.ازيكو

ازيكوا .......احب ارحب بكل واحد قاعد دلوقتى قدام مدونتى........انا زييى زيكوا كل يوم افتح النت الاقى اخبار مصراوى......عارفينها اللى تفتح النفس للحياه دى .....فجالى اكتئاب ........ايوه ايوه زى اللى عندكو ده بالظبط.....اعمل ايه اعمل ايه.......جاتلى فكره المدونه افضفض بيها معاكو ويارب تعجبكو

الثلاثاء، 7 أكتوبر 2008

تريكات ...للبنات ....المقدمات....عالزواجات

عريس يابووى

ازيكو يا بشر ..........(تحذير)
البوست دا يا جماعه (للبنات فقط)......اى لحواء فقط .........محدش من الولاد يقراه .....والا هنتفضح قدام اخونا ( ادم )وهيبوظ كل اللى عملته

تعالى يا بت يا (حوا) انتى وهى هنا ......ايوه اتلمواحواليا كده عشان اقولكوا كلمتين ..........ابعد يا ( ادم ) يا وحش ...دى قاعده (بنتوتيه)

بصوا بقى انا قعدت ايام كتيير جدا افكر ازاى ارجع منظر( حواء )مشرف تانى امام (ادم).....
بعد البوست اللى عملته وشردت فيه (حواء ).وطلعتها ارجل من (ادم) .............وهى ماسكه الشيشه وبتشد وتطلع الدخان من ودانها .........فكرت ف بعض الحيل والخدع اللى ممكن تخدع بيها (حواء)( ادم ) قبل الزواج .............._دا اذا كان فيه زواج اصلا_

لكن بعد الزواج يا جماعه موعدكوش انى اقدر اساعدكو........لان كل واحد سواء (حوا) او (ادم) ..بيتفضح بعد الزواج وبيظهر الوش التانى لكل واحد فيهم

يعنى م الاخر لتنين بيبقوا محتاجين (اعاده نفخ وتليين)................
ودا الحقيقه مش تخصصى .....فيه ميكانيكى على اول الشارع ممكن ترحوله ساعتها


انا دلوقتى بقى يا (حوا ) هقولك على شويه حيل تظهرى بيهم مفيش زيك قدام (ادم )..........وانسى بقى الشيشه وجو المخدرات اللى انتى عايشه فيه دا..... عشان منتفضحش


يا (حواء ).........اذا ربنا كرمك........ وجبر بخاطرك........ وبعد طووول انتظار بعتلك عريس يتقدملك
متفرحيش قوى كده يا حاجه انا لسه بقول (اذا)..........ومعتقدش ان دا هيحصل كمان ..لان شباب مصر مش لاقى ياكل اساسا ف مش معقول هيجيب واحده يأكلها معاه هى كمان
ما علينا
لو ادم حدد معاد وهييجى هو والست الوالده (ضره العروسه)...والسيد الوالد _دا اذا كان لسه عايش وهيشوف ابنه بيخطب _
وخبطوا عالباب

عارفه ان فيه بنات عندها نسبه تخلف شويه.....وهتجرى عالباب وتقول (عريسى جه عريسى جه ) .......وحياه ابوكى يا شيخه الهى تعدميه وهو عالباب بلاش الفضايح دى........... مش عيد هو
كل اللى تعمليه انك تدخلى الاوضه وتقفلى عليكى بابها .......ومفيش مانع تبصى من خرم الباب وتشوفى العريس _اذا مكنتيش شوفتيه قبل كده_ حد عارف يمكن يطلع (قرد) ومتخرجيش م الاوضه خالص

بعد كده تستنى لما مامتك تنادى عليكى ..........ابوس ايدك يا شيخه بلاش فشخه البق دى .......ابتسمى ابتسامه خفيفه وانتى خارجه الصاله .........وتبتدى تسلمى _ماتسلميش عالعريس الاول يا تحفه_ سلمى على ضرتك الاول (اللى هى امه يعنى )
وبعدين باباه...وبعدين تسلمى على عريسك بتراتيف صوابعك .........وانتى باعده وشك الناحيه التانيه.......... وبصه ف الارض (معلش كانك مكسوفه بقى)


لوحصل نصيب وعريسك عزمك عالغدا بره
وحياه الغالى ماتفضحينا وبلاش الحته اللى عالحبل اللى كل ما تزنقى ف خروجه تلبسيها دى
لوعندك صاحبه نضيفه ممكن تستلفى منها ......سورى اصدى تشحتى منها حاجه........ اشحتى ...بس ماتقوليلهاش خطيبى عزمنى
(عارفاكى هبله)........قوليلها انك رايحه عزا عشان القر

وطبعا خطيبك هياخدك مطعم فخم......... (عشان ماتقوليش عليه بخيل).
وماتقلقيش كله هيطلع عليكى بعد الجواز اللى طفحتيه بط بط .........هيطلعه على جتتك بعد الجواز صراصير صراصير

اول ما يقولك (تاكلى ايه يا حبيبتى )
وحياه ابوكى ماتفترى وتقولى _ابو بلاش كتر منه _ ونظام الشحاتين ده
لا تردى وتقولى (اللى تاكل منه انا موافقه عليه)........ان شالله يطلب فول سودانى اوعى تغيرى كلمتك

اكيد هيعمل نفسه جاى من فرنسا ويقول (انا هاخد فاتح شهيه الاول )
معلش استحملى انا عارفه والله ان شهيتك مفتوحه خلقه..........بس معلش استحملى

الجرسون هينزل فاتح للشهيه ........نقول مثلا (سمك مدخن )
وحياتى عندك يا شيخه اوعى تجرسينا وتقوليله (انت طالب فسيخ).....ماسموش فسيخ يا حاجه دا اسمه (سيمون فيميه)
اتعلموها بقى
تمسكى الشوكه ف ايدك الشمال والسكينه ف ايدك اليمين وتقطعى حتتين وتاكليهم .......افتكرى حتتين وبس.......... وتاكليهم وانتى قافله بقك
وتقوليله: (خلاص كده يا بيبى تقريبا كده شهيتى اتفتحت) هههههههههههه


هينزل طبق الشوربه: مهما كانت سخنه ( رجاء خاص) بلاش النفخ فيها والتفتفه والحاجات دى ..........انتى مش بتتعشى مع ام محروس جارتكو
كل اللى تعمليه انك تمسكى المعلقه بكل هدوء .........وبكل الاطه وشموخ تجيبى شويه شوربه.......وتشربيهم بهدوء يعنى من غير
(فففففففففف) ..واذاعه الشرق الاوسط دى


اه........جه الطبق اللى خايفه منه ........الطبق اللى مش هتقدرى تصمدى قدامه
(الجمبرى الجامبو )
بصى بقى وطرطقيلى ودانك كويس قوى ........الصنف دا اول ما ينزل عالترابيزه يا ريت تبصيله بقرف كأنك _قال يعنى _
زهقانه منه............(معلش معلش انا عارفه والله ان الموضوع صعب ..........بس حاولى )

وتقولى (ياااااه.........كل يوم جامبو ....كل يوم جامبو .........زهقت منه اصلنا يا حبيبى كل يوم بنعمله )
وتكلى اتنين بس

وبعدين تمسكى المنديل اللى عالترابيزه ..........وبكل رقه تمسحى بيه شفايفك بلطف وتقوليله
بعد ازنك يا حبيبى اروح التويليت (الحمام يعنى ) اصلح مكياجى .........(اصله اتكسر )ههههههههههه


وف الحمام بقى يا حبيبتى ......تطلعى من شنطتك سندوتشات الفول والطعميه اللى مدياهملك الست الواده


وبالهنا والشفا ...........اهىء اهىء اهىء

هناك 40 تعليقًا:

Alkomi يقول...

هي العرسان قامت من نومتها ولا ايه

دي تالت او رابع مدونة اخش الاقيها بتتكلم عن جوازة

يكونش الشباب بيشترطو تكون العروسة مدونة

يالا اديها فرصة برضه يمكن تزبطوا

بس مصيبة الواحد يتجوز مدونة لو الامور كحرتت معاه شوية يلاقيها عاملة مظاهرة بالعيال

ولا عاملة اضراب عن الغسيل ولا الطبيخ

نياهاهاهاهاهاهاااااااااااا

إبن مصر يقول...

السلام عليكم انجى
معلش بقا انا عارف ان القده دى للبنات فقط ولكن الموضوع شدنى للأخر
كنت مش ناو اعلق ولكن خفة دم الموضوع خلتنى اضحك لدرجة ان صوتى على من كتر الضحك
ههههههههههه
بجد والله دمك زى الشربات
انا اسف بجد انى قعدت فى القعده البنانيتى دى بس مقدرتش امسك نفسى من الضحك
عايز اهنيكى على خفة دمك

اسف مره اخيره ويشفعلى فى ده انى اول كومنت

الرومـيصاء يقول...

الحمد لله انى اتجوزت من زمان
احسن تطبيق النصائح دى تطبقها صعب
ههههههه
تسلمى على البوست الجميل
تحياتى.........

Unknown يقول...

ههه
انتي زي السكر
انا قريت الموضوع ده قبل كده بس بشكل تاني
بس عندك احلى
انا عاوزه موسيقى اللي حطاها على المدونه دي يابت
دي بتاعه فيلم زي النهارده ولا ايه

Miss. Sosa يقول...

ههههه

دمك زي العسل بجد

بس انتي ماشرجتيش هتاكل الجمبري الجامبو بتراتيف صوابعها ازاي ولاهو هينزل في الطابعة التانية :))

تحياتي

Butterfly يقول...

ههههههههههههههههههههههههه
والله انتى زى العسل
انا عن نفسى هبقى طبيعيه خااااالص
ماهوا كل حاجه هتبان بعد كده يبقى لازمة التمثيل ايه ههههههههه

"أم أدهم المصرية" يقول...

السلام عليكم ورحمه الله وبركاته

------------------
هههههههههههههههههههههه

بجد اسلوبك تحفه انا شفت الموضوع كتير بس عجبنى اوى عندك تسلمى ياسكره على النصايح بس انا عن نفسى معملتش كده

الطبيعه مفيش اخلى منها

بس عادى يعنى مش كل الرجاله كويسه فى منهم يستاهل ياخد على نفوخه

-------------------

Geo Amr يقول...

بجد البوست رائع جداااااااااااااااا والاسلةب نفسه رائع جدااااااااا بس علشان النصايخ علشان تتحقق يارب الشباب بس الاول ترضى تتجوز وكل سنة وانتى طيبه

!!! عارفة ... مش عارف ليه يقول...

البوست شدني غصب عني
مع إن الموضوع للبنوتات فقط
بس حبيت اشوف بتقولوا علينا أيه

الموضوع جميل ودمه خفيف


وعلى فكرة إحنا بردو بنعمل زيكم كده لما نبقى شباب مع بعض


تحياتي لنون النسوة
وليد

خواطر رئيس شاب يقول...

صعب اوى اللى حضرتك بتقوليه ومش واقعى

هو فى حد دلوقتى بيعزم خطيبته

كان زمان

دلوقتى احنا بنتصل واحنا خارجين من الشغل قال يعنى بنسلم
نسمع بس كلمة ما تيجى او اتفضل او اى شيء من هذا القبيل
جرى نشترى كيس شيبسى وبجنيه لب
وجرى نلحق الغدا قبل ما حمايا يخلصه

romansy يقول...

شوفتى بقى الحب
ادم طيب ازاى
مش حارم حواء من اى حاجه
كل اللى نفسها فيه تحت امرها
بس بقى اللى ادم كلو بط بط
هيطلع عليه وز وجمبرى وحمام وممكن كمان عرق سوس

مهرة سالم يقول...

ههههههههههههههه
بجد بوست زي العسل...
............
بس قوليلي جبتي الخبره دي كلها منيين....
.............
تقبلي مروري
دمتي بخير

*الطالبة عفو الله *زوزو يقول...

ههههههههههههههههههههه
بجد بوست هايل و نصايح ايه
و لا نلاقيها في مجالات سيدتي
بوصي يا انجي انا متفقة معاكي لحد الي حعمله يوم ما يتقدم يعني هو و السيد الوالد و الوالدة
اوكي حعمل كل الي قلتلي عليه يا ابله
بس موضوع العزومة دة مفتكرش يعني حتكون في عزومة من الاصل
يا بنتي مصاريف العزومة دول كتير عليه
الراجل بيحوش للمهر و الشبكة و مش عارفة ايه
ادم: قال عزومة قال
حواء: رجال اخر زمن
نعود و نقول مش لما يجي الاول
هههههههه
كلام رائع يا جميل
لك من كل الحب و التقدير

saragebaly يقول...

ههههههههههه

تدوينة جميلة ولذيذة جدا

حلوة حكاية القاعدة البنانيتي دي ،، بس يظهر ان محدش بيسمع الكلام هههه

بس ايه النصايح الصعبة دي

بتهيألي انها اول ما هتشوفه وهو يادوب لسة بيتقدم هيكون هاين عليها تتعلق في رقبته وتقوله متسبنيييييش ارجوك



احييكي على جمال مدونتك وخفة دمك

تقبلي مروري
سارة

الميكروباص يقول...

المشكله كلها يا أنجي في التمثيل
كله بيمثل على بعضه
وعشان كده الناس بعد الزواج بتتصدم في الواقع المؤلم
ودائما الواقع بيكون مؤلم خاصة الأيام دي
.....
واحد صديق لي تقدم لواحده
عارفه رفضها ليه بعد ما رجع من عندها؟
اصله بعد ما شرب العصير لم تقول له - هنيا-
قلت له يا سيدي انا عمري ما قلتها لحد أو يعني هي مش لازم
قالي لا- ازاي متقولش هنيا؟؟؟
سبب منطقي بردو
......
واحده تانيه اعرفها رفضت عريس لأن اسمه سيد !
وواحده تانيه رفضت عريس لأن اسمه " الصغير"
قالت مش معقوله كل لما اناديه أقوله ي" يا صغير انا نازله" يا صغير انا هتأخر في الشغل"
علىا لرغم من ان الصغير ده راجل صيدلي ومحترم، لكنه لم يستطيع أن يقنع الآنسه لأن اسمه الصغير- وما سبقه كان اسمه سيد
كلها اسباب فارغه
وبتدل على ان عقلنا ما شاء الله في صعود مستمر إلى الهاويه


راجع لك تاني

Dr.Amor Medhat يقول...

ههههههه

اية الجمال ده :))))))))

بجد اسلوبك في التريقة جااااااامد جدا
استمري

وشكرا لأنك نورتي مدونتي المتواضعة

تحياتي
عمرو

نسر الشرق يقول...

عايز انبهك لحاجه مهمه مختيش بالك منها
ادم ده يبقى احد الانبياء يعنى حرام لما نقول امشى يا ادم يا وحش
مش كده ولا ايه
http://nisr-elsharq.blogspot.com/

Maha Shahen يقول...

يعنى انتى كدا مشردتيش البنات يا أنجى بلى انتى نشرتيه دا
دا انتى بتقولى يلى متعرفش تعالى اقولك هههههههههههههههههههه خلتينى رقبتنا زي السمسمه
وشى منك فى الارض يا عبد الجبار
يا شماتت خالتى بمبه فيا

خالص تحياتى واعجابى وربنا يخليكى للغلابه اللي هما احنا يعنى بس بلاش تشريد

بنت مصريه يقول...

محمد الكومى
هههههههههههههههههههههههههههههههههههههههههههه
كل واحد وثقافته بقى يا محمد
هههههههه
مرسى على تعليقك

سون اوف ايجيبت
هههههههههههههههههه ربنا يخليك يا رب
بتعتذر علىايه محنا اتفضحنا خلاص

مرسى على تعليقك

الرويمصاء
شفتى فلتى من نصايحى انتى
ههههههههههههههههههه
تسلمى

لماضه
ههههههههههههههههههه ربنا يخليكى يا قمر
منا عارفه اكيد عندى احلى ههههههههههههه
بالنسبه للموسيقى
اضغطى على مكانها وهيجيلك الموقع
بس بصراحه مش عارفه هى بتاعت فيلم ايه


ميس سوسه
ههههههههههههههههه
ربنا يخليكى يا قمر
اه ان شاء الله الجزء الجاى
هههههههههههههههههههه
مرسى عالتعليق


بوتر فلاى
هههههههههههه عندك حق والله كل واحد فيكو هيبقى محتاج اعاده نفخ وتليين


لؤلؤه الرحمن
هههههههههههههههه
عندك حق والله ياختى
ايوه يا ام احمد
اسكتى اسكتى
هههههههههههههه
مرسى على تعليقك يا قمر

جيو عمرو
والله عندك حه وهو فيه حد بيتجوز الزمن دا
مرسى على زوقك


عارفه مش عارف ليه
ههههههههههههههههههههه ازيك يا وليد
مش بنم فيكو والله ولا حاجه
احنا بس مش عايزين البنات يفضحونا
مرسى على تعليقك

Unknown يقول...

السلام عليكم

ازيك يا مصرية

انا مرضيتش اقرأ البوست خااااااااااااالص



بس مش كان اولي سندوتشين حواوشي بدل الفول والطعميه ههههههههههه


ربنا يخليكي ليهم وتنصحيهم كمان وكمان

وربنا يجيب نصايحك بفايدة


تحياتي

محمود حسن العدل يقول...

السلام عليكم
تعرفى انى قعدت اكتر من ساعتينى اضحك على الاسلوب اللى مكتوب بيه البوست دة
انا نفسى اعرف انتى بتالفى الكلام دة ازاى .
بتتعملى اية بجد انا مش بهزار
بجد وبكل جرأة انتى مشكلة مش ليها حل انا بتخيل لو انا اعرفك وانتى على اسلوبك دة هايكون موقفى اية اكيد هاموت بس من كتر الضحك
انا عندى احساس كبير انك لو استلمتى حد تريقة الله اما انه هايمشى من شارع غير اللى انتى ماشية فية
هههههههههههههههههههههههههههه
بجد بوست فية خفة دم رهيبة واسلوب مميز .
انا عارف انة كان للبنات بس
بس البوست عجبنى حبيت اترك وجودى بقرائتة
تحياااااااااااااااااااااااااااااااتى

mregypt7 يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
جــــــــــــــــــامد مووووووووووووووووووووووووووووووووووز البوست ده يا انجــــــــــى
يخرب عقلك يا بعيده ايه ده
ده انتى فضحتى بنات حواء ده مش فضحتيهم بس ده انتى كمان جرستيهم
كويس انك قلتى عشان اعمل حسابى
لما اطلب الجمبرى الجامبو ابقى اخللى الجارسون يلفهولى فى كيس عشان اخده وانا مروح
هههههههههههههههههههههه
وماتقلقيش ا انجى جنب الشوربه هطلبلها زبادى
وعلى راى المثل اللى يتلسع من الشوربه ينفخ فى الزبادى هههههههههههههههه
صحيح ناقصات ....................
بلاش اكملها احسن تقوم عليا حمله وانضرب
هههههههههههههههه
البوست جد موز موز موز
تحياتى
بيبــــــــــو

zOzO يقول...

ههههههههه
ههههههههههههه
ههههههههههههههههههه

هستريا ضحك
ايه دا يخربيت عقلك
بجد بوست تحفه

ابو على يقول...

ههههههههههههههههههه
لو زعلان او متحير اعمل عمليه وغير

عسل عسل عسل
انتى شغاله ف جمعيه المراه المتوحشه ولا ايه:d

تائهة فى أرض الأحلام يقول...

ههههههههههههههههههههههه


فكرتينى بصحبتى لما واحد معاها فى الشغل جه وقالها انا عايز اكلم مامتك واخطبك منها

قالت له ماشى خد النمرة .. قالها انت ماصدقتى ولا ايه انا كنت بهزر

بس دبسته برده واتخطبوا

تحياتى لك

حبيبة الروح يقول...

ايه التشريد ده يا نوجي
هههههههههههههههههههههههه
بس نصايح غريبه فعلا
بس انا هتعامل بطبعتي اي اختي
مهو كل شئا هينكشفا ويبان كدا كدا
يبقي نصدموه من اولها
هههههههههههههههههههه
وحشتيني يا نوجي والله جدا

Unknown يقول...

حرام عليكى يا انجى مكنتيش عيزانى اقرا الموضوع ده ازاى

خفه دمك مش معقوله


تحياتى

موناليزا يقول...

رغم ان قراتها قبل كده
بس بجد قريتها وكانها اول مرة وضحكتينى جدا

*الطالبة عفو الله *زوزو يقول...

انا جيت اقلك انتي ما بتنورنيش ليه
لقيتك مبتنوريش حتى مدونتك فين يا انجي اهتفيتي كدة في ضروف غامضة ؟؟؟
خير يا رب قلقتيني عليك
يا رب يكون مانع دخولك خير
بجد قلقتيني اول ما تجي ابقي طمنيني عليك يا حبيبتي
في امان الله

kmt يقول...

السلام عليكم ورحمة الله وبركاته
شيء غريب جدا بس هو دا اللي بيحصل كل واحد من الاتنين يحاول يكون طاوس ادام التاني
وبعد الزواج الاتنين يتصدموا
تحياتي
الي اللقاء

د/ رامي شهاب الدين يقول...

طول عمرى بقول قعدة البنات مفيش أحلى منها ههههههههههه

بصراحة ربنا معاكوا فى شوية النصايح دول .. انتوا فعلا بتتعبوا بجد

نديها شوية ميلودراما بقى .. الموضوع جميل وساخر وبيناقش قضية هامة جدا وهى التصنع ، فعلا فيه جوازات بتنتهى قبل ماتكمل عامها الأول ، والسبب أن بعد الجواز كل شئ بيبان ، وبيكتشف الطرفين إن كل منهما الآخر أصبح إنسان مختلف تمام الإختلاف عن إللى عرفه فى فترة الخطوبة

فيها ناس بتعتبرها تجمل وناس بتعتبرها كذب ، وساعتها بقى بيرددوا المقولة الشهيرة : أنا لا أكذب ولكنى أتجمل .. الله يرحمك يا أحمد ياذكى

دمتى بكل خير .. تحياتى

يا مراكبي يقول...

هههههه بوست تحفة بجد

أنا كنت محتاج أضحك النهاردة بجد .. هههه

بس الست الوالدة مش ممكن تعمل سندوتشات جبنة رومي بدل الفول والطعمة دي؟

ماجيبتيش سيرة الحلو اللي بعد الأكل

غير معرف يقول...

ههههههه :-
والله يا بنتي انتي عسل اعذروني على الرغم من هي أول زيارة لمدوتنك بس لقيت موضوع جميل على الرغم إن هو لحواء بس .
بس انتي عارفة الممنوع مرغوب .وجميلة جدا الحتة بتاعت عامل نفسه جي من فرنسا ليه اخترت فرنسا بالذات ههههههه .
في إنتظار المزيد من الموضوعات الشيقة دي .

momken يقول...

معلش يا حريم انا اتسنط عليكوا وسمعت الحوار والخطه

الا صحيح هو فى بنات لارج كده

ووااااااو

طيب نفرض يا بشمهندسه انى واد بايظ وخدتها ديسكو وقلتلها تعالى نرقص
تعمل ايه
اكيد على وصفتك هتقولى ثوانى اتحزم وارجعلك
ههههههههه

طيب انتى اتكلمتى على السيمون فيميه ومتكلمتيش على كوم الخس الى فوق السيمون فيميه هى هتعمل فيه ايه
دى ممكن تفضحه وتقوله انت فاكرنى ارنبه
وممكن تاكل خستين ومتوصلش اصلا للسيمون فيميه

ياله المهم تعرف تبلف الواد ويلخص ويشيل

تحياتى

واحد من البلد دى يقول...

السلام عليكم

أختى العزيزة..حضرتك عندك حق طبعا..

لكن والله العظيم اللى بيتغير بعد الزواج سواء فى الرجل أو الأنثى..

هو الزواج القائم أساسا على الغش..
يبقى الواحد ياخدها من الأول بالصراحة أحسن..
ما يجراش حاجة أبدا إن الأثنين ياخدوا فترة الخطوبة دى فعلا على إنها (تعارف شرعى) ولو ظهر للأثنين إنهم مش متفاهمين..يبقى مافيش مشكلة..
المشكلة بقى فى الناس يا افندم..
إنهم بينظروا للأخت المفسوخة خطبتها كأنها والعياز بالله (مطلقة)وهذه هى العقول المتحجرة التى نتمنى أن تنتهى من المجتمع...
وعلى فكرة..
أنا عن نفسى خطبت حوالى 4 مرات ..وفى كل مرة كنت لا أجد الإنسانة مناسبة لى..
وعلى فكرة ..كلمة مناسبة أو مناسب لا تعنى أنه لا يصلح للزواج..
ولكن تعنى أن طباعه لا تتوافق مع الآخر..
كالتربية أو الوضع الإجتماعى أو التعليم أو الثقافة العامة حتى..
يعنى والدتى مثلا..لا تصلح لأن تكون زوجة وزير مثلا..لأنها من السيدات على سجيتها..وهكذا..
المشكلة فى الأم من الأساس لأنها لو قامت بتربية أبنائها(أولاد و بنات)على الصراحة و الجرأة فى إتخاذ قراراتهم دون النظر للتبعيات السلبية لهذا القرار..
لكان الحال غير الحال..

وقد علمنا رسولنا الكريم صلى الله عليه و سلم ما هو شفاء لصدورنا و عقولنا أيضا و أنا و من نفس المنهج أقول لكل شاب و فتاة...كما قال حبيبنا..صلوات الله و سلامه عليه

فاظفر بذات الدين ..تربت يداك..

تحياتى البالغة

أعذرينى لقلة زياراتى..والله أنا بانزل البوست بتاعى بالعافية..

ما تزعليش منى يا أختنا فى الله

غير معرف يقول...

هههههههههههههههههههههههه
مش عيب يابنتى لما تنقلى حاجة من على النت وتقنعينا انها من تاليفك
هو انتى بتستخفى بعقولنا ولا اية .
ها ها ها ها ها
اية الدور اللى انتى معايشة نفسك فية دة
اسيبك انا بقى
ملحوظة
مش انتى لواحدك ياامورة اللى عندك نت
كلنا عندنا وسهل نعرف انك ناقله منة
مع السلامة يافنانة
هههههههههههههههههههههههه
سلام ياحلوة

Soooo يقول...

يعني انا جايلك بعد طول غياب .. اقوم الاقيكي بتقولي مش عايز رجاله تقرى الموضوع
بتطرديني
طب عندا فيكي انا قريت الموضوع
واحب اوجه نصيحة لكل بنت هتتعزم بره
اضافة على النصايح اللي قلتيها
يارييييت
ياريييييييييييت
ياريييييييييييييييييت
تدفع معاه في الحساب
الحياه مشاركه
الحياه كفاح
احنا غلابه
وهنيالك يا فاعل الخير والثواب عند الله





سلاموووووووووووووز

بنت مصريه يقول...

الى الكل
مرسى ليكو كلكو يا جماعه على تعليقاتكو الجميله
ويا رب تنورونى دايما

الى غير معروف
هههههههههههههههههههههه
تصدق انت تحفه بجد تحفه
ضحكتنى والله
لو قريت يا استاذ التعليقات الاولنيه
من الناس
اللى بيقولولى انهم قروا الموضوع
قبل كده
وقالولى ان اسلوبى احلى
انا معترضتش
لانى فعلا قريت الفكره قبل كده
وفكرت احدث فيها واعملها باسلوبى
ودا بعد ما ربتطها ببوست ليا
بتكلم فيه عن حواء وهى بتشرب الشيشه
ومعتقدش ان دا عيب
انى احدث ف فكره
واطبع عليها شخصيتى واسلوبى

يا ريت يا استاذ لما تعلق لحد تانى اقل حاجه تكتب اسمك
لان انا بعتبر ان اللى يبقى عنده مدونه
باسم معروف ومعترض على حد يقوم يدخل مدونته بغير معروف
دا انا بعتبره جبان وبوشين ولا يستحق النظر الى مدونته من الاصل هههههههههه
ولا ايه
وبعدين انت اصلا ازاى تسمح لنفسك انك تقولى يا حلوه يا اموره
انا مش تافهه ولا بلعب معاك ف الشارع عشان تكلمنى كده
وايه ماما دى انا مش ماما يا حج
ماما عندك هناك ف بيتكو
ههههههههههههههههههههههههههه

محمود حسن العدل يقول...

اختى الغالية
بنت مصــــــــــرية
ههههههههههههههههههههههههه
ههههههههههههههههههههههههههههههه
انتى مشكلة اية دة كلة دا
انتى هريتى الواد والله
انا مش بقولك انتى لو جاتلك الفرصة انك تستلمى حد هاتضحكى علية طوب الارض .
انتى عارفة
انتى غلطانة انتى كدة عملتى لية سعر
هو جبان اصلا وافكاره هدامة
انتى ناسية لما دخل عندى مرة وكتبت علية بوست وانتى علقتى وقولتى انى عملت لية سعر .
على فكرة انتى ممكن تعطينى انا شرف انى اعرفة نفسة ومقامة وحجمة الطبيعى وبلاش انتى اختى اللى تكلمى الاصناف دى
بس بصراحة انتى عرفتية مقامة صح
المهم
برافو عليكى
صدقينى تستحقى انا اقف وانحنى احتراما وتقديرا لشخصك اختى الغالية .
رغم انى ليا عليكى ملحوظة صغنونة
ههههههههههههههههههههه
بس مش هاقولك علية
انتى هتعرفيها لواحدك
تحياااااااااااااااااااااااااااااااتى

Beram ElMasry يقول...

هذا ردى على المدعو امل فنحى المضلل
سيدتى او سيدى امل
الاسلام دين سماوى ، وكتابه محفوظ بعناية الله من التحريف عكس ما حدث للكتابين من قبله ، وليس دينا وضعيا كالبوذية والمجوسية والبهائية ، كى تطرح قضاياه للنقاش فى المدونات ، اوالدفاع عنه ضد مرضى عميت قلوبهم ، لسنا اهل تخصص ولا فقهاء وللفقهاء احترامهم ولهم حق الاجتهاد والامر ليس متروكا لكل من هب ودب ، ولماذا نشكك فى فقهاء الاسلام بينما لايجرؤ يهودى او مسيحى فى مجادلة حاخام اوقس رغم ما طرا على الكتابين من تحريف وما حوياه من تضارب واختلاف ، وما حوياه من مجون وسوء ادب مع الانبياء ، كنشيد الانشاد للنبى سليمان عليه السلام
السيد او السيدة امل ، ادرئي عن نفسك الشبهات فهذه دعوة باطلة يراد بها باطل

hi5