( تاج ) مش عايزه مواساه ولا عياط ...........ف التعليقات

اعذرونى يا جماعه على فتره غيابى .........بس اعمل ايه ليا اسبابى ..متستعجلوش هتعرفوها
من خلال هذا التاج المميز ............ عارفين مميز ليه ...لان محدش بعتهولى .......دا تاج من جوايا
تاج انا بهديه لنفسى ..........يللا نبدأ التاج ؟ ماشى يللا نبدأ التاج


اولا:اذكر عشر اشياء عن نفسك

1_الاسم :مازلت (انجى البوهى )
2_السن:مازلت فى ريعان شبابى (25 سنه)
3_المكان:مع اهلى وعيلتى اللى عمرهم ما هيجرحونى ابدا مهما حصل

4_فاكرين يا جماعه لما قولتلكوا ف تاجى الاولانى انى مؤمنه جدا بقول الله تعالى (وعسى ان تكرهوا شيئا وهو خير لكم ).................سبحان الله.........ربنا اراد يختبر صدقى يا جماعه ........اذا كنت مؤمنه فعلا بقوله هذا ولا لأ
لقد انفصلت عن زوجى ...........والى الابد............
وسبحان الله اشعر(بالرضا) لأبعد الحدود .........والله يا جماعه احساس داخلى كده بيقوللى خير خير خير
فعلا صدق الله العظيم

5_انا عمرى ما ندمت على اى حاجه عملتها ف حياتى ......وعمرى ما هندم لانى عارفه ان ربنا معايا ف كل كبيره وصغيره

6_لو فيه تجربه سيئه _او تبدو سيئه_مرييت بيها .......عمرها ما هتكسرنى بالعكس هتقوينى ............
هقوم بعدها واقف تانى وانفض هدومى واكمل مشوارى اللى انت مقدرهولى يا رب واللى انا متأكده مليون %...ان هو اللى فيه الخير

7_عمرى ما جرحت حد ف حياتى وعمرى ما كنت اتصور ان اقرب واحد ليا يجرحنى _او بمعنى اصح اللى كنت فكراه اقرب واحد ليا _واكتشفت انه ابعد واحد عنى ههههههههههههه مالوش عزيز يعنى

8_ربنا يخليلى اهلى اللى وقفوا معايا ف المحنه دى .......هههههههه ولونى بعتبرها (منحه) مش (محنه)
منحه من ربنا عشان اتعلم....... وابقى اقوى م الاول .......واعرف معادن الناس .....ومتغرش بالمظاهر

9_لو حد فيكوا يا جماعه حس انه اتظلم ف يوم ........احسن جمله ممكن يقولها هى (حسبى الله ونعم الوكيل )
بس وتسيب كل حاجه على ربنا بعد كده .............واذا استعنتم فاستعينوا بالله
وانا بستعين بيك يا رب وبقول (حسبى الله ونعم الوكيل ف اللى ظلمونى )

10_اخدتوا بالكوا م العنوان يا جماعه ههههههههههههه................مش عايزه ندب والنبى
مش ميتم هو ..........ومش عايزه مواساه والكلام الاهبل ده زى (معلش _وياعين امك _وياهمى _وياكبدى )
والكلام ده ............انا زى الفل اهه لا انا ناقصه ايد ولا ناقصه رجل ولا حتى مناخير
هتندبوا على ايه (الحمد لله)
ولا عايزه استفسارات ............احنا قولنا ايه لو استفسرتوا هنفتح مجال للنميمه .........وكده ربنا مش هياخدللى حقى
عشان كده نكتفى (بحسبى الله ونعم الوكيل) وبس
يعنى علقوا على اى حاجه تانيه ان شالله على مسلسل ( نور) ههههههههه


يا ريت يا جماعه تتعلموا من تجربتى دى ........دا حبيبى رسول الله قال (لو اتطلعتم على الغيب لخترتم الواقع)
والله ما حد عارف الخير فين ............خليها على الله........
اه صحيح..... كل سنه وانتو طيبين



امضاء :بنت مصريه .........لسه م البلوجريه

اغنيه (انا م البلد دى ) المعدله لسنه.........2008

انا م البلد دى انا م البلد دى انا م البلد دى انا م البلد دى
مات فيها ابوووويا........ وجد جدى
مات فيها ابوووويا ....... وولادى بعدى


دا انا م البلد دى وانا م البلد دى


انا م البلد دى بلد البلااااء.... بلد الخداع دى بلد الرياااء
الشغل فيها بدون عطاااء.... دا اذا اتوجد...اصلا يا ولدى

انا م البلد دى انا م البلد دى انا م البلد دى انا م البلد دى
عاطل يا ابووويا .........ولاشىء بيدى
عاطل يا اخووويا........ واسطه ما عندى


دانا م البلد دى وانا م البلد دى


انا م البلد دى بلد المساجد... بلد الكنايس بلد المعابد
ورغم ده وده فيه فتنه عادى ...دى ناس بتزرع الحقد ضدى

انا م البلد دى انا م البلد دى انا م البلد دى انا م البلد دى
بلد ابووويا ....والحج حمدى
بلد اخووويا ....والقس رشدى


دا انا م البلد دى وانا م البلد دى


انا م البلد دى مصر الجميله..... خلوا المسافه بيننا طويله
مصر اللى ليها اهداف نبيله..... خسروها كل ما الزمن يعدى

انا م البلد دى انا م البلد دى انا م البلد دى انا م البلد دى
بلدى بعوووها.... وأهين يا بلدى
بلدى هانوها..... صبرك يا بلدى

دا انا م البلد دى وانا م البلد دى


انا م البلد دى بلد الكلام .....هقول وهعمل كله كلام
قدامى لسه ميت سنه قدااام ......عقبال ما احقق ربع اللى عندى

انا م البلد دى انا م البلد دى انا م البلد دى انا م البلد دى
بقى كل شاااب ....لابسلى وردى
يحيى الشبااااب.... ضيعى يا بلدى


م انا م البلد دى وانا م البلد دى


انا م البلد دى مصر اللى نيلها..... مليان زباله ماافيش ماثيلها
كل اللى شربوا من ميه نيلها..... جالهم بلاوى ..ومستخبى

انا م البلد دى انا م البلد دى انا م البلد دى انا م البلد دى
اشرب يا اخووويا.... دا نيلها عندى
اشرب يا ابووويا.... بلاويه ف كبدى


دانا م البلد دى وانا م البلد دى


انا م البلد دى بلد العماره..... عز الدخيله جالنا خساره
دا حديد عز غلوا الحجاره ...وقابلنى لو جبت ..شقه يا ولدى

انا م البلد دى انا م البلد دى انا م البلد دى انا م البلد دى
ادونى حقى ....من ارض بلدى
ادونى حقى ....دا انا م البلد دى


دا انا م البلد دى وانا م البلد دى


انا م البلد دى بلد المفارق.... بلد المعارض .بلد المنافق
والامر جبرى والكل صابر.... والرأى فيها.. دا رأى فردى

انا م البلد دى انا م البلد دى انا م البلد دى انا م البلد دى
مات فيها ابووويا.... واتذل جدى
مات فيها اخووويا.... وانت اللى بعدى


دا انا م البلد دى وانا م البلد دى


انا م البلد دى بلد البجاحه..... بلد المياصه بلد اللكاعه
شباب وبنات فى كل ساحه .....يعملوا اييه..يمشوها عرفى

انا م البلد دى انا م البلد دى انا م البلد دى انا م البلد دى
أهين يا ابووويا.... عمرى بيجرى
أهين يا اخووويا ....عجزت بدرى


دانا م البلد دى وانا م البلد دى

افتكاسات مذيعه........فذيعه

ازيكوا يا حلوين ...........اتمنى ماكنش اتأخرت عليكو
انتو اكيد طبعا عارفين البرنامج الرائع (90 دقيقه ) .....تقديم الاستاذ الاعلامى (معتز الدمرداش )
بصراحه هذا البرنامج يعتبر من اهم برامج (التوك شو) ........وميقلش طبعا ف الاهميه عن برنامج (العاشره مساء) وسواء (معتز الدمرداش ) او (منى الشاذلى) فهم لتنين يعتبروا من المذيعين المتميزين سواء فى محاوره الضيف
او تشويق المشاهد فى عرض المواضيع المهمه وصولا الى الحقيقه ولا شىء غير الحقيقه


وللاسف مؤخرا ..........ظهرت مذيعه فى برنامج (90 دقيقه) ..........اسمها (ريهام السهلى)
وهذه المذيعه دليل واضح وصريح على الكوسه والواسطه ف مصر ...........
وعلى رأى اللى قال (لو النيل صلصه مش هيكفى الكوسه اللى ف البلد)


بصو يا جماعه انا ماليش ف الاعلام.............بس انا اكاد اجزم ان ريهام خريجه اى حاجه تانيه غير الاعلام

(ريهام السهلى ) قدرت تحول برنامج (90 دقيقه) من برنامج _مهم..جرىء..سياسى..اجتماعى..فنى _ يشاهده الكبار فقط
الى برنامج _كوميدى عالاخر يشاهده الصغار فقط ويضحك عليه الكبار فقط _باستثناء فقره (معتز الدمرداش)


طيب انا هقولكوا على عينه من اسئله الاستاذه (ريهام).........وانتو اللى تحكموا
وانا متأكده انكو هتقولولى زهقنا م الكوسه بقى هاتى شويه ملوخيه ........هههههههههه

كان فيه جريمه اغتصاب وقتل لطفله صغيره.........وكعاده برنامج (90 دقيقه)........ ان يخطر المشاهد بأى جريمه
او واقعه فساد او مشكله............واستضاف البرنامج والده الطفله المغتصبه المقتوله
وللاسف كانت اللى بتحاورها (ريهام السهلى ) ............قال يعنى الست ناقصه

وبعد تطويل( ريهام ) ف الاسئله لتعرف تفاصيل التفاصيل من والده الضحيه..........وجهت (ريهام) السؤال التالى
ريهام السهلى :(والابتسامه لا تفارق شفايفها ).....وحضرتك بقى ياحاجه لما عرفتى ان بنتك اغتصبت واتقتلت
كان شعورك ايه ...........كنتى حاسه بأيه يعنى ؟
(كانت فرحانه قوى يا ريهام لدرجه انها زغردت وقعدت ترقص.........بالذمه ده سؤال)
والده الضحيه:(وعلى وشها علامات الاستغراب من سؤال المذيعه الموقره )........طبعا انهرت ومصدقتش
_وقامت معيطه_(طبعا لازم تعيط هيه ريهام هتسيبها الا ما تعيط )


تعالوا شوفوا حلقه تانيه .....عن جريمه برضه ..........طفله برضه اتسرق حلقها واتقتلت
البرنامج استضاف اهل الضحيه وكانت اللى بتحاورهم (ريهام ) برضه .........(هم معندهمش غيرها ولا ايه)
وبعد معرفه تفاصيل التفاصيل كعادتها (والله ولا ضباط الشرطه)......
وجهت ريهام تحذير لحبايبنا الاطفال....اااصدى المشاهدين ...وهو ده التحذير..و كلامى اللى بين قوسين (بالاحمر)
لو سمحتوا يا جماعه (بليز) ....ما تسيبوش عيالكوا يلعبو ف الشارع
(معندكوش نادى تلعبوهم فيه ........طب اعملولهم سندوتشات حلاوه بالقشطه)
.وألا انتو حريين (هيجيلكو الديب السحلاوى )
..هيكون مصيرهم زى البنت الللى ماتت دى (الملافظ سعد _ماتت_طب شيكيها زى مانتى متشيكه كده وقولى_ توفت_
عالاقل قدام اهلها ................عموما حاضر يا ماما ساميه )


عشان ماطولش عليكوا هقولكو .........اخر فقره سمعتها ل (ريهام).....لما استضافت الناجى الوحيد ف حادث
(مرسى مطروح).........(اوجه عزائى الخاص جدا لاهالى الضحايا ربنا يلهمهم الصبر والسلوان يارب)
جائت (ريهام ) مع الضيف ..........ايه الشياكه دى يا ريهام ........لابسه ابيض ف كارثه زى دى .
ما شاء الله
دى (منى الشاذلى ) اللى اسمها (منى الشاذلى)...لو اى كلب مات ف البلد بتلبس اسود
تيجى حضرتك ف كارثه زى دى تلبسى ابيض...........مش عارفه اقولك ايه بصراحه
برضه مش عايزه اظلمك ...يمكن هدومك السوده كانت ف الغسيل ......اوه سورى اقصد ف (الدراى كلين )
وبعد ان دمرت الضيف بالاسئله التافهه والغريبه والتى كانت من عينتها

(يعنى كان منظر الجثث عامل ازاى ؟)..............واو يا ريهام دول كان شكلهم اروجينال خالص.......فاتك نص عمرك
واحد بيقولك القطر مشى عالعربيات حوالى 4 كيلو .........لازم تقرفيه ف عيشته يعنى
وفى اخر هذه الفقره اتحفتنا بسؤالها الفتاك الفذيع.........الا وهو
(بتعامل عيالك ازاى بقى بعد ما ربنا نجاك م الحادثه دى ؟)
ما شاء الله.......... يا عبقريه الاسئله بتاعتك يا ريهام ............بجد بجد تتحسدى
ناقص تقولى للراجل انت مش هتعيط بقى ........... خلاص اتكلمنا كتير نعيط شويه بقى


دا كان رأيى يا جماعه..عن الواسطه اللى ف البلد ..........ومش (ريهام) بس اللى بتكلم عنها ..لأ..
انا بتكلم عن كل واحد فى غير مكانه الصحيح ...وخصوصا ف الاعلام .........لان الاعلامى
بتبقى عين الناس عليه واى كلمه هيتحاسب عليها
والاحسن ل (ريهام) واللى زيها انه يروح يشتغل ف تخصصه .......
اللى انا متأكده انه بعيد تماما عن الاعلام

معلش يا ريهام........متنفعيش ف الاعلام
ادى العيش لخبازه يا ريهام

تاج ولا سلطانيه............هاجاوبه والاعمال بالنيه

ازيكوا يا حلويين ................بعد غياب اكيد مستنيين

اولا احب اشكر حبيبه قلبى (زوزو) عشان بعتتلى تاج _انا عارفه ايه التاج اللى شغالين فيه ده كانت بعتت كيلو جوافه احسن _هههههههههه حد سمعنى

المهم انا كنت بشوف التاج ده عند باقى المدونين ...........بس بصراحه لغايه دلوقتى مش عارفه ايه علاقه التاج ده بالحديث عن الشخصيه...بس انا هعمل زى ما بقيت المدونين بيعملوا انا هقعد اتفزلك يعنى

ومعأنى دارسه (علم نفس) وعارفه ان التعبير عن الشخصيه دا قدرات وموهبه .................بس انتو عارفين طبعا انى موهوبه.ولا ايه ............ايه متنحين ليه...........موهوبه ولا مش موهوبه ............ايوه كده اتعدلوا...........موهوبه ومتواضعه كمان ....ومش بقول على نفسى موهوبه ...دا كلامكوا انتو اللى لسه قايلينوا عليا دلوقتى ...ما علينا نقول بقى التاج عشان( زوزو) ما تزعلش....ولازم طبعا نسمع كلام (حسين فهمى ) و(سعاد حسنى) ونخللى بالنا من (زوزو)

اولا:اذكر عشره اشياء عن نفسك

1-الاسم:انجى الشهيره ب(بنت مصريه)...........السن:25 ويوم ودقيقه

المكان:قاهره ام عز (هيه كانت قاهره المعز .......بس بعد اكتساح حديد الدخيله بقت قاهره ام عز او قاهره عمو عز المهم يعنى لازم نجيب سيره عز .........فأذا ذكرت القاهره ذكر عز ف ديلها عالطول )

الحاله الاجتماعيه:متقندله (متجوزه) ................الوظيفه: خدامه (ست بيت)

خريجه:مستشفى المجانين (اداب علم نفس)

2-رومانسيه جدا بس البلد دى مينفعش فيها الرومانسيه زى مانتو عارفين ......يعنى اصل الحياه ف مصر بقت وردى قوى ف رومانسيه على وردى هتقلب بغم

3-برغم انى مريت بمواقف ف حياتى لا احسد عليها الا انى- الحمد لله-بميل لروح الدعابه والمرح

4- بحب اتقرب من ربنا قوى .......ودايما بدعى ان ربنا يهدينى ويهدى اللى بحبهم

5-ممكن اكون عصبيه شويه بس طيبه قوى بنسى الجرح بسرعه..........وساعات مابيهمنيش لما حد مش مهم عندى يضايقنى ........بس بزعل قوى لما حد بحبه يجرحنى

6-ربنا يخليلى (ماما وبابا واخويا وتيته_ماما حاجه_وزوجى العزيز) ساعات بختلف معاهم لكن عمرى مانكر افضالهم عليا ....وان هم اللى وقفوا جنبى ف كل موقف صعب لحد ما وقفت على رجليه تانى ......ولغايه ما اموت هفضل محتجالهم برضه

7-مؤمنه جدا بقول الله تعالى (وعسى ان تكرهوا شيئا وهو خير لكم)............محدش عارف الخير فين وموقنه ان ربنا مقدرلى دايما اللى فيه الخير

8-بحب اغنى قوى .........حتى وانا متضايقه.........ههه انتو عارفين ساعات ببقى مخنوقه قوى اقعد اغنى والاقينى بعيط وانا بغنى (مش قولتلكوا خريجه مستشفى المجانين)ههههههههههه

9-لقيت نفسى ف المدونه (اصلها كانت ضايعه)...........وحسيت فعلا انها بتساعد على فك الكبت وسمعت ان الحكومه قريب هتعمل عليها رقابه ..........قال يعنى الحكايه ناقصه

10- اخر حاجه هيه انى ( بحب مصر وبكره اسرائيل ) واييييييييييييييه

على فكره يا جماعه عايزه اقولكوا نصيحه للزمن ...........مش كل اللى بيضحك ويهزر على طول يبقى معندوش مشاكل .........بالعكس دا ممكن يكون مليان مشاكل ............بس بيحاول ينسى يعنى زى (البلياتشو) كده

زيى يعنى ههههههههههه

ثانيا:اهدى التاج ل خمس اشخاص

ا-مى صاحبه مدونه (مدينه الملائكه)

2-عليا حليم صاحبه مدونه(عندليبيات)

3-احمد البوهى صاحب مدونه (انكسارات)

4- بنوته مصريه

5-لورنس العرب
مرسى يا (زوزو) ياختى بس المره الجايه يا ماما بقى ابقى ابعتى حاجه تتاكل ...........

بدل البخل ده ...........قال تاج قال ..حكم..

الست مصريه............طالعه ع اسكندريه

ازيكو ياااا .............يا رجاله ولا تزعلو
معلش يا بلوجريه انا بعتذرلكوا هغيب عنكو 10 ايام....اصلى مسافره
لا بقولكوا ايه متمسكوش ف ديلى كده .........هو انا كنت خلفتكوا ونسيتكوا

(يا لهوى ايه ده ......ايه وش العشوائيات اللى طلع فجأه ده ..........اعمل ايه دلوقتى .......ارجعى يا بت عن اللغه دى لاتتفضحى )

احم احم........سورى يا جماعه انا اقصد ان انا مش ال(مامى) بتاعتكوا
عشان تتمسكوا بيا قوى كده
لازم يكون عندكو(بيرسوناليتى)...........برافو عليكو شخصيه مستقله يعنى

لا لا يا جماعه انا مش هقدر اكمل البوست كده دانا كده يجيلى المراره........
يا سبحان الله الجو بقى كله ( نشا )

انا هكلمكوا بتشبعتشى بقى ................
اصلى مسافره اسكندريه هصيف .........عقبال عندكوا يا حبايب....عقبالك يا ام احمد
عقبال ماتجوزى احمد (لو لو لو لو لىىىىىى)

انا عارفه ان انتو بتروحوا (شرم _ والغردقه_وابصر ايه دا اللى اسمه الساحل الشمالى )
كل برغوت على قد دمه ياخويا..........بلاش قنعره منك له
وبعدين هى اسكندريه وحشه ...........دى بلد الكابوريه والجمبرى والسمك الطازه
والله وحشتنى ريحه الزفاره هىء هىء هىء

هبقى اجيبلك معايا يا ام احمد .............خلاص يا وليه بلاش زن قولنا هجيبلك

كنا بنقول ايه اه اسكندريه دى بلد (الايوه )....وال....(ايوه) برضو
ايه فيه ايه اه (ايوه).........وفيه كلام تانى منقدروش نقولوه على رأى (سكيننه)

انا قولت اقولوكوا عشان ما تتوغوشوش عليا .........ولو حد سأل عليا قولوله الست مصريه
طلعت على اسكندريه ............وقولوا لام احمد تبطل سرييخ
هجيبلها اللى هى عايزاه_والله لا اجيبلها كابوريا معفنه _عشان ام احمد دى مجننانى ومش عايزه اغلط بقى

ياللا العواف عليكو
تتمسو بالخير

اه يا بلد.........عايزه ولد

ازيكوا يا عيااال.............
ايه متضايقين ليه ..........خلاص خلاص ماتزعلوش ....ازيكو يا رجاله
ولونى حاسه انهم خلصو...............يعنى مش خلصوا قوى ..لا..بس معدش موجود منهم كتيير
يعنى على 2010 كده هيكونوا انقرضوا
فيه ايه ..........زعلانين تانى ليه ...لسه فيه امل لغايه 2010 ..قدامكم سنتين بحالهم واحنا لسه فأول 2008
يعنى سنتين ونص........

طيب خلاص انا هحكيلكوا موقف وانتوا اللى تحكموا اذا كانت البلد عايزه ولد ولا لأ
(شكلنا هنلجأ للاستيراد م الخارج)
بغض النظر عن نسبه العنوسه العاليه وان البنات بقت اكتر م الولاد والكلام اللى لا يودى ولا يجيب ده
المشكله مش ف النسبه ..كام لكام..المشكله ان الولاد اساسا مش لاقيين شغل ...هيتجوزوا ازاى
المهم دا مش موضوعنا

احكيلكم بقى عالموقف اللى حصللى ...واثبتلى ..ان فعلا (البلد عايزه ولد)
امبارح كنت قاعده ف البيت بمارس هوايتى اللى انتو عارفينها _ايوه شاطرين بالضبط هيه دى _
(الطبيخ - غسيل الموعين - تنضيف البيت)
منا خلاص بوست ايدى وش وضهر ...بعد خروجه النيل وحرمت اخرج تانى
وحمدت ربنا عالهوايه الجميله دى ..مالها (شاديه) ماله فيلم (المقهورون ف الارض ).........اهو احسن من خروجه النيل المنيله دى

المهم سمعت جرس التليفون (تررم- تررم)
انا (بكل معانى القرف والزهق) :مين الرزل اللى بيتصل عالصبح دا
عادى يا جماعه مهى لسه الهوايه مأثره برضه .........اصلها متتنسيش بسهوله يعنى
ورفعت السماعه بعصبيه ونرفزه وردييت

انا (بغلاسه) :الو ميين
صاحبتى الانتيخ (بروقان بال) :ازيك يا اوجى
انا (اتعدلت ف الكلام طبعا) :اهلا ازيك يا قمر عامله ايه
صاحبتى (من غيير ما تدينى اى فرصه) :اوجى بليز عايزه اشترى هدوم ممكن تيجى معايا عباس العقاد
انا (ف عقل بالى ) :اللهم اخزيك يا شيطان ....منا خلاص كنت رضيت بالواقع وحرمت اخرج تانى
ايه يا اوجى ......بتشاورى عقلك ولا ايه .......شكلك كده هتتمردى عالهوايه ......يا بت مين خرج من داره اتقل مقداره
ولا انتى نسيتى......لا منسيتش بس انا زهقت وعايزه اخرج.

المهم اتحججت ان دى صاحبتى ومقدرش ارفضلها طلب .......مع العلم انها لو كانت طلبت طلب مش على مزاجى
عمرى ما كنت هنفزه

نزلت معاها وركبنا الميكروباص اللى كان كومبليت بالرجاله وكلهم قاعدين وانا وصاحبتى بس اللى واقفيين
فضلنا واقفين شويه يمكن حد فيهم يبقى عندوا شويه م الاحمر ويحس ويتنازل عن مقعد الرئاسه للبنات
مكسورين الجناح (اللى هم احنا يعنى )
برضه مفيش فايده اضطرييت ابص لكل واحد ف وشه يمكن حد فيهم يتكسف ويقوملنا

بصييت للاولانى :عمل نفسه نايم
بصييت للتانى :قعد يبص لسقف اليكروباص ..(الظاهر الدنيا كانت بتمطر ولا ايه مش عارفه)
بصييت للتالت:بسرعه قام مدور وشه وعمل انه بيكلم اللى جنبه وهو بيقول (الاستى خدت سيدى وراحوا الجونينه)
هههههههههههه اهو اى كلام المهم يعمل نفسه مش شايفنى

قولت لنفسى (مبدهاش بقى يابت يا مصريه )
مالقيتش قدامى غير انى اتكلم مع صاحبتى بصوت عالى يسمع كل اللى قاعدين .....وقولتلها
(تصدقى معدش فيه رجاله ف البلد.....اه والله.....بدليل الواقفه السوده اللى احنا واقفينها دى ......بزمتك يا شيخه
من ساعه ما ركبنا المخروب ده حد من اللى قاعدين دول فكر يقوملنا )
قعدت اتكلم اتكلم ..ان حد يعبرنا ..لكن لا حياه لمن تنادى ........لدرجه انى شكيت فعلا اننا نكون غلطنا ف الميكروباص
وركبنا ميكروباص مخصص للصم والبكم ههههههههههههههه

فيييين وفييين واحد قاملى .......
قولت لنفسى..( خليكى زوق بقى يا مصريه ...هو صحيح الراجل قام بعد ميت سنه ..بس يمكن كان مستنى الترجمه لكلامى ولا حاجه )
الراجل:تعالى اتفضلى اقعدى
انا ( بزوق مصطنع): لا والله خللى حضرتك مستريح
الراجل:لا شكرا اصلى نازل هنا
ساعتها كنت عايزه اخنقوا .......يعنى لولا انك نازل مكنتش قومتلنا

المهم نزلنا لفينا ف المحلات ........وانا ربنا رازقنى بصاحبه متشتريش حاجه بسهوله ..لازم تقيس كل اللى ف المحل
وميعجبهاش حاجه.......تروح محل تانى وتقيس كل اللى فيه وبرضه ميعجبهاش حاجه..(ودوخينى يا لمونه)
وهى بتقيس ف البروفه... انا بقى وقفت امارس هوايتى _(لا مش غسيل الموعين انا دلوقتى ف الشارع ....ركزوا)_
هوايتى انى اتفرج عالهدوم المتعلقه ف المحل
وايدى وقعت على بدى تحفه يا بنات
(لونه بمبه _ومترز بالترتر على شكل قلب_وفيه قلوب صغيره فوشيا)
قررت اشتريه لانه عاجبنى جدا

ف الاخر واحنا ماشيين وخلاص بحاسب عليه ........سمعنى (الكاشير) وانا بقول لصاحبتى
(هو صحيح نص كم ..بس انا ممكن البس تحتيه بدى ابيض بكم)
بمجرد ما قولت الكلمه دى ........لقيت (الكاشير) فطس على روحه م الضحك
ف الاول افتكرته عنده ربع ضارب او تاتش هطل..........بس لما عرفت بيضحك على ايه لقيت (الهطل) عندى انا

بصيتله (بكل فشخره وقنعره ) وقولت : بتضحك على ايه حضرتك
رد عليا (وهو بيحاول يمسك نفسه م الضحك) : مفيش يا فندم....... بس هو حضرتك هتشترى البدى دا ليكى ؟
قولت لنفسى (ايه ده ....ماله ده ....هو انا شكلى شحاته ولا ايه.........مينفعش البس حاجه نضيفه يعنى )
رديت ( بكل ثقه) :اه ليا طبعا ...ايه المشكله ؟
رد عليا (وهو مش قادر يوقف ضحك) : اصل البدى دا رجاالى
انا (مع حول ف العينين) :يا سنه سوخه........(صوتت بالبلدى بنت سلطح باشا)
بصييت لصاحبتى اللى كانت هتقع من الضحك وقولتلها
(الرجاله بقو يلبسوا بمبه وفوشيا بترتر .............مش قولتلك خلصوا )

شفتوا بقى ان البلد عايزه ولد.........
هههههههههههههه

بنت مصريه اتشهرت يا رجااله...........يا mens

والله صبرتى ونولتى يا بت يا مصريه

باركولى يا عيال(البنت مصريه) طلعت ف (جريده الاسره العربيه)

مين يا ولاد: البت مصريه

بتقولوا ميين يا ولاد :البت مصريه

مين :البت مصريه

بصو بقى يا جماعه اى واحد عايز يعلقلى ميعلقليش بقى كده زى زمان ..لا..خلاص فيه نظام بقى دلوقتى

انا مش اقل م المشاهير دلوقتى ...انا طلعت ف الجرنال يا جماعه... خلاص عديت

لا يا خفيف انت وهو .........مش ف صفحه الحوادث

واحده مدونه هتطلع ف صفحه ايه (لكى يا سيدتى)...........اكيد صفحه (المدونين) طبعا

بصوا بقى ...كل واحد عايز يعلقلى يقوم بالخطوات الاتيه::

1-يقدم طلب

2-يطبع عليه ورقه دمغه ب 4 جنيه

3-يمضى عليه اتنين موظفين

لا لا خلاص انتو حبايبى مقدرش اعذبكوا كده لأ حرام .....خلاص يا جماعه هاتو الدمغه اللى ب2 جنيه

بلاش اللى ب4 جنيه..................ايه فيه ايه منا هونت عليكو اهه

يا جماعه عادى دا انا بخللى الناس اللى ف البيت يكلمونى بميعاد دلوقتى ................انتو احسن من اهلى يعنى

هههههههههههههههههههههه

معلش يا بلوجريه........... مانتو عارفينى ............غلابويه والغلاسه عندى غيه

شكر خاص:

رئيس تحرير الجريده:وحيد غازى

رئيس مجلس الاداره:محمود ياسر رمضان

الصحفيه المعده:اسر ياسر

ولكل زمايلى البلوجريه اللى بحبهم جدا جدا واللى شجعونى على التدوين

الف الف شكر ليكو