the story of the picture............يللا بخاطرها امك

قلعتهم الجزم يا اخويا ........لا أذكى اخواتك والله

ازيكوا يا بشر ........

ههههههههه شايفين الصوره ........يا ريت بقى حد فيكوا_ شاطر كده_ يفسرهالى

ولا اقولكوا تعالوا نفسرها مع بعض

الاحتمال الاول :ممكن مثلا يكون بوش دا متواضع مع الناس _واحنا اللى ولاد لذين وبنفترى عليه_وكان عايز يخللى البساط احمدى بينه وبين البشر اللى مجتمع بيهم دول ..وقالهم عالباب (جزم ايه يا جماعه بس ...بلا جزم بلا بتاع

ادخلوا كده بالشراب... وبرجلكوا اليمين عشان النحس )

بس انا معتقدش ان بوش قال كده لانه لابس جزمه والا كان قلعها هو كمان (على راسه ريشه يعنى ولا ايه)

الاحتمال التانى :ان بعد تعمق بوش ف العراق.. واحتلاله لها واعتبارها ..(البيت بيتك) بتاع اهله

انه مثلا تكون عجبته ( القعده العربى ).....وحب يطبق النظام دا ف امريكا ..فقلع الناس الجزم

بس الاحتمال دا برضه ضعيف ..لان ف القعده العربى لازم يكون قاعد عالارض ومربع .....

وهو ف الصوره حاطط رجل على رجل ..........(شكل الريشه اللى على راسه دى بتاعه بطه.....من النوع اللى بيلزق ف الدماغ ومبيطلعش ده)

الاحتمال التالت :او ممكن تكون (الحاجه ام بوش )........قبل ما ينزل حيليتها يروح المؤتمر ده قعدت تدردش معاه كده شويه ......تعالوا نشوف قالتلوا ايه

الحاجه ام بوش :(اسمع يا بوش يابنى ....هقولك كلمتين تحطهم حلقه ف ودنك....انت صحيح اغبى عيالى

وانا بنفسى قولت للناس كده .....بس هروح فين من قدرى لسود...مهما كان برضه انت ابنى ...وواجب عليا انصحك

حيليتها بوش:ايه يا مامتشى ...whats up

الحاجه ام بوش : بص يابنى اى اجتماع او مؤتمر تروحه بعد كده ....لازم تقول للحرس يقلعوا الناس الجزم

_اه امال ايه_لحسن واحد فيهم يتهف ف عقله ..ويحاول يعمل زى الولد العراقى الوحش ده ....اللى حاول يضرب (المالكى) بالجزمه...وكانت هتييجى فيك يا ضنايا

حيليتها بوش: اه يا مامتشى ..صحيح دا انا كنت خايف موت ...بس thank god

انا عشان بروح الجيم ورياضى مخلتهاش تيجى ف وشى

الحاجه ام بوش : سلامه وشك يا عين امك ..ان شالله هو وكل العرب ............. (يللا معلش بخاطرها امك)

حيليتها بوش : ok mam

انا رايح دلوقتى دار المسنين ....وهعمل بنصيحتك واقلعهم الجزم.....ولو حكمت هقلعهم طقم السنان كمان

good bye mam

الحاجه ام بوش :goodbye sweety

_وف سرها_(go to hell)

ههههههههههههه

وهذا يا ساده هو الاحتمال الامثل......وهذا تخيلى ل قصه هذه الصوره

مكافئه نهايه الخدمه .......لبوش ..........الضرب بالجزمه

وطى وطى ...ما احنا ياما وطينا

ازيكوا يا جماعه.......... اتمنى تكونوا بخير ...... (اكيد طبعا بخير )هههههههه

اكيد عرفتوا موضوع البوست من العنوان والصوره .....وهو حديث الساعه من امبارح باليل

.وهو الحدث اللى اسعدنى انا شخصيا ......... (بقيت هلمس السقف من كتر السعاده والله)

ودا لما شفت ف التلفزيون وتحت عنوان (خبر عاجل) صحفى عراقى يدعى (منتظر الزيدى) .......والذى سميته انا بعد الواقعه (البطل منتظر)

هذا الصحفى الذى استحضر كل غل العرب من هذا المدعو بوش ..........وقام بأخذ الثأر لنا جميعا_ نحن العرب _

من هذا البوش

فقام الصحفى فى غفله من بوش والمالكى.............ورمى بوش بحذائه

ههههههههههه....بصراحه يا جماعه انا حسيت براحه نفسيه غامره بعد ماشفت بوش بيتحدف بالجزم ...........واظن انتو كمان حسيتوا بنفس الراحه النفسيه

وبرغم ان بوش مامتش او حصلت ليه اى اصابه ..........بس فرحت انه.. اتهان ..وان فيه ولو واحد من العرب عرف بوش مقامه وحسيت ان ده اللى كان لازم يحصل من ساعه ما تولى بوش رئاسه امريكا ..........وبدء تحكمه ف البلاد العربيه وحكامها وشعبها ك (قطع الشطرنج)

ولكن قلت فرحتى لما لقيت هجوم عنيف جدا من رجال الامن العراقيين على الصحفى (البطل منتظر )....واللى المفروض يكونوا ف صفه

سبحان الله

ويبقى السؤال

ما مصير الصحفى (منتظر الزيدى )؟

هل سيكون سجن ابو غريب مكانه ؟

ام ان من سيحاكمه سيكون لديه شىء من الاحساس ...........ويحكم له بالبطوله وليس التعذيب والاعدام ؟

انى اطالب......... انا وغيرى_ كثيرين_ من الشعب المصرى والعربى ......بالافراج عن هذا الشاب الصحفى البطل (منتظر الزيدى )

واريد ان اوجه (رساله) لمن سيحاكمه .....وهى رساله تخيليه .........لعلها تفيد هذا الصحفى فى موقفه البطولى

تخيلوا معى هذه القصه............

جاءك فجأه غريب من بلاد غريبه ............وجاء بكثير من الرجال الاقوياء والقنابل والزخيره (اى جاء للحرب )

واقتحم عليك دارك وقال لك (انا عارف ان انت عايز تقتلنى .........ومخبى سلاح ف بيتك عشان تقتلنى بيه وانا عشان كده

-هاخد ارضك

-هغتصب مراتك وامك واختك

-هموت عيالك

-هشرد اهلك

-هولع ف بيتك

-هنهب اموالك

-واخيرا هعدمك فى يوم عيدكم (الاضحى).........كما تدبحون البهائم

وبعد كل هذا ......وبعد مرور السنين من الذل والهوان جاء هذا الغريب يقول لاحفادك......(جدكم ماكنش عنده سلاح ولاحاجه .....

انا بس جاتلى معلومات غلط i am sorry )

والله دا واحد الجزمه شويه قوى عليه .....

مبروك يا بوش على جايزه نهايه الخدمه...................

اه نسيت ...........ومبروك ع الجزمه

تخيلوا يا ساده............ف مصر.......تاج سعاده

يا هلا يا هلا

والله يا جماعه مش قادره اقولكوا وحشتونى قد ايه...........انا عارفه ان فيه ناس منكم عايزين يضربونى بالطماطم

وشايفه ناس تانيه بيفكوا رباط الجزمه (عشان يحيونى طبعا).....انا عارفه ان بقالى كتير مابزورش حد فيكوا

ولا بنزل بوستات جديده..بس ما تسقوش فيها قوى كده ....دا انا بنت مصريه ايه ....كلكوا عليا ولا ايه

ههههههههههه

معلش يا جماعه بجد اصلى مشغوله جدا .....باخد كورسات عشان احسن مستوايا العقلى ........ وكده يعنى

اصل لقيت شهاده (محو الاميه) اللى اخدتها مش كفايا عشان اشتغل ......فقولت لنفسى لا يا بت انتى لازم تاخدى شهادات تانيه اعلى من محو الاميه ...........اه امال ايه

بتضحك على ايه انت وهو ...اوعوا تكونوا فاكرين ان الشهاده اللى مع كل واحد فيكوا دى اسمها (شهاده جامعيه )

_لا يا بابا لا_دا تمويه يابا هههههههه....... فوقوا يا اخواننا احنا ف مصر وما دام ف مصر تبقى اسمها شهاده

(محو الاميه)

وفى هذه الايام ومع تهور المدرسين ...وجنانهم اللى بيطلع عالعيال ...ممكن تضيف ل محو الاميه ..محو عين.. محو رجل

بص سيب اعضاءك ف البيت قبل ما تروح المدرسه

المهم بقى .........وانا قاعده كده ويا دوبك خلصت مذاكره وبشوف التعليقات اللى عندى ....لقيت اخى العزيز

(ابن مصر ) معلقلى ......وخابطنى تاج ف وشى انما ايه معتبر .......وقال ايه اسمه (تاج السعاده )

والله المدونين دول عليهم دماغ _قال سعاده قال_بأمارة ايه يعنى

المهم قررت انى اتحفكوا واصدعكوا واجاوب عالتاج ...........(ايه فيه ايه )

انتو مش بتسألوا عليا وعايزينى اكتب بوست جديد ................. استحملو بقى

يللا استعاننل عالشقا بالله ......

ملحوظه

المصدع يسد ودانه ويغمى عينيه ويكتم بقه ........اقولك حاجه اقفل الكمبيوتر وروح نام ......تاج ايه يا عم وبتاع ايه

نبتدى التاج ؟ ماشى نبتدى التاج..................

ماهى السعاده من وجهه نظرك ؟

والله يا جماعه كلمه السعاده بتختلف باختلاف الناس ........يعنى مثلا فيه واحد سعادته انه يلغى اختراع الزواج ده

بانه يفضل يغللى.. ويغللى .. ويغللى ف سعر الحديد وبكده الشقق هتغلى ومحدش هيتجوز (احمد عز)

وفيه واحد سعادته انه يدخل دقيق مضروب وغير صالح للاستهلاك الادمى عشان يتعمل بيه ..حاجه كده لو تفتكروها

اسمها (رغيف العيش) ههههههه ..................(وزير التموين)

وفيه واحد سعادته انه يشوف......ضباط الشرطه بيضربوا ويهينوا الناس ف الاقسام ....وعادى (وزير الداخليه )

وفيه واحد سعادته انه يقسم مع الموظفين المرتشين اللى تحت ايده.........فيفتى فيفتى يعنى ........(مدير بلا ضمير )

وفيه واحد شايف كل دا وساكت ...........(اتلم ياد انت وهو ماقصدش اللى ف دماغكوا .........ما تودوناش ف داهيه)

اما السعاده من وجهه نظرى ............انى اشوف كل البلاوى دى ..........وارضى بالامر الواقع

كيف تصل الى السعاده ؟

اصل الى السعاده بالرضا زى ماقولت ف السؤال الاول .........بمعنى .........

انى مثلا اجيب الرغيف ب جنيه ونص واستعجب وانا بقول ...(ايه دا بجنيه ونص بس..........دا رخص قوى كده ليه)

ولما اروح البيت واجى اكله ....واول ما افتح الرغيف الاقى حشرات ..(اشباه النمل )

اقوم قايله وانا السعاده هتنط من عينى ........(وكمان حاطين فيه حبه البركه.....يا سلام)

هل السعاده وهم ام انها حلم صعب ؟

السعاده مش وهم ........ممكن نقول حلم صعب ......والاصعب تحقيقه

ماهى اكثر اللحظات التى شعرت فيها بالسعاده ؟

بصراحه ومن غير تريقه ..........وانا باكل تورته الكريمه اللى بتعملها مامتى ...(ربنا يخليكى يا امه)

ولما بشوف مسؤول كبير جاى ف لقاء ف التليفزيون ومش عارف يتكلم ............(اللهم لا شماته.... بس انا شمتانه..ههههههه)

هل السعاده طريق للنجاح .. وضح ؟

اه طبعا السعاده طريق للنجاح...........تخيلو واحد مع كل البلاوى اللى ف البلد دى بيضحك وهو بيشتغل

اكيد هيعمل شغله بنفس مفتوحه.......صحيح بقيت زمايله هيفتكروه (متخلف عقليا )...بس مش مهم المهم انه ناجح

هل ممكن ان تحقق كل شىء ؟

اذا حققت كل شىء ....نقول مثلا......... وصلت لاعلى درجه علميه......تزوجت من ملياردير........

وجبت خمس عيال ف عين العدو ..........دا غير المرسيدس والهيونداى اللى ماركونين ف جراج الفيلا

اذا حققت كل دا

مش هيبقالى هدف ف الحياه بعد كده ........وبما ان هذه الاحلام تعتبر من المستحيلات فى مصرنا الحبيبه

اقدر اقول اننا الشعب الوحيد اللى عنده هدف ف الحياه

السعاده تجعلك تقبل الحياه ام لا ؟

هههههههههههه..............لما تنزل العتبه او وسط البلد ....... هتلاقى فجأه كده ناس ماشيه لوحدها كده وبتضحك

الناس دى يا اما وصلوا لمرحله الهبل ..............يا اما رضاهم باللى بيحصل ف البلد وصل لمرحله الزهد ف الحياه

لماذا تمر اوقات السعاده بسرعه ؟

عشان احنا فقر

هل ترى السعاده ف التدوين ؟

ارى السعاده عندما اعبرعن رأيى بصراحه .........وهذا ما توفره لى المدونه

بس عالله يقفلوها........... والا والله وما اعبد مانا ساكته وهتركب ف دماغى و..........(هعمل مدونه تانيه اهىء اهىء اهىء )

هل انت متفاءل وعندك امل ؟

والله ربنا بيقول (انا عند ظن عبدى بى )

وفيه مقوله كانوا بيقولوها بتقول (بكره اكيد احلى م انهارده )

بس مدرسين العربى كانوا بيقولوا ان (بكره)......لامحل له من الاعراب

اذا شعرت بالحزن ماذا تفعل ؟

بعيط شويه ...وبعدين ببقى فرش فرش فرش

هل يستمر الحزن معك فتره ام ينقضى ف الحال ؟

هو انا بوبى ولا ايه ..........اكيد بيستمر شويه ....بس مش كتير ....لان لو كتير مش هيبقى حزن هيبقى اكتئاب

ما رأيك بالأفراد المتشائمين ؟

مش فاهمين مصر صح .........افهمها صح تكسب جايزيتها ................شقه من عمو عز

ودقوا المزاهر

لولولولولىىىىىىىى

احذر..معلمك فى يده فتيلا........كاد التلميذ ان يكون قتيلا

طبعا يا جماعه انتو عارفين المصيبه اللى حصلت امبارح ...........ففى محافظه الاسكندريه ضرب مدرس الرياضيات تلميذه
(اسلام عمرو بدر).......لعدم ادائه الواجب المدرسى .....ضربه حتى الموت

دى رساله _من خيالى _.....كتبها اسلام يوم وفاته

اشرقت شمس يوم جديد
استيقظت من نومى وانا مستبشرا سعيد...............ولا اعرف لماذا كنت سعيد
تناولت فطورى مع ابى وامى واخواتى .....واسرعت لاذهب الى مدرستى
القيت التحيه على امى وابى .........وانا لازلت مبتسما سعيدا

ولكن بسرعه اوقفنى ابى وقال لى :لاتنسى يا بنى ..قف للمعلم وفه التبجيلا .......كاد المعلم ان يكون رسولا
ابتسمت له ابتسامه بها شىء من الخوف.....وظللت افكر وانا فى طريقى الى المدرسه
واسأل نفسى
(ماذا سيفعل معلمى عندما يعلم انى لم اؤدى واجبى ؟؟؟؟؟؟) ....
(هل سيغضب منى ؟؟؟؟؟؟؟؟؟؟) لا اريده ان يغضب منى ...فأنا احبه
(هل سيضربنى؟؟؟؟؟؟؟؟؟؟؟؟) لا لا لا ...لا اعتقد اكيد سيعذرنى ويسامحنى

وصلت الى المدرسه وانا لازلت مبتسما سعيدا ....القيت على زملائى التحيه فانا احبهم واحب المعلمين حبا شديدا
يقولون ها هو اسلام المسالم ..........فلم اكن عمرى عنيدا

لمحت معلمى يأتى من بعيد .....وقد علم انى لم اؤدى واجبى
ولمحت زملائى يسبقونه ويجرون نحوى وهم يقولون:
احذر معلمك فى يده فتيلا...........كدت يا اسلام ان تكون قتيلا

رنت كلماتهم فى اذنى .....انها مثل كلمات ابى .........ولكن ابى قال ان معلمى رسولا

ووجدت معلمى يأتى الى مسرعا ....والشر يخرج من عينيه متسارعا نحوى
وقبل ان انطق بكلمه ضربنى ضربه.... اوقعتنى صريعا

لا تحزنى يا امى ...ولا تحزن يا ابى .........لقد اخطأت ولم اؤدى واجبى ....وادى معلمى واجبه وقتلنى
وسيحكم بيننا خالق الخلق فى يوم عظيم .....نعم انه يوم الدين

تسألنى نفسى بأى ذنب قتلت؟؟؟ ......هل لانى فى دراستى اصرت
وهل هذا ذنب اقتل من اجله يا بشر ..............ام هذه دنياكم ولا مفر

لقد غادرت غابتكم..... وتركتكم ....تقتلون ولا تسألون............تسرقون ولا تحاسبون .........تعذبون ولا ترحمون
لهذا انا مبتسما سعيد

لا تحزن يا ابى .............. لاتحزنى يا امى
ها هو مكانى ف الجنه ...................وها هم الملائكه يستقبلونى بوجوه مستبشره

واسمع صوت خالق الخلق اجمعين...........يقول لى : سأنصرك ولو بعد حين


ان هذا حقا يوم عيد .......والان عرفت لماذا كنت مبتسما سعيد


اسلام عمرو


رحمك الله يا اسلام

يبقى انت اكيد ...اكيد.....والله اكيد ...اكيد ف مصر

ازيكو يا جماعه

يا رب تكونوا بخير ............(يا رب ياختى يا رب )
فيه جروب يا جماعه عالفيس بوك اسمه (رصد غرائب الشارع المصرى )............الجروب دا ناشر مجموعه صور

عن بعض المشاهد الموجوده ف الشارع المصرى .........ولا اعتقد انها موجوده فى اى شارع تانى

واسيبكوا مع بعض الصور ونرجع نتكلم تانى .............ياللا نشوف الصور

القبقاب الذى تريده ربما يكون ملبوسا .......من فضلك حاول ارتداءه فى وقت لاحق

يا خواتشى ايه الجمال دا لايقين على بعض قوى... ربنا يتمملكوا بخير يا رب

كرباج ورا ياسطى .......ههههههه

اختصر وقول بتاع كله

شكلك قارف الناس قوى .......هيبوسوا ايديك تشد السيفون

لا عداك العيب ............اكيد كده مالهمش حجه

يا جماعه المحل كويس مافيهوش حاجه الراجل بس هو اللى زباله

الراجل دا عندنا ف مدينه نصر .........وايه عليه امم

يعنى كده كده ..........هترشق ف الحيطه

مع (ايجيبشن جيبس)......لا تستطيع التفرقه بين يدك ورجلك

فعلا...........الحاجه ام الاختراع

عادى يا جماعه ........الراجل تطوع وهيقوم بدور الكاوتش

سيرى يا نورماندى .........مجراكى ومرساكى

صحيح............من علمنى حرفا صرت امامه قردا

الان ولاول مره ..............عيشكو من فودافونكو

حتى الاسعاف بقى بالنفر ....(عباس العقاد وعااااشررر)

هيه الحكايه ناقصه توهان ..........يا جماعه حد يشوف الفيشه

اكيد سباك .......وسرقه السيفونات دى هوايه يعنى

لا بجد افادك الله ..............نورت المحكمه

اخر صوره............ختامها مسك

والان سؤال يطرح نفسه

هل سنظل امام العالم بهذا المنظر الضاحك الباكى ؟

هل سيأتى يوما نمشى فيه فى شوارع مصر فخورين بما نراه؟

ام سنظل نضحك............ونقول لانفسنا....حقا شر البليه ما يضحك؟

نيكولاس المعجزه.........................مسلم بدون اسلام

كعادتنا كأسره مصريه _زى اى اسره مصريه_نلتف كل يوم حول ما يدعى ( التلفاز)........وذلك حينما ترمز الساعه الى العاشره مساءا

وذلك لنشاهد برنامجنا المفضل (العاشره مساءا).........تقديم الاعلاميه الشهيره (منى الشاذلى)..........

لنعرف ما وصلت اليه بلدنا مصرنا من (حرائق - كوارث - فقر - مرض - جرائم قتل وتحرش - قضايا فساد وظلم (اللى بقت مالهاش كبير)

الى اخر ذلك من من المصائب التى تصيب كل مصرى بالاكتئاب والحسره على ما وصلت اليه بلدنا الحبيبه (مصر)

ونحن نلتف كل يوم حول هذا البرنامج ..املا فى ظهور(معجزه) تغير حالنا الى الاصلح

واثناء مشاهدتنا للبرنامج اعلنت الاستاذه (منى الشاذلى ) انها بعد الفاصل ستستقبل فى الاستوديو شخص من استراليا يدعى

(نيكولاس فيوتشيدج)

تحدثت الى نفسى اثناء الفاصل وانا اقول (هتسيب بقى الكوارث اللى ف البلد وتعمل فقره كامله عن واحد مشهور ف بلده ......

طب احنا مالنا يعنى )

وبعد الفاصل ظهر (نيكولاس) على الشاشه...........وبمجرد ظهوره بدا على وجوهنا جميعا علامات الاستغراب والتعجب والدهشه

والتى قد تكون انعكاس لما يوجد داخلنا من مشاعر مختلطه

والان من هو نيكولاس؟

الاسم: نيكولاس فيوتشيدج

السن:26 سنه

البلد:استراليا

الهوايات: رياضه السباحه - الجولف - الكتابه عالانترنت - عمل علاقات اجتماعيه

الشهادات: حاصل على ثلاث شهادات ف الاقتصاد واداره الاعمال

الاعمال الخيريه:اسس بعض المؤسسات للمعاقين وايضا جمع تبرعات لهم ... منها مؤسسه (حياه بدون اطراف)

الاعاقه: ولد بدون اطراف... (اى ولد بدون ساقين او ذراعين)

ولد هذا الشاب بدون يدين او قدمين .........هل يستطيع اى فرد منكم ان يتخيل حياه هذا الشاب خلال مراحل عمره المختلفه من ضغط نفسى ..

صحيح انه حاول الانتحار ف سن التاسعه ولكن بعد فشله فى هذه المحاوله.........قرر (نيكولاس) التعامل مع الامر الواقع بمساعده ابواه

اللذان رسخا فيه معنى كلمه (الحمد لله).....................ان هذا الشاب ليس مسلما ....ولكنى لاحظت من خلال حديثه ان البسمه لا تفارق شفتاه

ولا تفارقه ايضا عباره (انا مؤمن ان هناك خطه من الله لحياتى لذلك جعلنى بدون اطراف )....

ومقتنع تمام الاقتناع ان هناك حكمه لا يعلمها الا الله فى ذلك

قلت لنفسى وانا استمع الى حديثه الشيق وضحكاته العاليه ونكاته وايمانه الكبير جدا بالله

(هذا هو المعجزه التى كنت انتظرها من البرنامج)

نحن نحمد الله على نعمه الكثيره لنا سواء اطراف او حواس .........ولكن ان اخذ الله هذه النعم منا..........هل معنى ذلك ان نفقد عقلنا

ان (نيكولاس ) دليل حى وواضح على ان عقلنا هو ما يحركنا وليست اطرافنا

اين عقلك ايها الشاب المصرى ........السليم البنيه......الذى لديك نعم ولا تعرف ماذا تفعل بها

ان (نيكولاس) هو المعجزه التى ان رأيتها ستغير مبدأك ومنطقك ف الحياه.............ونستطيع ان نعتمد عليك بعد الله _سبحانه وتعالى _ فى تغيير (مصرنا الحبيبه)

انى اعتبر ( نيكولاس) _مسلم بدون اسلام _ على عكس _الاسلام بدون مسلمين_ وللاسف هذا شائع فى (مصرنا)

http://www.youtube.com/watch?v=JXhjXyKtn3M

هذا الينك هو ريبورتاج سريع عن (نيكولاس) ارجو الدخول عليه ...........لانى مهما كتبت لم ولن استطيع ان اصف هذا الشخص الرائع

احب اختم البوست بالنداء الذى قاله ( نيكولاس ).....والذى جعل عينى تدمع

(الى كل يهودى او مسيحى او مسلم ....مهما كانت مشكلتك كبيره فأن الله اكبر منها )

تريكات ...للبنات ....المقدمات....عالزواجات

عريس يابووى

ازيكو يا بشر ..........(تحذير)

البوست دا يا جماعه (للبنات فقط)......اى لحواء فقط .........محدش من الولاد يقراه .....والا هنتفضح قدام اخونا ( ادم )وهيبوظ كل اللى عملته

تعالى يا بت يا (حوا) انتى وهى هنا ......ايوه اتلمواحواليا كده عشان اقولكوا كلمتين ..........ابعد يا ( ادم ) يا وحش ...دى قاعده (بنتوتيه)

بصوا بقى انا قعدت ايام كتيير جدا افكر ازاى ارجع منظر( حواء )مشرف تانى امام (ادم).....
بعد البوست اللى عملته وشردت فيه (حواء ).وطلعتها ارجل من (ادم) .............وهى ماسكه الشيشه وبتشد وتطلع الدخان من ودانها .........فكرت ف بعض الحيل والخدع اللى ممكن تخدع بيها (حواء)( ادم ) قبل الزواج .............._دا اذا كان فيه زواج اصلا_

لكن بعد الزواج يا جماعه موعدكوش انى اقدر اساعدكو........لان كل واحد سواء (حوا) او (ادم) ..بيتفضح بعد الزواج وبيظهر الوش التانى لكل واحد فيهم

يعنى م الاخر لتنين بيبقوا محتاجين (اعاده نفخ وتليين)................
ودا الحقيقه مش تخصصى .....فيه ميكانيكى على اول الشارع ممكن ترحوله ساعتها


انا دلوقتى بقى يا (حوا ) هقولك على شويه حيل تظهرى بيهم مفيش زيك قدام (ادم )..........وانسى بقى الشيشه وجو المخدرات اللى انتى عايشه فيه دا..... عشان منتفضحش


يا (حواء ).........اذا ربنا كرمك........ وجبر بخاطرك........ وبعد طووول انتظار بعتلك عريس يتقدملك
متفرحيش قوى كده يا حاجه انا لسه بقول (اذا)..........ومعتقدش ان دا هيحصل كمان ..لان شباب مصر مش لاقى ياكل اساسا ف مش معقول هيجيب واحده يأكلها معاه هى كمان
ما علينا
لو ادم حدد معاد وهييجى هو والست الوالده (ضره العروسه)...والسيد الوالد _دا اذا كان لسه عايش وهيشوف ابنه بيخطب _
وخبطوا عالباب

عارفه ان فيه بنات عندها نسبه تخلف شويه.....وهتجرى عالباب وتقول (عريسى جه عريسى جه ) .......وحياه ابوكى يا شيخه الهى تعدميه وهو عالباب بلاش الفضايح دى........... مش عيد هو
كل اللى تعمليه انك تدخلى الاوضه وتقفلى عليكى بابها .......ومفيش مانع تبصى من خرم الباب وتشوفى العريس _اذا مكنتيش شوفتيه قبل كده_ حد عارف يمكن يطلع (قرد) ومتخرجيش م الاوضه خالص

بعد كده تستنى لما مامتك تنادى عليكى ..........ابوس ايدك يا شيخه بلاش فشخه البق دى .......ابتسمى ابتسامه خفيفه وانتى خارجه الصاله .........وتبتدى تسلمى _ماتسلميش عالعريس الاول يا تحفه_ سلمى على ضرتك الاول (اللى هى امه يعنى )
وبعدين باباه...وبعدين تسلمى على عريسك بتراتيف صوابعك .........وانتى باعده وشك الناحيه التانيه.......... وبصه ف الارض (معلش كانك مكسوفه بقى)


لوحصل نصيب وعريسك عزمك عالغدا بره
وحياه الغالى ماتفضحينا وبلاش الحته اللى عالحبل اللى كل ما تزنقى ف خروجه تلبسيها دى
لوعندك صاحبه نضيفه ممكن تستلفى منها ......سورى اصدى تشحتى منها حاجه........ اشحتى ...بس ماتقوليلهاش خطيبى عزمنى
(عارفاكى هبله)........قوليلها انك رايحه عزا عشان القر

وطبعا خطيبك هياخدك مطعم فخم......... (عشان ماتقوليش عليه بخيل).
وماتقلقيش كله هيطلع عليكى بعد الجواز اللى طفحتيه بط بط .........هيطلعه على جتتك بعد الجواز صراصير صراصير

اول ما يقولك (تاكلى ايه يا حبيبتى )
وحياه ابوكى ماتفترى وتقولى _ابو بلاش كتر منه _ ونظام الشحاتين ده
لا تردى وتقولى (اللى تاكل منه انا موافقه عليه)........ان شالله يطلب فول سودانى اوعى تغيرى كلمتك

اكيد هيعمل نفسه جاى من فرنسا ويقول (انا هاخد فاتح شهيه الاول )
معلش استحملى انا عارفه والله ان شهيتك مفتوحه خلقه..........بس معلش استحملى

الجرسون هينزل فاتح للشهيه ........نقول مثلا (سمك مدخن )
وحياتى عندك يا شيخه اوعى تجرسينا وتقوليله (انت طالب فسيخ).....ماسموش فسيخ يا حاجه دا اسمه (سيمون فيميه)
اتعلموها بقى
تمسكى الشوكه ف ايدك الشمال والسكينه ف ايدك اليمين وتقطعى حتتين وتاكليهم .......افتكرى حتتين وبس.......... وتاكليهم وانتى قافله بقك
وتقوليله: (خلاص كده يا بيبى تقريبا كده شهيتى اتفتحت) هههههههههههه


هينزل طبق الشوربه: مهما كانت سخنه ( رجاء خاص) بلاش النفخ فيها والتفتفه والحاجات دى ..........انتى مش بتتعشى مع ام محروس جارتكو
كل اللى تعمليه انك تمسكى المعلقه بكل هدوء .........وبكل الاطه وشموخ تجيبى شويه شوربه.......وتشربيهم بهدوء يعنى من غير
(فففففففففف) ..واذاعه الشرق الاوسط دى


اه........جه الطبق اللى خايفه منه ........الطبق اللى مش هتقدرى تصمدى قدامه
(الجمبرى الجامبو )
بصى بقى وطرطقيلى ودانك كويس قوى ........الصنف دا اول ما ينزل عالترابيزه يا ريت تبصيله بقرف كأنك _قال يعنى _
زهقانه منه............(معلش معلش انا عارفه والله ان الموضوع صعب ..........بس حاولى )

وتقولى (ياااااه.........كل يوم جامبو ....كل يوم جامبو .........زهقت منه اصلنا يا حبيبى كل يوم بنعمله )
وتكلى اتنين بس

وبعدين تمسكى المنديل اللى عالترابيزه ..........وبكل رقه تمسحى بيه شفايفك بلطف وتقوليله
بعد ازنك يا حبيبى اروح التويليت (الحمام يعنى ) اصلح مكياجى .........(اصله اتكسر )ههههههههههه


وف الحمام بقى يا حبيبتى ......تطلعى من شنطتك سندوتشات الفول والطعميه اللى مدياهملك الست الواده


وبالهنا والشفا ...........اهىء اهىء اهىء

صوما مقبولا ................وافطارا بلوجريا.......(ساقيه الصاوى)

ازيكو يا جماعه................. امبارح كان يوم جميل جدا جدا .................لانه كان ممكن يكون ليله القدر ............لكنه كان مميز ليا انا شخصيا

عشان عمرى ماحضرت اجتماع للمدونين قبل كده ........لكن الحمد لله جاتلى الفرصه امبارح لحضور افطار جماعى ف (ساقيه عبد المنعم الصاوى )..........مع بعض المدونين المحترمين والمتميزين ايضا...........

واللى كان نفسى اشوفهم من زمان قوى ..........وكنت بتمنى كل المدونين يحضروا عشان اشوفهم ........

بس ملحوقه ربنا يجمعنا على خيير ف مرات تانيه ان شاء الله

عارفين يا جماعه حاجه حلوه قوى لما تعرف مدونه شخص معين وتعجب بأفكاره واراءه
وفجأه تجيلك الفرصه انك تشوفه وجها لوجه _ولا بتوع السيما والله_ههههههههه

بصراحه كنت فرحانه جدا وعايزه اتكلم معاهم واتصور معاهم وفخوره انى منهم ...........لانى بصراحه باعتبرهم

(صفوه المجتمع)

ومن الناس اللى اتشرفت بمعرفتهم

الرجال:

1_ابن عمى (احمد سكر ) ههههههههه هو مش ابن عمى يا جماعه ده م العيله بس وليا الشرف طبعا هههههههه

2_احمد سووو العجوز اللى عنده 30 سنه ...........(ولا عجوز ولا حاجه دا بيشتغلنا)هههه

3_خالى وخال الكل (احمد الصباغ) 4_استاذ خالد مدونه همس الاحباب 5_ابو المدونين كلهم بابا خالد
6_استاذ احمد صاحب مدونتى امى و جوده التعليم 7_احمد بكر صاحب مدونه بيكر 8_مندهش صاحب مدونه
(رساله من تحت الماء) 9_استاذ احمد ثروت صاحب مدونه (يا مراكبى) 10_محمد مدونه الغزالى

البنات:

1_داليا مدونه قوس قزح 2_عليا حليم مدونه عندليبيات 3_منى مدونه نبضات 4_نرمين مدونه كلاكيت تانى وتانى
5_ونكى 6_مصريه متغاظه اند مفروسه 7_رودى بنوته مصريه 8_عبير مدونه بيرا 9_سمر مجدى مدونه اريج السمر 10 _وانا طبعا بنت مصريه مدونه مين فين ليه (ايوه ايوه اللى انتو فيها دلوقتى)

اعذرونى اذا كنت نسيت حد يا جماعه ..............اصل انا اساسا عندى زهايمر

وزى مانتو عارفين طبعا انه (ليس على الزهايماريين حرج ) هههههههههههه

اسيبكوا بقى مع الصور

دا بابايا مع احمد سكر

الاستاذ خالد صاحب مدونه همس الاحباب _والاب الروحى للمدونين ابو خالد_وسووووو مش عايز يتصور

دا استاذ خالد وبابا وانا وبابا ابو خالد يعنى انا بين بابا وبابا

وينكى تغنى

احمد سكر وخالد وخالو احمد الصباغ وبابا ابوخالد برضه سوو مش عايز يتصور

الاستاذ احمد ثروت صاحب مدونه يا مراكبى والسيده حرمه

وينكى على اليمين ومندهش صاحب مدونهرساله من تحت الماء على اليسار

واخيرا انا على ضفاف نيل (ساقيه الصاوى)

صوما مقبولا......................وافطارا مؤذيا

ازيكو يا جماعه ......... كل سنه وانتو طيبين

ولونها جت متأخره بس معلش بقى المهم انى قولتهالكوا وخلاص

طبعا اكيد بتصوموا ....شىء طبيعى يعنى ...ولا زى كل سنه ...اه شكلكوا زى كل سنه .......لا لا لا كده مينفعش خلاص احنا كبرنا بقى ....وكل واحد فيكو شنبه خط ف وشه خلاص ....نصوم بقى عدل لغايه الظهر .....

اااصدى لغايه المغرب .........زيى كده يعنى ..........

مش معقول كده يا جماعه ....اتعلموا منى شويه...

وطبعا لما تيجو تفطروا بتفطروا على كبايه بلح او عصير او ميه .......واكيد الكرنبه التختوخه اللى هناك دا بيدفس على طول

لسه هيقعد يشرب حاجه............الميه والبلح والكلام ده بتاع الفرافير اللى زيكو

المهم فيه موقف كنت عايزه احكيهولكوا حصل قدامى من يومين ............كنا معزومين عالفطار عند خالتشى

والمغرب اذن علينا واحنا بنركن العربيه ف (الباركينج) اه....سورى يا جماعه.....اكيد فيه ناس فيكوا صايمين

ومحتاجين ترجمه..........اصدى واحنا بنركن العربيه ف (الفسحه)...اللى قدام بيتها

كان فيه عربيه تانيه راكنه فيها (بنتين وولدين) والاربعه من النوع ال (لامؤاخذه).............

اكيد انتو اتعرفتوا منى قبل كده عالنوع دا من بوست (شباب لامؤاخذه)........وعالعموم مش مهم اشرحلكو تانى

تعريف الشاب اللامؤاخذه : هوالشاب الذى يطلق على نفسه لقب (الروش)...يتفوه ببعض العبارات الغريبه

مثل (بيس يا مان - اشطه- الش -فكك -احلق ).......يرتدى حظاظه فى يده ...مع تسقيط البنطلون الى ركبته

بحيث تظهر للعامه ملابسه الداخليه اذا انحنى _ والانحناء غالبا يكون متعمدا_......لديه مبدأين ف الحياه فقط لاغير

وهما (عمرو دياب هو الكينج يامان -او تامر حسنى هو الكينج يا مان ).....واخيرا وليس اخرا اول ما تشوفوا تحس انك

عايز تهرش او تاخد دش

تعريف البنت اللامؤاخذه : هى من تطلق على نفسها لقب (الجامده) ........ويطلق عليها الشباب لقب (المزه)

ترتدى البديهات العريانه ....والبناطيل الزماره (اى الضيقه من فوق ومن تحت ) وياحبذا لو كانت عجله

وتلبس ايشارب عجيب الشكل وتقول انها محجبه

هذا هو تعريف الشباب من النوع ال (لامؤاخذه)

نكمل البوست بقى ........وفجأه اول ما أذن المغرب لقيت الاربعه دول (البنتين والولدين)على طول كل واحد طلع سيجاره عشان يشربها ..........ايه فيه ايه ........عادى يا جماعه صايمين وخرمانين ف نفس الوقت ايه المشكله

هههههههههههه

بصراحه ونعم الفطار طب احنا لما بنيجى نفطر بنقول دعاء (اللهم لك صمت وعلى رزقك افطرت )

بالله عليك يا شيخ دول يقولوا ايه اكيد دعاءهم مختلف ..تلاقيهم بيقولوا (اللهم لك صمت وبالدخان اتكيفت )

اذا كانوا بيعتبروا دا صيام يعنى

المشكله ان الناس فاهمه رمضان امتناع عن الاكل وبس ...........والسجاير كمان هههههههه

ولون والله فيه واحد عامل شيخ وهو لا شيخ ولا حاجه طلع فجاه كده وقال ان السجاير لا تفطر فى نهار رمضان

وجه ف برنامج وقال يعنى سيجاره او اتنين ميهمش ............اكيد عارفينه (جمال البنا ) صاحب الافكار الطئه ااااصدى الفذه

طب بالله عليكو الشباب والبنات اللى دينهم ضعيف زى دول لما يسمعوا الكلام دا هيعملوا ايه .....اكيد هيعملوا زى ما بيقول ..........والله وحتى لو مبيدخنوش هيدخنوا بسبب الفتوى دى

هقول ايه غير ربنا يهدى

وصوما مقبولا وافطارا مؤذيا

يا شعبى .....الحبيب.....الصبور.....المهاود

ياشعبى الحبيب الصبور المهاود

كلمه قالها صبحى ....ف عرض مسرحيه

كان عامل ديكتاتور .... ف رداء الديمقراطيه

وفرحوا الغلابه دوول .... بلفظ ديكتاتوريه

ماكنوش فاهمنها يمكن...... فاكرينها ديمقراطيه

يللا بينا نشوف الرساله.......رساله صبحى الحقيقيه


ياشعبى يا حبيبى .....يا صبور انت يا مهاود
قوللى لحد امتى ..... هتفضل ساكت وهامد
تبقى عيشتك ضنك ....وتقول ما انا اسمى حامد


صدق اللى قال فعلا ....... انك راجل مهاود


هتهاود لحد امتى .....وانت مذلول وراضى
وكل مهم تقابله........يعمل نفسه مش فاضى
ولو صرخت مره......يعمل الباشا قاضى


صدق اللى قال فعلا........ انك ساكت وراضى


سألتك...... انت مين ؟
قولت....... انا عبد المعين
سنى........ حوالى ستين
وف البطاقه.... تلاتين


عجزت بدرى اصلى ......دايما ساكت وهادى


سألتك....... انت مصرى
اكدت......... وقولت عصرى
سألت ........عن معنى عصرى
رديت
شعرى وبرفانى .......وبنطلونى وحزامى
وبنات روشه قدامى ......شور انا كده عصرى


يا خسارتك يابنى مانت.....مخك خاوى وفاضى


سألت ...........عيشتك خنيقه؟
قولت.............منا م الدويقه
راحو حبايبى..... ف دقيقه
ومعاهم..........ايام بريئه


الرحمه عليكو يا ولادى ..............وانا لسه ساكت وراضى


عرفت صبحى مين ؟
وعرفت انت مين ؟
والله هو المعين

صبحى قالها كلمه
خدها منه حكمه

عايز منه ايه ......مدام انت ساكت وراضى
لازم تقوله يا بيه.....وتطاطى عالاراضى

( تاج ) مش عايزه مواساه ولا عياط ...........ف التعليقات

اعذرونى يا جماعه على فتره غيابى .........بس اعمل ايه ليا اسبابى ..متستعجلوش هتعرفوها
من خلال هذا التاج المميز ............ عارفين مميز ليه ...لان محدش بعتهولى .......دا تاج من جوايا
تاج انا بهديه لنفسى ..........يللا نبدأ التاج ؟ ماشى يللا نبدأ التاج


اولا:اذكر عشر اشياء عن نفسك

1_الاسم :مازلت (انجى البوهى )
2_السن:مازلت فى ريعان شبابى (25 سنه)
3_المكان:مع اهلى وعيلتى اللى عمرهم ما هيجرحونى ابدا مهما حصل

4_فاكرين يا جماعه لما قولتلكوا ف تاجى الاولانى انى مؤمنه جدا بقول الله تعالى (وعسى ان تكرهوا شيئا وهو خير لكم ).................سبحان الله.........ربنا اراد يختبر صدقى يا جماعه ........اذا كنت مؤمنه فعلا بقوله هذا ولا لأ
لقد انفصلت عن زوجى ...........والى الابد............
وسبحان الله اشعر(بالرضا) لأبعد الحدود .........والله يا جماعه احساس داخلى كده بيقوللى خير خير خير
فعلا صدق الله العظيم

5_انا عمرى ما ندمت على اى حاجه عملتها ف حياتى ......وعمرى ما هندم لانى عارفه ان ربنا معايا ف كل كبيره وصغيره

6_لو فيه تجربه سيئه _او تبدو سيئه_مرييت بيها .......عمرها ما هتكسرنى بالعكس هتقوينى ............
هقوم بعدها واقف تانى وانفض هدومى واكمل مشوارى اللى انت مقدرهولى يا رب واللى انا متأكده مليون %...ان هو اللى فيه الخير

7_عمرى ما جرحت حد ف حياتى وعمرى ما كنت اتصور ان اقرب واحد ليا يجرحنى _او بمعنى اصح اللى كنت فكراه اقرب واحد ليا _واكتشفت انه ابعد واحد عنى ههههههههههههه مالوش عزيز يعنى

8_ربنا يخليلى اهلى اللى وقفوا معايا ف المحنه دى .......هههههههه ولونى بعتبرها (منحه) مش (محنه)
منحه من ربنا عشان اتعلم....... وابقى اقوى م الاول .......واعرف معادن الناس .....ومتغرش بالمظاهر

9_لو حد فيكوا يا جماعه حس انه اتظلم ف يوم ........احسن جمله ممكن يقولها هى (حسبى الله ونعم الوكيل )
بس وتسيب كل حاجه على ربنا بعد كده .............واذا استعنتم فاستعينوا بالله
وانا بستعين بيك يا رب وبقول (حسبى الله ونعم الوكيل ف اللى ظلمونى )

10_اخدتوا بالكوا م العنوان يا جماعه ههههههههههههه................مش عايزه ندب والنبى
مش ميتم هو ..........ومش عايزه مواساه والكلام الاهبل ده زى (معلش _وياعين امك _وياهمى _وياكبدى )
والكلام ده ............انا زى الفل اهه لا انا ناقصه ايد ولا ناقصه رجل ولا حتى مناخير
هتندبوا على ايه (الحمد لله)
ولا عايزه استفسارات ............احنا قولنا ايه لو استفسرتوا هنفتح مجال للنميمه .........وكده ربنا مش هياخدللى حقى
عشان كده نكتفى (بحسبى الله ونعم الوكيل) وبس
يعنى علقوا على اى حاجه تانيه ان شالله على مسلسل ( نور) ههههههههه


يا ريت يا جماعه تتعلموا من تجربتى دى ........دا حبيبى رسول الله قال (لو اتطلعتم على الغيب لخترتم الواقع)
والله ما حد عارف الخير فين ............خليها على الله........
اه صحيح..... كل سنه وانتو طيبين



امضاء :بنت مصريه .........لسه م البلوجريه

اغنيه (انا م البلد دى ) المعدله لسنه.........2008

انا م البلد دى انا م البلد دى انا م البلد دى انا م البلد دى
مات فيها ابوووويا........ وجد جدى
مات فيها ابوووويا ....... وولادى بعدى


دا انا م البلد دى وانا م البلد دى


انا م البلد دى بلد البلااااء.... بلد الخداع دى بلد الرياااء
الشغل فيها بدون عطاااء.... دا اذا اتوجد...اصلا يا ولدى

انا م البلد دى انا م البلد دى انا م البلد دى انا م البلد دى
عاطل يا ابووويا .........ولاشىء بيدى
عاطل يا اخووويا........ واسطه ما عندى


دانا م البلد دى وانا م البلد دى


انا م البلد دى بلد المساجد... بلد الكنايس بلد المعابد
ورغم ده وده فيه فتنه عادى ...دى ناس بتزرع الحقد ضدى

انا م البلد دى انا م البلد دى انا م البلد دى انا م البلد دى
بلد ابووويا ....والحج حمدى
بلد اخووويا ....والقس رشدى


دا انا م البلد دى وانا م البلد دى


انا م البلد دى مصر الجميله..... خلوا المسافه بيننا طويله
مصر اللى ليها اهداف نبيله..... خسروها كل ما الزمن يعدى

انا م البلد دى انا م البلد دى انا م البلد دى انا م البلد دى
بلدى بعوووها.... وأهين يا بلدى
بلدى هانوها..... صبرك يا بلدى

دا انا م البلد دى وانا م البلد دى


انا م البلد دى بلد الكلام .....هقول وهعمل كله كلام
قدامى لسه ميت سنه قدااام ......عقبال ما احقق ربع اللى عندى

انا م البلد دى انا م البلد دى انا م البلد دى انا م البلد دى
بقى كل شاااب ....لابسلى وردى
يحيى الشبااااب.... ضيعى يا بلدى


م انا م البلد دى وانا م البلد دى


انا م البلد دى مصر اللى نيلها..... مليان زباله ماافيش ماثيلها
كل اللى شربوا من ميه نيلها..... جالهم بلاوى ..ومستخبى

انا م البلد دى انا م البلد دى انا م البلد دى انا م البلد دى
اشرب يا اخووويا.... دا نيلها عندى
اشرب يا ابووويا.... بلاويه ف كبدى


دانا م البلد دى وانا م البلد دى


انا م البلد دى بلد العماره..... عز الدخيله جالنا خساره
دا حديد عز غلوا الحجاره ...وقابلنى لو جبت ..شقه يا ولدى

انا م البلد دى انا م البلد دى انا م البلد دى انا م البلد دى
ادونى حقى ....من ارض بلدى
ادونى حقى ....دا انا م البلد دى


دا انا م البلد دى وانا م البلد دى


انا م البلد دى بلد المفارق.... بلد المعارض .بلد المنافق
والامر جبرى والكل صابر.... والرأى فيها.. دا رأى فردى

انا م البلد دى انا م البلد دى انا م البلد دى انا م البلد دى
مات فيها ابووويا.... واتذل جدى
مات فيها اخووويا.... وانت اللى بعدى


دا انا م البلد دى وانا م البلد دى


انا م البلد دى بلد البجاحه..... بلد المياصه بلد اللكاعه
شباب وبنات فى كل ساحه .....يعملوا اييه..يمشوها عرفى

انا م البلد دى انا م البلد دى انا م البلد دى انا م البلد دى
أهين يا ابووويا.... عمرى بيجرى
أهين يا اخووويا ....عجزت بدرى


دانا م البلد دى وانا م البلد دى