.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الجمعة، 23 مايو 2008

زمان(جلا جلا جلا فين البت).........دلوقتى (جلا جلا جلا فين النت)

ازيكوا يا جماعه .........وحشتونى جدا
اكيد انا كمان وحشتكوا صح.........وقعدتوا تسألوا نفسكو
فين البنت المصريه؟
دا احنا من غيرها خيبتنا قويه
غابت عننا فجأه من غير حتى تحيه
مش كنتوا بتقولوا كده ولا ايه.........ايه متنحين ليه.........كنتوا بتقولوا كده وللا لأ
عموما انا هضحك على نفسى واصدق انكو كنتوا بتقولوا كده....يعنى عشان مبطحكوش
واكيد طبعا عايزين تعرفوا انا كنت فيين..........بس قبل ما اقوللكوا هحكيلكو على حاجه

كان زمان فيه واحد ف الموالد اسمه(الحاوى) ........كان الراجل ده يجيب 3 ورقات كوتشينه
فيهم صوره بنت...ويقلبهم على ضهرهم ويحركهم بشكل عشوائى......ويبتدى يسأل الناس اللى حواليه
فين صوره البنت؟
من قواعد اللعبه لو حد من اللى واقفين جاوب صح (الحاوى) يديله فلوس
ولو واحد جاوب واجابته كانت غلط هو اللى يدى (الحاوى) فلوس (وده هوالمطلوب)
عشان (الحاوى) ياخد فلوس من الناس وميخسرش حاجه
بيعمل حيله معينه
يعنى .....يظهر للناس ف الاول صوره البنت
وببعض الحركات اليدويه السريعه يخبى صوره البنت........تحت طقيته........ف جيبه .......ف كمه
ويبدلها بأى رقم تانى
وبكده عمر ما حد هيطلع البنت
و(الحاوى) هيلم على قلبه قد كده من الناس

اكيد دلوقتى بتقولو عليا هبله....واكيد بتقولوا ايه اللى جاب غيابها عن البلوج( للحاوى) والكوتشينه والبنت والهبل ده؟



معلش استحملونى انا زى امكوا برضه
اقولكوا بقى انا كنت فين



من 3 شهورلقيت ناس ف العماره مشتركين ف النت........وفيه واحد اسمه(الحج فلان)
هههههه قال حج قال.......مدى للناس وصلات نت والواصله ب200 جنيه
اتفقنا انا وزوجى على اننا فى حاجه لهذا المدعو(نت) .......وقمنا بالاتصال بالحج
جه الحج وركب الواصله.....ولهف ال200 جنيه....(الهى ما يوعى يصرفهم)
المشكله بقى ان النت فصل من اسبوعين وفضل فاصل واحنا مش عارفين فيه ايه
(والحج علان ) اختفى لا بقى يرد على تليفونات وقافل مكتبه ومستكنيص (نايم يعنى) ف بيتهم


كده اى ذكى يفهم ان احنا اتضحك علينا



يومين ولقينا خبط عالباب فتحنا لقينا شاب محترم بيقول
(انتو كنتوا مشتركين مع فلان ف النت....احب اقولكوا ان فلان ده نصاب..بعلكو وصلات ب200 جنيه وباعكو ليا _على اساس اننا بكوات شاى_ الواحد ب40جنيه.........بس اطمنوا انا خدمتى هتكون متميزه.....
نأسف للازعاج)

ساعتها بس عرفت ان فيه تطور ف كل حاجه
يعنى بعد ما (الحاوى) زمان كان بيقول فين البت؟ .......
الحاوى دلوقتى بيقول فين النت؟......
وعجبى

هناك 53 تعليقًا:

rtrcbh يقول...

السلام عليكم ورحمه الله وبركاته
هههههههههههههههه
ربنا يكرمك يارب
سيبك انتى المهم حمدا لله على سلامتك ومادمتى رجعتى تكتبى يبقوا شكلكوا وافقتم على البيعه واشتركتم معه تمام؟
ربنا يوفقك يارب
وهنتظر كتاباتك بجد تانى
والسلام عليكم ورحمه الله وبركاته
اخوك
د/احمد جمال

بنت مصريه يقول...

شكرا يا استاذ احمد
والله يسلمك يا رب
واتمنى انك تشرفنى تانى

سفينة يقول...

هههههههههههههه
امال بس استشاريه نفسيه
وبفهمها وهي طايره
ومن كلمتين بس معاك افهم انت ايه وعايز ايه

دا انتي طلعتي بيتنصب عليكي اهوه زينا يعني
بس والله وما ليكي عليا يمين سعيد جدا بعودتك وبرجوع النت ليكي
انا مش هزعل لو النت فصل من عندي أد زعلي لو اتنصب عليكي تاني واتفصل من عندك تاني
اتمني اسمع عنك كل خير دايما
وبأمانه مدونتك تحفه واحب مدونه لقلبي هي وصاحبتها اللي دمها زي العسل
خالص تحياتي ويارب اسمع عنك كل خير دائما

HERO يقول...

هو طبعا كان ليكي وحشة منقدرش ننكر واحمدي ربنا انها جت على قد 200 جنيه وان شاء الله تنتظمي في الكتابة تاني

تحياتي

بنت مصريه يقول...

شكرا على تعليقك يا هيرو
وربنا يخليك وتنورنى دايما

Unknown يقول...

السلام عليكم ورحمة الله
الحمد لله ان انا جيت يوم ما انتى رجعت بالسلامة والا كان زمانى عمالة اعييييييييييط لما اجيب لحم عينينا(وما تسألينيش يعنى ايه انا باسمعها كده)المهم حمد الله على السلامة
وخللى بالك ياما حيحصل ,زى كده , طالما ان العزيز الغالى(النت) عرف الطريق اليكى
خللى بالك
نحن السابقون
وانتى شكلك محصلنا على السريع
والسلام عليكم مرة تانية.

كريم مصطفي سيد يقول...

حمد الله علي السلامه
وتعيشي وتخدي غيرها
بس حالياالشعب المصري بياكل في بعض وربنا يستر

Mafrousa يقول...

معلش يعنى لو فيها غلاسه فى السؤال يا بنوته
انتى ماروحتيش ليه على طول للمنبع يعنى لينك دوت نت و ال د س ل و كده

بنت مصريه يقول...

سفينه
اه يا اخويا بفهمها وهى طايره
عندك مانع
واذا كان اتنصب عليا فكل قاعده وليها استثناءات هههههههههههه
وانتو والله كلكو وحشينى

نورهاتى
معأنى مش فاهمه بعض كلامك بس اشكرك عالتعليق واتمنى تنورينى دايما

كريم مصطفى احمد فراج
الله يسلمك
وشكرا على تعليقك
على فكره انا بحاول اعلقلك ومش لاقيه
تعليق

واحده مفروسه
ازيك يا قمر
وبالنسبه لاستفسارك
اهو اللى لقيته قريب وباشتراك شهرى رخيص
بدل ما اتحمل تكلفه روتر وسويتش لوحدى
شكرا على تعليقك

mostafa rayan يقول...

ربنا يرحمنا من اللي بيحصل في بلادنا
صحيح هي مصر لسة بلدنا ؟

mregypt7 يقول...

انا جيتلك وسايب امتحاناتى عشان انتى بس غاليه عندى اوى
وبلا اى تحيز ولا بكش
انتى التوب فى الكتابه للمدونات
فانا لا استطيع ان اتاخر عنك فى الرد
نيجى لموضوعنا اللى سيادتك كاتباه
بقى فى فى الزمن ده مصرى بينضحك عليه ويتنصب عليه وياريته اى واحد دى اخصائيه نفسيه تزعم انها تعرف الشخص الذى امامها وتقراه وتفهمه بالبلدى يعنى هههههههههههه
معلش يا بنت يا مصريه تعيشى وما تخديش غيرها
نيجى للحاوى ده انتى زى ما تكونى فاهمه كل حاجه هو كان بيعملها
انا شاكك فيكى انتى كنتى بتسرحى معاه ولا ايه
وتقولى قرب وتعالى وبص واللى هايطلع المزه
هاطلع عين اللى خلفوه
بعد كده ابقى خدى بالك
بصى فى عرض حيلو اوى هاعرضه عليكى
ممكن اوصلك النت وبخدمه مميزه وب 400 جنيه فى الشهر بس النت بتاعنا غير الغير
بيتكلم وبيحمل لواحده ويقولك على مين اللى نصب عليكى
ولا اقولك بصى هابيعلك محطه مصر
ولا اقولك هابيعلك العتبه
ولا اقولك تاخدى سيجاره
وفى الختام احب اقدم لك كلمه شكر على كل ما تكتبيه
فكعادتك تبدعى ومن ثم تتالقى وببوستاتك تتعملقى وتتفوقى
مع خالص تحياتى
الباش مهندس بوحميد المزنوق فى موسم الامتحانات

بنت مصريه يقول...

مصطفى الريان
والله ما اعرف يا مصطفى اذا كانت لسه بلدنا ولا لأ
شكرا عالتعليق ونورنى دايما

باشمهندس بوحميد
يا هلا يا مرجبا بوحميد هل علينا
وبرغم امتحاناته طل علينا قيموا الافراح ودجوا الطبول
رمضان جانا
اولا يا سى بوحميد الاستشاريه النفسيه دى مش مصنوعه م الفولاز
يعنى مش هبص ف عين الراجل اعرف انه نصاب
ولونى كنت شكه فيه دا حتى قال اى بعد ما شكيت فيه هههههههه
ثانيا
انت بقى افتكرتنى هبله
وبتعرض عليا عرض للاغبياء فقط
عرض ايه دا اللى هيبعلى محطه مصر
نورتنى يا بشمهندس والله
وعلى فكره انت من احسن واجمل المدونين بجد والله ومتتصورش بفرح قد ايه لما بتعلقللى
بس بقولك ايه دى ايام امتحانات
متفتحش النت بحجه انك تعلقلى
والطوبه تيجى ف ماده وللا حاجه
بعد الشر وتقول منها لله بنت مصريه هيه السبب
ههههههههههههههه
يللا سلام وربنا يوفقك يااااااااا
رب
قول امين

Unknown يقول...

حتى النصب ف الوصلات...ربنا يستر على باقى الحاجات.

khobayb يقول...

الواحد مبيتعلمش ببلاش !

---

عامة ..

الحاوي موجود في كل حاجة ..

الواحد لو غمض عنيه اليومين دول ، بيفتح يعد صوابعه بعدها ..

بنت مصريه يقول...

كريم
اه والله يا كريم
النصب بقى ف كل حته
مرسى على مرورك
ويارب تنورنى دايما

خبيب
عندك حق والله يا خبيب
ربنا يكفينا شر الحاوى
واللى بيعمله الحاوى
شكرا على تشريفك ليا

امل يقول...

السلام عليكم
حمد الله على سلامتك يا احلى بنوته
اللي حصل ده تطور طبيعي
حتى الحراميه عايزين يستفيدوا من التكنولوجيا الحديثة
بوست دمه خفيف قوي
وطبعا وحشتينا
تحياتي

الميكروباص يقول...

وصلة النت ب 200 جنيه؟
ده في السنه ؟
عارفه
انا الواد اللي انا واخد منه صلة النت رفع السعر وخلاه 50 جنيه شهري لأن السرعه أصبحت جيجا
المهم
بعد ما رفع السرعه من هنا- السنترال باظ- والنت بقى زباله- وياعيني ملحقتش اتهنى بيه
ولما سألته وقلت له ايه الحكايه ياعم- قالي المشكله في السنترال هو السبب
واديني منتظر لما السنترال يحل المشكله
عسى أمن يكون الحل قريبا
...
لا توهمي نفسك بأننا كنا بنسأل عليكي
تأكدي من اننا كنا بنسأل
وانا أقول المدام اختفت فين
يالا حمدا لله على سلامة الوصول

Miss. Sosa يقول...

معلشي يا بنتي اللي اخد منك الفيل قصدي النت... قادر يرجعهولك تاني ..... دي من فيلم طاقية الاخفا اصل الراجل نصب عليكوا علي طريقة توفيق الدقن أه.... ويللا
شكرا علي تشريفك الغالي لمدونتي وبجد اسلوبك ساخر ومميز وعود احمد طبعا هتسألي احمد مين .... مش هقولك احسن يطلع اللي نصب عليكوا اسمه الحاج احمد
واسمحيلي اتابع مدونتك ... او متسمحيش ماهو مش بمزاجك اصلا .... هتابعك يعني هتابعك

بنت مصريه يقول...

امل
الله يسلمك يا قمر وربنا يخليكى
يا رب وتنورينى دايما

لورنس العرب
بقوللك ايه حرص م اللى انت واخد منه الواصله دا ممكن السنترال يبقى تمام وهو اللى بيستهبل
اه مهو اللى اتلسع م الشربه بينفخ ف الزبادى
مرسى على تشريفك

ميس سوسه
ههههههههههههه
تابعى ياختى تابعى هتابعى المله يعنى
ههههههههههه
شكرا لتشريفك يا قمر

shaimaa samir يقول...

ههههههههههههههههههههههههههههههههههههههههههههههههههههه
والله ضحكتينى من قلبى
ربنا يكرمك
ويعزك
ودايما تدخلى السرور

وحشتينا
وكل نصبة وانتى بخير
اهم حاجة الصحة

دمت بخير يارب دايما

la3lahakhier يقول...

هههههههههههههه

200 جنيه حته واحدة

انا اسفة انى ماسألتش عنك اوعدك المرة الجاية ابقى متباعكى دايما
والمرة الجاية من غير مايتنصب عليك هه؟
كل التحية يا ست الكل

واحد من البلد دى يقول...

كمبيوتر بلا نت...
إنسان بلا مخ..
دام سؤالك عنى غاليتى..
وشرفينى لترى الجديد

مدحت محمد يقول...

ههههههههههههههههههههههههههههههههه
انتى شكلك مشكلة

عارفة
انا برضه مشترك مع ناس فقر ومنهم واحد نصاب انا طردته والله ضحك على واحد مشترك معانا فى خمسين جنيه
وواحد تانى فى عشرين جنيه جه يستعبط عليا
رمتله سلكه
فى ناس كدة
كتير للاسف

Abo 7anf يقول...

السلام عليكم
انا اولاااااا اسف جدااااااا على تاخي الرد
ثانيا
فعلااااااااا فينك من زمان وحمدالله على السلااااااامه
ثالثا
الحاوى دا فى كل مكان وعندنا بردوا
بس اوعى تكونى ادتيه الفلوس حاسبيه الاول على النص شهر الفات
انا لو فصل النت عندى يوم ينهااااااار
يلا المهم حمدالله على سلامتك تانى مره

Unknown يقول...

بنت مصرية

كل الهيصه دى علشان 200 جنيه !!

حكم

دى مصر كلها حواه .. ومن شابه رئيسه

ما ظلم حاوى كبير وحواه صغار

انا معنتش هتكلم اصل باين هعك

""""" يقول...

حسيت بمأساتك اوى

بس انتى اسلوبك ساخر ومميز بجد

ضحكتينى كتير فعلا

وكله كوم وحبستى هنا فى مدونتك كوووووووووووم هههههههههههههههههههه

الجو عندك تحفه بجد

حمد الله على سلامتك

والحمد لله ان مشكلتك مع النت اتحلت

بعد اذنك انا هتابع كتاباتك :)

محمد عبد الغفار يقول...

هو مكنش بيقول جلا جلا خالص لنه مكنش بيلحق يقول من السرعه الخرافيه اللى بيوزع بيها الثلاث ورقات

كمان كان بيقول فين السنيوره

بنت مصريه يقول...

شيماء سمير
مرسى يا قمر عالدعوات الحلوه دى
نورتى البلوج واتمنى تنورينى دايما

لعلهل خير
ربنا يخليكى ومتنسينيش خالص
وتنورينى دايما

واحد م البلد دى
عندك حق والله ولا شكر على واجب
دا واجب انى اسأل على زمايلى البلوجريه
وانى يشرفنى انى ازورك
عود احمد

مدحت
ههههههههه
الحمد لله يا مدحت ان فيه ناس تانيه غيرى اتنصب عليها مش انا بس
احنا نعمل انا وانت حامله
لخزؤقه النصابين ايه رأيك
ههههههههههههههه

ابو حنفى
يا عم متتأسفش احنا اخوات
بس اختك بقى ادته الشهر كله
ههههههههههههه
اتمنى تنورنى دايما

استاذ حسن محمد توفيق
هههههههههههههه
اه يا استاذ حسن الهيصه دى عشان 200 جنيه
يا عم احنا شباب ولسا بدئين حياتنا
شكلك كده هتودينى معاك ف داهيه
ههههههههههههههههه
اتمنى تنورنى دايما

امل
اول مره تنورينى يا قمر
واتحبسى ياختى اتحبسى ولا يهمك
اجيبلك عيش وحلاوه
وايه اسمحلك دى يابنتى داانا بتنشأ
على زبون
ههههههههههههه
شرف ليا انك تنورينى دايما

MATRIX يقول...

ههههههههههه الموضوع دا جميل اوى..
على فكرة انا اول مرة ازور المدونة دى ..افكارها جديدة ..اتمنى نشوف مواضيع اكتر ...

بنت مصريه يقول...

محمد عبد الغفار
فينك من زمان يا راجل
ههههههههههههه
انت بتعلق على حاجات غريبه سايب الموضوع الاساسى وبتتكلم ف فرعيات
بس احب اقولك وجهه نظرى
وجهه نظرى من جلا جلا جلا
كعنوان للبوست عشان الناس تعرف انى هتكلم عن الحاوى
قولت فين البت بدل ما اقول فين السنيوره
عشان يكون ف العنوان نوع من القافيه
بين
(البت والنت)
والمفروض ان دى حاجه المفروض تفهمها من غير ما اقول يعنى
هههههههههههههههه
عموما شكرا عالتعليق ومتبقاش تتأخر علينا تانى

بنت مصريه يقول...

ماتريكس
ربنا يكرمك يا رب واتمنى تشوف مواضيعى اللى فاتت
هتعجبك اكتر
واحييك على اختيار اسم ماتريكس اصلى بحب الفيلم دا قوى
هههههههههههه
اتمنى تنورنى دايما

غير معرف يقول...

السلام عليكم ورحمه الله وبركاته
بجد انتى شخصيه جميله جدا ولذيذه جدا وزى العسل
انا حبيتك لله فلله من غير ما اشوفك حسه كانى قعده معاكى وزعلت لما قولتى حكايه النت دى لانك فعلا مدونتك بتخفف عنى احيانا
احلى حاجه عجبانى فيكى اسلوبك التلقائى بتكتبى بتلقائيه جميله جدا ودا الى شدنى للاسلوبك
بتمناللك كل توفيق
تقبل مرورى
نرمو

MATRIX يقول...

شكرا على التعليق فى مدونتى وانا بجد بقيت خلاص زائر دائم اذا سمحتى لى ..وانت بجد افكار مواضيعك جديدة ولزيزة اوى
شكرا لحضرتك

بنت مصريه يقول...

غيرمعروف نرمو
انا سعيده قوى بتعليقك ده
ووالله انا بعرف بتعليق الناس
اللى مش معروفين او اللى مش مدونين اكتر من تعليق المدونين
اتمنى تنورينى دايما
وتبقى صديقه دائمه لى
وربنا يكرمك يا رب
ويجازيكى كل خير عالكلام الحلو اللى انتى
بتقوليه دا

بنت مصريه يقول...

ماتريكس
يا عم ايه اللى بتقوله دا
لا شكر على واجب
مدونتك فعلا رائعه وجديده
وانا يشرفنى
انك تكون زائر ليا
واتمنى تنورنى دايما

Tamer Nabil Moussa يقول...

اولاا

حمد الله على السلامة

وبعدين ازى بقلى فترة مش بجى عنط طيب بصى كدة من اول بوست عرفتك بتاع شم النسيم لحد الان دة انا كمان كل شوى انط عندك وايال عليكى ى دى بقى انا عايز حقى ماليش دعوة

فى حكاية انى نسيت اقول ليكى على خفل الافتتاح دى معاكى حق فيها

----.

الحاوى موجود فى كل وقت مع اختلاف الشكل والصورة وبعدين تاجرى نت 200 جنية لية تعالى عندى واديكى الخط 30 جنية بس ههههههه

خلى بالك بعد كدة

تحياتى

Soooo يقول...

طب والله العظيم انا بقالي كام يوم باقول هي البنت دي اختفت ليه

لكن انتو اصلا غلطانين
ميتين جنيه ايه؟؟؟
ليه يعني
وحتى اربعين جنيه كتير يابنتي

ده انتي تبقي مشتركه لوحدك وتدفعي في الشهر خمسه وتسعين جنيه وسرعه زي الفل


وفكرتيني بالكلمه بتاعة هنيدي .. الحاج صاحب البيت .. بس ده .. الحاج صاحب النت


ماتختفيش كده ياستي تاني





سلاموووووووووز

استراحة محمد يقول...

بالنسبة للمتين جنيه والله يرحمهم ومع الأبرار والشهداء فى الجنة
المهم خدى بالك احسن اللى اتبعتوا ليه يطلع من اعضاء فريق السحرة
ويجى كمان اسبوعين واحد يقولكوا انتوا اتبعتوا ليا ب 10 جنيه

GOLDEN B0Y يقول...

ياسلاااااااااام


مدونه جميله

بوست رائع

تقبل تحياتى :
ROONEY

بنت مصريه يقول...

تامر
شكرا على تعليقك يا تامر وبعد كده اى حاجه للمدونين تعرفها ابقى قوللى عليها
مش عايزين نبتديها نداله

سووووووووووو
والله ليك وحشه يابن الايه
اهو الللى حصل بقى يا سووو اندبينه وخلاص
انا فرحانه قوى انك نورتنى
ويارب دايما


استراحه محمد
والله عندك حق يا محمد
هههههههههههههه
بس ساعتها بقى مش هيخرج من تحت ايدى عايش
هههههههههههه
شكرا لحضورك


اسامه
ربنا يخليك يا رب وتنورنى دايما

غير معرف يقول...

شكرا ياجميل على اضافتك الجميلة
اللي حسستني بنوع الامل والتفائل
رغم اني كرهت الحياة
ونفسي اللي بحبها تحس بية
انا قرائت انك بتحلي المشاكل النفسية
ممكن القي حل لمشكلتي عندك
لو مش يضايقك ممكن ترسلي لي ايميلك
لو مش عاوزة بلاش

أسير الجراح يقول...

ياااااااااااة انا وصلت متاخر اوى


بجد سعدت بتعليقك

وانا اهو نفزت

وجيت اعلق عندك

سعدت بيكى وبجد يارب ما تكونش اخر زيارة



تقبلى تحياتى


اسير الجراح

weka_weka49

لو حبيتى تكلمينى انا موجود

tarek alghnam يقول...

بنت مصرية
اكيد اخترتى الاسم دة لان فيكى من خفة دم المصريات كتير
ومن جمال روحهم
استمتعت بالبوست الرائع
وسعيد بتواجدى هنا
واتمنى ان تتواصلى معى بمدونتى المتواضعة
ودمتى بحفظ الله

حبيبة الروح يقول...

هههههههههههههههههه

تصدقي انك سكرة
حلو جدا جدا البوست ده
نورتي مدونتي ويا رب متكونش الاخيرة

مي

FaceMoon يقول...

هههههههههههههههه
حصلت معايا اول مرة وبعد كدة فهمت لعبة الحاوى كويس اوى
وعملت نت لوحدى وبمزاجى
يارب تعدلى النت بقى عشان يبقى الحاجة العدلة اللى فى حياتنا الا كلة اتعوج
ربنا يستر
تحياتى وتقديرى

الملكة هند يقول...

هههههههههههه

كويس انة كشف قبل المزيد من النصب والاحتيال

تحياتى

maYHam يقول...

السلام عليكم
حركة طبيعية ...إحنا شعب دهن الهوا دوكو

بس برضة مفروض تسئلي وتعرفي الأسعار قبل ما تدفعي الفلوس وإعلانات النت مالية الجرايد
ولو إن الواحد مش بيتعلم بلاش

Butterfly يقول...

ههههههههههههههههههههههههههههههههه
لأ بجد جامده الحكايه دى
ولسه ياما هنشووووووووووف

.:.-=- ELGaZaLy-=-.:. يقول...

انتو كنتوا مشتركين مع فلان ف النت....احب اقولكوا ان فلان ده نصاب..بعلكو وصلات ب200 جنيه وباعكو ليا _على اساس اننا بكوات شاى_ الواحد ب40جنيه.........بس اطمنوا انا خدمتى هتكون متميزه.....
نأسف للازعاج)
------------------------

عالى اوى الافية دة بجد...

200 جنية فى السنة...
الشعب دة تحفة..

ربنا يكرمك بجد

والف حمدالله على السلامة

بنوته مصرية يقول...

ههههههههههههه

حمدالله علي السلامه

بس 200 كتير دانتي لو اشتركتي في الدي اس ال هتدفعي بس 90 جنية وهيبقي النت لوحدك

عموما منوره من تاني بس مقولتيش انتي اشتركتي مع مين دلوقتي وايه اخبار النت

يعني مش تغيبي عنا تاني
تحياتي

بنت مصريه يقول...

امير الجراح
انا اسعد والله بتشريفك
بس معرفتش تعليقك عالبوست

طارق الغنام
دا بس من كتر زوقك
ربنا يخليك يا رب واتمنى تنورنى دايما

مدينه الملائكه دا انتى اللى عسل يا مى والله
واتمنى اشوف اسمك كتيير ف مدونتى

فيس مون
عندك حق والله كله اتعوج
شكرا عالتعليق واتمنى تنورنى دايما

هند
ازيك يا قمر فينك من زمان
اتمنى متهجرينيش تانى

انا من كنت محتاج
والله سألت
بس على رأيك الواحد مبيتعلمش ببلاش
خصوصا ف البلد دى
شكرا عالتعليق

بوترفلاى
دا انتى اللى جامده يا قمر
فينك من زمان
اتمنى تنورينى دايما

الجزالى
الله يسلمك
بس انا مقولتش 200 جنيه ف السنه
عموما ربنا يكرمك انت واتمنى اشوفك دايما

بنوته مصريه
ازيك يا قمر عامله ايه
لا اطمنى النت تمام دلوقتى
ربنا يستر
شكرا ليكى يا قمر

الميكروباص يقول...

هل عاد الاختفاء من جديد؟؟؟

Maha Shahen يقول...

يا عزيزتى الله يكرمك روحى هاتى خط نت من شركة بدل الوصلات الغريبه دى انتم لو جمعتوا كل المبالغ اللي اتنصب عليكم فيها كان زمانكم ركبتوا نت من شركة ههههههههه وابقى قسميه على ناس برضوا عادى كلنا بنعمل كدا هههههههههه بس يبقى مكان مضمون وخلاص
وحمدالله على سلامتك برغم انها متأخره شوية بس متمناش تغيبى تانى لأنى هكون مقيمه في المدونه بتاعتك بقى خلاص

hi5