بوست خاص لاحبابى ......لتوضيح اسباب غيابى

سلامو عليكو (انا خايفه منكو والله)

بصو بقى ...م الاول كده من غبر شتيمه وتهزيء وضرب وقله قيمه........انا عارفه والله ان دا اللى استاهله ....خصوصا من الناس اللى سألوا عليا ف فتره غيابى دى ...واخص بالذكر _ لورنس العرب (اللى هيودينا ف داهيه ببوستاته) _شفقه واحسان (ايوه ايوه لتنين الشحاتين دول ) _رومانسى _بشمهندس بوحميد_حماده زيدان _وليد (عارفه مش عارف ليه)..وغيرهم وغيرهم
اصحابى كتير الله اكبر

الناس دول سألوا عليا وماهنش عليهم قعداتنا حول بوستات النم ف الحكومه وانتشار الفساد ههههههه (انا عارفه ان كل واحد فيكوا هيجرى دلوقتى ويقول ولا اعرفها )ههههه

المشكله ان الناس افتكروا انى جرالى حاجه او مت ...وانا عملت البوست دا مخصوص عشان اطمنهم عليا واقولهم انى
لازلت حيه (عايشه يعنى عشان عارفه ان فيه ناس هتفهمها غلط )

واقولهم برضه سبب غيابى والمتمثل فيما يلى :

اول حاجه :انى اكتشفت ان الشركه اللى بشتغل فيها واخده توكيل (التيييييت) لاداره الشركات المعفنه.....طبعا سبتها واشتغلت ف شركه تانيه مهو الانسان ايه غير شويه شركات فوق بعض

دا غير ان السبب الرئيسى لغيابى هو انتقال الاسره السعيده (اللى هى اسرتى يعنى هنعتبرها سعيده ) ..الى مكان اخر للسكن (ف طبيعى هياخدونى معاهم مش هيسيبونى ف الشارع يعنى ).....وانتقلنا للعيش يا ساده فى مدينه السعاده
والمعروفه عند البعض بمدينه الرحاب ....وعن نفسى بسميها ( مدينه البهجه )

بقيت من سكان الرحاب يا مدوديين ......اصدى يا مدونين .....ليكو الحق الان ان تفشخروا ....زميلتكم ف الكفاح والتدوين بقت من سكان الرحاب ......(صوت تصفيق حاد )

وسبحان الله يا جماعه من اول ما سكنت ف الرحاب .....اتحكم على هشام طلعت مصطفى بالاعدام
(يا محاسن الصدف ).......تفتكروا دى مسأله اقدار وللا فيه حاله نحس ....هنمشيها اقدار عشان ماضربكوش

انا عارفه ان فيه ناس دلوقتى هينموا عليا ويقولوا ...(دى سكنت ف الرحاب يعنى هتبيع القضيه )....انا بحذرهم جميعا
وبقولهم لا ...لا والف لا ....مش انا ....مش بنت مصريه اللى النيل روانى والخير جوانى......

بس طبعا مع تغيير المستوى لازم يكون فيه تغيير ف عناصر موضوعاتى ....
يعنى مثلا ....بدل ما اتكلم عن ارتفاع سعر كيس العيش هتكلم عن ارتفاع سعر كيس الفستق او الكاجو مثلا
بدل ما اتكلم عن ارتفاع سعر الميه اتكلم عن ارتفاع سعر الميلك شيك ......تفتكروا الانسان يقدر يعيش ازاى من غير ميلك شيك

وعشان انقل نظره سكان الرحاب للعالم من حولهم ......عملت مدونه يومياتى ف الرحاب انتظروها قريبا

وانهارده خير اللهم اجعله خير ......افتكرت ان عندى مدونه ولقيت الناس بتسأل عليا وتقول فين البت مصريه
قولت لبابا انا خلاص هكتب بوست انهارده
قاللى انتى لسه فاكره ما قفلوا مدونتك من زمان .....لطمت بالبلدى يا سنه سوخه قفلوها ؟ قفلوها ازاى يابا الحج ..
قاللى لهو انتى ما تعرفيش ....قولتله معرفش ايه يابا الحج .....قاللى مش عفنت وريحتها قلبت النت ..هههههههه
اصل احنا عيله كوميديه حبتين

وعملت البوست دا مخصوص لاحبابى لاشرح فيه اسباب غيابى

اه .......يا خوفى يا بدران

السلام عليكم ورحمه الله وبركاته

معلش يا جماعه انا عارفه والله انى معنديش نقطه احمر ...(دم يعنى)

اصلى كنت نايمه مع اهل الكهف....بس تقريبا كده اهل الكهف صحيوا قبلى ومصحونيش......

واذ فجأه وانا نايمه وعلى حين غره (متسألونيش يعنى ايه ...معرفش هم بيقولوها كده )........لقيت ناس بتصحينى وبتقوللى

قومى يا بت يا مصريه ( اوباما ) جاى

صحيت مفزوعه وانا بقول (ابو الوفا ابو الوفا) .......بس اوباما مين ؟ وجاى فين ؟

قالولى ....يا بت يا مصريه يا هبله مانتيش عارفه اوباما رئيس امريكا .....يا خيبتك يا خيبتك

قولتلهم ....اه يا جماعه انا اسفه معلش ....اصلى اما نمت كنت نايمه ايام (الجزمه ) ....فمعرفتش ايه اخر التطورات

قالولى ......(اوباما ) جاى مصر............قولت يا سلام احنا ف ديك الساعه وللا ف فرختها حتى

صحيت من النوم وانا لسه بفرك عينى وبفتح الراديو ......ايوه الراديو واحده نايمه مع اهل الكهف هفتح ايه (DVD)

المهم فتحت الراديو على صوت مذيعه كده باين من صوتها انها مضروبه بالنار قبل ماتذيع الخبر وبتقول :

صباح الخير اعزائى المستمعين ......ركزوا معايا يا جماعه..........

بما ان رئيس اكبر دوله مستر (باراك اوباما )...هيشرف وينور ويعطر مصر الموكوسه ...سورى اصدى المحروسه رجاء خاص ....يا ريت مانشوفش اشكالكوا ف الشوارع انهارده....يعنى بمعنى اصح (اذا بليتم فاستتروا )

واحنا كمان هنمنع اى مواصلات من التجول فى شوارع القاهره.....مش عايزين بقى نظام رمسيس عتبه والهبل دا ....كل واحد فيكو بقى يتلم ف بيته ويقعد كده مستكين .....يتفرج على ( اوباما ) ف التليفزيون

قولت يللا احسن بلاها شغل انهارده كلمت الشغل ..رد عليا نائب المدير

قاللى :انتى ماجيتيش ليه ؟

قولتله :اوباما جاى فانا مش جايه

قاللى: ليه بقى ان شاء الله ؟

قولتله: مفيش اصلنا زعلانين مع بعض شويه

قاللى : احنا هنهزر مافيش اجازات (اصله راجل غتت حبتين)

روحت الشغل كما المغلوب على امره ....واتفرجت ف الشغل على خطاب (اوباما)......بصراحه كلامه اذهلنى ونال اعجابى خصوصا اهتمامه بالعالم الاسلامى .....وعلاقه العالم الاسلامى بالغرب .....ولكن يبقى السؤال .....

هل كلام الليل مدهون بسمنه يطلع عليه النهار يسيح ؟ ( ايه ام احمد اللى ظهرت فجأه دى )

اقصد يعنى تفتكروا كلام اوباما دا نابع من حقيقه جواه فعلا ؟ (واذا كان ذلك صحيحا فهو يستحق خلع القبعه وليس خلع الحذاء مثل سابقه)

ام ان كلامه هذا لا يعدو مجرد كلام.........وهذا ما ستكشفه الايام ......والى ان نصل الى هذا الزمان .....تبقى عباره

(يا خوفى يا بدران )

انتى جايه ....تشتغلى ايه ....اااهاهااااا

محدش يضرب .....انا بقولكوا اهه محدش يضرب
والله يا جماعه انا عارفه انى وحشه ومش بسأل بقالي كتير ...دا حتى بابا اللي اسمه بابا قاللى ( مدونتك دوددت يا بت يا مصريه )
بس انا عارفه انكوا طيبين وقلبكوا انضف م البيض المسلوق ....وهتسامحونى لما تعرفوا ظروفي

لالا لا ...مش قوى كده يا جماعه كفايه هتافات وتحيه ..... معقوله كل ده ليا ؟هو انا كنت وحشاكوا للدرجه دي ؟لالا لاماتبوسوش ايدى لالا ..ولا كتفى لا مش معقول كده .....دعوني اعمل فى صمت (صوت تصفيق حاد ) هههههه

ازيكوا يا جماعه .. انتو عارفين من قبل كده انى كنت باخد كورسات وحاجات كده لعلها تنفعني انى الاقى اي شغل والسلام ...
المهم انى مقعدش ف البيت اتفرج على ميلودى تتحدى الملل لأنها بصراحه جابتلى الملل والشلل المستعجل كمان

وبعد ما خلصت الكورسات ....الطبيعي بعد كده ايه ؟ ايوه بالظبط ..انى امسك الرفيق الاوحد للشباب والبنات فى جمهوريه مصر العربية والذى يزور كل بيت من البيوت المصرية يوم الجمعه والاثنين ..ولا يكلفنا لا ابيض ولا اسود

الا وهو (جريده الوسيط)

فمن هنا بدأت الشحططه اقصد محاولات البحث عن وظيفه ....فقد كنت اركز على الاعمال التي تحتاج مهاره فى اللغه الانجليزية والكمبيوتر .....ايوه مهاره طبعا ...اوعوا تكونوا فاكرين انكوا بتكلموا اي حد لا لا لا انا متواضعه معاكوا بس

ههههههههه

المهم ..وانا بدور ف الوسيط ..لقيت شركه استيراد وتصدير طالبه موظفين يجيدون التحدث بلانجليزيه وكذلك الكمبيوتر
ولقيتها قريبه من البيت ...(قولت بس هيه دي)
ورفعت سماعه التليفون للاتصال بهم ...ردت عليا واحده ...وكان الحوار التالي

هي : شركه (تيييييت) .....الو
انا : لو سمحتي انا كنت بتصل عشان الاعلان اللي ف الوسيط
هي : ايوه ...انتي ضليعه فى قواعد اللغه الانجليزية ؟
انا : ايوه يا فندم
هي : وتجيدين التعامل مع الكمبيوتر والانترنت والاعمال الالكترونية؟
انا : اه الحمد لله
هي : تعالى بكره من الساعه عشره للساعه عشره وربع عشان تقابلي ال Maneger وتعملى ال interview........وماتنسيش تجيبى معاكى ال cv
انا :( زى الهبله) ان شاء الله من تسعه الصبح هكون عندكوا

وتانى يوم صحيت الساعه سابعه الصبح محتاره بقى البس ايه ....طبعا يا جماعه منا هقابل ال maneger مش اى حد.. وفى تمام الساعه التاسعه وصلت الى شركه ال (تيييت)..وطبعا لابسه اللى عالحبل وماسكه ال cv ف ايدى وجايباله فايل من الغالى ابو 3 جنيه ونص (حار ونار ف جتتهم) ...وفضلت مستنيه بره انا وبابايا لحد الساعه ما بقت عشره ...وبعدين دخلت العماره اللى فيها الشركه ...لقيت يافطه الشركه

ركزوا معايا بقى ف الحته دى ......اليافطه عباره عن ورقه فلوسكاب ملزوقه على سلم العماره (بشىكارتون) (اصل السلوتيب غالى )..ومكتوب عليها بقلم رصاص_ مبرى قبل كده عشر مرات _ عباره (الشركه من هنا) وسهم يمين

قولت (خير خير )وطمنت نفسى ان دا عادى وممكن تكون الشركه لسه فى بدايتها ومالحقوش يعملوا يافطه ...وقولت لنفسى انا كمان هطمن اكتر لما اقابل ال maneger ان شاء الله .......خبطت عالباب فتحتلى واحده

هى : عايزه مين ؟

انا :انتو مش كنتوا عاملين اعلان ف الوسيط ؟

هى :ايوه ايوه ...اتفضلى اتفضلى ...(دا احنا زارنا النبى ) ههههه ..... يا محمد واحده جايه عشان الاعلان

بينى وبينكوا اول ما دخلت الشركه دى قلبى انقبض.. وحمدت ربنا ان بابا مستنينى بره حد عارف يمكن ياخدوا كليتى ولا حاجه هههههه

ووصل الاستاذ محمد ولقيته (شاب لامؤاخذه كده ) من اخواننا الروشين ونظام (حط ف شعرك جل ...القمل فيه هيهل )

هو اللى جاى يعمل معايا ال interview ...وكان قاعد على جهاز كمبيوترغريب كده ...

بسبينى وبينكواانا فرحت والله فرحت ...اصلى اكتشفت ان الفراعنه هم اول ناس اخترعوا الكمبيوتر وادوا لمحمد ده نسخه هديه

قولتله :انا لما اتكلمت ف التليفون ردت عليا واحده وقالتلى انى هقابل ال maneger ...

بصللى باستغراب كده وقاللى : ما انا ال maneger

انا ف عقل بالى :خير خير بدايه مشرقه بالتفاؤل

وقام مطلع ورقه لحمه كده فيها بيانات .. وقاللى امليها .........قولتله :منا معايا ال CV فيه نفس البيانات

قاللى : ماشى بس املى دى برضه عشان نتطمن .......(على اساس انى هسرقهم مثلا)

وبدأ الكلام

هو: احنا شركه تصدير واستيراد

انا: تصدير واستيراد ايه بالظبط؟ (ليكونوا بيصدروا مخدرات ولا حاجه والبسها انا)ههههههه

هو:بنصدر ونستورد كل حاجه واى حاجه

انا: ايوه يعنى زى ايه؟

هو:امشاط_ شرابات_ فلايات_ ولاعات...وكل الحاجات .....(مين يقول هات)

انا :وانا بقى هشتغل ايه بالظبط ....ولاعه؟

هو :هنديكى شنطه و........ اول ما قال (هنديكى شنطه) عرفت اللى فيها انى هلف ف الشوارع ابيع اللى ف الشنطه واقول كلمه كريم عبد العزيز الشهيره (نحن نختلف عن الاخرون .... خالص )

هو :امال انتى جايه تشتغلى ايه؟

انا:انا كنت فاكره انكوا عايزين سكرتيره او واحده للعلاقات العامه... لان اللى ردت عليا ف التليفون اشترطت اللغه الانجليزيه

هو :طيب مانتى ممكن تقابلى واحد اجنبى تبيعيله ...(ياسلام)

هو :هتبدأى الشغل من بكره .....(دا عند امه يا ادهم)

انا: ان شاء الله ....(لما مصر تاخد كاس العالم بأذن الله)

هو : ايه مش موافقه ولا ايه ؟

انا :لا لا من بكره الصبح هكون عندكوا....... (ادى دقنى لو شوفتوا خلقتى تانى )

وجيت اخد ال cv بتاعى ....قاللى :هتخدى ال سى فى ليه

قولتله :لا مانتوا معاكوا ورقه اللحمه كفايه ههههههههه

وخرجت من الشركه وانا عندى كريزه ضحك فظيعه ....بابا قاللى :ها قبلوكى

رديت عليه بكلمه واحده وهى (نحن نختلف عن الاخرون .....خالص)

وبعد شهور من الشحططه ...ربنا كرمنى الحمد لله بالعمل فى شركه محترمه جدا ..ومش عايزه قر هه...انا مش ناقصه اه...ولو حد بصلى ف الشغلانه وقر عليا ...هنتقم منه وابعته يشتغل فى شركه الفلايات ...ايوه بالظبط كده ..شركه ال (تييييييت ) ههههههههههههه

بس بجد والله ربنا يصبر شباب وبنات مصر اللى مش لاقيين شغل لانى اكتشفت فعلا

(انهم يختلفوا عن الاخرون ........خالص )ههههههههه

أسفه على الازعاج.............فلم اجد للقضيه علاج

حسبنا الله ونعم الوكيل....................

اعتذر عن تأخيرى ....واعتذر ان تكون هذه العباره هى افتتاح لموضوعى هذا.....ولكنى ارجوا المعذره

فانا كغيرى من العرب _مسلمين ومسيحيين على حد سواء_وما مررنا به خلال الايام الماضيه..من حاله من الاكتئاب والشعور بالضعف والخوف.......وذلك لما حدث فى غزه..........وما اطلق عليه _انا_مجزره 2009

نعم....انها مجزره....ولا انكر حاله الذعر والخوف التى اصبت بها......فبينما عينى تشاهد نشرات الاخبار وهى تدفق الدمعه تلو الاخرى فى حاله مزريه من الاندهاش لما تراه ......

تصارعت فى ذهنى الكثير من الاسئله .....ابحث لها عن اجابه

-هل سيأتنى صاروخ يدمر بيتى يوما ما ولن اجد مأوى احتمى به من غدر اولاد الخنازير؟

-هل سيأتى يوم لا استطيع فيه الخروج من بيتى للبحث عن لقمه العيش؟

-هل سياتى اليوم الذى سأقتل فيه بلا شفقه ولا ذنب اذنبته......والقى جثه هامده على الطريق؟

-هل سيأتى اليوم الذى ساجد فيه اهلى ما بين موتى وجرحى؟

وبعد لحظات وجدت ان الاجابه على هذه الاسئله هى نعم

فبالله عليكم كيف لى ألا اصاب بالذعر وخيبه الامل.............لقد حاولت الكتابه..فرفضت اناملى كتابه حرف واحد

حاولت ايجاد حل لهذه القضيه...فرفض عقلى التفكير فى اى شىء

وبينما انا اتصفح المدونات .. وتعجز يدى حتى عن التعليق

وجدت ابيات من الشعر...كانت تعبر بطريقه او بأخرى عما بداخلى من مشاعر مختلطه

فها هى ابيات الشعر ........اما انا (فأسفه عالازعاج......لم اجد للقضيه علاج)

يا تلاميذ غزه علمونا ......بعض ما عندكم فقد نسينا

علمونا بأن نكون رجالا..........فلدينا الرجال صاروا عجينا

علمونا كيف الحجاره تغدو..........بين أيدى الاطفال ماسا ثمينا

كيف تغدوا دراجه الطفل لغما..........وشريط الحرير يغدو كمينا

وكيف مصاصه الحليب..........اذا ما اعتقلوها تحولت سكينا

يا تلاميذ غزه..........لا تبالوا بأذاعاتنا ولا تسمعونا

اضربوا اضربوا بكل قواكم.........واحزموا امركم ولا تسألونا

نحن اهل الحساب والجمع والطرح............فخوضوا حروبكم ولا تسألونا

اننا الهاربون من خدمه الجيش................فهاتوا حبالكم واشنقونا

نحن موتى لا يملكون ضريحا...................ويتامى لا يملكون عيونا

قد لزمنا جحورنا .................وطلبنا منكم ان تقاتلوا التنينا

قد صغرنا امامكم الف قرن ...........وكبرتم خلال شهر قرونا

يا تلاميذ غزه ...............لا تعودوا لكتاباتنا ولا تقرأونا

نحن اباؤكم ......................فلا تشبهونا

نحن اصنامكم.....................فلا تعبدونا

نتعاطى القات السياسى والقمع.................وتبنى مقابرا وسجونا

حررونا من عقده الخوف فينا....................واطردوا من رؤوسنا الافيونا

علمونا فن التشبث بالارض...................ولا تتركوا حزينا

يا ابناءنا الصغار سلاما .......................جعل الله يومكم ياسمينا

من شقوق الارض طلعتم.......................وزرعتم جراحنا نسرينا

هذه ثوره الدفاتر والحبر ..................فكونوا على الشفاه لحونا

امطرونا بطوله وشموخا....................واغسلونا من قبحنا اغسلونا

ان هذا العصر اليهودى وهم...................سوف ينهار لو ملكنا اليقينا

يامجانين غزه .....................الف اهلا بالمجانين ان هم حررونا

ان عصر العقل السياسى ولى من زمان.................فعلمونا الجنونا

سها الرحال

مدونه الشاطىء

the story of the picture............يللا بخاطرها امك

قلعتهم الجزم يا اخويا ........لا أذكى اخواتك والله

ازيكوا يا بشر ........

ههههههههه شايفين الصوره ........يا ريت بقى حد فيكوا_ شاطر كده_ يفسرهالى

ولا اقولكوا تعالوا نفسرها مع بعض

الاحتمال الاول :ممكن مثلا يكون بوش دا متواضع مع الناس _واحنا اللى ولاد لذين وبنفترى عليه_وكان عايز يخللى البساط احمدى بينه وبين البشر اللى مجتمع بيهم دول ..وقالهم عالباب (جزم ايه يا جماعه بس ...بلا جزم بلا بتاع

ادخلوا كده بالشراب... وبرجلكوا اليمين عشان النحس )

بس انا معتقدش ان بوش قال كده لانه لابس جزمه والا كان قلعها هو كمان (على راسه ريشه يعنى ولا ايه)

الاحتمال التانى :ان بعد تعمق بوش ف العراق.. واحتلاله لها واعتبارها ..(البيت بيتك) بتاع اهله

انه مثلا تكون عجبته ( القعده العربى ).....وحب يطبق النظام دا ف امريكا ..فقلع الناس الجزم

بس الاحتمال دا برضه ضعيف ..لان ف القعده العربى لازم يكون قاعد عالارض ومربع .....

وهو ف الصوره حاطط رجل على رجل ..........(شكل الريشه اللى على راسه دى بتاعه بطه.....من النوع اللى بيلزق ف الدماغ ومبيطلعش ده)

الاحتمال التالت :او ممكن تكون (الحاجه ام بوش )........قبل ما ينزل حيليتها يروح المؤتمر ده قعدت تدردش معاه كده شويه ......تعالوا نشوف قالتلوا ايه

الحاجه ام بوش :(اسمع يا بوش يابنى ....هقولك كلمتين تحطهم حلقه ف ودنك....انت صحيح اغبى عيالى

وانا بنفسى قولت للناس كده .....بس هروح فين من قدرى لسود...مهما كان برضه انت ابنى ...وواجب عليا انصحك

حيليتها بوش:ايه يا مامتشى ...whats up

الحاجه ام بوش : بص يابنى اى اجتماع او مؤتمر تروحه بعد كده ....لازم تقول للحرس يقلعوا الناس الجزم

_اه امال ايه_لحسن واحد فيهم يتهف ف عقله ..ويحاول يعمل زى الولد العراقى الوحش ده ....اللى حاول يضرب (المالكى) بالجزمه...وكانت هتييجى فيك يا ضنايا

حيليتها بوش: اه يا مامتشى ..صحيح دا انا كنت خايف موت ...بس thank god

انا عشان بروح الجيم ورياضى مخلتهاش تيجى ف وشى

الحاجه ام بوش : سلامه وشك يا عين امك ..ان شالله هو وكل العرب ............. (يللا معلش بخاطرها امك)

حيليتها بوش : ok mam

انا رايح دلوقتى دار المسنين ....وهعمل بنصيحتك واقلعهم الجزم.....ولو حكمت هقلعهم طقم السنان كمان

good bye mam

الحاجه ام بوش :goodbye sweety

_وف سرها_(go to hell)

ههههههههههههه

وهذا يا ساده هو الاحتمال الامثل......وهذا تخيلى ل قصه هذه الصوره

مكافئه نهايه الخدمه .......لبوش ..........الضرب بالجزمه

وطى وطى ...ما احنا ياما وطينا

ازيكوا يا جماعه.......... اتمنى تكونوا بخير ...... (اكيد طبعا بخير )هههههههه

اكيد عرفتوا موضوع البوست من العنوان والصوره .....وهو حديث الساعه من امبارح باليل

.وهو الحدث اللى اسعدنى انا شخصيا ......... (بقيت هلمس السقف من كتر السعاده والله)

ودا لما شفت ف التلفزيون وتحت عنوان (خبر عاجل) صحفى عراقى يدعى (منتظر الزيدى) .......والذى سميته انا بعد الواقعه (البطل منتظر)

هذا الصحفى الذى استحضر كل غل العرب من هذا المدعو بوش ..........وقام بأخذ الثأر لنا جميعا_ نحن العرب _

من هذا البوش

فقام الصحفى فى غفله من بوش والمالكى.............ورمى بوش بحذائه

ههههههههههه....بصراحه يا جماعه انا حسيت براحه نفسيه غامره بعد ماشفت بوش بيتحدف بالجزم ...........واظن انتو كمان حسيتوا بنفس الراحه النفسيه

وبرغم ان بوش مامتش او حصلت ليه اى اصابه ..........بس فرحت انه.. اتهان ..وان فيه ولو واحد من العرب عرف بوش مقامه وحسيت ان ده اللى كان لازم يحصل من ساعه ما تولى بوش رئاسه امريكا ..........وبدء تحكمه ف البلاد العربيه وحكامها وشعبها ك (قطع الشطرنج)

ولكن قلت فرحتى لما لقيت هجوم عنيف جدا من رجال الامن العراقيين على الصحفى (البطل منتظر )....واللى المفروض يكونوا ف صفه

سبحان الله

ويبقى السؤال

ما مصير الصحفى (منتظر الزيدى )؟

هل سيكون سجن ابو غريب مكانه ؟

ام ان من سيحاكمه سيكون لديه شىء من الاحساس ...........ويحكم له بالبطوله وليس التعذيب والاعدام ؟

انى اطالب......... انا وغيرى_ كثيرين_ من الشعب المصرى والعربى ......بالافراج عن هذا الشاب الصحفى البطل (منتظر الزيدى )

واريد ان اوجه (رساله) لمن سيحاكمه .....وهى رساله تخيليه .........لعلها تفيد هذا الصحفى فى موقفه البطولى

تخيلوا معى هذه القصه............

جاءك فجأه غريب من بلاد غريبه ............وجاء بكثير من الرجال الاقوياء والقنابل والزخيره (اى جاء للحرب )

واقتحم عليك دارك وقال لك (انا عارف ان انت عايز تقتلنى .........ومخبى سلاح ف بيتك عشان تقتلنى بيه وانا عشان كده

-هاخد ارضك

-هغتصب مراتك وامك واختك

-هموت عيالك

-هشرد اهلك

-هولع ف بيتك

-هنهب اموالك

-واخيرا هعدمك فى يوم عيدكم (الاضحى).........كما تدبحون البهائم

وبعد كل هذا ......وبعد مرور السنين من الذل والهوان جاء هذا الغريب يقول لاحفادك......(جدكم ماكنش عنده سلاح ولاحاجه .....

انا بس جاتلى معلومات غلط i am sorry )

والله دا واحد الجزمه شويه قوى عليه .....

مبروك يا بوش على جايزه نهايه الخدمه...................

اه نسيت ...........ومبروك ع الجزمه

تخيلوا يا ساده............ف مصر.......تاج سعاده

يا هلا يا هلا

والله يا جماعه مش قادره اقولكوا وحشتونى قد ايه...........انا عارفه ان فيه ناس منكم عايزين يضربونى بالطماطم

وشايفه ناس تانيه بيفكوا رباط الجزمه (عشان يحيونى طبعا).....انا عارفه ان بقالى كتير مابزورش حد فيكوا

ولا بنزل بوستات جديده..بس ما تسقوش فيها قوى كده ....دا انا بنت مصريه ايه ....كلكوا عليا ولا ايه

ههههههههههه

معلش يا جماعه بجد اصلى مشغوله جدا .....باخد كورسات عشان احسن مستوايا العقلى ........ وكده يعنى

اصل لقيت شهاده (محو الاميه) اللى اخدتها مش كفايا عشان اشتغل ......فقولت لنفسى لا يا بت انتى لازم تاخدى شهادات تانيه اعلى من محو الاميه ...........اه امال ايه

بتضحك على ايه انت وهو ...اوعوا تكونوا فاكرين ان الشهاده اللى مع كل واحد فيكوا دى اسمها (شهاده جامعيه )

_لا يا بابا لا_دا تمويه يابا هههههههه....... فوقوا يا اخواننا احنا ف مصر وما دام ف مصر تبقى اسمها شهاده

(محو الاميه)

وفى هذه الايام ومع تهور المدرسين ...وجنانهم اللى بيطلع عالعيال ...ممكن تضيف ل محو الاميه ..محو عين.. محو رجل

بص سيب اعضاءك ف البيت قبل ما تروح المدرسه

المهم بقى .........وانا قاعده كده ويا دوبك خلصت مذاكره وبشوف التعليقات اللى عندى ....لقيت اخى العزيز

(ابن مصر ) معلقلى ......وخابطنى تاج ف وشى انما ايه معتبر .......وقال ايه اسمه (تاج السعاده )

والله المدونين دول عليهم دماغ _قال سعاده قال_بأمارة ايه يعنى

المهم قررت انى اتحفكوا واصدعكوا واجاوب عالتاج ...........(ايه فيه ايه )

انتو مش بتسألوا عليا وعايزينى اكتب بوست جديد ................. استحملو بقى

يللا استعاننل عالشقا بالله ......

ملحوظه

المصدع يسد ودانه ويغمى عينيه ويكتم بقه ........اقولك حاجه اقفل الكمبيوتر وروح نام ......تاج ايه يا عم وبتاع ايه

نبتدى التاج ؟ ماشى نبتدى التاج..................

ماهى السعاده من وجهه نظرك ؟

والله يا جماعه كلمه السعاده بتختلف باختلاف الناس ........يعنى مثلا فيه واحد سعادته انه يلغى اختراع الزواج ده

بانه يفضل يغللى.. ويغللى .. ويغللى ف سعر الحديد وبكده الشقق هتغلى ومحدش هيتجوز (احمد عز)

وفيه واحد سعادته انه يدخل دقيق مضروب وغير صالح للاستهلاك الادمى عشان يتعمل بيه ..حاجه كده لو تفتكروها

اسمها (رغيف العيش) ههههههه ..................(وزير التموين)

وفيه واحد سعادته انه يشوف......ضباط الشرطه بيضربوا ويهينوا الناس ف الاقسام ....وعادى (وزير الداخليه )

وفيه واحد سعادته انه يقسم مع الموظفين المرتشين اللى تحت ايده.........فيفتى فيفتى يعنى ........(مدير بلا ضمير )

وفيه واحد شايف كل دا وساكت ...........(اتلم ياد انت وهو ماقصدش اللى ف دماغكوا .........ما تودوناش ف داهيه)

اما السعاده من وجهه نظرى ............انى اشوف كل البلاوى دى ..........وارضى بالامر الواقع

كيف تصل الى السعاده ؟

اصل الى السعاده بالرضا زى ماقولت ف السؤال الاول .........بمعنى .........

انى مثلا اجيب الرغيف ب جنيه ونص واستعجب وانا بقول ...(ايه دا بجنيه ونص بس..........دا رخص قوى كده ليه)

ولما اروح البيت واجى اكله ....واول ما افتح الرغيف الاقى حشرات ..(اشباه النمل )

اقوم قايله وانا السعاده هتنط من عينى ........(وكمان حاطين فيه حبه البركه.....يا سلام)

هل السعاده وهم ام انها حلم صعب ؟

السعاده مش وهم ........ممكن نقول حلم صعب ......والاصعب تحقيقه

ماهى اكثر اللحظات التى شعرت فيها بالسعاده ؟

بصراحه ومن غير تريقه ..........وانا باكل تورته الكريمه اللى بتعملها مامتى ...(ربنا يخليكى يا امه)

ولما بشوف مسؤول كبير جاى ف لقاء ف التليفزيون ومش عارف يتكلم ............(اللهم لا شماته.... بس انا شمتانه..ههههههه)

هل السعاده طريق للنجاح .. وضح ؟

اه طبعا السعاده طريق للنجاح...........تخيلو واحد مع كل البلاوى اللى ف البلد دى بيضحك وهو بيشتغل

اكيد هيعمل شغله بنفس مفتوحه.......صحيح بقيت زمايله هيفتكروه (متخلف عقليا )...بس مش مهم المهم انه ناجح

هل ممكن ان تحقق كل شىء ؟

اذا حققت كل شىء ....نقول مثلا......... وصلت لاعلى درجه علميه......تزوجت من ملياردير........

وجبت خمس عيال ف عين العدو ..........دا غير المرسيدس والهيونداى اللى ماركونين ف جراج الفيلا

اذا حققت كل دا

مش هيبقالى هدف ف الحياه بعد كده ........وبما ان هذه الاحلام تعتبر من المستحيلات فى مصرنا الحبيبه

اقدر اقول اننا الشعب الوحيد اللى عنده هدف ف الحياه

السعاده تجعلك تقبل الحياه ام لا ؟

هههههههههههه..............لما تنزل العتبه او وسط البلد ....... هتلاقى فجأه كده ناس ماشيه لوحدها كده وبتضحك

الناس دى يا اما وصلوا لمرحله الهبل ..............يا اما رضاهم باللى بيحصل ف البلد وصل لمرحله الزهد ف الحياه

لماذا تمر اوقات السعاده بسرعه ؟

عشان احنا فقر

هل ترى السعاده ف التدوين ؟

ارى السعاده عندما اعبرعن رأيى بصراحه .........وهذا ما توفره لى المدونه

بس عالله يقفلوها........... والا والله وما اعبد مانا ساكته وهتركب ف دماغى و..........(هعمل مدونه تانيه اهىء اهىء اهىء )

هل انت متفاءل وعندك امل ؟

والله ربنا بيقول (انا عند ظن عبدى بى )

وفيه مقوله كانوا بيقولوها بتقول (بكره اكيد احلى م انهارده )

بس مدرسين العربى كانوا بيقولوا ان (بكره)......لامحل له من الاعراب

اذا شعرت بالحزن ماذا تفعل ؟

بعيط شويه ...وبعدين ببقى فرش فرش فرش

هل يستمر الحزن معك فتره ام ينقضى ف الحال ؟

هو انا بوبى ولا ايه ..........اكيد بيستمر شويه ....بس مش كتير ....لان لو كتير مش هيبقى حزن هيبقى اكتئاب

ما رأيك بالأفراد المتشائمين ؟

مش فاهمين مصر صح .........افهمها صح تكسب جايزيتها ................شقه من عمو عز

ودقوا المزاهر

لولولولولىىىىىىىى