.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الخميس، 17 يوليو 2008

تاج ولا سلطانيه............هاجاوبه والاعمال بالنيه



ازيكوا يا حلويين ................بعد غياب اكيد مستنيين
اولا احب اشكر حبيبه قلبى (زوزو) عشان بعتتلى تاج _انا عارفه ايه التاج اللى شغالين فيه ده كانت بعتت كيلو جوافه احسن _هههههههههه حد سمعنى
المهم انا كنت بشوف التاج ده عند باقى المدونين ...........بس بصراحه لغايه دلوقتى مش عارفه ايه علاقه التاج ده بالحديث عن الشخصيه...بس انا هعمل زى ما بقيت المدونين بيعملوا انا هقعد اتفزلك يعنى
ومعأنى دارسه (علم نفس) وعارفه ان التعبير عن الشخصيه دا قدرات وموهبه .................بس انتو عارفين طبعا انى موهوبه.ولا ايه ............ايه متنحين ليه...........موهوبه ولا مش موهوبه ............ايوه كده اتعدلوا...........موهوبه ومتواضعه كمان ....ومش بقول على نفسى موهوبه ...دا كلامكوا انتو اللى لسه قايلينوا عليا دلوقتى ...ما علينا نقول بقى التاج عشان( زوزو) ما تزعلش....ولازم طبعا نسمع كلام (حسين فهمى ) و(سعاد حسنى) ونخللى بالنا من (زوزو)
اولا:اذكر عشره اشياء عن نفسك
1-الاسم:انجى الشهيره ب(بنت مصريه)...........السن:25 ويوم ودقيقه
المكان:قاهره ام عز (هيه كانت قاهره المعز .......بس بعد اكتساح حديد الدخيله بقت قاهره ام عز او قاهره عمو عز المهم يعنى لازم نجيب سيره عز .........فأذا ذكرت القاهره ذكر عز ف ديلها عالطول )
الحاله الاجتماعيه:متقندله (متجوزه) ................الوظيفه: خدامه (ست بيت)
خريجه:مستشفى المجانين (اداب علم نفس)
2-رومانسيه جدا بس البلد دى مينفعش فيها الرومانسيه زى مانتو عارفين ......يعنى اصل الحياه ف مصر بقت وردى قوى ف رومانسيه على وردى هتقلب بغم
3-برغم انى مريت بمواقف ف حياتى لا احسد عليها الا انى- الحمد لله-بميل لروح الدعابه والمرح
4- بحب اتقرب من ربنا قوى .......ودايما بدعى ان ربنا يهدينى ويهدى اللى بحبهم
5-ممكن اكون عصبيه شويه بس طيبه قوى بنسى الجرح بسرعه..........وساعات مابيهمنيش لما حد مش مهم عندى يضايقنى ........بس بزعل قوى لما حد بحبه يجرحنى
6-ربنا يخليلى (ماما وبابا واخويا وتيته_ماما حاجه_وزوجى العزيز) ساعات بختلف معاهم لكن عمرى مانكر افضالهم عليا ....وان هم اللى وقفوا جنبى ف كل موقف صعب لحد ما وقفت على رجليه تانى ......ولغايه ما اموت هفضل محتجالهم برضه
7-مؤمنه جدا بقول الله تعالى (وعسى ان تكرهوا شيئا وهو خير لكم)............محدش عارف الخير فين وموقنه ان ربنا مقدرلى دايما اللى فيه الخير
8-بحب اغنى قوى .........حتى وانا متضايقه.........ههه انتو عارفين ساعات ببقى مخنوقه قوى اقعد اغنى والاقينى بعيط وانا بغنى (مش قولتلكوا خريجه مستشفى المجانين)ههههههههههه
9-لقيت نفسى ف المدونه (اصلها كانت ضايعه)...........وحسيت فعلا انها بتساعد على فك الكبت وسمعت ان الحكومه قريب هتعمل عليها رقابه ..........قال يعنى الحكايه ناقصه
10- اخر حاجه هيه انى ( بحب مصر وبكره اسرائيل ) واييييييييييييييه
على فكره يا جماعه عايزه اقولكوا نصيحه للزمن ...........مش كل اللى بيضحك ويهزر على طول يبقى معندوش مشاكل .........بالعكس دا ممكن يكون مليان مشاكل ............بس بيحاول ينسى يعنى زى (البلياتشو) كده
زيى يعنى ههههههههههه
ثانيا:اهدى التاج ل خمس اشخاص
ا-مى صاحبه مدونه (مدينه الملائكه)
2-عليا حليم صاحبه مدونه(عندليبيات)
3-احمد البوهى صاحب مدونه (انكسارات)
4- بنوته مصريه
5-لورنس العرب
مرسى يا (زوزو) ياختى بس المره الجايه يا ماما بقى ابقى ابعتى حاجه تتاكل ...........
بدل البخل ده ...........قال تاج قال ..حكم..

هناك 56 تعليقًا:

حبيبة الروح يقول...

اوك يا ستي
تدبيسه يعني
بس بجد بجد وحشتيني موت
حمد لله علي سلامتك يا قمر
يا رب تكوني قضيتي وقت كويس واتبسطتي
جبتيلي شويه مايه ورمل ولا نسيتيني
هجوبه قريب يا ستي لان نوسه كمان كانت طلاباه مني

مي

بنت مصريه يقول...

خلاص يا مى اعملى اتنين ف واحد بقى زى الشامبو
وبعدين اشمعنى انا اللى ادبس لوحدى
متتدبسوا معايا ولا على راسكو ريشه

اسكتى يا مى كانت اجازه تحفه
عقبالك

عروسة ننوسة يقول...

مبروك على التاج يا قمر ....اجاباتك نوذجيه
تحياتى

بنت مصريه يقول...

مرسى يا ننوسه ويا رب تنورينى دايما

بنت مصريه يقول...

مرسى يا ننوسه ويا رب تنورينى دايما

بنت مصريه يقول...

مرسى يا ننوسه ويا رب تنورينى دايما

kmt يقول...

السلام عليكم ورحمة الله وبركاته

حمد الله علي السلامه
يسعدني دائما قراءة ما تكتبين لانك بتبسطيني ربنا يسعد قلبك زي ما بتسعديني

واتفق معك ِ فب ان معظ اللي دايما بيبانوا مبسوطين هما اكتر ناس من جواهم تعبانين بس بيفضلوا الحياة مع الناس بالوجه الذي يضحك يمكن من باب انهم مايعيشوش كل يومهم في اكتئاب يعني ممكن نقول هروب
واحيانا بتكون نوع من الخصوصية

ربنا يسعد ايامك
تحياتي
الي اللقاء

L.G. يقول...

سلامو عليكم
دخلت عندك قلت حتحلي لينا المشاكل وتفكي العقد وتحليل نفسي وكده لقيتك شبه أبي لو تعرفي مدونتها
واضح انك مرحة ومدسوسة علينا نحن المكتئبين وعايزاكي تعلميني السليد شو ازاي بالنسبة للتاج ده أهم حاجة في المدونات والتاج ده بالذات بيخلي كل واحد يشوف نفسه في المراية
تحياتي

blue-wave يقول...

الف حمدالله على السلامه
مصر نورت
وبجد تاج تحفه
والله احسن من كيلو جوافه:))
تحياتى

zOzO يقول...

اولا الف حمدلله ع السلامه
والله وحشتينا اوي
ووشحنا كلامك


ثانيا لا شكر ع واجب اكيد لازم ابعتكل التاج
طبعا انتي زي اختي
حاضر من عنيا المره الجايه هبعتلك مانجا ولا تزعل
جوافه بس
وكل اللي انتي عايزاه


من كلامك انك طيبه اوي
فعلا عندك حق ان اللي بيضحك بيكون بيداري اوي بينسي مشاكله
رنبا يوفقك يارب
وتحققي كل ما تتمنيه

محمود حسن العدل يقول...

اولا / حمد اللة على السلامة مصر كلها نورت .
وفين الرمل والمياة اللى وعدتينا بيهم
بوست رائع كالعادة .
وحشتنا خفة الدم والاسلوب النادر المميز فى الكتابة .
اخوكى / محمود العدل

dina يقول...

هههههههههه
انتى بجد زى العسل...قمة القوة فعلا ان الانسان يكون قادر على الضحك و المرح و هو عنده مشاكل و يفضل الضحك فى اللحظة اللى كان نفسه يبكى فيها.....بس كله كووووووووم و ام عز دى كوم تانى
ههههههههههههه
تحياتى

بنت مصريه يقول...

كيميت
الضحك ده عندى زى الكيف
يعنى عشان انسى
ههههههههههههه
انا معاكى ف كل اللى قولتيه
واتمنى تنورينى دايما

l g
وعليكم السلام
والله انا بعرف احل مشاكل الناس بس
باجى عند مشاكلى واتشنكل ههههههه
اعرف ابى اه
بس ابى حزينه شويه
لكن انا بهزر وادارى الغم
بالنسبه للسليد شو ادخل عليه من عندى هيفتح موقع السليد
قوم بقى انت تعمل واحد لنفسك هههه
فهمت حاجه
اه الظاهر انى ما بصتش ف المرايه من زمان

بلو وافز
الله يسلمك
دى منوره بنورك والله
بس بعد اذنك بقى
كيلو الجوافه احسن

زوزو
الله يسلمك يا زوزو يا حبيبتى
وربنا يخليكى عالكلام الحلو ده
بس انا مش طماعه المانجه غاليه حرام
هاتى جوافه بس ويا ريت لو كيلو عنب معاها
هههههههههههههه

محمود العدل
ازيك يا حوده
الله يسلمك
ايه الكلام الحلو ده بس يا عم
ربنا يخليك يا رب وتنورنى دايما

بنت مصريه يقول...

دينا
هههههههههههه
ربنا يخليكى يا رب
عارفه علمونا ف الكليه حاجه
ان التعبير اللى موجود على الوش لفتره
يقدر يشكل الانفعال
يعنى لو انتى قعدتى مكشره خمس دقايق
اكيد هتحسى انك متضايقه
ولو ولو رسمتى على وشك ابتسامه خفيفه
لمده خمس دقايق
هتحسى بعديهم انك فرحانه قوى
جربى وادعيلى

لا ما خلاص المعز راح وراحت ايامه
مفضلش غير عمو عز وام عز
هههههههههههههههههههه

حمادة زيدان يقول...

أنجي هانم

ألف مليون حمدالله ع السلامة ... أنا طبعاً مليش تعقيب على التاج لأنه خاص شوية ... بس جيت أسلم واهني على وصولك إلي ارض المدونة مرة أخرى

سلاموز بقي

امل يقول...

السلام عليكم
حمد الله على السلامة يابنوتة يامصرية
معاكي حق والله كيلو جوافة كان أحسن من التاج أنا بموت في الجوافة هههههه بس التاج ده لذيذ قوي يعني ينفع برده بدل الجوافه هههههه حقيقي دمك خفيف قوي في الاجابات عليه أنا من مواليد شهر سبعة زيك وأحيانا بيبقى في شوية جنون مش عارفه العيب في الشهر والا في أنا هههههه.. تحياتي ودمت بخير

بنت مصريه يقول...

حماده زيدان
ازيك يابوحميد الله يسلمك يا عم عقبالك كده لما تطلع على اسكندريه اجمل بلد ف مصر
اتمنى تنورنى دايما

امل
ازيك يا قمر الله يسلمك
والله هو العيب ممكن يكون ف الدماغ
ههههه
اتمنى تنورينى دايما يا قمر

إبن مصر يقول...

السلام عليكم
اختى الغاليه البنت المصريه
اتمنى انى اكون مش اتأخرت التأخير اللى يخليكى تنسينى ولو ان ده شكله حصل فعلا
بس معلش اتمنى يرجع التواصل بينا تانى
وعلى فكره انا كمان كان عندى التاج ولسه مجاوب عليه اتمنى انك تشرفينى شئ يسعدنى
تحياااتى

nageh

مدحت محمد يقول...

وتعالى تعالى تعالى واول مادخلت لاقيت تاج قلت اوبااا يبقى بعتالى التاج ابص فى اللى مبعوتلهم التاج قلت يبقى بعتتلى الجوافة
ههههههه بهزر طبعا اهم حاجة حمد الله على سلامتك وعودتك من اسكندرية ورجوهك للتدوين
نيجى لتاج زوزو بقى

اللى عرفنا منه انك عندك مشاكل خايفة تتحسدى ولا ايه هههههه مفيش انسان خالى من المشاكل اصلا ام عز المهم اقصد
ربنا يوفقك ياباشا ومتغنيش خالص قصدى متضايقيش خالص ان شاء الله
سلام عليكم

غير معرف يقول...

حمد الله ع السلامه واتمنى انك تكونى قضيتى وقت جميل
اجابات جميله
وشخصيه هايله

واحلى تاج فى الدنيا
وربنا يعين اللى ادبس فيه

فى حب الله يقول...

اولاً احب اقول لك حمدالله على السلامه اسكندرية ضلمت من بعد ما ميشيتي وسبتيها
ثانياً : مبروك على التاج وبجد اجاباتك جميله جداً وخصوصاً اجابه عمو عز ربنا يخليه لينا يارب قولوا امين

!!! عارفة ... مش عارف ليه يقول...

على اعتبار انك واحدة من المشاهير
سعدت جداااا اني اتعرفت على شخصيتك اكتر من خلال السلطانية دي
وواضح انها كانت مليانة على الاخر
وانت كمان اتوصيتي اووي بينا

تحياتي لشخصك ولكل من اسهم في انه يعبي السلطانية واللي كان نتيجتها الحاجات الجميلة اللي بنشوفها على المدونة بتاعتك

تحياتي
وليد

Unknown يقول...

حمد لله على السلامة
انا كمان لسة راجعة من اسكندرية
وكانت رائعه
البوست بتاعك اجاباتة هايلة ورائعه

Mohamed Hesham Safa يقول...

حمد الله على السلامة ...

كل مصيف وأنتم بخير ...

مبروك على التاج ...

والسـ ختام ــلام

بنت مصريه يقول...

سون اوف ايجيبت
انا عارفه والله انى مأثره معاك ومع ناس تانيه كتير
وانا سيبتلك اعتذار رسمى عندك واتمنى تقبله
ونرجع نزور بعض زى الاول

مدحت محمد
يعنى تاخد التاج دلوقتى ولا تستنى الجوافه
يا عبيط الجوافه احسن
هههههههههههههه
الله يسلمك يا مدحت يا رب
يا عم حسد ايه وبتاع ايه
دى المشاكل بقت صحبتى خلاص
ههههههههههههه
اتمنى تنورنى دايما
ومتغيبش كده


مواطن زهقان
ربنا يخليك يا رب عالكلام الحلو ده
ههههههه
والله انا ليل نهار بدعى للى ادبسو ف موضوع التاج ده
طول عمر المصريين كده يحبوا يعملو الحاجه بمزاجهم لكن الواجبات انسى

فى حب الله
الله يسلمك ويسلم كل اهل اسكندريه الجميله
انا ما زورتش بلاد كتير بس انا متأكده ان اسكندريه احلى بلد ف الدنيا

امين ياختى
امين يا حاجه


عارفه مش عارف ليه
ايه يا وليد الكلام الجميل ده
سلطانيه ويملاها حسستنى انى فول مدمس والله
م المشاهير ازاى بشتغل رقاصه بعد الضهر انا ولا ايه
اه اصدك عالجرنال
دا انت قديم قوى يا وليد
دانا اتشهرت اكتر من كده
انت متعرفش انى طلعت ف البوتاجاز
ماقولكش كان حته طبخه
اصدى حته برنا مج فذيع
ههههههههههههههههه
اتمنى تنورنى دايما


نهر الحب
الله يسلمك يا قمر
طب مش كنتى تقوليلى كنا نتقابل
تعالى هنا عالطول ماشى

محمد هشام
حمد الله عالسلامه
كل مصيف وانتم بخير
مبروك عالتاج
ورقصنى يا جدع
هههههههههههههه
ايه يا عم انت ف فرح
عموما
الله يسلمك وانت كمان بخير والله يبارك فيك
اوعى تزعل انا بهزر

WhItE HeArT يقول...

ربنا يخليلى (ماما وبابا واخويا وتيته_ماما حاجه_وزوجى العزيز)

ربنا يخليهوملك

انتي فكرتيني باللي بيتكلمو في الراديو بتوع بهدي سلامي لتيته وعمو واونكل وانور وجدي

ههههههههه

شخصية جميله ربنا يخليهالك

تحياتي

بنت مصريه يقول...

وايت هارت
مرسى على تعليقك الجميل
واهدى سلامى للحج احمد ف السعوديه
والست ام احمد ف البحيره
هههههههههههههه

فارس بلا جواد يقول...

السلام عليكم ورحمة الله وبركاته
دى اول زياره ليا
مدونتك روعه بجد
تحياتى

_**( قلب الأسد )**_ يقول...

لا بجد اجاباتك مميزة
تقبلى تحياتى

غير معرف يقول...

انجي
لألألألألأ،، تؤتؤتؤتؤتؤ
مش ممكن!! ما ينفعش وربنا !!!

هو احنا نعرف بعض قبل كده؟؟

مها ميهوووو

مدحت محمد يقول...

تاج تانى فور يو

واتنين كيلو جوافة حاططهملك على باب المدونة

Soooo يقول...

التاج هي تحويل لكلمه
tag
واللي بالانجليزي معناها انه تمت ذكرك في الحياه او في موقف ولازم تعرفي الناس بيكي
وفي عرف المدونين بيعتبرو ده نوع من انواع التعارف عشان الناس تعرف حياة بعض الشخصيه بدل ما نكتفي بالكلام في مواقف خاصه او عامه

واجاباتك على التاج حلوه فعلا .. خصوصا انك مؤمنه بقول الله تعالى (وعسى ان تكرهوا شيئا وهو خير لكم).. وده معناه انك انسانه واثقه ان ربنا رايدلنا الخير بس احنا اللي ساعات بنستعجل

وكمان عجبني جزئية ان اللي بيضحك دايما مش معناها انه مبسوط .. وساعات بنضحك من كتر الالم اللي جوانا

وربنا يسعدك ويبسطك ويكرمك ويوفقك ويرضيكي دنيا وآخره يارب




سلامووووووووووووز

momken يقول...

ماشاء الله
قدام كلامك الموزون والى يتاقل بالدهب مينفعش الا نقول بسم الله ماشاء الله

كلامك مليان خفه دم ورقه ورومانسيه
وايمان عظيم

انتى نموزج للبنت المصريه
والزوجه العصريه
والفتاه الباره باهلها
جازكى الله خير الجزاء

تحياتى

بنت مصريه يقول...

فارس بلا جواد
شرفتنى زيارتك
ومرسى على المجامله الجميله
ربنا يكرمك يا رب
وتنورينى دايما

قلب الاسد
ربنا يخليك يا رب ومرسى على مرورك


احسن تستاهل
ههههههههههههههه
ايه يا مها شبهك صح
دا شرف ليا يا قمر

مدحت محمد
ارحمنى يا مدحت مش مجاوبه تيجان تانى
معلش بقى هاخد الجوافه بس
هههههههههههههههه

سووووووو
وحشنى وجودك بين المعلقين يا سوووو
ومش عارفه بصراحه اقولك ايه عالكلام الحلو ده
ربنا يخليك يا رب
وتنورنى دايما زى زمان

ممكن

بصراحه دى مجامله
انا اعجز عن الرد عليها بما يليق بيها
ربنا يخليك يا رب
ومرسى عالكلام الحلو ده
واتمنى تنورنى دايما

أسير الجراح يقول...

روفى



مفيش انسان بيخلى من المشاكل



اسف نسيت اقولك الف حمد لله على سلامتك



ويارب تكونى اتبسطى فى المصيف




ليكى تعليق تانى


على التاج



تحياتى
د





اسير الجراح

semsema يقول...

معاكى حق مش دايما اللى بيهزر ويضحك كتير بيبقى خالى من المشاكل

احب احييكى على تواضعك الشديد
وعلى روحك الجميلة

تحياتى يا قمر

غير معرف يقول...

صفات حلوة
علة فكرة احنا ولاد عم انا بردة اداب قسم اجتماع

Mohamed Hesham Safa يقول...

it's ok ...

never mind

nody يقول...

حمدالله على السلامه يا انجى
واحشتينى والله كتير
ويارب تكون اجازه سعيده

اجابتك بسيطه وهاديه زى شخصيتك
تحياتى ياجميل

حـــــدوتـــــة يقول...

السلام عليكم

حمد الله على السلامة
اجاباتك جميلة وصريحة

سلالالالالالالالالالالالالالالالالالالالالالالالالالالالالام

صوت من مصر يقول...

ايه التاجات دى بجد تسلم الايادى على الاجابات الحلوه ؟

بنت مصريه يقول...

اسير الجراح
مرسى على تعليقك والله يسلمك ويسعدك يا رب
طبعا مفيش انسان معندوش مشاكل بس الفارق بين الناس ازاى بيتعاملوا مع مشاكلهم دى
اتمنى تنورنى دايما

مصطفى الريان
ازيك يابن العم وانا اقول برضه
انا شمه ريحه حد اعرفه ههههههههههه
اتمنى تنورنى عالطووووووول

سمسمه
مرسى يا قمر عالكلام الجميل ده
واتمنى تنورينى دايما

محمد هشام
ماشى يا عم ولا هيهمنى اى مايند

نودى
اهلا ازيك يا قمر فينك من زمان
اتمنى متقطعيش بيا تانى كده
مرسى عالكلام الحلو يا سكر

حدوته
وعليكم السلام ورحمه الله وبركاته
مرسى على كلامك الحلو واتمنى تنورنى دايما

صوت من مصر
اول مره تأيدنى ف بوست ليا
بجد متتصورش انا فرحت بتعليقك قد ايه
اصلى متعوده منك على الهجوم
شكرا لتعليقك الجميل واتمنى متكنش اخر مره

Unknown يقول...

دمك خفييييييييييييييييييييييييييييف جدا والله
كل ودي لك
ياريت تنوريني بزيارة لو معندكيش مانع

دكتور بهــدوء يقول...

عشره ع عشره
دمك شرباااااااااااااات

بنت مصريه يقول...

كاتب مصرى
ربنا يخليك يا رب وشرف ليا انى ازورك
اتمنى تنورنى دايما

دكتور بهدوء
ازيك يا دكتور فينك من زمان محدش بيشوفك
مرسى عالتعليق الحلو واتمنى تنورنى دايما

mregypt7 يقول...

انا بمسى التماسى اجدع تماسى احسن تقولوا ان انا ناسى ددن ددددن ددن ددددن

يا هلا والله بيكى يا مصريه اشلونك وايش اخبارك

وحشتنا بوستاتك يا انجى وبعد طول غياب تعود لنا انجى باجدد بوستاتها ورجعالنا المره دى بتاج تاج ايه ده مش عارف يكنش بتاع الملك وهتمسك حكم مصر بس اوعى تبقى زى شجره الدر وتبقى نهايتك على القباقيب

بس عجبنى اوى انك غيرتى اسم القاهره لقاهره ام عز الراجل برضه يستاهل كل خير بقى بيبيعلنا طن الحديد برخص التراب عشان نبنى ونهيص بقى ب 9 الاف بس والله فيك الخير يا عز باشا وربنا يديك على قد ما بتساععد الغلابه واقل واجب اننا نسمى القاهره على اسم امه اهه منها برضه ذكرى ليها

بس اجاباتك نموزجيه يا ايخيبتو ( مصريه بالاسبانى ) ادخلى الامتحان بيهم وانا اضمنلك انك تطلعى من الاوائل فيها يعنى مش هتحتاجى للتحسين يعنى بدل ما تبقى دكتوره فى مستشفى المجانين هتبقى رئيسه قسم باحد الغرف بمستشفى الامراض العقليه حلوه الصيغه ديه
بس انتى بتنسى الجرح بسرعه بس اوعى تكون التعويره كبيره عشان ما تتلوسشى بصى انتى الاول طهريها وبعد كده ابقى انسيها براحتك احسن تحلصك غرغرينه ونضطر نعمل حاجات احنا فى غنى عنها
ونبطل نستمتع بكتاباتك
بوستك زى السكر يا انجى
تحياتى ليكى
الباش مهندس بوحميد

الميكروباص يقول...

كل سنه وانتي طيبه بمناسبة ثورة يوليو
كنا عبيد وبئينا اسياد
ع الدوار ع الدوار راديو بلدنا فيه أخبار
أنا من الأحرار يا علي

ابن الجنايني بأه ضابط يا انجي

ادم المصرى يقول...

الف الف حمدله على سلامتك ويارب تكونى اضيتى وقت ممتع مع الميه والهواء انا لسه جى من مطروح بس بجد بيكون وقت جميل عندما تغيرين من جوك واهو بيكون مول جديد لحياه

فارس بلا جواد يقول...

الف حمدالله ع السلامة مع انها متأخرة بس معلش
وحشتنا بوستاتك الجميلة
ما شاء الله عندك قدرة تقلبي اي بوست لكوميديا بطريقة جميلة .. حتي لو كان تاج .. بجد عجبتني اجاباتك وحلوة قوي قاهرة أم عز هههههههههه
وبعدين أول مرة أشوف واحده تكون متجوزة ولسه رومانسية
ربنا يوفقك يارب ومتألقة دايما
تحياتي

bastokka طهقانة يقول...

الحمد لله انا نفدت من التاج ده ههههههههههه
هايل جدا انننا اتعرفنا بيكي يا جميلة

اوروفوار

بنت مصريه يقول...

مستر ايجيبت
باش مهندس بو حميد
ههههههههههههههههههههه
شى اخبارك شى حوالك شى لونك شى مسوى
كفايه شى بقى احسن اقربت انهق نننييييههههه
بتفول عليا ياه غرغرينه
ماشى
طب والله لاامسك الحكم وابهدلكو يا ولاد اللذين
هقفل كل المدونات
وهعين عمك عز وزير للاقتصاد عشان تمشو تشحتوا ف الشوارع
بس احسن هههههههه

نتكلم جد شويه بقى
ازيك يا بوحميد
الله يسلمك يا رب
وربنا يخليك عالتعليق الجميل قوى ده
وتجيلى عالطول ما تنسانيش بقى


لورنس العرب
وانت طيب
ايه يابنى مالك ما كنت بعقلك
اقولك حاجه مش هتصدقا
انا زوجى اسمه على
هس بقى احسن يسمعنا هههههههههههههه

ادم المصرى
الله يسلمك يا ادم
فعلا انا جايه عندى طاقه جامده قوى للكتابه ليكوا وقراءه مدوناتكوا
اصلكوا وحشتونى قوى
اتمنى تنورنى دايما

فارس بلا جواد
مش متأخره ولا حاجه زى بيتكوا يا فارس تيجى ف اى وقت
ومرسى قوى عالكلمات الجميله دى
كل ده فيا سبحان الله
اتمنى تنورنى دايما

طهقانه
بونسوار حبيبتى
فعلا التيجان دى بتبقى عامله زى الهم عالقلب
بس الحمد لله ربنا عافانى
ههههههههههههه
اتمنى تنورينى دايما
اروفوار

فتاه حالمه يقول...

هاي يا انجي

ليكي عندي تدبسيه
قصدي تاج تعالي خديه

هههههههههههههه


مي

*الطالبة عفو الله *زوزو يقول...

ما شاء الله عليك تمتلك شخصية جميلة اوس و لك خفت دم ما شاء الله
يا ربي هو كل مرة حبقى اتلخبط انا و زوزو التانية انا في البداية بقول مع نفسي هو انا كتبت الكلام دة امتى ههههههههه
ة بعدين افتكري انها مش انا
على العموم انتو لازم تعرفو ان في زوزو و زوزو يعني اتنين زوزو

بنوته مصرية يقول...

ههههههههه

فطستيني من الضحك بقي بتغني وتعيطي ايه اللخبطة دي

وبعدين تعالي هنا انتي مشوفتيش يعني اني التاج ده انا جاوبت عليه قبل كدا ولا شمس اسكندرية لسعت الربع اللي كان فاضل عندك
ههههههههههههههه

اجابتك حلوة ولزيزة وانا معاكي مش كل اللي بيضحك مبسوط الدنيا مليانه هموم

اشوفك علي خير

ابقي سلمي علي عمو عز
هههههههههه

بنوته مصرية يقول...

http://rody80.blogspot.com/2008/05/blog-post_29.html

التاج اهو يا حاجه

وكنتي رديتي عليا فيه كمان

مش بقولك شمس اليكس لسعت الربع اللي كان فاضل

وبعدين ولا يهمك يا قمر اجاوب عليه تاني
هو انا ليا كم انجي وبعدين مش كفاية قاربتي يعني متاخرش عنك يا قمر

تحياتي

Maha Shahen يقول...

احلى ما فيكى كل ما فيكى على رأى هشام عباس
ولا نقول كلك علي بعضك حلو
هههههههههه
انتى زي السكر والله
واجابات جميله وسلطانيه اقصد تاج مميز على رأس صحبته ذاد بهائه
ربنا ميحرمناش منك ولا من قلمك الي فعلا بيخفف كتير قوى عنا , وبيتسبب في ضحكة من القلب بتسعدنا
ربنا يكرمك يا انجى

hi5