.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الجمعة، 23 أكتوبر 2009

بوست خاص لاحبابى ......لتوضيح اسباب غيابى

سلامو عليكو (انا خايفه منكو والله)
بصو بقى ...م الاول كده من غبر شتيمه وتهزيء وضرب وقله قيمه........انا عارفه والله ان دا اللى استاهله ....خصوصا من الناس اللى سألوا عليا ف فتره غيابى دى ...واخص بالذكر _ لورنس العرب (اللى هيودينا ف داهيه ببوستاته) _شفقه واحسان (ايوه ايوه لتنين الشحاتين دول ) _رومانسى _بشمهندس بوحميد_حماده زيدان _وليد (عارفه مش عارف ليه)..وغيرهم وغيرهم
اصحابى كتير الله اكبر

الناس دول سألوا عليا وماهنش عليهم قعداتنا حول بوستات النم ف الحكومه وانتشار الفساد ههههههه (انا عارفه ان كل واحد فيكوا هيجرى دلوقتى ويقول ولا اعرفها )ههههه

المشكله ان الناس افتكروا انى جرالى حاجه او مت ...وانا عملت البوست دا مخصوص عشان اطمنهم عليا واقولهم انى
لازلت حيه (عايشه يعنى عشان عارفه ان فيه ناس هتفهمها غلط )

واقولهم برضه سبب غيابى والمتمثل فيما يلى :

اول حاجه :انى اكتشفت ان الشركه اللى بشتغل فيها واخده توكيل (التيييييت) لاداره الشركات المعفنه.....طبعا سبتها واشتغلت ف شركه تانيه مهو الانسان ايه غير شويه شركات فوق بعض

دا غير ان السبب الرئيسى لغيابى هو انتقال الاسره السعيده (اللى هى اسرتى يعنى هنعتبرها سعيده ) ..الى مكان اخر للسكن (ف طبيعى هياخدونى معاهم مش هيسيبونى ف الشارع يعنى ).....وانتقلنا للعيش يا ساده فى مدينه السعاده
والمعروفه عند البعض بمدينه الرحاب ....وعن نفسى بسميها ( مدينه البهجه )

بقيت من سكان الرحاب يا مدوديين ......اصدى يا مدونين .....ليكو الحق الان ان تفشخروا ....زميلتكم ف الكفاح والتدوين بقت من سكان الرحاب ......(صوت تصفيق حاد )

وسبحان الله يا جماعه من اول ما سكنت ف الرحاب .....اتحكم على هشام طلعت مصطفى بالاعدام
(يا محاسن الصدف ).......تفتكروا دى مسأله اقدار وللا فيه حاله نحس ....هنمشيها اقدار عشان ماضربكوش

انا عارفه ان فيه ناس دلوقتى هينموا عليا ويقولوا ...(دى سكنت ف الرحاب يعنى هتبيع القضيه )....انا بحذرهم جميعا
وبقولهم لا ...لا والف لا ....مش انا ....مش بنت مصريه اللى النيل روانى والخير جوانى......

بس طبعا مع تغيير المستوى لازم يكون فيه تغيير ف عناصر موضوعاتى ....
يعنى مثلا ....بدل ما اتكلم عن ارتفاع سعر كيس العيش هتكلم عن ارتفاع سعر كيس الفستق او الكاجو مثلا
بدل ما اتكلم عن ارتفاع سعر الميه اتكلم عن ارتفاع سعر الميلك شيك ......تفتكروا الانسان يقدر يعيش ازاى من غير ميلك شيك

وعشان انقل نظره سكان الرحاب للعالم من حولهم ......عملت مدونه يومياتى ف الرحاب انتظروها قريبا

وانهارده خير اللهم اجعله خير ......افتكرت ان عندى مدونه ولقيت الناس بتسأل عليا وتقول فين البت مصريه
قولت لبابا انا خلاص هكتب بوست انهارده
قاللى انتى لسه فاكره ما قفلوا مدونتك من زمان .....لطمت بالبلدى يا سنه سوخه قفلوها ؟ قفلوها ازاى يابا الحج ..
قاللى لهو انتى ما تعرفيش ....قولتله معرفش ايه يابا الحج .....قاللى مش عفنت وريحتها قلبت النت ..هههههههه
اصل احنا عيله كوميديه حبتين

وعملت البوست دا مخصوص لاحبابى لاشرح فيه اسباب غيابى

هناك 27 تعليقًا:

romansy يقول...

اول تعليق

ل


رومانسى

الميكروباص يقول...

صحيح نسيت اقولك
عشان اخضك
اناعامل برنامج في الاتوبيس
يبقي ادخلي شوفيه

romansy يقول...

بعد ما شرحتى الاسباب
اقولك
برضه
ليه
الغياب دا كله بقى


دا كتير علينا

romansy يقول...

بس بقى دلوقتى بقيتى رحابيه
وبعدين بابا عنده حق
انتى جيتى فى الوقت المناسب
قبل ماكانت تبقى فى خبر كان
ومتاخده بوضع اليد

romansy يقول...

بما انك بقى فى الرحاب يعنى خضره وجمال وميلك سيك
عاوزين بوستات طعمه بقى

Sweet Violet يقول...

حمدلله على السلامة
ومبروك السكن الجديد و المدونة الجديدة كمان
^_^

Butterfly يقول...

أولا وحشتينى جداااااااااااااا
ثانيا ايوه يا عم الرحاب مره واحده
يعنى بعد كده محدش هيعرف يكلمك بعد كده
بقى
مهو اللى على على هههههههههه

متغبيش تانى انا بقلك اهه !

يا مراكبي يقول...

أنا برضه إستغربت لما لقيت الريدر بيقول إن بنت مصرية صحيت تاني بعد ما كنا قلنا انها راحت في الوباء واستريحنا منها خلاص

ههههههه

مبروك نقلة الرحاب وان شاء الله يكون وشها حلو عليكي .. مش زي ما عملتي انتي في هشام طلعت مصطفى

هههههه

*الطالبة عفو الله *زوزو يقول...

نورتي بيتك ومطرحك يا جميل

والف مبروك السكن الجديد

كريم مصطفي سيد يقول...

السلام عليكم
مبورك علي السكن ويكون قدم سعد عليكي وعلي اهلك
وعودة افضل انشاء الله

momken يقول...

ياستى مبروك البيت الجديد ابقى اعزمينا بقى اسبوع ولا عشر تيام عندكوا نغير جو

بالنسبه للميلك تشيك مش مهم خالص المهم يوفروا الكاتشب

ولان نظرى دعيف انا مش شايف اى حاجه تخليكى تغيبى

ما علينا المهم ربنا يرجعك بالسلامه ياستى

فى انتظار جديدك


تحياتى

شفـقــة و إحســــان يقول...

اولا انتى عارفى انتى واحشتينى اد ايه؟؟
كتيييييييييييييييييييييييييييييييير جدااااااااااااااااااااااااااااااااا
كمان مبروك الوظيفة الجديدة والسكن فى الرحاب
احنا كده بقينا جيران لاننا من سكان الرحاب وكده بصرة
بس اوعى تكونوا انتم الناس اللى اشتريتم شقة اخو جوزى لحسن تبقى صدفة فظيعة اصلوا لسه بايع شقته فى الرحاب عموما مبروك واوعى تغيبى تانى لاقتلك بجد والله بحب مدونتك جدا وحرام تهجرينا

غير معرف يقول...

6ieb momken akoon sadeek gedeed (be7eb el ah2waa) we ba2oleek alf mabrook for the new house we en shaa allah tkoon kol ayamek feeh sa3eeda, hope u good luck-------------
Medo Sh

سلمى يقول...

السلام عليكم
شكلك عسوله خالص ربنا يسعدك
وبيكون بيتك الجديد احلى
ومدونتك كمان حلوه اوى
دمتى بخير وسعاده

اقصوصه يقول...

اهلا بعودتك:)

حـــــدوتـــــة يقول...

السلام عليكم

كل عام وانتم الى الله اقرب

وعيد اضحى مبارك

الميكروباص يقول...

تهانينا بعيد الأضحى المبارك
وكل عام وأنتم بخير
اوعي تنسيني في اللحمه

zOzO يقول...

كل سنه وانتي طيبه اولا
ثانيا وحشااااااااني جدا
انا زيك برده بقالي فتره مش دخلت
هههههههههههههه

انا جايه اسلم بس
في رعايه الله

الصقر الجارح يقول...

انا اول مره ادخل المدونه هنا
وبصراحه زعلت اوى ان انا فتهاش من بدرى
ويارب متغبيش تانى
ولا هاقول على نفسى انا اللى نحس
كتبت اتعليك والمدونه تاهت

الدار العربية يقول...

اة الرحاب ياعم هنيالك معرفش لية حاسس ان الاغنياء امثالك دمهم تقيل (لا اقصد الاهانة) انا احب اوي ابن البلد اللى الدنيا دوأتة من مررها ومع ذلك لسة بردة ابن بلد
ومع ذلك وبغرابة لقيت واحدة تسكن الرحاب ودمها خفيف دا يدل علي ان المصري حيفضل مصري الحنين رواه والبلد جواه

ابو على يقول...

واللهى انا افتكرت حصلك حاجه
بس انتى جيتى ليه احنا كان دماغنا مرتاح منك

يلا حمد الله ع السلامه وعقبال الهجره الاخيره

الميكروباص يقول...

ازيك يا استاذه

غير معرف يقول...

مممممممممممم
طب بالنسبة لي انا كواحدة صحبتك زميلتك في التدوين
ماشي ماشي
يا بتاعة الرحاب
ياي رحاب،، ليه كده

طب مش هتعزميني على كوباية شاي بلبن بأه عندكو ولا معندكوش بقسماط ولا ايه حكايتكو

جيجي... والله ده انتي من الناس اللي بتوحشني خالص اوي جدا الله بأه

ما تغيبيش كده تاني بأه

مها ميهوووو

انت تسال والكمبيوتر يجيب يقول...

انجى كل سنه وانت طيبه ...نفتقد تعليقاتك الشيقه....نرجوا ان نراها قريبا فانت من الأصدقاء الذين نعتز بهم

*الطالبة عفو الله *زوزو يقول...

خير يا انجي طولتي الغيبة هو حي الرحاب اخذك مننا و لا ايه
مفتقدينك يا رب يكون المانع من تواجدك خير

فاروق سحير ( فاروق بن النيل ) يقول...

فاروق إبن النيل....
حمد الله على السلامة وطبعا حتشيلى ريحة العفن اللى موجودة بالمدونة , والله مأنا اللى قولت كده , دابابا الحاج.
farouksam.blogspot.com

test يقول...

nice topic thankss
& dats my blog i hope u visit me

http://ngomnews.blogspot.com

hi5