالكرسى فى وشه......
ماتستغربيش ......والله العظيم ما كنت إستنيت ثانية واحدة..وبعد كده بقى يقول آسف يقول اللى يقوله المهم أبقى فشيت غلى ...وبالنسبة لموضوع الشيشة أنا أعتبر أى رجل أو شاب يسمح لمراته أو خطيبته إنها تشيش يبقى يروح السجل المدنى ويشطب من بطاقته كلمة ذكر أو بدل ما يشطب(على أساس إن الشطب ممنوع فى الأوراق الحكومية)..يضيف بعد كلمة ذكر كلمة(الخنزير)...لأن الخنزير بس هو اللى يرضى بالقرف ده....يا سلاااااام شوفى بقى كام واحد فى البلد حيغير نوعه فى البطاقة..
وبعدين بعد كده ومنعا للفضايح..لما يجيله الجرسون ويسأله ..المدام تشرب إييييييه؟؟؟من غير ما يرد..يروح مطلعله البطاقة..
إيه رأى حضرتك بقى..
فكرة.....صح

بنت مصريه يقول...

حائر فى دنيا الله
والله عندك حق المفروض ان الدكتور ده حدوه اصدى قدوه والمصيبه ان الناس بتبقى فخوره قوى وهى بتشيش
تقولش هتاخد الدورى هههههههههه

خبيب
والله حاجه نيله كل واحد ماشى ومعاه كلب واللى معهوش ف الشارع سايبه ف البيت

واحد م البلد دى
يخرب بيت افكارك ههههههههه
والله الجارسون صعب عليا لما جوزى قاله هو احنا وش كده برضه ولما حس انى برقت واحوليت اول ما سأل السؤال ده
اصل ده شغله وده الطبيعى اللى بيشوفه كل يوم ف يا عينى من كتر التكرار قدامه حس انها حاجه عاديه

شكرا لتعليقكوا كلكو

الميكروباص يقول...

بما أن يوجد مساواه بين الرجل و المرأه، فلماذا لا تشرب المرأه الشيشه؟ لسه من ساعتين وانا نازل اصلي العشاء مرت أمامي سياره، الرجل سائق، وزوجته تمسك بالسيجاره، المشكله ان هذا المنظر اصبح عادي ومألوف، على الرغم من ان الست اللي بتشرف الشيشه أو تجلس بسيجاره أمام الناس لها عندنا وصف واحد، لكن أغلب من يجلس على المقاهي من النساء يتفاخر كل منهن بهذا المنظر القبيح، فتجد المرأه تجلس وفي يدها الشيشه وعماله ترص في الفحم والمعسل، حاجه تقرف

صحفية روشة يقول...

والله انا مهتميه جدا انى احافظ على شخصيتى كمصرية ومش بحب الامركه
انا فخورة بهويتى وبحبها
وكمان بالنسبه للى بيشيشو ده عادى خلاص
بقة موضوع محدش بيتكلم فيه
بقة منظر عادى فى كل كافيه

Esraa Hamed يقول...

ههههههههههههه
ال شيشة يا فندم ال
كويس علي انها جت معاكي علي اد تعبير الوش
ههههههههههههه

مدونتك جميلة جداااا علي فكرة
و اسلوبك في الكتابة كمان تححححفة
ان شاء الله هتابعك علطول

تحياتي ليكي يا قمر

المـــفـــــــقــــــــوعـــــة مــرارتـهــا يقول...

انا اكتر حاجة أكرهها في حياتي منظر الست اللي بتشيش ...
أحنا مرة كنا خارجينمع مجموعة وراسهم والف شيشة انهم يقعدوا يشيشوا .. وانا وجوزي قعدنا قافلين مناخيرنا من الريحة اللي كتمت علي نفسنا ... ودي عوايدهم في رمضان .. وواحدة منهمكانت جاية من غير زوجها وطلبت شيشة وأمرتنا مانقلش لجوزها علي حكاية الشيشة دي ... لحد ماالحمد لله خليناهم يبطلوها لما يفكروا يزورونا .. ماعدا واحد دكتور فيهم .. الوحيد اللي ثابت علي مبدأ الشيشة لا وعاوز المجموعة كلها تروح معاه عشان البيه يعدل دماغه وكانت مراته حامل كمان .. بس سيبناه يروح لوحده وقعدنا كلنا في البيت

نسر الشرق يقول...

السلام عليكم
هذة المدونة جميلة جدا
ودى اول زيارة لية
وارجو لكى التوفيق

مشربية يقول...

اولا يافندم متشكر جدا علي سؤالك انا موجود اهو الحمد الله :D
ثانيا : الحمد الله شميت النسيم في البيت احسن حاجة في الدنيا
ثالثا: متقعديش علي الكافية دي تاني فية واحد احسن اسمها "شبابيك" و اضمني الجرسون مش هايقولك حاجة :D لان مافيهاش جارسون
رابعا : عادي ياعني الحياة حلوة شيشة تفاح مش بتضر دة حتي بيعودوا الولاد علي اكل التفاح "ربنا يكرمهم" :D
و بجد متشكر قوي قوي يا انجي و ربنا معاكي في اللي بتشوفية :D

بنت مصريه يقول...

لورنس العرب
اولا شكرا على تشريفك
تانيا اللى يسيب مراته تشيش بتبقى حاجه صعبه قوى هو مبيشوفش منظرها قدام الناس
فيه رجاله فعلا بتحب تبان مراتاتهم قدام الناس انها مودرن شيك بتشيش كده يعنى

صحفيه روشه
ازيك يا قمر نورتينى
بس اسمحيلى افرضى منظر عادى بس غلط
نقول خلاص دا بقى عادى ومنتكلمش فيه
كده الغلط عمره ما هيتصلح
بالعكس دا هيزيد

اسراء حامد
منورانى يا حبيبتى ومرسى عالكلام الحلو ده يا قمرربنا يخليكى يا رب
والله يا بنتى الواحد قرف م المنظر ده

مرارتى مفقوعه من حماتى
ازيك يا قمر من زمان منورتينيش
حلوه قوى راسهم والف شيشه دى هههههههههه
بس انتى بتقولى عادتهم ف رمضان
يا لهوى ف رمضان كمان
وسبحان الله الدكتور اللى فيهم ما سبش الشيشه
دا المفروض ده اول واحد يسيبها

نسر الشرق
مش عارفه اقولك ايه عالكلام الحلو ده ربنا يخليك يا رب وتنورنى دايما


مشربيه
اولا متشكرنيش على سؤالى دا واجب عليا دى عشره مدونات يا بنى ههههه
ثانيا انا مش زعلانه م الجرسون والله هبقى انا والناس عليه وكفايه ان زوجى رد عليه وقاله هو احنا وش زلك
والكافيتريا دى كويسه جدا وانا مش بتكلم عالكافيتريا انا بتكلم عالمناظر اللى هناك اللى قاعدين ف الكافيتريا
لو تضمنلى ان شبابيك دى مش هلاقى فيها بنات بتحشش ااصدى تشيش
اروحها اوكى مرسى لحضورك

امل يقول...

عادي في الزمن ده ما عادش فيه حاجة غريبة
وتلاقي الواحد عنده الف تبرير لو سألتيه عن سبب اللي بيعمله
ربنا يهدينا جميعا

shaimaa samir يقول...

هههههههههههههههههه
انتى رااااااائعة
ورهيييييييييييبة
بجد ضحكت جداااا
وموضوعك بتناقشية بطريقة هزلية ساخرة
والله مشكله فعلاا

بلاش تروحى زلط تانى
اجيلك انا واعملك اللى انتى عايزاه باخفض الاسعار كمان
هههههههههههههههههه

ربنا يكرمك ويرزقك الخير يارب

mregypt7 يقول...

كعادتها دائما تبدع ومن ثم تتالق ونحن نقرا لها فنفرح ونضحك
انها بنت مصريه
انتى زعلانه ليه بس من الجارسون ده يا ستى الراجل ده بيتبع اسلوب الايتيكيت يعنى ايه هاقولك يعنى ايه
شاف واحده ست قاعده فاتبع ان لازم يحصل حاجه اسمها ليديس فيريست
بس السؤال اللى محيرنى وعمال افكر فيه يا ترى كان نوع الشيشه ايه ؟
وهل عنده شيشه كولا ولا لا
وتعالى هنا
الكلاب اللى فى الرحاب نوعها ايه
اوعى تكون كلاب صيد
اصلى ناوى اروح الرحاب شوقتينى ليها
مع خالص تحياتى
الباش مهندس بوحميد

كلاكيت تانى وتانى يقول...

ياحبيبتى انا معظم صداقاتى اتدمرت بسبب الشيشة دى كل ما اتعرف ع بنت او سيدة واقول خلاص هنبقى صحاب واقتنع بعقليتها ونقعد سوا ونتعرف الاقيها بتطلب شيشة مقدرش استحمل واقلبها
هى طبعا حرية شخصية بس انا بعتبر ان الشيشة دى مظهر من مظاهر التقليد الاعمى ومحاولة للظهور بمظهر الناس الهاى لايف بدون وعى او احساس اننا شرقيين وان منظر زى دة مؤذى وبيدل ع ضعف الشخصية وعدم الاحترام وتدنى الاحلاقيات والقيم
تحياتى

بنت مصريه يقول...

امل
انتى اول مره تنورينى وانا اقول البلوج منور كده ليه
عندك حق والله كل حاجه غريبه ف بلدنا بقت حاجه عاديه مهو كله من قله الدين

شيماء سمير
دا انتى اللى قمر والله
ومدونتك حلوه قوى ربنا يخليكى وتنورينى دايما

باشمهندس بوحميد
والله انا مش عارفه اشكرك ازاى عالكلام الحلو ده بجد
وبعدين انا مش زعلانه م الجرسون ولا حاجه مهو ده الطبيعى هناك الله يكون ف عونه
وكان فيه ف المينو انواع شيشه على حسب الطلب تفاح معسل مشمش هههههه كده يعنى
والكلاب بقى بتتحدد بنوع الشخص اللى بيجيبها ههههههههه اصدى يعنى تفضيله لاى نوع المهم انه ميخليش جيرانه تنام وخلاص
انت ممكن تروح هناك انت وصحابك بصراحه مكان حلو قوى للخروج
ويا رب تنورنى دايما

كلاكيت تانى وتانى
انت اول مره تنورنى وانا سعيده قوى بتعليقك ده والله عندك حق ربنا يهدى

nody يقول...

ليدز فريست
افضحونا بقى
على فكره انتى عامله زى اختى الصغيره
لما بنروح مكان بتفصص الناس الى فيه
مره كنا فى عياده دكتور
والله حسيت اننا ها نطرد من كنر ما فصصتهم وفضلت تضحكنى
بس لما بنروح مطعم نضيف يقعدها وشها فى وش التلفزيون علشان ما تفضحنيش
وبعدين الشيشه والكلاب دى لزوم الاتيكيت والشياكه
مش بقولك فضحتينا

سفينة يقول...

كالعاده زي ماعودتينا اسلوبك لذيذ قوي وجميل في سرد الاحداث دا انا كأني كنت قاعد معاكو
علي فكره موضوع الشيشه ده اصبح منتشر جدا واصبحت ظاهره تستحق وقفه
انا بتكلم دلوقت عن الرجاله
اما بالنسبه للسيدات المدخنات فلا تعليق
اما بالنسبه للاخ الانصاري ده فربنا يكرمه لاني بجد مش فاهم وجهة نظره خالص في اللي بيقوله هو بيدافع عن المدخنين ولا ايه؟
ويعني ايه حريه شخصيه من وجهة نظر سيادته......الله اعلم
ماعلينا....المهم
انا بكون بجد سعيد جدا بزيارتي ليكي وبكون اسعد لما بتنوريني
خالص تحياتي...واتمني اشوفك دايما علي خير
سلااااااااااام

Miss. Sosa يقول...

يعني بدل ما تشمي نسيم الحياة تروحي مركز شباب الشيشة ده
عموما تأملاتك للترابيزات شيئ يستحق التقدير علي الاقل مروحناش زلط بس عرفنا فيه كام طوبة اتحدفت من دخان الشيشة

Unknown يقول...

انتي عارفه
انا دخلت مدونات كتير اوي بس اول مره الابتسامه تفضل علي شفايفي طول البوست واتمني انه ميخلصش
بجد يا احلي بنوته مصريه الكلام يجنن

تحياتي

انا برقش
اول زياره ليا في مدونتك وان شاء الله متكونش الاخيره

اتمني تشرفيني عندي في مدونتي

bar2ash

غني يابهيه يقول...

هارجع واقراا تانى
بس قلت اشكرك على ردك بعد كتييييير اوى
على فكره انا عملت المدونه عن طريق اصلا
وفى اول بوست كنت كاتب ليكى شكر خاص
بس انتى ما دخلتيش قبل كده

تحيات بهيه
وكمان الاسم من عندك
لما كنتى بتعلنى عن الحفله

لكى كل الشكر والتقدير

Soooo يقول...

هممممم
بصي هو من حق اي حد يعمل اللي هو عايزه من غير مايضر الاخرين
يعني انا مش ضد ان حد يشيش .. بنت ولد شايب كومي
اللي عايز حاجه يعملها

ولكن
وياحوفي من ولكن اللي هقولها

ولكن .. انا عن نفسي لو اتجوزت واحده بتشرب شيشه معلش يعني ماحبش انها تشيش في مكان عام .. وياريت ماتشيش قدامي من اصلو .. وانا كمان هحاول اني ماشربش سجاير وهحاول اني ابطلها خالص

وبعدين انا بجد مش فاهم ازاي ام تشيش قدام ولادها؟؟؟
ازاي؟؟؟
ده بنات اخويا لما بيدخلو عندي الاوضه اول حاجه باشيها من قدام عينيهم هي علبة السجاير عشان مايشوفوهاش ومايفتكروش انها حاجه حلوة

وبعدين ازاي بقى ام تدي ابنها المبسم يلعب بيه
ازاي
ازااااااي
طب وهي تشيش بايه ولا مؤاخذه؟؟؟؟






سلامووووووووووووز

جيهان علي يقول...

السلام عليكم ورحمة الله وبركاته

أولا أحنا كل المناسبات والإحتفالات عندنا لها ارتباط وثيق جدًا بالأكل فطبيعي ان شم النسيم يبقى بالرنجة زي ما عيد الفطر بالكحك وعيد الأضحى باللحمة وهلما جرا
ده بقى شيء طبيعي عندنا اوي ده نفسي في مناسبة مفيهاش اكل

ثانيا الكلاب مش مشكلة اوي سواء في الرحاب أو غيره لأنها لو لغرض الحراسة فعلا ولها مكان مخصص خارج المنزل يكون عادي

ثالثا موضوع الشيشة والبنات خصوصا هو الشيشة ضررها على الجنسين واحد فسواء شاب او بنت المفروض غلط وحرام كمان لا نفس الشيشة الواحد فيه حوالى 40 سيجارة !!!
لكن المشهد بيكون لما بنت تعد في كافية وتشيش بيكون مقزز شوية أو كتير الحقيقة


تحياتي

di el2mr يقول...

ههههههههههه
بجد اللى يعيش ياما يشوف
بس ماظنش ان ممكن اقضى اى شم نسيم او اى مناسبه زيك كدا لانى اصلا بتخنق من دخان السجاير والشيشه

على فكره مدونتك حلوة قووووىD:

بنت مصريه يقول...

نودى
والله يابنتى انا عارفه انها عاده منيله بنيله بس مش عارفه اخلص منها ازاى
فعلا حاجه فضايح والله انا حاسه ان انا اللى كنت غريبه هناك

سفينه
ربنا يخليك يا محمد يا رب اصدى يا دكتور محمد وتنورنى دايما
وبالنسبه لاستاز عاصم الانصارى فكل واحد ليه وجهه نظره
وانا والله ببقى سعيده جدا لما تنورنى

ميس نوسه

دا انتى عسل بس والله ده مش مركز شباب شيشه ولا حاجه دى كافيتريا حلوه قوى وصدقينى انا متاكده انىلو قعدت على اى كفيتريا تانيه ف اى حته ف مصر هلاقى برضه ستات بتشيش
اسعدنى مرورك يا قمر
ويا رب تنورينى دايما

برقش
ربنا يخليك يا رب عالكلام الحلو ده
واتمنى فعلا تنورنى دايما

غنى يا بهيه ربنا يخليك يا رب لدخولك بس حفله ايه اللى كنت انا بعلن عنها دى مش واخده بالى بصراحه
عموما اتمنى تنورنى دايما

سووو
ازيك يا سوو فينك يا عم من زمان
والله يا سوو الموضوع ده بقى حاجه تقرف قوى وانتشر بين البنات زى المرض اعوز بالله
والله يا سوو الوليه مديه ابنها العيل الصغير المبسم يلعب بيه
متفهمش كان زياده ولا هى بتحب يبقى بقها للشيشه كده من غير حواجز ولا ايه

جيهان على
والله عندك حق مفيش عيد الا ما ناكل فيه
لأوبعد مانلغ اللغ التمام كل واحده تقول انا مش عارفه تخنت كده ازاى
مهو من الحش يا حاجه
وعلى فكره الكلاب ملهاش مكان مخصص ف الرحاب ولا حاجه دى مأنساهم فى البيت
شكرا على تعليقك واتمنى تنورينى دايما

ضى القمر
ربنا يخليك يا رب وتنورنى دايما

تــــ(حـنة)ــــر يقول...

ياه
هو فى كده بجد
يلا الله المستعان
اول زيارة وفى الجو دة
يلا بقى متعوضه

Butterfly يقول...

والله الناس دى معندها ده ولا احساس ومش عاوزه أقول ولا دين عشان ميبقاش حرام عليه
هو ايه منظره وكلام فارغ وقله أدب وكل ده قال ايه عشان نبقى متحضرين
!!!!!!!!!!!!!!!!!!!!!!!

Abo 7anf يقول...

السلام عليكم
معلش على التاخير
اهم حاجه الاستاذ الطلب لمراته شيشه تفاح
امبسط
ان لم تستحى فافعل ماشئت
واسف على تاخير الرد
امتحانات بجى

باجوجو يقول...

أنا شايف إن الصورة كانت واضحة من إسم الكوفى شوب
وكمان إنتى متعودة تروحى
يعنى أكيد شوفتى المنظر ده قبل كده
وغالبا علشان كده جوزك مقربلهوش
بس فعلا كان يوم جميل
شوقتينى أجرب الشيشة التفاح

بنت مصريه يقول...

حنه
اول مره تنورنى واتمنى ماتكنش اخر مره

بوتر فلاى
اتمنى تنورينى دايما يا قمر ويلعن ابو التحضر اللى عمل فينا كده مرسى عالتعليق يا قمر

ابو حنف ربنا يوفقك يا رب وتنجح بتفوق وبالنسبه للراجل اعتقد ان واحد زى ده مبسوط على طول والا ماكنش اتفشخر بالشيشه هو ومراته

باجوجو
لا اوعى تجربها
اول زياره ليك هنا فى البلوج بتاعى واتمنى تنورنى دايما

Tamer Nabil Moussa يقول...

كل ما اجى مش اشوف موضوع جديد

باين عليكى لسة بتشمى الى الان ههههه


فى انتظار جديدك

تحياتى

بنت مصريه يقول...

معلش يا تموره
والله اصلى مشغوله شويه اليومين دول وانا مش عارفه اشكرك ازاى على اهتمامك بالبوستات الجديده
نورنى دايما

استراحة محمد يقول...

انتى بتكلمى عن مدينة الرحاب ، يعنى كل حاجة مرحب بيها ، والدنيا براح وبيس يا مان
لكن تعالى حدانا فى الشرجية - الشرقية يعنى عشان ما حدش يفهمنى غلط - هتلاجى النسوين جاعدة بتشيش برضه
المنظر بتاع بنت بتشرب سجاير بيموتنى على نفسى من الضحك ، بفتكر افلام زمان ونجوى فؤاد مولعة سيجارة فى الكابرية بتاع العصابة
تقريبا ان كبارية العصابة فروعه كترت شوية

الجواز و سنينه يقول...

عملنا رز بلبن
هههههههههههههههههه
بصى يا ستى مره كنت فى اسكندريه و كانت جانبى واحده و جوزها و الله من كتر ما شربوا شيشه حسيتهم هايولعوا
بس الحمد لله على نعمه الاسلام و العقل

بنت مصريه يقول...

استراحه محمد
عندك حق والله يا محمد
الكباريه بقى ف كل حته بس نجوى فؤاد بيمثل دورها ناس تانيه
سلامى لاهل الشرقيه
وشكرا عالتعليق

الجواز وسنينه
عندك حق والله فى الزمن ده المتمسك بدينه مثل القابض على جمره من النار

رئـــــيسـة حزب الأحلام يقول...

شيشه هى حصلت لشيشة

بنت مصريه يقول...

شكرا يابو على بلغت عنى ماشى مهو ده العشم برضه ههههههههههههههههههه

إبن مصر يقول...

دعتينى ولبيت الدعوه ومش ندمان لأن ده شرف لى
عموما فى بعض البنات متخيله ان الشيشه شربها بالنسبه ليها عادى معلش ده يبقى اسمه هبل
سورى يعنى وبتعتبره من ضمن مطالب المساواه
طيب انا هحكى على موقف حصلى فى الأتوبيس
انا فلاح من قريه مصريه
كان لازم اول مااركب الأتوبيس واكون قاعد على كرسى انى اول ما اشوف بنت او ست واقفه اقوم واقعدها ولكن فوجئت بعد مانزلت مهندس زميلى بيقولى وتقف ليه هو الوقوف فى الاتوبيس للرجاله بس قولت امال
قالى لأ دلوقتى بقا فى مساااااااااااااااااواااااااااه
ههههههههههههههههههههههههههههه
على فكره انا بكره اشوف المنظر ده وبكره ريحة الدخان
تقولى ايه بقا رجالة اخر زمن


تشرفت بيكى واتمنى دوام الإتصال

بنت مصريه يقول...

سون اوف ايجيبت
انا متشكره لحضورك ده
واتشرفت بمعرفتك
واتمنى التواصل الدائم
بس بصراحه الله يخرب بيت دى مسواه يا اخى اللى تخللى منظرنا كده

رامى اشرف يقول...

شكرا ليزرتك ليا وتعليقك واتمنى تورينى ديمن وممتازة البلج عندك عجبنى الموضوع

بنت مصريه يقول...

شكرا على زيارتك يا رامى

zOzO يقول...

ههههههههههههه
هههههههههههههههه
ههههههههههههههههههههههه


عندك حق والله
الام تلاقيها بتشرب وجوزها جنبها مش بيشرب
احيانا بتحصل
تحياتي ليكي
ومعلشي لو مقصره اعذريني عشان الامتحانات

بنت مصريه يقول...

ربنا يوفقك يا زوزو يا رب
وشكرا على تعليقك يا حبيبتى

rain man يقول...

على الاقل انتي قضيتي شم النسيم
و لا يهم مع من
اعرف شخصا _ ربما كان انا _ قضاه كرنجة كبيرة عائمة في بحر من الطحين
:D

بنت مصريه يقول...

رين مان
والله كده احسن صدقنى شكرا انك نورتنى ويا رب دايما

بنت مصريه يقول...

شكرا ليكو كلكو

حمادة زيدان يقول...

بنت مصرية
أسف اسف اسف اسف
اتأخرت كتير , والظاهر فاتني كتير وكتير
البوست يجنن كالعادة دائماً , والشيشة دلؤتي بقيت زيها زى المصاصة في بق أي حد
ومش في الرحاب بس

محمود حسن العدل يقول...

ههههههههههههه
لا طبعا انتى مدام وست الستات كمان
قوليلى فين الجرسون دا وانا اقتلة
انتى فعلا عندك حق الظاهرة الغريبة دى انا شفتها فى مكان ما
كنت منتظر واحد صحبى واللة ماقولتلة انى وصلت غير بعدها بساعة او اكتر على ماعينى قدرت تتاقلم على اللى شايفة
انا واللة بردو سالت نفسى نفس السؤال بتاعك هما الناس دول من غير اهل والبنات دول بيعملو كدة لية
هيا دى كدة هاتكون بت اسبور
المهم انا بشكرك اوى على البوست دة
انتى فعلا نقلتى جزء ضايع من المجتمع اللى احنا عايشينة
شكرا ليكى

hi5